¿Jesusba saka dachi aiɗa ɓua?
Chi Bibliaba panau ɓuu
Jesús biusii ẽbẽrarã jipa nureerã karebai baita (Mateo 20:28). Mauɗeeba chi Bibliaba jara ɓuu Jesús iujãaɗebenarã karebabarii nii (1 Juan 4:14). Bibliaba naka jara ɓuu: “Mauɗeeba Jesucristoɗéburu ijãaduubʉrã, Dachi Akõreba dachi kastikaabai dachiba kachirua waupeɗaaɗa kakua. Ichi awara, Dachi Akõreba aɓa biɗa nau iujãaɗe ɓuubasii ẽbẽrarã” karebayua (Hechos 4:12, Biblia Chamí, WPS.).
Jesús biusii ẽbẽrarã ichiɗe ijãabadaurã kakua (Hebreos 2:9; Juan 3:16). Maaɗakare, Dachi Akõreba Jesús waya piradruɗakare ʉtaa wãbipeɗa ángel kĩra babiyua (Hechos 3:15). Bibliaba nau siɗa jara ɓua “chi ichiɗeeba Dachi Akõremaa needuu joma poyaa karibai ewaricha chokae nureaɗamẽra. Biukauɗeeba ewaricha dachi baita Dachi Akõremaa chi chuburia iɗibarii” (Hebreos 7:25, Biblia Chamí, WPS.).
¿Sakayua dachia nesitabadaa Jesusba Dachi Akõremaa wiɗiyua dachi kakua?
Jomaurã jipa nureaɗawẽe (Romanos 3:23). Dachi biubadau chi pekaoɗeeba mauɗe Dachi Akõre kaita akawa nureaɗaabai (Romanos 6:23). Jesús abogado kĩra aiɗabarii nii joma ẽbẽrarã ichiɗe ijãa nuree (1 Juan 2:1). Jesús dachi kakua biusii bẽrã dachia ʉtaa wiɗiiruuɗe ichia Dachi Akõremaa ũribiyua mauɗe dachi pekao perdonabiyua (Mateo 1:21; Romanos 8:34). Jesusba Dachi Akõre bustabariidu wiɗibarii bẽrã Dachi Akõreba ũripeɗa asebarii chi joma Jesusba wiɗiɗa baɗa. Dachi Akõreba Jesús nau iujãaɗaa ɓuisii ẽbẽrarã karebakuayua (Juan 3:17).
¿Jesusɗe ijãa nibayua jã́turu aseɗayue dachi karebabiyua?
Makawẽma. Dachia Jesusɗe ijãa niibʉrã dachi karebabiyua ara jã́turu aseɗaabayua, mauchaburu asebaraaɗai (Hechos 16:30, 31). Bibliaba naka a ɓuu: “Biuɗa jauri wãꞌãe nii. Ara mau kĩra Dachi Akõreɗe ijãa ɓuu a ɓuuba biꞌia wauwẽebʉrã, biawãra ijãawẽa ɓuu. Ichiba ijãa ɓuu a ɓuu ẽbẽra biuɗa kĩra nii” (Santiago 2:26, Biblia Chamí, WPS.). Dachi karebaɗayua naka asebaraaɗai:
Kawaɗayua Jesús mauɗe ichi Akõre ʉ̃rʉbena, ichi trʉ̃ Jeowabʉ (Juan 17:3).
Ãchiɗe ijãabaraaɗai (Juan 12:44; 14:1).
Dachia ãchiɗe ijãa nureebʉrã joma ãchia jarabudau jãka aseɗayua (Lucas 6:46; 1 Juan 2:17). Jesusba jaraɗa baɗa jomaurãba “Señor” a nureerã jãu joma karebaɗaabayua, Dachi Akõreba kʉ̃riaburuu ase nureerãdu karebaɗayua (Mateo 7:21).
Dachi ne kachirua pasaburuu mina, Jesús mauɗe Dachi Akõreɗéburu ijãaɗayua. Jesusba jara ɓoosii chi ẽbẽra choroaburuu chi kaaɗe uruburuuɗaa jã́turu Dachi Akõreba karebayua (Mateo 24:13).