“Chi beɗea biarã Dachi Akõre Kobierno ʉ̃rʉbena iujãa jomauɗe kawabiɗayua”
“Chi beɗea biarã Dachi Akõre Kobierno ʉ̃rʉbena iujãa jomauɗe kawabiɗayua. Maabea chi joma miadaa barau akabayua” (MATEO 24:14).
¿Kãare jaradeasaa Jesusba? Jari jara ɓuu kĩra Evangelio Lucasɗe, Jesús “ichi puuru ɓeecha wãɗa basia mauɗe de koɓeerãɗe biɗa, jaradeɗeka wãburuu chi beɗea biarã Dachi Akõre Kobiernoɗebena” (Lucas 8:1). Nau siɗa Jesusba jarasia: “Mauɗe mʉa jarayua chi beɗea biarã Dachi Akõre Kobiernoɗebena junebena puururãmaa biɗa, mʉ mauɗeeburu bʉeɗa baɗaa” (Lucas 4:43). Naa Jesusba jaraɗa baɗa puuru ɓeecha jaradea wãyu mauɗe chi puururã ara kaita ɓeerãɗe, maaɗakare naka jaraɗa basia: “Beɗeaɗayua mʉ ʉ̃rʉbena [...] drua kaitawẽe koɓeeɗe biɗa nau iujãaɗe” (Hechos 1:8; Lucas 10:1).
Chi nabenarã cristianorãba naka asebachiɗau. Jesús baare nureabariirã ara ãchia ũrisiɗauɗe, ara naka asepeɗaaɗa basia. Hechos 5:42ɗe jara ɓuu: “Maabea noremaacha, apii bari noɓoowẽa, waaburu jaradea duanasia mauɗe chi beɗea biarã Cristo, Jesús ʉ̃rʉbena jaraɗapeɗa, chi temploɗe, decha biɗa”. Cha nau trajo aɓa nii baitaburuwẽebasia, jomaurã baita basia. Mukĩra kuitaa ãrĩã niiba, August Neander naka jaraɗaa: “Mukĩra aɓa nii Celso abadauba, atua jarabachii chi cristianorãba jaradeaɗe wãbachiɗauɗe, ãchia zapato arregla nureaɗapeɗa, oeja kara ome trajaɗapeɗa mauɗe escuelaɗaa kawaɗe wãɗaabasiiɗeeba”. Jean Bernardiba chi libro “Los primeros siglos de la Iglesia” ɓʉɗaa, cha nau libroɗe cristianorã ʉ̃rʉbena naka jara ɓoosii: “Ãchia kawabiaɗayu joma ẽbẽrarãmaa nau iujãa jomauɗe. Oɗe, puuruɗe, ẽbẽra ãrĩã unubadaumare mauɗe decha biɗa. Ãchia jaradeaɗe wãɗayua biʼiwẽe kopanumina”. Ichia jara ɓuu kĩra, ãchia jaradeaɗayua “nau iujãa jomauɗe”.
¿Iɗibea kairãba ara jãka asebadau? Chi líder David Watson Iglesia anglicanaɗebenaba naka kʉ̃risiabarii: “Chi iglesiaɗebenarãba jaradeaɗe wãɗakau mauɗe iglesia eɗare biɗa biʼia jaradeaɗakau baerã, chi ẽbẽraba akawa waaburu kawa kʉ̃riaɗawẽa”. José Luis Pérez Guadalupeba ichi libroɗe jara ɓuu chi evangelicorã, adventistarã mauɗe junebenarã biɗa jaradeaɗakau, chi decha jaradea nureerã maarã Jeowa ɗebena Jaranũrẽrãburu.
Chi ɓʉbarii Jonathan Turley, ichia jarasii: “Chi ẽbẽrarãba kʉ̃risiabadauɗe Jeowa ɗebena Jaranũrẽrãɗe, ãchia decha jaradeaɗe wãuribudauɗe ara kapichia ẽbẽrarãba ũri kʉ̃riaɗawẽe. Ãchirãba jaradeaɗakau waarãmaa kawabiaibaitaburu, bari ãchia ara maka asebadau ãchi feɗeeba” (Cato Supreme Court Review, 2001-2002).
[Ochias chi recuadro página 9ɗebena]
¿Ɓʉa kuitaa ɓuẽ kaiba jãka asebadau?
Cha nau kartaɗe jara ɓuu chi cristiano ariɗe nureerã saka nibaɗayua Bibliaba jara ɓuu kĩraka. ¿Kuitaa ɓoosee kairãba? Iɗibea ãrĩãrãba cristiano ariɗe nuree jarabadau. Maka ɓumina Jesusba naka jara ɓoosii ichi kaaɗe ãda nureerãmaa: “Jomaurãba mʉʉmaa ‘Señor, Señorʼ a nureerã joma neeɗaabayua chi Kobierno ʉtʉ bajãaɗebenaɗaa. Bari neebudau chi Akõre bajãaɗe ɓuuba jaraburuu asebadaurãdu” (Mateo 7:21). Makarã Dachi Akõre Kobierno neei naeɗe, dachia kuitaa baraaɗai kairãba cristiano ariɗe nuree mauɗe ãchi kĩraka nureaɗayua, naka aseɗarã kĩrajʉʉ nureaɗayua. ¿Bichia maucha kawa kʉ̃ria ɓuẽ Dachi Akõre Kobiernoɗebena? Mauɗe, ¿saka mau Kobiernoɗeeba nau iujãa mipitaa ɓooyu? (Lucas 4:43). Mauɗeeba beɗeachãu cha nau karta deasiɗau ome: chi Jeowa ɗebena Jaranũrẽ.