Mʉʉɗeburu ãrĩãdu kʉ̃risia ɓoosia

MɄ BIBLIA ESTUDIAI NAEƊE SAKA NIBASAA:

Chuburi nibasiiɗe Leipzig kaita nibaɗa, mau basia República Democrática Alemana, ãrĩã kaitawẽa ɓoobasii chi frontera Polonia ome, iɗibea mau República Checa. Mʉ 6 años nibasiiɗe Brasilɗaa vivi wãpeɗaaɗa baɗa mʉ akõre trajoɗeeba, maaɗakare Ecuadorɗaa.

Mʉ 14 años baɗakare, mʉ akõrerãba Alemaniaɗaa bʉipeɗaaɗa baɗa internadoɗe estudiabiɗe. Mʉ akawa du aɓa kaitawẽe ãrĩã ɓeeɗakare, joma du aɓaburu ase nibaɗa. Mʉa kʉ̃risiabachia mʉa joma ase kʉ̃riaburuu mau waabenarãba bustaɗakabachiɗau.

Mʉ akõrerã waya neesiɗau Alemaniaɗaa mʉ 17 años nibasiiɗe. Naeɗera ãchi baara vivi nibaɗa, mʉ akawa du aɓa ase kʉ̃ria nibasiiɗeeba, mʉa bustaabasii ãchia mʉʉmaa jarabachiɗau, maabea 18 años baɗakare mʉ akawa deɗabena wãɗa baɗa.

Waaburu aburri nibaɗe wãɗa baɗa mʉ vivi niiɗebena, maabea kʉ̃risia nibaɗe wãsii saka kĩrajʉʉ nibayu. Wãsii ãrĩãrã grupoɗaa mauɗe organización baraumaa, maabea mʉa kʉ̃risiasii ãda nibaɗe wãyu nau iujãa jomauɗe chi kĩrawãrea ãrĩã ɓuuɗe chi ẽbẽrarãba mau acabaɗai naeɗe.

Mʉa moto nedosii, mʉ Alemaniaɗebena wãpeɗa Africaɗaa wãsii. Maaɗakare waya neeɗa baɗa Europaɗaa chi moto dañaɗa bẽrã. Arreglabiɗakare, wãsii chi playa Portugalɗebenaɗaa. Jãma aria kʉ̃risiasiiɗe chi moto ɓuiyu maabea waa nibaɗe wãyu chi iujãa jomauɗe barcoɗeburu.

Mʉ wãsii waabena kũudrãarã baara ãchi wãɗayua océano Atlanticoɗaa. Maarã baara Laurie nibasii, ichi mʉ wẽraɗe basii. Jʉ̃kaa kãribaɗe wãsiɗau chi isla Caribeɗaa, ɓaʼãra baburuuɗe Puerto Ricoɗe kopanuuɗe, waya neesiɗau Europaɗaa. Laurie mʉ omeeba barco ɓiɗĩika ɓuu nedo kʉ̃riasiɗau, mauɗe eɗa jãma vivi nibaɗe wãɗayua. Maaɗakare õbea meses jʉrʉsiɗauɗe, maabea daiba kʉ̃risia panaɗa ida kuɓusiɗau, mʉ iusiɗau bẽrã ejército alemanɗe trajayua.

Marinaɗe 15 meses ɓoosii, jãu tiempoɗe dai kimabaraasiɗau. Mauɗeebiɗa waaburu ãda nibaɗe wãɗayu kʉ̃riasiɗaa. Ejercitoɗeeba iuɗai naeɗe lancha nedo panaɗa baɗa, maabea mʉ ejercitoɗe nibasii misa, mau velero kĩra wausiɗau. Daiba kʉ̃risiasiɗau jãma aria vivi nibaɗe wãɗayua waaburu ãda nibaɗe wãɗai baita nau iujãaɗe. Marinaɗebena saliɗakare, barco biʼia koɓeeyu naeɗe, Jeowa ɗebena Jaranũrẽrã dai ome beɗeasiɗau maabea chi Biblia estudia kopaneeɗa.

BIBLIABA MɄ SAKA NIBAƊA KAMBIASAA:

Naeɗeeɗa kʉ̃risiabachii ãrĩã́turu ɓui basii: mʉ kimabaraaɗa baɗa chi wẽra ome, maabea ida ɓuɗa baɗa cigarrillo do nibasiiɗebena (Efesios 5:5). Maaɗakare, ãda nibayu iujãa jomauɗe chi kĩrawãrea ãrĩã ɓuu Dachi Akõreba aseɗa baɗa unui baita kʉ̃risiabachii, jã́turu biʼia ãrĩã ɓoosii jãka nibayua.

Maka ɓumina chi kachirua ɓee ɓuibasii mʉʉɗebena. Juakaya ãrĩã nibapeɗa du aɓaburu ase nibayua mʉa kʉ̃riabachii, mʉa unubiayuaburu, mʉa chi biʼia ãrĩã ase niiɗebena. Mʉʉɗéburu ãrĩã́turu kʉ̃risia ɓoosii.

Ewari aɓauɗe leasiiɗe Jesusba Jaradeaɗa baɗa Ea ʉ̃rʉbenaɗe (Mateo, capitulorã 5-7ɗaa). Lea koɓeesiiɗe mʉa bustasii Jesusba jaraɗa baɗa saka kĩrajʉʉ nibayu. Ichia jarasii chi jarrbisiapeɗa mauɗe obisia nureeɗebena ãchi kĩrajʉʉ panabarii (Mateo 5:6). Maabea kʉ̃risiasii saka nibai ẽbẽra jarrbisia nibapeɗa obisia nii kĩrajʉʉ nibayua. Waaburu kawa kãribaɗe wãsiiɗe Bibliaɗebena, mʉa jãabera joma kawa koɓeesii dachia saka nesita panuu kawaɗayu Dachi Akõreɗebena, dachia jãka aseyua, naa ijãayua dachia mau nesita duanuuɗebena. Jesusba jaraɗa kĩraka: “Chi kuitaa duanuu ãchia nesita panuu kawaɗai Dachi Akõre ʉ̃rʉbena kĩrajʉʉ nurea” (Mateo 5:3).

Laurie mʉ ome Biblia estudia kopaneeɗa Alemaniaɗe, maabea wãsiɗau Franciaɗaa maaɗakare Italiaɗaa. Dai wãsiɗaumaa Jeowa ɗebena Jaranũrẽrã baraaɗaa. Mʉa chi bustasii jãarãɗebena saka ãchi chiya kʉ̃ria nuree maabea araa ãbuaburu nuree. Mʉa biawãrabenáturu kawasii vivi nuree ãba kĩrakaburu nau iujãaɗe (Juan 13:34, 35). Makaɗakare dai bautizasiɗau.

Mʉ Jeowaɗebena Jara nibabarii ɓumina, waaburu cambia kãribaɗe wãsii mʉ chi nibabariiɗebena. Laurie mʉ ome kʉ̃risiasiɗau wãɗayua chi costa Africaɗebenaɗe Atlanticoɗe chi kĩaraa Estados Unidosɗaa. Chi do choroma tãeɗe, kʉ̃risia basiiɗe mʉ wẽra ome chi barco ɓiɗĩika ɓuuɗe dai aɗu bania ãrĩã́turu kuɓuuɗe, jãma aria mʉa kawasii dai ɓiɗĩika ãrĩã duanuu dachi mechia Waukaɗa baɗaɗeebiɗa. Ewari ãrĩã́turu baara ɓoosii (chi do choromaɗera wãʼãe kãare ase nibayu), mauɗeeba mʉa chi Biblia lea ɓeesii. Chi Jesús nibaɗaɗebena leasiiba ãrĩã́turu kʉ̃risiabisii. Bariara ichi pekaowẽe nibasmina, ichi juakayawẽa nibasii. Ichia kʉ̃risiabasii ara ichi du aɓa, bari chi Akõréturu.

Kʉ̃risiaburuuɗe saka nibaɗa Jesús, mʉa kawasii poyaabasii ɓaʼãraburu trajayu chi Kobierno Dachi Akõreɗebena baita, jã́turu chi aude importante bai ɓuu mʉ baita (Mateo 6:33). Dai neesiɗauɗe chi Estados Unidosɗaa, kʉ̃risiasiɗau akawa ɓuiɗayu chi barco, bari trajaɗayua Dachi Akõre baitaburu.

KÃARE KOSA BIA UNUƊE WÃSAA:

Naeɗera, kʉ̃risiasii mʉʉɗéburu, mauɗeeba mʉa adua basii mʉa ase kʉ̃ria ɓuu biʼia ɓooi maebʉrã biʼiwẽe ɓooi. Jãabera kawasii Bibliaɗe mʉ biʼia wãi baita (Isaías 48:17, 18). Jãabera, kawasii kãare aseyu: kʉ̃riayu Dachi Akõréturu mauɗe junebena ẽbẽrarã aiɗayua ichi ʉ̃rʉbena kawayua.

Jãabera mʉ wẽra Laurie ome biʼia ãrĩã niɗaa chi consejo biʼia ɓuu Bibliaɗebenaba. Maabea, Jeowaba daimaa kau mipitaa ãrĩã nii deasii ichia biɗa kawasii ichiɗebena maabea chi kʉ̃ria.

Dai niɗauɗe biɗa problema bara nibabadaa. Maka ɓumina Jeowaba dai ɓuikaa maabea kʉ̃risiabadau ara jãma kuɓuɗaabayu bari ichiɗéburu ijãa nibaɗayu (Proverbios 3:5, 6).