Jeowaba Sansón chaarea nibabisii

Israelita ãrĩãrãba mauchaburu imagen kʉ̃riakuasiɗau. Jãuɗéburu Jeowaba idaarabiaɗa baɗa chi filisteorãba israelitarã gobernai baita. Maka ɓumina, chi nuree israelitarãba Jeowa kʉ̃ria nibasiɗau, jari Manoahba kĩra. Ichi mauɗe chi wẽra ome warr wãʼãe nibasiɗau. Día aɓa ɓuuɗe, Jeowaba ángel bʉeɗa baɗa naka jarabiyua Manóah wẽramaa: “Warr aɓa adauyua ichia chi israelitarã filisteorã juaɗebena karebakuayua. Ichi nazareo bayua”. ¿Kuitaa ɓuẽ kairã basii nazareorã? Ãchi Jeowa baita biʼia ãrĩã trajabadaurã basia mauɗéburu buɗa tʉʉkabachiɗau.

Maaɗakare, Manóah warr naceɗa baɗa mauɗe Sansón trʉ̃apeɗaaɗa. Ichi warisiiɗe, Jeowaba chaarea nibabiɗa basia. ¡Imama ichi juaburu beai ɓoosii! Ɓes aɓa ɓoosiiɗe, ichia 30 filisteo beakuaɗa baɗa junebenaba aiɗaɗawẽeɗe. Mauɗéburu chi filisteorãba ichi kĩramaabachiɗau mauɗe saka beayu kawa kʉ̃ria nureasii. Puuru aɓa koɓoosii, Gaza abadau, mama Sansón ẽsabuɗe du aɓa kãi noɓooɗa baɗa. Chi kĩramaa nureerã esperaɗe wãuripeɗaaɗa chi poroa puuruɗe norema beataɗayua. Ẽsabuɗe, Sansón piradrupeɗa, chi o puuruɗaa wãbariiɗaa wãɗa maabae puuru aɗu jʉ̃ka kuɓuuɗebena poroa ẽekuaɗa baɗa. Ichia epeɗe ʉ̃rʉ eaɗaa jira adoesii Hebrón kaita.

Maaɗakare, chi filisteorã Dalila ome beɗeaɗe wãuripeɗaaɗa, mau Sansón novia basii, maabae naka asiɗau: “Chi nejarra aribia paaɗayua bichia kawaaruubʉrã Sansón sakayua chaarea ãrĩã nii. Daiba ichi jidauɗapeɗa carcelɗe eɗa jʉ̃aɗa kʉ̃ria panuuɗeeba”. Dalilaba mau chi nejarra adau kʉ̃ria koɓoosii, mauɗéburu ijãaɗa baɗa. Naeɗeeɗara, Sansonba jara kʉ̃riawẽe basii samabena adaubarii ichi chaarea nibai baita. Maka ɓumina, ichia apii wiɗi ɓeesiiɗeeba Sansonba choroawẽe basii maabae jarasii ichi chõpea ɓooɗa baɗa. Dalilamaa naka jarasii: “Akawa mʉ buɗa tʉʉkau mʉ nazareo niiɗeeba. Mʉ buɗa tʉʉtabirã, maabera mʉ chaarea nibaɗa mauba choroabai ɓuu”. Kachirua ãrĩã ɓooɗa baɗa Sansonba Dalilamaa jãu jarasiiɗeeba, ¿bichi baita maka ɓuka?

Ara mauɗe, Dalilaba naka jaraɗe wãsii chi filisteorãmaa: “¡Mʉa jãabaera kuitaasii ichi sakayua chaarea nii!”. Mauɗéburu ichia Sansón kãi nuɓuɗa baɗa ichi õdarr ʉ̃rʉ maabae ẽbẽra iuɗa baɗa chi buɗa tʉʉtabiyua. Maabae Dalila naka ɓiaɗa baɗa: “¡Sansón, chi filisteorã nama bara ɓuu!”. Ichi ʉ̃rʉmasia mauɗe kawaɗa ichi chaarea nibaɗa jãabera poyaabai ɓuu. Chi filisteorãba ichi jidauɗapeɗa, dau pãriubiɗapeɗa maabae carcelɗe jʉ̃apeɗaaɗa.

Día aɓa ɓuuɗe, filisteorã ãrĩã chibʉrʉsiɗau ãchi dios chi trʉ̃ Dagón deɗe. Maabae naka ɓiasiɗau: “Dai diosba Sansón dai juamaa deasii. Awara adauɗapeɗa enésturu Sansonba dai arawarrea ʉibiai baita”. Ichi ɓari nuɓusiɗau de wãto ome kuɓuu tãeɗe, maabae ichiɗi atua jara uru kopaneesii. Sansonba mechia jarasii: “Jeowa, muchuburia, mʉ chaareabis naeɗebena kĩra”. Maucha ichi buɗa cheɗa basia, mauɗeeba chi de wãto baɗa juaɗeeba mechia kaatuɗa baɗa. Chi de kore wãsiiba aria duanaɗa joma biusiɗau. Sansón siɗa biusii.