Dachi Akõre Beɗeaba jaraɗea ɓuu
¿Kãare pasaiba mau chi Día Juicioɗebenaɗe?
Nau articuloba aiɗa ɓua ara bichia unui baita chi Bibliaba jara kuɓuu chi bichia naeɗe kʉ̃risiaɗa baɗa. Bichia kʉ̃ria ɓuubʉrã, Jeowa ɗebena Jaranũrẽrãba bichimaa kawabiɗai ɓuu nauɗebena.
1. ¿Kãareba mau chi Día Juicioɗebena?
Chi imagen jua biareɗe kuɓuu unubi ɓuu chi ẽbẽrarãba kʉ̃risia panuuɗebena chi pasaburuu Día Juicioɗebenaɗe. Ãchia kʉ̃risia panuu ẽbẽrarã ãrĩã biupeɗaaɗarã ʉtʉ bajãaɗaa wãɗapeɗa ãbua chibʉrʉ duanuu, Dachi Ãkõre ãkau kĩrapeta ãchi juzgaɗayua chi ãchia asepeɗaaɗaɗeeba: chi nuree ʉtʉ bajãaɗe duaneeɗai baita ganaɗayua, mauɗe waabenarã kastikaɗayua infiernoɗaa bʉekaburuuba. Maka ɓumina, Bibliabara jara ɓuu Día Juicioɗebenaɗe joma nau iujãaɗe miadaa ase bara ɓuu acabakuayua (Salmo 96:13). Jesusdu Dachi Akõreba jʉrʉɗa baɗa Juez bayua, ichia ẽbẽrarã jomaurã jipa nureabiyua (Leas Isaías 11:1-5; mauɗe Hechos 17:31).
2. ¿Chi Día Juicioɗebenaɗe saka jipa duanabiɗayu?
Chi nabena mukĩra, Adán, ichia Dachi Akõre Jeowa beɗea ũri kʉ̃riabaɗa, mauɗeeburu, joma ichiɗebena neebadaurãba pekao aseɗapeɗa, sufriɗapeɗa mauɗe biu duanua (Romanos 5:12). Mau joma acababipeɗa jipaburu duanabii baita, Jesusba ẽbẽrarã ãrĩãrã biuɗapeɗaaɗarã waya piradrubikuarua. Chi libro Bibliaɗebena Apocalipsisɗe, jara kuɓuu mau joma pasai Jesucristoba gobernaburuuɗe mil añoɗe (Leas Apocalipsis 20:4, 11, 12).
Chi piradrubudaurã ãchi juzgaɗayua, chi ãchia biuɗai naeɗe asepeɗaaɗaɗeeba juzgaɗaabai, bari chi ãchia asebudauɗeeburu kartarã ewapeɗaaɗakare, ara jari capítulo 20 Apocalipsisɗebenaɗe jara kuɓuu kĩra (Romanos 6:7). Apóstol Pabloba jaraɗa baɗa “chi jipa nuree mauɗe chi jipawãe nuree” biupeɗaaɗa ʉ̃rʉbena, ãchi waya chokae nureaɗai mauɗe kawaɗai panuu Dachi Akõre ʉ̃rʉbena (Leas Hechos 24:15).
3. ¿Kãare maucha pasaiba Día Juicioɗebenaɗe?
Chi ẽbẽrarã Jeowa beɗea ũriɗawẽa biupeɗaaɗarã, ãchia kawaɗapeɗa mauɗe aseɗai panuu chi ichia jara kuɓuuɗebena. Maka aseeduubʉrã, ãchi piradrubudau “viviɗayua”. Maka ɓumina, chi Dachi Akõre beɗea ũri kʉ̃riaɗawẽerã maarã “piradrubudau ãchi kastikakuayua” (Leas Juan 5:28, 29 mauɗe Isaías 26:10; 65:20).
Chi Día Juicioɗebena mil año demorai ɓuu, mau acabaɗakare, Jeowaba joma ẽbẽrarã waya biʼia jipa nureabiyu (1 Corintios 15:24-28). ¡Chi biʼia ãrĩã nureabiyu ãchia ũribudau kakua! Chi Diablo, mil añoɗe jʉ̃a noɓooɗa baɗa choɓeaɗe, maabeaburu Dachi Akõreba ena ɓeei chi mauba kũruakuaɗe wãi. Satanasba berekayua ẽbẽrarã chi Jeowa jʉ̃kaabena ãyaa bʉekaɗayua, chi mau ijãaduuwẽerã ãchi biuɗawẽa panaɗayua nau iujãaɗe (Leas Isaías 25:8 mauɗe Apocalipsis 20:7-9).
4. ¿Chi sãu junebena día juicioɗebenaba biʼia eneeyu ẽbẽrarã baita?
Bibliaba junebena día juicioɗebena jara kuɓua. Jãuɗe chi joma miadaa bara ɓuu nau iujãaɗe akabakuaburua. Jãu día kawawẽeɗe neerua, ara jari Noé diaɗe kue ãrĩã chee ɓoosii kĩra, mau diaɗe joma miadaa nureerã biupeɗaaɗa baɗa. Chi ẽbẽrarã miadaa nureerã kenabudauɗe jãabera ẽbẽrarã biʼia nureedu nau iujãaɗe duanaɗayua “mama jomaurãba jipa wau nureaɗai” (Leas 2 Pedro 3:6, 7, 13, Biblia Chamí WPS.).