BIBLIABA MɄ SAKA NIBAƊA KAMBIASAA
¿KÃARE kawaɗaba wẽra niiba universidaɗe estudia nibasii junebena religionɗe nibayu kʉ̃risiawẽe baɗa? ¿Kũudrãa católico niiba kãare kawaɗaba biubadau ʉ̃rʉbena? ¿Kãareba aiɗasaa chi kũudrãa nii kĩrajʉʉ nibaabasii Dios kaita nibayu? Leaɗaika chi ãchia jara panuu.
“Añorãɗe mʉa wiɗi ɓeeɗa ‘¿kãarea nama nurea?ʼ aɗa”(ROSALIND JOHN)
AÑO NACEƊAƊEBENA: 1963
SAMABENA: GRAN BRETAÑA
ICHI Ʉ̃RɄBENA MAUCHA JARA ƁUU: MɄ ESTUDIA KÃRI ƁOOƊA IDA ƁUSIA
MɄ BIBLIA ESTUDIAI NAEƊE SAKA NIBASAA:
Mʉ naceɗa baɗa puuru ɓuu chi trʉ̃ Croydon, mau sur de Londresɗe ɓua. Mʉ akõrerã isla de San Vicenteɗebena basii. Mʉ chi 6 basii 9 warrarãɗebena. Mʉ dana wãbachimina Iglesia Metodistaɗaa, mʉa bustakabachii chi religión. Chuburi nibasiiɗe mʉa ãrĩã kawa kʉ̃ria ɓoosia. Mʉ cenea jʉ̃kaa akoɓee kʉ̃riabachii bibliotecaɗebena libro leayua escuelaɗe niiwẽeɗe.
Escuela terminaɗakare, aiɗa nibaɗe wãsii chi sufri nureerã, ẽbẽrarã deswẽa nureerã, ẽbẽra enfermedad bara nureerã mauɗe chi boro biʼiawẽe nureerã isa kawaɗakaurã. Maaɗakare medicinaɗebena estudia koɓeeɗa. Graduaɗakare mʉ biʼia ãrĩã wãɗa basia. Chi trajoɗe mʉʉmaa ãrĩã paabachiɗaa mauɗe chi nejarra barau kĩraka vivi nibaɗa. Gestora mauɗe investigadora social baɗa basii. Trajayua computadora internet baaraburu nesita ɓooɗa. Junebena paisɗaa biɗa wãbachii, mʉ hotel kĩrawãrea ãrĩã ɓeebachia, mʉ gimnasioɗaa wãɗapeɗa, mʉ kakua mipitaa babiyua wãbachia mauɗe puuru kĩrawãrea ochiabachia. Mʉa kʉ̃risiabachii mʉ joma bara nii mʉ kĩrajʉʉ nibai baita. Maka ɓumina ida kuɓukabachii kʉ̃risiayua sufri nureerã.
BIBLIABA MɄ SAKA NIBAƊA KAMBIASAA:
Kaabenaɗe basiiɗe mʉa wiɗibachia ¿kãare kakua nama nibasaa? Maka ɓumina ida kʉ̃risiakabachia jʉrʉyu Bibliaɗe eɗa. Chi día 1999ɗe mʉ nawekau chi kaaɗe nii, Margaret, mauɗe ichi amika mʉ ochia neesiɗaa. Ãchi omea Jeowa ɗebena jaranũrẽ baɗa. Chi amika ẽbẽra bia ãrĩã nibasia, mauɗeeburu mʉ estudiayua chi Bibliaɗe aɗa basia. Mʉ ãrĩã trajapeɗa estudia niiɗeeba mʉ ɓiɗĩi ɓiɗĩiaburu wari kãribaɗe wãɗaa.
Suroeste Inglaterraɗe mʉ viviɗe wãsii 2002ɗe, aude estudia kʉ̃ria ɓoosiiɗeeba chi investigación social ʉ̃rʉbena. Jãma reunionɗaa wã koɓeeɗa baɗa mʉ warr baare. Bariara mʉ universidaɗe ãrĩã estudia basmina, adua basii saka ẽbẽra sufriɗawẽa nureaɗaiɗebena, Bibliaɗeburu kawabiasia nauɗebena. Chi Mateo 6:24ɗe jara ɓuu ãrĩã kawabisii mʉʉmaa. Omeerã baita poyaa trajaabayua, Dios baitaburu trajai basia maebʉrã chi nejarra adauyuaburu jʉrʉi basii. Mʉa kʉ̃risia ɓoaɗa sãu importante ãrĩã ɓuu mʉ baita.
Año pasasiiɗe ãrĩã wãbachii Biblia estudiaɗe Jeowa ɗebena Jaranũrẽ deemaa, aria estudiabachiɗau chi libro ¿Existe un Creador que se interese por nosotros?a Mauɗeeba mʉa kawasii Dachi Waukaɗa baɗaba, Jeowa, ichiaburu dachi aiɗai ɓua. Universidaɗe mʉʉmaa jarasia dachia nesitaɗawẽe Dachi Waukaɗa baɗa ʉ̃rʉbena kawaɗai baita biʼia duanaɗayua asia. Jãuba mʉ ãrĩã kĩruɗa baɗa. Dos mesburu ba koɓosmina ida ɓuɗa baɗa chi universidaɗaa wãñu mauɗe kʉ̃risiasii Diosmaaburu aude jʉ̃kaa nibayu.
Chi Proverbios 3:5, 6ɗe jara ɓuu jãuba mʉ ãrĩã aiɗa ɓuu: “Confiayua Jeowa joma bichi corazonɗeeba, mauɗe aserã́ba bichia kʉ̃risiaaruudu, joma bichia aseburuu kʉ̃risiaba ichia jara ɓuuɗebena, ichiaburu bichi jipa ãdabiyua”. Estudiaaruu universidaɗe chi nejarra bara nibayua, mʉ trajoɗe biʼia wãi baita jãu mʉ baita serviibasia, unuñua Diosba dachi kʉ̃ria ãrĩã unii jãdu servi ɓua. Ãrĩã kawasii Dachi Akõreba nau Iujãa paraisoɗe babiiruu ʉ̃rʉbena mauɗe Jesús nama iujãaɗe neesiiɗe dachi kakua biui baita, jãuɗeeburu mʉ bautiza kʉ̃riaɗaa. Jeowa ɗebena Jaranũrẽɗe bautizaɗa baɗa abril de 2003ɗe. Maaɗakare kosarã ɓiɗĩi ɓee omeburu vivi ɓeeɗa.
KÃARE KOSA BIA UNUƊE WÃSAA:
Dios amika nibayu jãu ãrĩã vale ɓua. Jãabae mʉa ichi unuɗakare kĩrajʉʉ ãrĩã nia. Mʉ siɗa kĩrajʉʉ nii traja niiɗeeba Jeowa baita traja nuree baare.
Mʉa ãrĩã bustabariiɗeeba kawai baita, estudiapeɗa reunionɗaa wãi baita ãrĩã bustabaria. Mauɗe bustabaria junebenarã ome beɗeayu mʉa ijãa niiɗebena. Jãuɗeeba, junio 2008ɗeeɗa ãrĩã kawabiabaria Bibliaɗebena junebenamaa biɗa. Jãuba aiɗakuabarii chi ẽbẽra paraisoɗe biuɗawẽa duanaɗai baita. Mʉ kĩrajʉʉ ãrĩã nibabaria, maabea Diosmaa ara kiruma abaria, jãabera mʉ trajo ãrĩã vale ɓuu.
“Mʉ amiko biusii ʉ̃rʉbena ãrĩã kʉ̃risia ɓeesia”(ROMAN IRNESBERGER)
AÑO NACEƊAƊEBENA: 1973
SAMABENA: AUSTRIA
ICHI Ʉ̃RɄBENA MAUCHA JARA ƁUU: ÃRĨÃ JEMENE NIBASII CHI NEJARRA BAARA APOSTAYUA
MɄ BIBLIA ESTUDIAI NAEƊE SAKA NIBASAA:
Chi familia católico nureerã baara naceɗa, chi puuru Braunau Austriaɗebenaɗe. Jãu barrio peligroso wãʼãe basia, biʼia vivi nibapeɗa joma mauɗe chi nejarra siɗa faltakabachia.
Kewaraa 1984ɗe, mʉ 11 año nibasiiɗe, mʉ baita nomaa ãrĩã ɓeeɗa basia, mʉ amiko bia, mau omeburu fútbol jemeneɗe nibasii, accidente carroɗe biuɗa basia. Mʉ amiko biusiiba mʉ akawa kʉ̃risiawẽa nomaa ɓuiɗa basia. Kʉ̃risiabachii kãare pasabarii dachi biuɗakare.
Escuela terminaɗakare, electricista kĩraka traja ɓeeɗa. Maabea jemeneɗe ɓeesii, chi nejarra baara apostayua. Chi nejarra ãrĩã perdei ɓosmina, chi nejarraswẽa ɓeekabachia. Tiempo ãrĩã pasabachia deporte ase nii mauɗe música heavy metal mauɗe punk ãrĩã ũribachia. Wẽrarã ãrĩã baara kãi ɓeebachia, discotecarãɗaa biɗa baeraɗe wãbachia. Mʉchia kʉ̃riaburu asebachii maamina biʼia sentikabachia.
BIBLIABA MɄ SAKA NIBAƊA KAMBIASAA:
1995ɗe, Jeowa ɗebena Jara nii dawarau nii mʉʉmaa neeɗa mauɗe libro Bibliaɗebena jara ɓuu deasii, chi libroba jaradeasia “¿Kãare pasabarama ẽbẽrarãmaa biuɗakare?”. Mʉa adauɗa abiɗa kʉ̃risia nibaɗa bẽrã mʉ amiko biuɗaɗebena. Mʉa chi libro joma leaɗa.
Mʉa ãrĩã kawasii chi biuɗaɗebena mauɗe junebena siɗa kawasii. Mʉ deɗabenarã catolicorã nuree bẽrã, mʉa Jesusdu ijãa nibasia. Bibliaɗebena estudiaɗakare, chi Jesús Akõre ʉ̃rʉbena aude kawasii, ichi trʉ̃ Jeowa. Mʉa ãrĩã bustasii Dios chi ichi baita traja nuree kaita nuree. Ichia idaarabibarii chi ẽbẽraba ichi unuɗayua (Mateo 7:7-11). Maucha kawasii ichia dachi kʉ̃ria nii mauɗe ichia asebarii ichia jaraaruuɗebena. Mauɗeeburu mʉa ichi ʉ̃rʉbena aude kawa kʉ̃ria ɓoosia. Chi kawaɗa baɗaba mʉ fe aude chaareabi ɓoosia.
Maaɗakare kawasii chi Jeowa ɗebena Jaranũrẽrã ãchi jãarãburu biʼia aiɗabadaa waabenarãmaa chi Jeowaɗebena kawaɗai baita. Joma chi versiculorã chi kartaɗe koɓeerã mʉa jʉrʉsia mʉ Biblia Catolicaɗe eɗa. Jãkaburu kawasii chi religión ariɗe ɓuuɗebena.
Bibliaɗebena estudiasiiɗe mʉa kawaɗa Jeowaba kʉ̃ria ɓuu ichia jara ɓuu aseɗai baita. Efesios 4:22-24ɗaa leasiiɗe, kawasii chi kachirua asebarii ida ɓuyu, empeza adauyua Diosba jara ɓuu kĩra. Aɓaeɗe ida ɓuɗa wẽrarã ãrĩã baara kãi ɓeebarii baɗa, mauɗe chi nejarra baita apostapeɗa jemenebarii baɗa siɗa ida buɗa, mauɗe ida ɓusii chi nejarra jʉrʉbarii baɗa siɗa (1 Corintios 6:9, 10). Mauɗeeba amikorã naeɗebenarã baara nibabarii baɗa siɗa ida ɓuɗa mauɗe jʉrʉyua amikorã Diosba jara ɓuu kĩra.
Jãu fácil ɓuuwẽe. Wã koɓeesiiɗe unuɗa basii amikorã ase nuree Diosba kʉ̃ria ɓuu kĩra mauɗe mauchaburu kawa koɓeeɗa Bibliaɗebena, jãabera naeɗe música unubarii baɗa siɗa ida ɓuɗa, mauɗe ida ɓuɗa baɗa paru mʉa jʉ̃barii baɗa. 1995ɗe Jeowa ɗebena Jaranũrẽ bai baita bautizasii.
KÃARE KOSA BIA UNUƊE WÃSAA:
Jãabera kʉ̃risiakau chi nejarradu importante ãrĩã ɓuu. Mʉ isa kĩrukaa, mʉa ãrĩã kʉ̃risiakaa kãare pasaaruuɗebena.
Mʉ ãrĩã kĩrajʉʉ nii ẽbẽra Jeowa baita traja nuree baara nibai niiɗeeba. Mʉa kawa ɓuu nau mundo jomauɗe problema bara nuremina jãarã ichi kaita nurea. Jãabera mʉa kʉ̃riaburuuɗe ase nibai bustakaa, bari Jeowa baitaburu traja nibaidu mauɗe ne biʼia ɓeedu ase nibai junebena baita.
“JÃABAEBURU MɄ KĨRAJɄɄ NIA”(IAN KING)
AÑO NACEƊAƊEBENA: 1963
SAMABENA: GRAN BRETAÑA
ICHI Ʉ̃RɄBENA MAUCHA JARA ƁUU: MɄ VIDA MɄA KɄ̃RIA NII KĨRA NIBAABASIA
MɄ BIBLIA ESTUDIAI NAEƊE SAKA NIBASAA:
Mʉ Inglaterraɗe naceɗa, maabea 7 año nibasiiɗe mʉ familiaba mʉ oɗoesiɗau Australiaɗaa viviɗe, chi Queenslandɗaa mau chi trʉ̃ Gold Coast. Chi nejarra ãrĩã wãʼãe bara nibasiɗaumina, ira panasia joma chi nesita ɓoaɗa.
Joma unibasiɗamina, mʉ kĩrajʉʉ nibaabasii. Mʉ vida mʉa kʉ̃ria nii kĩra nibaabasia. Mʉ akõre itua ãrĩã dobachii, mauɗe mʉa kʉ̃ria nibaabasii. Mʉa bustakabachii ichi itua ãrĩã do nibayu, mauɗe mʉa bustakabachii mʉ dana sĩñu siɗa. Maaɗakare, kawasii ichi ejercitoɗe ãrĩã sufriɗa baɗa Malasiaɗe, mauɗe kawasii sakayua ichi jãka nii.
Kũudrãa niiɗe ãrĩã do koɓeeɗa baɗa mʉ. 16 año nibasiiɗe escuela ida ɓuɗa mauɗe marinaɗaa wãsii. Jãu ewariɗe droga dopeɗa mauɗe taaku siɗa dosii, maabea ãrĩã do ɓeeɗa basia. Naeɗe du aɓa itua biubachii semanaɗe jãabea noremaacha itua biubachii.
20 año nibasiiɗe kʉ̃risiabachii Dios nii mau niiɗe sakayua ida sufribibarima a kʉ̃risiabachia maabea biubadau mauɗe poema siɗa ɓʉbachii jarabadau Diosturu culpa bara nii chi pasabaraa ɓuuɗebena.
23 año nibasiiɗe, marinaɗe traja nibaɗa ida ɓuɗaa. Ãrĩãɗe traja nibasia mauɗe año aɓauɗe junebenarã paisɗaa wãɗa basia. Ara maka nomaa nibaɗe wãɗa basia.
Poloniaɗaa wãɗa campo de concentración Auschwitzɗebena ochiaɗe. Jãma kachirua ãrĩã ɓee asebadauɗebena leaɗa basia, jãma wãsiiɗe unuɗa basii aude kachirua ãrĩã ɓuuɗe. Mauba mʉ nomaa sentiɗa basia. Mʉa kawawẽe basii sakayua ẽbẽra ãrĩã kachirua nureeɗebena. Jãma ãda niiɗe jẽapeɗa jaraɗaa: “¿Sakayua naka asesiɗaa?” aɗa basii.
BIBLIABA MɄ SAKA NIBAƊA KAMBIASAA:
1993ɗe, june paisɗebena neesiiɗe, Bibliaɗeeɗa ãrĩã jʉrʉsii kawai baita. Jãabera Jeowa ɗebena Jaranũrẽrã ome mʉ deemaa neesiɗau, mʉʉmaa jarasiɗau estadioɗaa asambleaɗaa wã́baɗa apeɗaaɗa. Maabea mʉa jamaria wãsii.
Ara ɓaʼãraburu basii jãu estadioɗaa wã ɓooɗa partido fútbol ochiaɗe, nau besɗera diwara ɓooɗaa. Chi Jeowa ɗebena Jaranũrẽrã ẽbẽra biarã nureabadaa, jomaurã paru biʼia ãrĩã jʉ̃ɗapeɗa maabea chi warrarã ãrĩã necio wãʼãe basii. Almuerzo horaɗe ãrĩã koɗe wãpeɗaaɗa canchaɗaa, joma kopeɗaaɗakare biʼia ãrĩã jayoa ɓuiɗaabasia. Joma kĩrajʉʉ duanaɗapeɗa biʼia duanaɗa basia, mʉ siɗa jãarã kĩra niba kʉ̃riaɗa basia. Mʉa kawawẽe chi discursoɗe kãare beɗeapeɗaaɗa makaɓumina mʉa kuitaa ɓuu kãare asepeɗaaɗa Jeowaɗebenarã kĩrajʉʉ ãrĩã duanasiɗau.
Jãu ẽsebuɗe, kʉ̃risiaɗa mʉ primo, ichia mʉʉmaa jaraɗa chi ariɗe nuree cristianorã unui baɗa biʼia ase nureeɗebena, maka Jesusba jaraɗa baɗa (Mateo 7:15-20). Maabea aude kawa kʉ̃riaɗa basii chi Jeowaɗebenarã. Mʉ biʼia ãrĩã sentiɗa basia.
Mau semana neeburuuɗe, chi Jeowa ɗebena jaranũrẽba mʉʉmaa asambleaɗaa wã́baɗa apeɗaaɗa baɗa, maarã mʉ deemaa neepeɗaaɗa basia, Biblia estudiábaɗa aɗayua, maabea mʉa maerã aɗa basia. Maabea reunionɗaa biɗa wã koɓeeɗa basia.
Chi ɓee Biblia estudia koɓeesiiɗe audeburu Diosɗebena kawa koɓeeɗaa mauɗe ichi culpa wãʼãe ɓuu chi ẽbẽra sufri nureeɗebena, biʼiwẽe ãrĩã sentibarii chi ẽbẽrarã kachirua asebudauba (Génesis 6:6; Salmo 78:40, 41). Kʉ̃risiasii ichi sufribi kʉ̃riaabai bari kĩrajʉʉbi kʉ̃ria ɓuu. Mʉa cigarrillo do nibaɗa ɓuisii, do basii siɗa ida ɓuɗa mauɗe wẽrarã baara kãibarii baɗa siɗa ida ɓuɗa basia. Maabea marzo de 1994ɗebena, mʉ bautizasii Jeowa ɗebena Jaranũrẽ babii baita.
KÃARE KOSA BIA UNUƊE WÃSAA:
Mʉ kĩrajʉʉ ãrĩã nii. Chi itua dobarii baɗa ɓuisii, maubapeɗa algo nomaa sentibibʉrã Jeowa juaɗe ɓuiruu (Salmo 55:22).
10 año basii kimabaraaɗa wẽra mipitaa ãrĩã kiɗii baare, ichi siɗa Jeowaɗebena Jarabarii nia, mau chi trʉ̃ Karen, chi kau chi trʉ̃ Nella baare vivi niɗau. Dai õbea Jaradeaɗe wãbadaa mauɗe junebenarã ẽbẽrarãmaa aiɗabadaa chi Dios ʉ̃rʉbena kawabiɗai baita. Jãabaeburu mʉ kĩrajʉʉ nia.
a Chi Jeowa ɗebena Jaranũrẽrãba ɓʉpeɗaaɗa.