Jãabera mʉa waabenarã aiɗai unu ɓua

MɄ BIBLIA ESTUDIAI NAEƊE SAKA NIBASAA:

Aculɗe mʉ kiriasiɗaa, chi puuruɗeeba kaitawẽe ãrĩã Guatemala oesteɗaa. Mʉ deeɗabenarã ẽbẽrarã duanuu ãchirãra Ixil abadauɗebenarã, mayarã naeɗeeɗabenarãɗebena. Español mauɗe dai beɗea siɗa kawasia. Mʉ wari kãrii dauchia chi dai puuru choromaɗe chĩo bara ɓeesiɗaa, nau 36 año demorasia. Nauɗe eɗa ẽbẽrarã Ixilɗebenarã ãrĩãdu kinisiɗau.

Mʉ kimare años kiɗibasiiɗe mauɗe mʉ ãba 7 años, ichi granada ome jemene ɓoosia juaɗe maamina nau tõosii. Mauɗeeba mʉ dau pãriu ɓeesii maamina mʉ ãba cheke biubarisia, jãmaeɗeeɗabena mʉ institución dau pãriu nureerã baita ɓuuɗe ɓeesia, aria mʉa juaba lea kawasia, mʉa adua basia sakayua ariabena ẽbẽrarãba waabenarã warrarã ome ida jemenebiɗakaabasia, mauɗe sakayua chi nuree warrarãba mʉ ome nibai kʉ̃riakaa ɓoosiɗau. Mʉ du aɓaburu ɓoabasia maka ɓuuɗeeba chi ome mes isa neebii kʉ̃ria ɓoosii mʉ dana unuyua, mʉ danaba mʉ chi kʉ̃ria ãrĩã unibasii, maamina chuburi ãrĩã mʉ 10 año niiɗe ichi biubarisia. Mʉ ãrĩãdu nomaa ɓeesia, chi mʉ dana chi kʉ̃ria ãrĩã uru kiɗibaɗa mauɗe aɓa jãdu unibasii biubarisiiɗeeba.

Mʉ 11 año niiɗe, mʉ chi puuruɗaa waya neesia mʉ ãba mauɗe ichi deeɗabenarã ome bibiɗe wãsii. Aria mʉ paru, chiko, de uru ɓoosia, maamina mʉ kĩrajʉʉ ɓoi baita unuubasii. Besesɗe mʉa Dachi Akõremaa naka biabachii: “¿Sakayua mʉ dana biubarisaa? ¿Sakayua mʉ naka pãriu nibaɗe wãsaa?”. Ẽbẽrarãba mʉʉmaa jarabachidau joma ne kachirua mʉʉmaa neeɗabaɗa jãra Dachi Akõreburu kʉ̃ria koɓoosiiɗeeba nee ɓuu abachiɗaa. Mauɗeeba mʉa Dachi Akõre ẽbẽra kachirua nii kʉ̃risiabasii ichiaburu dachi ãrĩãdu supribia ɓuu apeɗa, mʉa aɗabasirã mʉ du aɓa biu ɓoosia.

Mʉ dau pãriu nibaɗe wãsii bẽrã jomaurã baita miichuburi ɓoosia, mʉ kʉ̃risɗeeba mauɗe ara mʉ kakuaɗeebiɗa maka unubi ɓoosia. Mʉ chuburi nibasiiɗe ãrĩãdu embiolapeɗaaɗabaɗa. Maamina mau mʉa poyaa jaraabasia, mʉa kʉ̃risiabasiiɗeeba waabenarãmaa jãra importawẽe. Ẽbẽrarã mʉ ome beɗeaɗakaabasiɗau. Mauɗe mʉ du aɓa akʉ ɓuuɗe jẽayuaburu ɓoobasii, mauba mʉ waabenarã ome beɗeayu siɗa bustakaabasia.

BIBLIABA MɄ SAKA NIBAƊA KAMBIASAA:

Mʉ 13 años niiɗe, kimarã Jeowa ɗebena jaranũrẽ beɗeasiɗaa mʉʉmaa eskuelaɗe recreoɗe duanuumisa. Profesora ichia mʉ chi chuburi unubi ɓuuba ãchimaa jarasia mʉ ome beɗeaɗayua. Ãchia mʉʉmaa ariɗe jarasiɗau chi dau pãriu kirureerã waya unuɗayu, mauɗe kinipeɗaaɗabaɗa waya piradruɗayu (Isaías 35:5; Juan 5:28, 29). Mʉa ãrĩãdu bustabasia ãchi beɗea ũriyu, maamina ãrĩã beɗeayu bustakaa bẽrã, mʉa bari ũripeɗa chõpea akʉ ɓeebasia, mʉ du aɓaburu waa akʉɓoobarii basii bẽrã, ãchia mʉʉmaa bikãa mauɗe kʉ̃ria iɗaa Bibliaɗebena jaradeabasiɗaa. Ãchi 10 kilómetros tuabasiɗau mʉ puuru ɓuuɗaa neeɗayua.

Mʉ ãba chekeba ãchi saka niɗau jaradeasiɗauɗe, ãchi poore kiruree maamina mipitaa jʉ̃ɗapeɗa neebadau jarasia. Ãchia mʉ kʉ̃ria ãrĩã uru duaɗai unubisiɗau, ãchia mʉʉmaa rekalorã ɓiɗĩika keɗee deabachiɗaa. Mʉʉra ariɗe kuitaa akʉ ɓoosia chi Jesusɗe ijãa nuree biawãra waabenarã kakua ãrĩãdu ase duanua.

Mʉa chi Biblia estudia ɓoosii mauɗe kartarã juaba leayu mauɗeeba kawa ɓoosia. Mʉ kʉ̃risɗe uru ɓoosia chi kawa kãriiɗebena maamina chi ɓeerãɗebena poyaa ijãabasia mʉa. Mʉ baita chaarea ɓoosia ijãayu Dachi Akõre mʉ kakua ochia ɓuu, mauɗe waabenarã biɗa ara ichi kĩra jãka kʉ̃risia duanuu. Kawasia jãmaburu sakayua ichia chi kachirua idarabi ɓuu maamina mʉa ichi Akõre dachi kʉ̃ria ãrĩã uru nii kĩra unuubasia.a

Bikãa Bibliaba jaradeamaa ɓuuba, kambia kãribaɗe wãsia chi mʉa kʉ̃risia nibaɗa. Mʉa kawasia Dachi Akõre ichia ãrĩãdu supri kiruu dachia supri duanuu kakua. Jeowaba ichi baita traja nuree ʉ̃rʉbena jara ɓuuɗe ãrĩãdu puʼua duanuuɗebena naka jara ɓua: “Mʉa unu ɓua joma mʉ puuruba supri duanuu [...] Mʉa kuitaa ɓua biʼia kãare supri duanuu” (Éxodo 3:7). Mʉa Dachi Akõre jomaurã kʉ̃riabarii kiɗii kawasiiɗe, mʉa ichi baitaburu trajayu kʉ̃risiasia. 1998ɗe mʉ bautisapeɗa Jeowa ɗebena jara nibabarii basia.

Año baɗakare, mʉ curso asesia ẽbẽrarã dau pãriu nuree baita puuru Escuintlaɗebenaɗe. Ẽbẽra chi konkrekasionɗebenaba kawasia mʉ baita chaarea ãrĩã ɓuu reunionɗebenaɗaa wãi baita Aculɗe, mʉ chi araɓau moɗe chi Jeowa ɗebena jaranũrẽ wãbadau oare wãi ɓuuɗeeba. Mʉ aiɗai baita chi ãbarãba deeɗabenarã Jeowa ɗebena jaranũrẽ unusia aria mʉ ɓoi baita, maabea araareba mʉ aiɗai ɓuu reunión wãyua. Iɗiɗaa, mʉ ochia ua niɗaa kĩrabara ãchi deeɗebena kĩra.

Mʉa waaburu jarai ɓua kãare ãbarãba mʉ kakua asepeɗaaɗarãbaɗa. Mʉa ariɗe kuitaa ɓua jãabera Jeowa ɗebena jaranũrẽ bara niiba mʉ chi ariɗe Jesusɗe ijãa nureerã ome akʉ ɓuu (Juan 13:34, 35).

KÃARE KOSA BIA UNUƊE WÃSAA:

Mʉa jãabera serbikau kĩra sentiwẽa; mʉa ariɗe kuitaa ɓuu ne bia uruburuu, mauɗe mʉ bida kakua kĩrajʉʉ ãrĩã. Mʉa kʉ̃risiakaa mʉ dau pãriu niiɗebena, maamina waabenadu ũkuru Bibliaɗebena jaradeɗeka ɓua. Mʉ siɗa dawaraurã konrekasionɗebenabʉ mauɗe jaradeɗeka ɓua konkrekasion ara kaita ɓeerãɗebenamaa, mʉ ãrĩãdu kĩrajʉʉ ɓuu diskurso deabariiɗeeba araa ẽbẽra ãrĩãdu wãuribadaa.

2010ɗe mʉ graduasii chi Escuela de Entrenamiento Ministerial abadauɗebena (iɗibea mau trʉ̃ a ɓuu Eskuela Dachi Akõre Kobierno ʉ̃rʉbena Jaradeabadaurã baita) Salvadorɗe. Nau eskuelaba mʉ aude biʼia aiɗabiyua mʉ ãbarã. Chi aria kawa ɓuuba mʉ kʉ̃risiabisii Jeowaba mʉ kʉ̃riapeɗa ua nibayu, mauɗe barikiau ẽbẽraba ichia kʉ̃ria ɓuu asebi ɓua.

Jesusba jarasii: “Ãrĩãdu kĩrajʉʉ ɓuu dearuuba adauruu kãyabãra” (Hechos 20:35). Mʉ ãrĩãdu kĩrajʉʉ nii, mʉa adua basia naka nibai ɓoosii, jãabera mʉa waabenarã ãrĩãdu aiɗa ɓuu unui ɓua.