¿Chi Jeowa ɗebena Jaranũrẽrã ɓubaaka wẽrarã ministra abadau?

Maerã, ãrĩã baraa iujãa jomauɗe. Ãchia beɗea bia Dachi Akõre Kobiernoɗebena jaradeɗekabadau, ara jari Salmo 68:11​ɗe Dachi Akõreba jara ɓuu kĩra: “Chi wẽrarãba chi beɗea kĩrawãrea jara nureerã ejército choroma kĩra nurea”.

Madu, chi wẽrarã Jeowa ɗebena Jaranũrẽrãba aseɗakaa jari junebena religionaba ase nuree kĩraka. ¿Sakayua diwara nurea?

Chi wẽrarã pastora abadau junebena iglesiaɗebenarã lidereza nurea ãchi religionɗe, ãchia ʉtʉwaareeba kawabiabadau chi iglesiaɗaa neebadaurãmaaburu. Maka ɓumina chi wẽrarã Jeowa ɗebena Jaranũrẽrãba congregación awaraburu jaradeɗekaɗe wãuribadaa, barikiauɗe biɗa unuuduumaa.

Chi pastorarã iglesiaɗebenarãba jara nurea joma chi congregacionɗeburu. Mau kãyabãra, chi wẽrarã Jeowa ɗebena Jaranũrẽrãbara jaradeaɗakaa chi congregacionɗe mukĩrarã bautizapeɗaaɗa ara mama duanuubʉrã. Chi mukĩrarãba jaradea nuree ãchi trʉ̃ jarapeɗaaɗa nureerãburu (1 Timoteo 3:2; Santiago 3:1).

Bibliaɗe jara ɓuu kĩra, mukĩrarãburu jaradeɗeka ua panua congregacionɗebenarãmaa. Chi apóstol Pabloba junebena superintendente cristiano Tito abadaumaa naka jarasia: “Mʉʉba bichi Creta islaɗe ɓʉisii [...] ijãabadaurã nubadaurã puurucha ɓukuase”. Maabea jarasia chi superintendente “ijãabadaurã nubarii ʉ̃rʉbena nebʉra barau nii aɗayuswãe ɓuu. Wẽra aɓaburu uru ɓuai ɓuu” (Tito 1:5, 6, Biblia Chamí, WPS.). Mauɗe chi apóstol Pabloba ara mau kĩra Timoteomaa naka jarasia: “Chi mukĩraba ãrĩã bereka ɓuubʉrã superintendente bayua, mau ariɗe ɓuu. Mauɗéburu superintendenteɗebena kachirua jaraabayua, chi wẽra aɓa nii baitabena mauɗe chi biʼia kawa nibai baita [...] mauɗe biʼia ãrĩã kawa nibayu kawabiayua” (1 Timoteo 3:1, 2).

Maka ɓumina ¿sakayua mukĩrarãburu jaradeɗeka uabadau congregacionɗe? Pabloba naka jaraɗaa: “Ãbua panuuɗe mʉʉba ida ɓukau wẽraba mukĩrarãmaa jaradea ɓuai maebʉrã mukĩra ichi juaɗe uru ɓuai. Maumaarã wẽrarãba chũpea ũri panaɗai panuu. Maka ɓuai ɓuu Dachi Akõreba Adán naa wausiiɗeeba. Mawãare Eva wausii” (1 Timoteo 2:12, 13, Biblia Chamí, WPS.). Makarã, Dachi Akõreba Adandu naa wauɗa bẽrã mauba unubi ɓua Dachi Akõreba kʉ̃ria ɓuu chi mukĩraburu jaradeɗeka ua ɓooi baita congregacionɗebenarã́.

Jeowa ɗebena Jaranũrẽba ãchi Líder Jesús kĩra ase nuree. Lucasba jara ɓuuɗeebara, Jesús “ichi puuru ɓeecha wãɗa basia mauɗe de koɓeerãɗe biɗa, jaradeɗeka wãburuu chi beɗea biarã Dachi Akõre Kobiernoɗebena”. ¿Kãare asesiɗaa ichi kaaɗe nureerãba ichia ara jãka jaradeɗekaɗe bʉikasiiɗe? “Maka wãɗapeɗa puuru ɓeecha jarabachiɗau chi beɗea bia Jesús ʉ̃rʉbena” (Lucas 8:1; 9:2-6, Biblia Chamí, WPS.).

Iɗiiɗaa biɗa, Jeowa ɗebena Jaranũrẽ iɗibeabenarã mukĩrarã wẽrarã baare kĩrajʉa jaradeɗekaɗe wãuribadau ara jari Mateo 24:14ɗe jara ɓuu kĩra. Mama aria Jesusba naka aɗa: “Chi beɗea biarã Dachi Akõre Kobierno ʉ̃rʉbena iujãa jomauɗe kawabiɗayua. Maabea chi joma miadaa barau akabayua”.