¿Chi Biblia Dachi Akõreɗebena neesaaka?

1. ¿Kaiba ɓʉbisaa chi Biblia?

Bibliaɗe eɗa ɓʉkuɓua chi beɗea kĩrawãrea dachirã nau iujãaɗe biuɗawẽa duanaiɗebena (Salmo 37:29). Bibliaɗe 66 librochekerã duanua, mauɗe Dachi Akõreba 40 mukĩrarã kĩrajipakiruremaa ɓʉbisia. Chi librorã 5 naa ɓʉkuɓeera Moisesmaa ɓʉbisia 3.500 año basii, mauɗe chi libro kaɗeara Apocalipsis 1900 año basii Juanba ɓʉɗabaɗa. Bibliaɗe Dachi Akõreba kʉ̃risiaɓuu eɗa ɓʉkuɓua. Ichia ichi Jauriɗeeba Biblia ɓʉbiasia (2 Samuel 23:2). Mukĩrarãba ãchia kʉ̃risiabudau ɓʉɗaabasia, bari Dachi Akõreba kʉ̃risiaɓuudu ɓʉpeɗaaɗabasia. Mauɗeeburu, chi Bibliara Jeowaburu wauɗaa. 2 Timoteo 3:16; 2 Pedro 1:20, 21 leas.

2. ¿Saka kuitaapanaa Bibliaba ariɗe jaraɓuu?

Bibliaɗe eɗa chi kãare ariɗe uruburuu ʉ̃rʉbena jaraɓuu mauɗe jãara ẽbẽrarãba poyaa jaraɗaabai ɓua (Josué 23:14). Dachi Akõreburu ichidu poder ãrea baraɓuuɗeeba jãu jarai ɓua. Mauɗeeburu dachia kuitaapanua chi Biblia Dachi Akõreɗeeburu neeɓuua. Isaías 42:9; 46:10 leas.

Libro Dachi Akõreɗeeba uruɓuubʉrã, makara jãma eɗa kosa biarã baraa. Chi Bibliaɗera eɗa maka ɓʉkuɓuu. Bibliaɗebena ara jãka ɓʉkoɓee ãreadu deɗekapanua beɗearã ãreaɗe. Chi jãma eɗa ɓʉkoɓee yataɗeeɗa ɓʉpeɗaaɗamina ariɗe deaɓua iɗi kuitaapanuu ome. Mauɗe, chi 40 mukĩrarãba mau ɓʉpeɗaaɗabaɗa ãchi chiya añaa jaraɗakaa. Jãma eɗa ɓʉkuɓuuba dachirãmaa unubiɓua Dachi Akõreba dachirã ãrea kʉ̃ria uanii. Iɗi biɗa Bibliaba ẽbẽrarã kosa kachirua asei baɗa chi biadu asebiɓua. Mauɗeeba, ẽbẽrarã ãreaba jarabadau chi Biblia Dachi Akõre beɗea apanua. 1 Tesalonicenses 2:13 leas.

3. ¿Kãare ʉ̃rʉbena beɗeaɓua Bibliaɗe?

Bibliaɗe beɗea kĩrawãrearã eɗa ɓea jaraɓua: kãare kosarã biarã Dachi Akõreba dachirã baita uneiɗebena. Maubapeɗa dachirã naeɗeeɗa biuɗawẽa iujãa kĩrawãrea ãrea kiruuɗe duanaɗai baɗa mauɗe chi nau iujãa waya aude kĩrawãrea ɓuuɗe bayu ʉ̃rʉbena siɗa jaraɓua. Apocalipsis 21:4, 5 leas.

Bibliaɗe leirã baraa, Dachi Akõre kʉ̃risia baare mauɗe konsejo ɓee. Jeowaba saka ẽbẽrarã kawa ochiakuabarii ʉ̃rʉbena jaraɓuma, jãuba unubiɓua ichi saka nii. Mauɗeeba, Bibliaba dachirãmaa Dachi Akõre biʼia unukawabipeɗa mauɗe jaradeaɓua ichi ome saka amiko nureaɗai. Salmo 19:7, 11; Santiago 2:23; 4:8 leas.

4. ¿Dachia saka biʼia kawaɗaiba Bibliaɗebena?

Jesusba testo Bibliaɗebena aɓa jararuuɗe, ichia jomaurãmaa biʼia kawabiabachia. Ara jãka nau poyetoɗe biɗa testorã Bibliaɗebena ɓoapeɗa mambea biʼia jaradeaɓua kãare ʉ̃rʉbena jarakʉ̃riaɓuu. Lucas 24:27, 45 leas.

Dachi Akõre beɗea kĩrawãreadu ɓuu. Maamina, barau ẽbẽrarã Bibliaɗebena ũrikʉ̃riaɗawẽ, mauɗe chi nuree chi jãuɗebena beɗeakʉ̃riaɗawẽ. Maamina, mau kakua, maũcha kawai baɗa ida ɓuirãaba. Bichia Dachi Akõre ʉ̃rʉbena unukawaɓuubʉrã maũcha nibaɗe wãi ɓua. Juan 17:3 leas.