ẼBẼRARÃMAA JARADEABA
LECCIÓN 11
Beɗea ẽbẽraba entendei ɓuuɗeburu beɗeaba
Bibliaba naka jara ɓuu: “Machiba ũribadau beɗeaɗe berreaɗawẽebʉrã, ẽbẽrarãba ¿saka kuitaaɗaima machiba jara panuma?” (1 Cor. 14:9).
Chi Jesusba aseɗa
1. VIDEO ochias maebʉrã Mateo 6:25-27 leas. Maabea nauɗe kʉ̃risiaba:
¿Kãareɗebena Jesusba jarasaa jaradeayua Jeowaba dachi cuida niiɗebena?
Bariara Jesusba ibanaɗebena kuitaa ãrĩã nibasmina, ¿sakayua ichia ɓiɗĩikaburu jaraɗaba jãarã ʉ̃rʉbena, mauɗe sakayua biʼia ɓoosaa jãka jarai baita?
¿Kãare kawa panaa Jesusba aseɗa?
2. Chi beɗea ẽbẽraba entendei ɓuuɗeburu beɗeabudaubʉrã, ichi boroɗe ɓeeyua dachia jaradea panuuɗebena mauɗe ichi corazonmaa neeyua.
Jesusba aseɗa kĩra aseba
3. Ãrĩã beɗearã́ba. Jaradearã́ba chi kawamaa ɓuumaa joma bichia kuitaa niiɗebena. Bari, chi leccionɗe kuɓúturu jaradeaba. Bichia chi kawamaa ɓuumaa wiɗiburuuɗe, kĩrukaraarã́ba, bari ida panaubiba. Chi kawamaa ɓuuba adua niibʉrã saka panauyu maebʉrã ichia diwara jaraaruubʉrã chi Bibliaɗeebiɗa, aude wiɗiba kʉ̃risiabii baita maabea ichiaburu chi ariɗe ɓuu jarayua. Chi kawamaa ɓuuba kawasiibʉrã bichia jaradeamaa ɓuu, ara mawãare kuɓuu jaradeaba.
4. Beɗeaba chi kawamaa ɓuumaa ichia kuitaa kuɓuu ʉ̃rʉbena kawayua ichia adua ɓuuɗebena. Ichimaa kawabiiruubʉrã chi lección jara ɓuu biupeɗaaɗa baɗa waya piradruɗaiɗebena, naa ɓaʼãra beɗeai ɓuu chi kawamaa ɓuu ome ichia kuitaa kuɓuuɗebena kãare pasabarii dachi biuɗakare.
5. Biʼia kʉ̃risiayua chi ejemplo bichia jaradearuuɗebena. Ejemplo baraa jaradeai naeɗe kʉ̃risiaba:
“¿Cha nau ejemplo fácil ɓuẽ kawai baita?”.
“¿Mʉa kawabi ɓuuba entendei ɓuẽ cha nau ejemplo?”.
“¿Mʉa kawabi ɓuuba acordai ɓubaaka mʉa jara kʉ̃ria kuɓuuɗebena, maebʉrã cha nau ejemplodu acordai ɓubaa?”.