¿Bichia jaradea kʉ̃ria ɓue ẽbẽrarãmaa do ʉaɗe wãburuuɗe ɓeda jidauruu kĩraka?

1. ¿Kãare jarasaa Jesusba ɓeda jidau panuurã kimare duanuumaa, mauɗe ãchia kãare asesiɗaa?

CHI discipulorã Pedro, Andrés, Santiago mauɗe Juan ɓeda jidaubadaurã basii mauɗe kʉ̃risiawẽa ɓeesiɗau Jesusba naka jarasiiɗe: “Mʉ baara wã́duru. Machiba ɓeda jidaubadau kĩra mʉʉba machimaa jaradeai ẽbẽrarã mʉʉmaa eneeɗamera”.b Maabea ¿maarãba kãare asesiɗaa? Bibliaba naka jara ɓuu: “Ara makʉɗe ãchi jãba […] ɓʉiɗapeɗa Jesús baara wãsiɗau” (Mat. 4:18-22, Biblia Chamí, WPS.). Ãchia ɓeda jidau basii ida ɓusiɗau mauɗe ẽbẽrarãmaa jaradeaɗe ẽpesasiɗaa (Luc. 5:10). Iɗibea, Jesusba jara ɓuu ẽbẽrarã biarã araɓau kĩra aseɗai baita (Mat. 28:19, 20). ¿Bichira Jesús beɗea ũri ɓobaaka ẽbẽrarãmaa jaradeai baita?

2. ¿Sakayua biʼia kʉ̃risiaɗaiba dachia ẽbẽramaa jaradeaɗai baita, mauɗe kãareba aiɗaɗaiba nau aseɗayua?

² Bichi tiempo ãrĩã Bibliaɗebena estudiamaa ɓuubʉrã mauɗe jaradeaɗe wãi kʉ̃ria ɓuubʉrã. Bichia adua ɓuubʉrã Jesusba jara ɓoosii kĩra asei baita, preocuparã́ba. Bichia kuitaa ɓuu jãu importante ãrĩã ɓuu bẽrã, biʼia ɓuudu ase kʉ̃ria ɓuu. Bibliaɗe jara ɓuu Pedro ichi kõpaerorã “isa” chi ãtarraya ɓuisiɗaumina jãarãba biʼia kʉ̃risiasiɗau jãu aseɗai naeɗe. 6 mes basiiɗe Jesusmaa unusiɗau, mauɗe ãchia kuitaabachiɗau Jesús chi karebabariibʉ (Juan 1:35-42). Araɓau kĩra, bichi ãrĩã kawapeɗaaɗa baɗa Jeowa mauɗe Jesús ʉ̃rʉbena, mauɗe maucha kawa kʉ̃ria ɓuma. Madu, nau asei naeɗe biʼia kʉ̃risia baraai. ¿Kãare asesiɗaa Pedro, Andrés mauɗe ãchi kõpaerorã Jesús beɗea ũriɗai naeɗe?

3. ¿Kãare cosarã kimare ɓuu aseɗayua Jesusba jaraɗa kĩraka?

³ Chi nabena Jesús kaaɗe ãdabadaurãba Jesusba jaraɗa kĩra ase kʉ̃riaɗapeɗa, ãrĩã kawaɗapeɗa, kĩra ʉɓʉa ãrĩã nureasiɗau, mauɗe apii ɓookabachiɗau. Jãuɗeeba ãchia biʼia jaradeabachiɗau. Nau articuloɗeeba kawaɗayua saka ãchi kĩraka nureaɗai baita.

KAWABIBA JEOWA Ʉ̃RɄBENA KĨRAJɄɄ ÃRĨÃDU

4. ¿Sakayua Pedro ɓeda jidau nibasaa?

⁴ Pedro ɓeda jidau nibachia ichi deɗabena ochiai baita. Maamina ichi kĩrajʉʉ ãrĩã ɓoosia, ichi ɓeda jidauɗe wãa ɓoosiiɗe kĩrajʉʉ ãrĩãbi basii (Juan 21:3, 9-15). Biʼia ãrĩã busta ɓoosii ẽbẽrarãmaa jaradeɗekai baita. Jeowa juaɗeeba biʼia jaradeabachii (Hech. 2:14, 41).

5. 1) Lucas 5:8-11ɗe jara ɓuuchaa, ¿sakayua Pedro pera nibasaa? 2) Chi Biblia estudia nii Pedro kĩraka kʉ̃risia niibʉrã, ¿kãareba aiɗai ɓua?

⁵ Waabenarãmaa jaradeabadau Jeowa kʉ̃ria uabadauɗeeba. Poyaa aseebai kʉ̃risia panuubʉrã, Jeowa kʉ̃riabadau bẽrã aseɗai ɓua. Jesusba Pedromaa jara ɓoosiiɗe jaradeaɗe wãi baita, ichia naka asii: “Bʉ jãabera perawẽa” asii ( Lucas 5:8-11 leas). Pedro pera sentiibasii Jesús kaaɗe ãdai baita. Ichia kuitaa ɓoosia Jesús poder ãrĩã bara ɓoosii bẽrã, ɓeda ãrĩã jidau basiiɗeeba, ichia kʉ̃risiabachia poyaawẽe basia asei baita Jesús kĩraka. ¿Bichi jãka senti ɓue? ¿Bichi baita chaarea ɓue Jesús kaaɗe ãdayua? Jãka pasa ɓuubʉrã, berekas Jeowa aude kʉ̃riai baita, Jesús mauɗe waabenarã siɗa, jãu aseeruuba Jesusba jara ɓuu kĩra ase kʉ̃riayua, mauɗe waabenarãmaa jaradeayua (Mat. 22:37, 39; Juan 14:15).

6. ¿Sakayua ẽbẽrarãmaa jaradeaɗe wã kʉ̃ria duanua?

⁶ Kawaɗaika sakayua jaradeaɗe wãɗaiba. Naa dachia Jesús beɗea akawa ũri kʉ̃riabadauɗeeba, ichia naka jarasii: “Jaradeaɗe wã́sturu mʉ kaaɗe duanabii baita” (Mat. 28:19, 20). Mauɗe ẽbẽrarã “miichuburi panasiiɗeeba, kĩra nomaa panasiɗauɗeeba”, mauɗe ãchi isa kawa nestabadau Dachi Akõre Kobierno ʉ̃rʉbena (Mat. 9:36). Jeowaba “kʉ̃ria ɓuu jomaurãba chi biawãra beɗea kuitaapeɗaaɗa kachiruaɗebena karibaɗai” (1 Tim. 2:4, Biblia Chamí, WPS.).

7. Romanos 10:13-15ɗe jara ɓuu kĩraka, ¿sakayua biʼia ãrĩã ɓobaama junebenarãmaa kawabiayua?

⁷ Nauɗe kʉ̃risiaba: chi ɓeda jidaubariiba ɓeda jidaubarii nedobʉi baita o maebʉrã koɗai baita, maka ɓumina dachirãba ẽbẽrarãmaa jaradeabadau maarã biuɗawẽa nureaɗai baita (Romanos 10:13-15 leas; 1 Tim. 4:16).

ÃRĨÃ KAWABA

8, 9. ¿Kãare kawa nibaiba ɓeda jidaubariiba, mauɗe sakayua?

⁸ Jesús nama iujãaɗe nibasiiɗe, chi ɓeda jidaubadaurã Israelɗebenaba ãchia kuitaa nureasii kãare ɓeda jidauɗai ɓuu (Lev. 11:9-12). Mauɗe kuitaa nureai basia sama unuɗai ɓuu. Chi ɓeda eɗa baniaɗe nuree chi bania biʼia ɓua ãchi baita, mauɗe chi chiko koɗai ãrĩã ãchi baita, mauɗe biʼia ãrĩã ɓua kuitaayua chi hora biʼia ɓuu wãi baita. Nau chi ãba isla Pacificoɗe beɗeaɗa baɗa misionero ome. Chi misioneroba naka asii: “9 dapeɗeeɗa unuɗaika ɓeda jidauɗai baita”. Maka ɓumina chi ãba chekeba naka panausii: “Maka ɓuuwẽe, wãɗayua chi hora ɓeda barauɗaa”.

⁹ Araɓau kĩra, chi ẽbẽrarã siglo naeɗebena jaradeaɗe wauribachiɗau sama unuɗai ɓuu chi ẽbẽrarã ãrĩã. Jari, chi Jesús kaaɗe ãdabadaurãba temploɗe jaradeabachiɗau, sinagogaɗe, decha, plaza nerkaoɗebenaɗe (Hech. 5:42; 17:17; 18:4). Dachirã biɗa kuitaaɗai ɓua kãaredu bustabadau chi ẽbẽraba daiba jaradeaɗe wãbadaumaa vivi nureerã. Biʼia kʉ̃risiaɗai ɓua sama unuɗai ɓuu chi ẽbẽra ãrĩã mau kãare horaɗe (1 Cor. 9:19-23).

10. ¿Kãare dea ɓua organización Jeowaɗeba biʼia kawabiayua?

¹⁰ Chi ɓeda jidaubadaurãba chi jidauɗayu ãrĩã bara nureaɗapeɗa kuitaa nureaɗayua saka adauɗayu. Dachirã biɗa. Jesusba biʼia jaradeɗekasii ichi kaaɗe ãdabadaurãmaa saka biʼia jaradeaɗai baita. Jara ɓoosii kãare adauɗayua, sama jaradeaɗe mauɗe kãare jaraɗai (Mat. 10:5-7; Luc. 10:1-11). Iɗibea, chi organizacionba deabarii chi kit enseñanzaɗebena biʼia jaradeaɗai baita.c Maarãɗeeba peraɗawẽa jaradeaɗai ɓua junebenamaa (2 Tim. 2:15).

KĨRA ɄƁɄA ÃRĨÃ NIBABA

11. ¿Sakayua kĩra ʉɓʉa ãrĩã nibaiba Dachi Akõre ʉ̃rʉbena jaradeɗekaɗayua?

¹¹ Ɓeda jidaubarii nibayua, kĩra ʉɓʉa ãrĩã nibayua, ɓooyua ẽsebuɗe biɗa trajayu kue ãrĩã che kuɓuu siɗa. Bibliaɗebena jaradeabadau siɗa kĩra ʉɓʉa nureaɗayua. Dachia jaradea koɓeeburuuɗe mauɗe dachi Jeowaɗebena Jaranureerã aburuuɗe, ɓoobaria chi deɗabena dachi kaaɗe ãdaɗayu dachiɗebena kachirua jaraɗayua, maebʉrã dachi amikorãba dachiɗebena atua jaraɗayu, mauɗe chi ẽbẽrarãba ũriɗa kʉ̃riaɗawẽe dachi beɗea. Maamina dachia kuitaa nurea kãare pasayu, Jesusba jaraɗaa ɓuekayu chi kaaɗe ãda nureerã ẽbẽra kachiruarã baara (Mat. 10:16).

12. Josúe 1:7-9ɗe jara ɓuu kĩraka, ¿saka kĩra ʉɓʉa ãrĩã nibaiba?

¹² ¿Saka kĩra ʉɓʉa ãrĩã nibaiba? Naa kawaba, Jesusba bajãaɗeeba ichidu naa tʉa kãrii (Juan 16:33; Apoc. 14:14-16). Maaɗakare, ijãaba maucha Jeowaba ara jãka cuidayua (Mat. 6:32-34). Ichiɗe ãrĩã ijãaruubʉrã aude kĩra ʉɓʉa nibayua. Pedro mauɗe junebenarã biɗa ãrĩã ijãapeɗaaɗa ãchi trajo ida ɓuɗapeɗa Jesús kaaɗe ãdaɗayua. Bichia biɗa ijãaɗa baɗa jarasiiɗe bichi amikorã mauɗe deɗabenamaa kawa kʉ̃ria nibasii Bibliaɗebena Jeowaɗebena Jaranuree baara, jãabea reunionɗaa wã koɓeeɗa. Bichia asebarii baɗa ida kuɓuuɗaa Jeowaba jara nii kĩraka aseɗayua. Bichi ara jãka kĩra ʉɓʉa niibʉrã, Jeowa ara bichi baara nibayua ( Josué 1:7-9 leas).

13. ¿Jeowamaa wiɗipeɗa mauɗe kawa kʉ̃risiaruuɗe, ¿bichi saka kĩra ʉɓʉa ãrĩã nibaiba?

¹³ ¿Bichi saka kĩra ʉɓʉa ãrĩã nibaiba? Wiɗiba Jeowamaa kĩra ʉɓʉa ãrĩã nibai baita (Hech. 4:29, 31). Ichia panauyua maabea ida ɓuebayua. Ara jãka aiɗayua. Kʉ̃risiaba saka karibaɗa Jeowaba ichi baita trajapeɗaaɗa baɗa naeɗebenarã. Mauɗe kʉ̃risiaba saka ichia bichi aiɗa ɓuu poyaabai kuɓuuɗe mauɗe bichi chaareabibaria biʼia ɓee asei baita. Jeowaba ichi puuru aiɗasiiɗe chi mar Rojoɗeeba wãbiayua, bichi siɗa ichia aiɗayua Jesús kaaɗe ãdai baita (Éx. 14:13). Kʉ̃risiai ɓua chi salmistaba naka jaraɗa: ”‏Jeowa mʉ baara ɓua, mʉ peraabayua. ¿Kãare aseiba mukĩraba?”‏ (Sal. 118:6).

14. ¿Bichia kãare kawarua Masae mauɗe Tomoyoɗe baara?

¹⁴ Bichia biɗa kʉ̃risiai ɓua Jeowaba saka aiɗabarii ẽbẽra pera ãrĩã nii kĩra ʉɓʉa ãrĩã nibabii baita. Naka pasaɗa nawekau aɓa chi trʉ̃ Masae. Ichi ãrĩã perabachia mauɗeeba junebena kĩrapeta poyaa jaraabai nibasia. Jãu ichi baita chaarea ɓoosii ea mechibena nuɓuu kĩra. Mauɗeeba ãrĩã kʉ̃riaɗa basia Jeowa mauɗe waabenarã. Kuitaa nibasii importante ãrĩã ɓuu jaradeayu Jeowa ʉ̃rʉbena mauɗe Dachi Akõremaa wiɗiɗa baɗa aiɗabiyua mauchaburu jaradea kʉ̃ria nii bayua. Jãuɗeeba ichia peraabasii, asta ichi precursora regular ba wãsii. Jeowa biɗa aiɗai ɓua uruburu ichi ʉ̃rʉbena jaradeamaa panuu kĩra ʉɓʉa nureaɗai baita, Josué 1:7, 9ba jara ɓuu kĩra. Jãka pasaɗa basia chi nawekau Tomoyo. Ichi uruburu ẽpesasiiɗe jaradeaburuu decha, chi nabena hora wausiiɗe wẽra aɓa niiba naka biasia: “¡Akawa kawa kʉ̃riawẽma Jeowaɗebena Jaranuree!”, maabea chi poraa jʉ̃atasia. Ichi nomaa basia, maabea ichi kõpaeramaa naka jarasia: “Mʉa akawa jaraabasma, chi wẽraba kuitaa ɓoosia mʉ Jeowaɗebena nii. ¡Jãu biʹia ɓua!”. Tomoyo jãabera precursora regular nii.

BICHI DU AƁA BEREKA ASEI CHI KɄ̃RISIA ƁUU

15. ¿Saka dachi du aɓa bereka asei chi kʉ̃risia ɓuu, mau sakayua biʼia ãrĩã ɓobaama Jesusɗe ijãa nuree baita?

¹⁵ Dachi du aɓa bereka asei chi kʉ̃risia ɓuuɗe asebadau, ase kʉ̃riawẽe kuɓuu siɗa. Mukĩra ɓeda aribia jidaubarii dapeɗeeɗa piradrubarii, akawa joma trajaaruuɗaa ɓeebaria kue ãrĩã che kuɓuu siɗa. Dachi Jeowa baita traja nureerã dachi chaarea trajabaraaɗai choroaɗai baita akawa trajaburuuɗaa (Mat. 10:22).

16. ¿Kãareba aiɗa ɓobaama koʼoaswẽa nibaɗayua?

¹⁶ Nacesiɗauɗeeɗa dachi bereka aseɗakaa chi biʼia ɓuu. Biʼia aseɗai baita dachi kakuaba waubai panuu dachia waubi panuu. Jãuɗéburu nesita panua Jeowaba Dachi aiɗayua ichi jauriɗeeba (Gál. 5:22, 23).

17. Pabloba 1 Corintios 9:25-27ɗe, ¿kãare jarasaa koʼoaswẽa nibaɗayua?

¹⁷ Pabloba asebachia chi aseyu kuɓuu mauɗeeba ichi kakuaba waubai ɓuu ichia waubibachia ( 1 Corintios 9:​25-27 leas). Jaraɗa baɗa cristianorãmaa kʉ̃risiaɗai baita chi biʼia ɓuudu aseɗayu ”‏joma kawa arikʉɗeburu asébaɗa” (1 Cor. 14:40). Náturu chi aseɗayu ɓuu aseɗai baita Jesusba dachimaa asebiɗa kĩraka (Hech. 2:46).

API ƁOORÃ́BA

18. ¿Kãare aseɗaiba Jeowa kĩrajʉʉbiɗayua dachi ase nuree kakua?

¹⁸ Ɓeda jidaubarii niiba aribia jidausiibʉrã kuitaa nia biʼia wãsii. Maka ɓumina, dai baraa biʼia wãsii aɗakaa bariara ãrĩã ẽbẽrarã organización Jeowaɗaa neebudau siɗa (Luc. 8:11-15). Mauchaburu jara paneebudauɗe chi beɗea bia junebenarãmaa Jeowa kĩrajʉʉ ãrĩã ɓeeyua dachi ase nuree kakua. ¿Sakayua? Ichi beɗea mauɗe ichi Warr beɗea akawa ũrimaa panuuɗeeba (Mar. 13:10; Hech. 5:28, 29).

19, 20. ¿Sakayua dachia aude kawabia nibayu Jeowaɗebena iɗibea?

¹⁹ Chi ɓee puururãɗe, ida ɓeda jidaubibadau chi ɓee mesrã añoɗebenaɗe. Jãarã mes acabai wauruuɗe chi ɓeda jidaubadaurã bereka aribia jidauɗayua chi ɓeda. Dachirã biɗa kuitaa panuu bẽrã chi acababuruu ara kaita kuɓuu bẽrã bereka mauchaburu jaradeaɗayua. Chi diarã ɓiɗĩikaburu koɓeesia jaradeayua ẽbẽrarãmaa. Kʉ̃risiarã́ba joma jipa ɓooyu aiɗa jaradeaɗayua Jeowaɗebena (Ecl. 11:4).

²⁰ Berekayua aude aseyua kawayu mauchaburu chi Bibliaɗe, kĩra ʉɓʉa nibayua, bereka aseyua chi asei kuɓuu. Bereka koɓooyua chi 8 millón aude Jeowaɗebena jara nuree baara joma nau iujãaɗe barau mauɗe bichi “Jeowaba […] kĩrajʉʉ nureabi ɓuu” (Neh. 8:10). Bereka jaradea koɓooba ãrĩãdu asta Jeowaba acabasma aaruuɗaa. Artículo warebenaɗe kawaɗayua õbeaɗebena bereka mauchaburu jaradea kʉ̃riayua Dachi Akõre Gobierno ʉ̃rʉbena.