¿Sakayua biʼia ɓua chi kobierno dachi akõreɗe Jesús baita?

Jesusba ãrĩã jaradeɗekabachii “chi beɗea biarã Dachi Akõre Kobiernoɗebena” (Lucas 8:1). Ichia ãrĩã berekapeɗa, ãrĩãburu ãdabachii joma puuru Israelɗe jãu Kobierno ʉ̃rʉbena ẽbẽrarã ome beɗeayua. Maubapeɗa, chi kimare librorãba, ichia jaradeaɗa ʉ̃rʉbena jara koɓeerãɗe, mama eɗa Dachi Akõre Kobierno ʉ̃rʉbena, 100 ɓes wãyaa jara kuɓua, ara Jesusba ãrĩã jãuɗebena jaraɗa baɗa. Maka ɓumina, mama aria jãuɗebena ɓaʼãra ɓʉsiɗau siɗa, ichiara ãrĩãburu jaradeakeraabachia jãuɗebena (Juan 21:25).

¿Sakayua Dachi Akõre Kobierno ichi baita biʼia ãrĩã ɓoosaa? Dachi Akõreba ichidu jʉrʉ adauɗa baɗaɗeeba rey bayua jãu Kobiernoɗebena (Isaías 9:6; Lucas 22:28-30). Ichia kʉ̃riakabasii waabenarã aude nibayua (Mateo 11:29; Marcos 10:17, 18). Ichia Dachi Akõre Kobierno ʉ̃rʉbena jaradea kʉ̃ria ɓoosii. Ichia kuitaa ɓoosia, mauɗe ichia kuitaa nia jãu kobiernoba ẽbẽrarã chi kʉ̃ria ua kiruree kakua, ãrĩã biʼia ɓuu aseburua: ichi Akõre mauɗe chi discipulorã.a

DACHI AKÕRE KOBIERNOBA KÃARE ASEBURUA JESÚS AKÕRE KAKUA

Jesusba ichi Akõre corazonɗeeba kʉ̃ria nibabachia (Proverbios 8:30; Juan 14:31). Ãrĩã busta ɓuu ichi saka biʼia ãrĩã nii ichia kʉ̃ria nibapeɗa, kĩra chuburia nibapeɗa mauɗe jipaburu ase keraabarii (Deuteronomio 32:4; Isaías 49:15; 1 Juan 4:8). Mauɗeeba Jesusba ichi Akõre ʉ̃rʉbena setaa jarapeɗaaɗa bustawẽe akawa. Ẽbẽrarãba jara duanuuɗeeba Dachi Akõreba ochiawẽe ẽbẽrarã sufri duanuuɗe, makawẽe siɗa, ichiaburu sufribia ɓuuɗebena. Mauɗeeburu Jesusba ãrĩã berekasia jaradeɗekai baita “chi beɗea biʼia ɓee Dachi Akõre Kobiernoɗebena”: ichi Akõre ʉ̃rʉbena miadaa jarapeɗaaɗa, biawãrawẽe unubiyua Dachi Akõre Kobiernoba (Mateo 4:23; 6:9, 10). ¿Saka aseiba?

Biʼiaburu aseburua jomaurã ẽbẽrarã baita. Dachi Akõre Kobiernoɗeeba, Jeowaba ẽbẽrarã “dau ɓaa jarekuarua” joma dachi jẽabibarii. Jeowaba acabayua, “mauɗe biui baɗa waa unuɗaabai, waa nomaa duanaɗaabayua, jẽaɗawẽa, ni puʼua siɗa” (Apocalipsis 21:3, 4). Dachi Akõre Kobiernoɗeeba, ẽbẽrarã sufri duanaɗa baɗa jãmabera sufri duanaɗaabayua.b

Dachi Akõre Kobiernoba unubiaruu Jesús Akõreba kĩra chuburiapeɗa poder ãrĩã bara ɓuuɗeeba, Jesusba jãu Kobierno ʉ̃rʉbena beɗeayu ãrĩã bustabachia (Santiago 5:11). Dachi Akõre Kobiernoba Jeowa kakuaburu ne bia ɓee aseebayua. Jesusba ẽbẽrarã kʉ̃ria ua kiruree kakua biɗa aseburua: ichi discipulorã.

DACHI AKÕRE KOBIERNOBA KÃARE ASEBURUA JESÚS DISCIPULORÃ KAKUA

Iujãaɗaa neei naeɗe, Jesús ʉtare ichi Akõre baare ãrĩã ɓoobachia. Ichia ũkuru joma barau wauyua aiɗasia: chi estrella ʉtare joma bara ɓuu, dachi iujãa kĩrawãrea ɓuu mauɗe ẽbẽrarã ãnimaraɗeeɗa duanuurã siɗa (Colosenses 1:​15, 16). Jesusba ẽbẽrarãdu ãrĩã kʉ̃ria ua ɓuu joma chi Jeowaba waukaɗa baɗaɗebena (Proverbios 8:31).

Ẽbẽrarã kʉ̃ria ɓuuɗeeba jaradeɗekabachia. Naeɗeeɗa ichia jara ɓoosia ichi nama iujãaɗaa neeɗa baɗa ẽbẽrarã “ne wãʼãe nureerãmaa jaramera Dachi Akõreba ãchi karibai” (Lucas 4:18, Biblia Chamí, WPS.). Jesusba bari beɗeakabasia, mau asebachia. Ichia ẽbẽrarã ãrĩã unusiiɗe, “maarã kĩra chuburiasiiɗeeba chi ẽpermo nuree aribiabiasii” (Mateo 14:14, Biblia Chamí, WPS.). Maaɗakare, Jesusba mukĩra unusii ẽpermo ãrĩãdu nibasii mauba naka jarasia: “Bichiba kʉ̃ria ɓuubʉrã, mʉ poyaa aribiabii”. Ichia, kʉ̃riapeɗa kĩra chuburiaɗeeba, naka asia: “Maka wau kʉ̃ria ɓuu. ¡Aribiáse! Ara makʉɗe chi kakua chau nibaɗa wãʼãesii” (Lucas 5:12, 13, Biblia Chamí, WPS.). Ichia unusiiɗe chi amika María jẽa nii chi ichi ãba Lázaro biuɗa baɗa kakua, Jesús baita chuburia ãrĩã deapeɗa, nomaa koɓeepeɗa, jẽa koɓeesia (Juan 11:32-36). Ichia biʼia ɓúturu asesia: chi Lázaro biuɗa baɗa 4 día ba ɓosmina, waya piradrubisia (Juan 11:38-44).

Jesusba kuitaa ɓoosia chi bia Jesusba ẽbẽrarã aribiabikuaɗa baɗa waya ẽpermaɗayu mauɗe ichia piradrubiaɗa baɗa siɗa waya biuɗayua. Ichia biɗa kuitaa ɓoosii Dachi Akõre Kobiernoba eneeburuurã ara ɓaʼãra wãʼãe bayua, maara apii koɓeeyua. Mauɗeeburu ichia milagrodu aseebasia, bari Jesusba akawa jaradea koɓeesia chi beɗea biarã Dachi Akõre Kobiernoɗebena (Mateo 9:35). Jesusba chi milagrorã asesii ara ɓiɗĩikaburu aseɗa basia, mauɗe chi Kobierno Dachi Akõreɗe neeburuuɗe akawa audeburu aseyu baita. ¿Kãare pasayuba? Chi Bibliaba jaradea ɓua.

• 

  Jãabera chi ẽbẽrarã waya ẽpermaɗaabayua.

  “Mau diaɗe, chi dau pãriu duanaɗaɗe baɗa waya unuɗayua mauɗe chi kʉʉrʉ ũriɗakaurãɗe baɗa ũriɗayua. Mau diaɗe, chi nʉkadu tʉa nibaɗa, bii kĩra tʉa ɓooyua, bosara kẽreme kĩrajʉʉba ɓiayua”. Mauɗe “ni aɓa biɗa: ‘Mʉ ẽpermoʼ ɓuu a jaraabai” (Isaías 33:24; 35:5, 6).

• 

  Jãabera biuɗaabayua.

  “Ẽbẽrarã biarãdu nau iujãaɗe waaburu biuɗawẽa duanaɗayua” (Salmo 37:29).

  “[Dachi Akõreba] ẽbẽrarã waaburu kinibiaabayua, Jeowa Señor chi Autoridad Audeburu ira ɓua, ichia dau ɓaa poabii jomaurã kĩadarrɗebena” (Isaías 25:8).

• Chi biuɗapeɗaaɗa baɗa waya piradruɗai.

  “Jomaurã biuɗarãba mʉ […] beɗea ũriiduuɗe, mauɗe jomaurã chokae jiraduɗai” (Juan 5:28, 29, Biblia Chamí, WPS.).

  “Chi biupeɗaaɗarã waya piradrukuayua” (Hechos 24:15).

• 

  Jomaurã de bara duanaɗayua mauɗe trajo siɗa.

  “De karaaɗapeɗa mama aria duanaɗai; uva uuɗapeɗa mau ko duanaɗai. Ãchia de waabenarã duanaɗai baita aseɗaabayua mauɗe waabenarãba koɗai baita uuɗaabayua [...] chi mʉa jʉrʉ adauɗa baɗa kĩrajʉʉ ãrĩãburu nureaɗayua ãchi juaba trajapeɗaaɗaba” (Isaías 65:21, 22).

• 

  Guerra wãʼãe bayua.

  “[Dachi Akõreba] ãchi chiya pelea duanuu acababiyua joma iujãaɗe” (Salmo 46:9).

  “Puuru junebena puuru ome espadaba peleaɗaabayua waaburu kawaɗaabayua peleabudauɗebena” (Isaías 2:4).

• 

  Chiko barayua jomaurã baita.

  “Chi iujãaɗe chauburua; Dachi Akõreba dachirã bendecikuaburuu” (Salmo 67:6).

  “Nau iujãaɗe ãrĩã netaa baraa ɓoi, michia ʉtʉ modeɗe biɗa” (Salmo 72:16).

• Jomaurã ara dauchia nureaɗai.

  “Poore nureerã ida ɓuiɗaabayua” (Salmo 9:18).

  “Ichia karebayua chi poore kiruuba aiɗayu baita ɓia kuɓuu, miichuburi kiruu siɗa mauɗe chi ichi aiɗayu baita wãʼãe siɗa. Ichia kĩra chuburia bayua chi miichuburi kiruu mauɗe chi poore nii siɗa, mauɗe chi poore nureerã biuwẽa nibabiyua” (Salmo 72:12, 13).

Nau joma kawaɗakare, ¿sakayua biʼia ãrĩã ɓoosii Jesús baita chi Dachi Akõre Kobierno? Ichia Kobierno ʉ̃rʉbena ẽbẽrarãmaa beɗeabachia chi joma ichi ũri kʉ̃ria nureerã ome, ichia kuitaa ɓoosiiɗeeba dachi problema baita junebe solución wãʼãe.

¿Dachi Akõreba asei jara ɓuu busta ɓuẽ? Maka ɓuubʉrã, ¿saka waaburu kawai ɓua ichi Kobierno ʉ̃rʉbena? ¿Kãare asei ɓua chi ichia eneeburuu adauyua? Bichia kawa kʉ̃ria ɓuubʉrã, kawaba chi Bibliaba jara kuɓuu nauɗebena.