Jeowa beɗea ɓoosia Samuelmaa

Sacerdote mechia nii Elí abadau warr ome unibasii: Hofní mauɗe Finehás. Ãchi sacerdote basiɗau mauɗe tabernaculoɗe traja nureabachii. Maka ɓumina, ãchia Jeowaba jaraburuu ũriɗakabachii mauɗe ẽbẽrarãmaa kachirua ãrĩã asebachiɗau. Israelitarãba Jeowa baita ãnimara baaɗe odoebachiɗauɗe, Hofní Finehás omeeba chi kiuru biʼia ɓuudu ãchi baita adaubachiɗau. Eliba kuitaa nibasii chi warrarã jãka kachirua ase niɗau, maka ɓumina akawa jarawẽe baɗa ãchimaa. ¿Jeowaba mau waaburu idaarabi ɓoosaaka?

Hofní Finehás baara aude dawara nureasiɗau Samuel kãyabãra, mauɗe ichi ãchi kĩraka kachirua aseka basii. Mauɗéburu, Jeowa kĩrajʉʉ nibasia ichi kakua. Ẽsebuɗaa Samuel kãi nuɓuuɗe, ũriɗa baɗa ichi iubudau. Ichi piradrupeɗa, piraɗa baɗa Elí ɓuumaa maabae ichimaa naka asia: “Mʉ nama ɓuma”. Mauɗe Eliba naka asii: “Mʉa bichi iubasma. Waya kãi noɓooɗe wãba”. Samuel waya kãi noɓooɗe wãsii. Maabae waya araɓau pasasii. Samuelba õbea ɓesɗe ichi iuduu ũrisiiɗe, Eliba kawasii Jeowaburu Samuel iu ɓoosii. Eliba Samuelmaa jarasii waya ichi iubudaubʉrã, ichia naka jarayua: “Jeowa, mʉʉmaa jaraba. Mʉa ũrimaa ɓuma”.

Samuel ichi waya kãi noɓooɗe wãpeɗa maabae ũrisii ichimaa naka jaraaruu: “Samuel, Samuel”. Ichia naka panausii: “Jeowa, mʉʉmaa jaraba. Mʉa ũrimaa ɓuma”. Jeowaba ichimaa naka asii: “Elimaa jarase mʉa ichi mauɗe ichi deɗabenarã kastikakuarua. Ichia kuitaa niiɗe ichi warrarã kachirua ase duanuu mʉ tabernaculoɗe, maka ɓumina, ichia akawa iadaawẽe”. Mau norema dapeɗeeɗa, Samuelba poroa tabernaculoɗe ewakuasia, ara jari noremaacha ase nibabachii kĩraka. Ichi ãrĩã pera nibasii sacerdote mechia niimaa jarai baita chi Jeowaba jaraɗa baɗa. Maka ɓumina, Eliba ichi iupeɗa naka wiɗisii: “Samuel, ¿kãare jarasaa Jeowaba bichimaa?”. Mauɗéburu Samuelba joma nebʉrʉ ɓoosii.

Samuel waripeɗa, mauɗe Jeowa ichi ome amiko nibasia. Joma israelitarãba kuitaa duanasii Jeowaba Samuel jʉrʉɗa baɗa ichiɗebena beɗea nibabarii bapeɗa mauɗe juez bayua.