“Mʉ chĩo nibabarii nibaɗa jãabera ida ɓusia”

MɄ BIBLIA ESTUDIAI NAEƊE SAKA NIBASAA:

Mʉ puuru Calgary abadauɗe naceɗa baɗa, Albertaɗe (Canadá). Mʉ chuburi nibasiiɗe, mʉ akõre dana ome amaa panasii, mʉ dana mʉ ome mamitamaa ɓooɗe wã panasii. Ãchia dai chi kʉ̃ria ira panasii, ariara mʉ kĩrajʉʉ ãrĩã nibaɗa; mʉ ẽrosãa koɓeeɗa baɗa. Mʉ dai jãu tiempoɗe biʼia ãrĩã panasiɗau.

Mʉ siete años nibasiiɗe, joma cambiasia. Mʉ dana waya jĩɗaa mʉ akõre ome kãisiɗau maabea puuru San Luisɗaa ɓooɗe wã panasii, Misuri (Estados Unidos). Mʉa unusii mʉ akõre miadaa ãrĩã ɓuu. Ɓes aɓauɗe, mʉ primer ɓes escuelaɗaa wã ɓoosiiɗe waya deeɗaa neeburuuɗe, ichia kawasii junebenarã warrarãba mʉ ãrĩã sĩpeɗaaɗa baɗa madu mʉa aɓaareka choroabaɗa. Ichi mau kakua mimichia kĩru koɓeesia, mʉ akõreba mʉ aude sĩ ɓoosii warrarãba mʉ sĩpeɗaaɗa kãyabãra. Ichia mʉʉmaa jãka nibayu kawabiaɗa baɗa, makaeɗeeɗebena ãrĩã pelea nibabasii.

Mʉ akõre chi kĩrubi ãrĩã ɓoosii bẽe, mʉ dana ichi ome ãrĩã kĩrubachiɗau, ãchi chiya jĩwa beɗea kopaneeɗapeɗa peleabachiɗau. Mʉ nejarr do koɓeepeɗa, ituaɗeeɗa 11 año nibasiiɗe. Mʉ audeburu kĩru koɓeepeɗa mauɗe calleɗe ãrĩã pelea nibabachia. Bachillerato terminaɗakare, mʉ pelea nibabarii niiɗeeba miadaa ãrĩã ba ɓoosii.

Mʉ 18 año niiɗe, Infantería de Marina Estados Unidosɗebena baare koɓeesia. Mʉ chĩo nibabarii baɗamina, ariaburu aɓarekau beayu kawa koɓeesia. Cinco año baɗakare, ejército ɓuipeɗa Psicología abadaudu estudia koɓeesia, FBIɗe traja kʉ̃ria ɓoosiiɗeeba. Mau Estados Unidosɗeburu estudia koɓeeɗa, Canadaɗaa wã ɓoosiiɗe, aria biɗa estudia ɓoosia.

Universidaɗe estudia kãriiɗe naa ijãa ɓooɗa jãabera ijãawẽa ɓeesia. Mʉʉmaarã jomaurã ẽbẽrarã kachirua ãrĩã nuree. Nau iujãaɗe biʼiwẽe kuɓuu solucionai baita bereka aseeruu siɗa serviwẽe a kʉ̃risia ɓooɗa mʉa. Ẽbẽrarãburu joma biʼia noɓeei baita poyaabai kʉ̃risia ɓeesii.

Kãare baita dachirã nama duanuu unuwẽeɗeeburu waaburu nejarr, ituaɗeeɗa do koɓeepeɗa, chi nejarra adauyúturu mauɗe wẽrarã kabanaarã ome kãi noɓoidu kʉ̃risia koɓeesia. Fiestarãɗaa ãrĩã wãbachia mauɗe wẽrarã kabanaarã ome ãrĩã kãi ɓoobachia. Ejercitoɗe mʉʉmaa kawabiabachiɗau chaarea ɓoi baita, mauɗeeburu mʉ ara kapichia chĩo nibabachii aɓarekau ome. Mʉa kʉ̃risia ɓoosiiɗe ẽbẽra niiba aɓau miadaa ase kuɓuu, mʉ kĩru koɓeepeɗa maabea ichi ome chĩoɗe wãbachii. Mʉ jãabera chĩo nibabarii nibasia.

BIBLIABA MɄ SAKA NIBAƊA KAMBIASAA:

Earaɓa amiko ome nejarr ãrĩã doɗapeɗa kauwẽa kopaneesiɗauɗe, mʉ deɗe mʉ daiba nejarr pe kãriɗau nedobʉei baita, maabea mʉ amikoba mʉʉmaa wiɗiɗa baɗa: “¿Bʉa Dachi Akõreɗe ijãa ɓuka?” aɗa baɗa. Maabea mʉa naka asia: “Ẽbẽrarã nau iujãaɗebena ãrĩã sufri bara ɓuubʉrã Dachi Akõreɗeeburu, ¡makarã mʉa ichi ʉ̃rʉbena akawa kawa kʉ̃riawẽe!”. Mau norema mʉ trajo chi wiɗiɗe, kõpaero Jeowa ɗebena Jara nibabariiba mʉʉmaa naka wiɗiɗa basia: “¿Ɓʉʉmaa Dachi Akõreburu ẽbẽrarã nau iujãaɗebenarã sufribia baaka?”. ¡Mʉ bari ochia koɓeesii! Mʉʉmaa mʉ amikoba noremaeɗa wiɗiɗa baɗa kĩraka mʉʉmaa wiɗisiiɗeeba waaburu kawa kʉ̃ria koɓeesia. Jãu ʉ̃rʉbena seis mesɗe ãrĩã beɗea kopaneesii, mauɗe ichia Bibliaɗeeba mʉʉmaa jaradeasia chi mʉa audeburu kawa kʉ̃ria ɓooɗáturu.

Chi wẽrakau mʉ ome ɓoosiiba mʉʉmaa jaraɗa baɗa akawa kawa kʉ̃riabasii chi mʉa kawa kãriiɗebena. Misaɗe mʉa jaraɗa baɗa Jeowa ɗebena Jaranũrẽrãmaa imibiɗa baɗa mʉ deemaa Bibliaɗebena daimaa kawabiɗayua. Mau norema, trajoɗebena neesiiɗe unu ɓooɗa ichia joma ichiɗi baɗa adaupeɗa wãsia. Mʉ awara wãpeɗa jẽa koɓeesia. Maabea, Dachi Akõremaa “mʉ aiɗábaɗa” aɗa basia. Jãu basii primera ɓes Dachi Akõre trʉ̃, Jeowa, mʉa jaraɗa baɗa ʉtaa wiɗisiiɗe (Salmo 83:18).

Dos días baɗakare Bibliaɗebena estudia koɓeesia Jeowa ɗebena Jaranũrẽrã kimabaraapeɗaaɗa niɗau omeeba. Ãchi wãpeɗaaɗakare, libro ãchia Bibliaɗebena kawabiai baita deabadau, mʉa lea koɓeesia jãu libro Usted puede vivir para siempre en el paraíso en la Tierra. Ẽsebuɗaa mʉa joma leatasia.a Jeowa ʉ̃rʉbena kawapeɗa mauɗe ichi Warr ʉ̃rʉbena biɗa, Jesucristo, mʉ corazonɗaa neesia. Mʉa kawa koɓeesii Jeowaba kĩra chuburiapeɗa mauɗe ichi ãrĩã puʼuabarii dachi sufri duanuu unuuruuɗe (Isaías 63:9). Ãrĩã bustaɗa baɗa kawayu Dachi Akõreba mʉ kʉ̃ria inii mauɗe ichi Warr mʉ kakua biuɗa baɗa (1 Juan 4:10). Mʉa kawasia Jeowaba esperasia mʉ cambiai baita “Ichiba kʉ̃riawẽa ɓuu ẽbẽra aɓa biɗa ichiɗebena ãi ɓuai. Kʉ̃ria ɓuu jomaurãba kachirua ida ɓuɗapeɗa ichimaa neeɗai” (2 Pedro 3:9, Biblia Chamí WPS.). Mʉ ichimaa neebisii kĩra (Juan 6:44).

Ara jãu semanaɗe reunión ũri ɓeesia. Mʉ buɗa deseroa aa nibapeɗa arete ataubarii basii, chi waa ẽbẽrarãba mʉ unu kopanuuba ãrĩã pera kopaneebachii, maka ɓumina Jeowa ɗebena Jaranũrẽrãba biʼia irsibi panasii ãbachekeka cristiano ariɗe nureerã kĩraka irsibi panasii. Jamaria mʉ biʼia sentiɗa baɗa, ara jari mʉ papitomaa ochiaɗe wãburuu kĩra, madu jãma ãrĩãburu chi biʼia ãrĩã ɓooɗa.

Ɓiɗĩika ba ɓoosiiɗe Bibliaɗebena kawaburuuba mʉ naa nibaɗa cambiabisia. Mʉa mʉ boro kõbipeɗa, maabea ida ɓusia wẽrarã kabanaarã ome kãi noɓoobachii mauɗe itua, nejarr siɗa ida ɓuɗa baɗa (1 Corintios 6:9, 10; 11:14). Mʉa kʉ̃ria ɓoosiira Jeowa mʉ ome kĩrajʉʉ nibayudu. Mʉa ase nibabarii baɗa jãu miadaa ɓuu kawasiiɗe mʉ ara jãka ɓoi baita kʉ̃risiakabachii, bari mʉ corazón chi pua ɓoopeɗa, naka kʉ̃risiabachia: “Jãabera mʉa jãkʉʉ aseebai ɓuu”. Makarã, aɓaeɗa mʉ kʉ̃risia, mauɗe mʉa ase nibabarii baɗa cambiai baita bereka koɓeesia. Jãuɗeeburu, mʉ biʼia kãribaɗe wãsii aseburuuba chi Jeowaba jaraburuu. Seis mes baɗakare mʉʉmaa Bibliaɗebena kawabipeɗaaɗa baɗa, 29 de julio de 1989ɗebenaɗe mʉ bautizapeɗa Jeowaɗebena Jara nibabarii basia.

KÃARE KOSA BIA UNUƊE WÃSAA:

Bibliaba mʉ aiɗa ɓua mʉ naa nibaɗa cambiai baita. Naeɗeeɗa, ẽbẽra niiba mʉ kĩrubi ɓoosiiɗe, chĩo koɓeesia. Iɗiiɗaara ãrĩã berekabaria peleawẽa ɓoi baita jomaurã ome (Romanos 12:18). Ara mʉɗeeburuwẽ. Jeowaɗeeburu ɓua. Ichi Beɗea ichi Jauri baara poder ãrĩã baraa panuu, maarãba dachi naa nibapeɗaaɗa baɗa cambiabi ɓua (Gálatas 5:22, 23; Hebreos 4:12).

Naa nejarr do nibapeɗa, chĩo nibabarii baɗa mauɗe wẽrarã kabanaarã ome ãrĩã kãi ɓoobachii, maka ɓumina jãabeaburu ãrĩã berekabaria Jeowa kĩrajʉʉbii baita. Mauɗe chi biadu deayua mʉɗebena mauɗe waabenarãmaa ichi ʉ̃rʉbena kawabiabaria. Mʉ bautizaɗakare, junebena paisɗaa ɓooɗe wãsii Bibliaɗebena kawabiai baita ẽbẽrarãmaa chi jaradeabadaurã ɓaʼãra duanuumare. Yataɗeeɗabena iɗiiɗaa kĩrajʉʉ jaradea nibabarii Bibliaɗebena ẽbẽrarã aribiaurãmaa. Mauɗe ochia ɓuu ãchi siɗa aude biʼia nibaɗe wãbadau. Mʉ ãrĩã kĩrajʉʉ nibabaria mʉ dana siɗa Jeowa ɗebena Jara nibabarii basii bẽrã, mʉ naa nibaɗa ida ɓusii unuburuuba.

1999ɗe Escuela para Evangelizadores del Reino abadauɗebena graduaɗa baɗa El Salvadorɗe. Aria mʉʉmaa kawabiasiɗau jaradea nibabarii aude biʼiaburu nibayua, mauɗe congregacionɗebenarãmaa jaradeɗekapeɗa, jomaurã cuida ua ɓoi baita. Mau kaaɗe, ara jãu añoɗe, mʉ kimabaraa ɓoosii Eugenia ome. Jãabera dai omeeba ẽbẽrarãmaa jaradea nureabarii Guatemalaɗe.

Naeɗeeɗa mʉ aburri koɓooɗa akawa ijãawẽa nibaɗaɗeeba jãabaeburu, mʉ kĩrajʉʉ ãrĩã nibabaria. Bibliaba jara ɓuu aseburuuba mʉ biʼia nibabisiiɗeeba;   mʉ chĩo nibabarii nibaɗa jãabera ida ɓusia  mauɗe wẽrarã kabanaarã ome kãi ɓooɗa baɗa siɗa ida ɓusia. Jãuɗeeburu, mʉ jãabera ẽrosãa diɗipeɗa mauɗe waabenarã ãrĩã kʉ̃ria nibabaria.