Chi Bibliaɗe eɗa kuɓuu Dachi Akõre Beɗea dachirã baita

Jeowaba dachirãmaa biʼia ɓuu dea ɓua: chi 66 librorã Bibliaɗe eɗa kuɓuu. Bichia kawa kʉ̃risiai ɓuu: “¿Samabena neesaa chi Biblia? ¿Kaiba ɓʉbisaa?”. Kawaɗayua nauɗebena, ochiaɗaika saka chi Beɗea Dachi Akõreɗe neesii waa iɗiiɗaa.

1. Chi Biblia mukĩrarãba ɓʉsiɗaubʉrã, ¿sakayua Dachi Akõre Beɗea abadaa?

Chi Biblia ɓʉsiɗau mukĩrarã 40 niɗauba, ãchi traja nureasii aɓa ɓuu trajoɗewẽe, mauɗe chi nuree chi nejarra ãrĩã bara nureapeɗa mauɗe junebena wãʼãe nureasii. Chi año 1513ɗe Jesús naeɗe, Biblia ɓʉ erdausiɗau mauɗe akawa ɓʉtasiɗau año 98ɗe Jesús kaaɗe. Mauɗéburu, 1.600 años demorasiɗau joma ɓʉɗayua. Maka ɓumina, chi Bibliaɗe june ãyaa ɓuuwẽe. ¿Mau sakayua ariɗe ɓua? Mau Dachi Akõreburu ɓʉbisii bẽrã (1 Tesalonicenses 2:13 leas). Naarã mukĩrarãba ɓʉɗaabasia ãchi kʉ̃risiaɗe ɓuu. Bari, “Dachi Akõreɗeburu beɗeasiɗau ichi Jauriɗeeba” (2 Pedro 1:​21).a Dachi Akõreba ichi kʉ̃risiaɗe ɓuu ɓʉbisii mukĩrarãmaa ichi Jauriɗeeba (2 Timoteo 3:16).

2. ¿Kairãba inibaɗai ɓua chi Biblia?

Ẽbẽrarã “joma puuruɗebenarã, junebena druaɗebenarã, diwara beɗea nureerãɗebena”, maarãba kawaɗai ɓua chi Bibliaba biʼia jara ɓuuɗebena (Apocalipsis 14:6 leas). Dachi Akõreba joma asesia chi Biblia beɗearã ãrĩãɗe tradusibari ɓooyua. Jãdu nau iujãaɗebena libro aude tradusibari ɓuubʉ. Nau iujãa jomauɗe kawaɗai ɓua chi Bibliaɗe jara ɓuu, bariara ãi bibi nureerã biɗa mauɗe diwara beɗea nureerã biɗa.

3. ¿Kãare asesaa Jeowaba chi Biblia akababiimaaba?

Chi Biblia ɓʉsiɗau bura koɓeeɗe jãarã waubachiɗau papel isa kõa diɗibariiɗeburu ãnimara eba mauɗe chi bakuru eba, mau papiro abadau. Maka ɓumina, chi mukĩrarãba Biblia kʉ̃ria ãrĩã nureerãba kawa kʉ̃risiaɗapeɗa waukasiɗau copiarã ãrĩãdu juaɗeeba. Bariara ẽbẽra ãrĩãrãba akaba kʉ̃riasiɗamina chi Biblia, ẽbẽrarã biuɗai ɓuu adua, jãu kuidasiɗaa. Jeowaba idaarabiwẽa ẽbẽra aɓauba ni junebenaba ichi ome beɗeabiɗaabai. Chi Bibliaba naka jara ɓua: “Chi Beɗea Dachi Akõreɗe, waaburu ɓooyua” (Isaías 40:8).

AUDE KAWABA

4. Chi Bibliaba jara ɓua kaiba jãu ɓʉbisii

BIDEO ochiábaɗa. Mauɗe 2 Timoteo 3:16 leaɗapeɗa, mambea nau ʉ̃rʉbena beɗeasturu:

BIDEO: ¿Kaiba ɓʉbisaa chi Biblia? (Bideo ɓaʼãra) (2:48)

• Chi Biblia mukĩrarãba ɓʉsiɗaubʉrã, ¿sakayua Dachi Akõre Beɗea abadaa?

• Dachi Akõreba ɓʉbisii ichi Beɗea mukĩrarãmaa, ¿bichi baita maka ɓubaaka?

5. Chi Biblia choroasii bariara akaba kʉ̃riasiɗamina

BIDEO: Ãchia chi Biblia awa panasii (Bideo ɓaʼãra William Tyndale) (6:17)

• Bichia kawaaruuba chi Biblia ãrĩãdu choroasii bariara jãu akabaɗai berekasiɗau siɗa, ¿jãu kakua bichia aude leayua kʉ̃ria ɓue? ¿Sakayua?

Salmo 119:97 leaɗapeɗa, mambea nau ʉ̃rʉbena beɗeasturu:

• ¿Sakayua ẽbẽrarã ãrĩã bariara biuɗai duanuu adua ãrĩã tradusiɗapeɗa deɗeka kopanuu chi Biblia?

6. Libro aɓa ɓuu jomaurã baita

Chi Bibliadu aude tradusiɗapeɗa maabea nau iujãa jomauɗe deɗeka kopanuu. Hechos 10:​34, 35 leaɗapeɗa, mambea nau ʉ̃rʉbena beɗeasturu:

• ¿Sakayua Dachi Akõreba ichi Beɗeaɗebena tradusibi kʉ̃ria ɓua diwara beɗea nureerã baita, mauɗe sakayua jãu joma nau iujãaɗe deɗeka kʉ̃ria ɓua?

• ¿Kãaredu aude bustabaraa chi Bibliaɗebena?

NAU KAWASIƊAA

Bibliadu chi Dachi Akõre Beɗea ɓuu, ichiaburu joma asesia jomaurã ẽbẽrarãba inibaɗayua.

Waya berreaɗaika

• ¿Saka asesaa Dachi Akõreba chi Biblia ɓʉbiyua?

• ¿Saka kʉ̃risia ɓua chi Biblia berekasiɗaa akabataɗayua maamina poyaaɗaabasii? ¿Saka kʉ̃risia ɓua chi Biblia tradusiɗapeɗa waaburu deɗeka duanuuɗebena?

• ¿Bichi saka senti nia chi Dachi Akõreba asesii bichi ome beɗeayua Bibliaɗeeba?

NAU SIƊA OCHIAS MAUCHABURU KAWAYUA

Kawas Biblia ʉ̃rʉbena: naeɗebenarã ɓʉpeɗaaɗa mauɗe iɗibeabena Bibliarã.

“Saka neesaa Biblia dairãmaa” (¡Despertad!, noviembre 2007ɗebena)

Leas saka chi Biblia choroasia bariara jãu ɓʉpeɗaaɗa basii chi papel isa kõa wãbariiɗe, mauɗe jãu inibayu idaraabikabachiɗau siɗa, mauɗe jãu kambiaɗai kʉ̃risiasiɗau siɗa.

“Chi Biblia choroasia waa iɗiɗaa” (Chi Kartaba, 2016ɗebena chi 4)

Ochiáse saka chi nuree biuɗai panasii Biblia tradusibudauɗeeba.

Ãchia chi Biblia awa panasii (14:26)

Copiarã ãrĩã barau Bibliaɗebena tradusipeɗaaɗa. ¿Saka jipa kawa duanaa dachia chi Dachi Akõreba jaraɗa baɗa ara maka kambiawẽa ɓuu?

“¿Nau Biblia kambiasiɗau makawẽebʉrã ãyaa maucha ɓʉsiɗaka?” (Artículo jw.org ɗebena)