LESION 11
¿Bichia saka biʼia kawai ɓua chi Bibliaba jara ɓuu?
Bichia kʉ̃risiachãu iujãa ira ɓuu chi mau bichia ponai baita, maabea bichia adua samareeba adauyu. Chi nau trajo ãrĩã chaarea ɓuu sentiimaaba, bichia ɓaʼãra ɓaʼãra asei ɓua. Ara maka ɓoabaria Biblia leai baita. Bʉa naka kʉ̃risiai ɓua: “¿Mʉa samareeba leai ɓua?”. Dachia nau lesionɗe biʼiaburu kawabudau saka chi Biblia kĩrajʉʉ leai koʼoaɗaiswẽa.
1. ¿Sakayua biʼia ɓua chi Biblia dachia noremaacha leaɗayu?
Chi ẽbẽraba “Jeowa ley”, maebʉrã chi Biblia noremaacha lea ɓuu jãra biʼia kĩrajʉʉ nibapeɗa biʼia wãi (Salmo 1:1-3 leas). Makarã, berekas noremaacha ɓaʼãra leai. Bichia aude kawaburuuɗe Bibliaɗebena, ãrĩãburu kʉ̃ria ɓeei ɓua leai baita.
2. ¿Bichia saka biʼia kawai ɓua chi Bibliaba jara ɓuu?
Dachia Biblia leabudauɗe biʼiaburu kʉ̃risiaɗai lea panuuɗebena. Dachia nau libro leabudauɗe ara jãkaburu sea leaɗaabai, bari chi eɗa panuu ʉ̃rʉbena biʼiaburu “kʉ̃risia kopaneeɗai” (Josué 1:8). Bichia leamaa ɓuuɗe, naka kʉ̃risiáse: “¿Kãare jara ɓua chi jãu versiculoba Jeowa ʉ̃rʉbena? ¿Dachia kãare aseɗai ɓua ara mama jara ɓuu kĩra? ¿Dachia saka kʉ̃risiaɗai ɓua chi dachia kawaɗapeɗa arabenamaa jaradeaɗai baita?”.
3. ¿Bichia saka jʉrʉi ɓua tiempo Biblia leai baita?
¿Bichimaa ãrĩã chaarea ɓue tiempo jʉrʉi Biblia leai baita? Dachimaa ãrĩã maka pasabaria. Berekas “chi tiempo bichia bara kiruu aribia adauruuka aseyua” (Efesios 5:16). Hora jʉrʉs noremaacha leai baita. Chi ɓee ẽbẽrarã dapeɗeɗaburu leabadaa chi Biblia, mauɗe chi nuree chiko koɗapeɗaaɗakareburu lea kʉ̃riabadaa. Mauɗe chi ɓee ẽbẽrarã kãi paneei naeɗe, leabadaa. ¿Bichimaa chi sãu hora biʼia ɓeei ɓua?
AUDE KAWABA
Dachia kawaɗai saka chi Biblia kĩrajʉʉ leaɗayu. Eɗakare jara ɓua saka estudiai naeɗe biʼia kawaɗai ɓua mauɗe Bibliaɗebena biʼiaburu kawaɗai baita.
Chiko dachia naeɗe kokabachii ãrĩã bustasii kĩra, ara jãka busta ɓeei ɓua Biblia leaburuu.
4. Kawaba saka chi Biblia kĩrajʉʉ leayu
Chi nuree baita chaarea ɓoobaria Biblia lea koɓeeyua. Dachi chi chiko nabena ko kʉ̃riaɗakabachii, chi Biblia siɗa ara mau kĩraka dachia akawa lea kʉ̃riaɗakabachii, maka ɓumina jãu chiko kooruuɗe biʼia ɓuu senti ɓua. Makarã ara mau kĩra chi Biblia dachia lea “kʉ̃ria kopaneebadaa”. 1 Pedro 2:2 leaɗapeɗa, mambea nau ʉ̃rʉbena beɗeasturu:
¿Bichia chi Biblia noremaacha learã, makarã ãrĩã bustai ɓue lea ɓeei baita?
BIDEO ochiábaɗa, unukuayua chi waarã kũudrãarã maarãba Biblia lea kʉ̃ria kopeneesiɗau. Mambea nau ʉ̃rʉbena beɗeasturu:
¿Chi jãarã kũudrãarã sakayua Biblia lea kʉ̃riaɗakabachaa?
¿Kãare asesiɗaa jãarãba Biblia lea panuu ida ɓuɗaamaaba?
¿Kãare asesiɗaa Biblia kĩrajʉʉ lea kʉ̃ria kopaneei baita?
Bichia naka asei ɓuu Biblia lea koɓeei baita:
Jʉrʉs Biblia biʼia beɗea ɓuu mauɗe beɗea ãrĩã chaarea ɓee baraa ɓuurãwẽe. Jʉrʉs chi Traducción del Nuevo Mundo bichi beɗeaɗe kuɓuubʉrã.
Lea koɓees chi bichia lea kʉ̃ria ɓuudu. Chi tabla “¿Saka lea koɓeei ɓua chi Biblia?”, jãuɗe unui ɓua bichia bustaburuu.
Ɓʉ kãribase bichia lea kãrii ʉ̃rʉbena. Ɓʉse chi tablaɗe “Bʉa nama ɓʉ kuɓus Bibliaɗebena lea kãrii ʉ̃rʉbena”, nau libroɗe ɓuu.
Ira koɓooi aplicación JW Library®. Celularɗe maebʉrã tableɗe deskarka ɓuubʉrã, leapeɗa ũrii ɓua chi Biblia ãyaa wãburuuɗe biɗa.
Apéndice chi Traducción del Nuevo Mundo ɗebena leas. Mama aria unui ɓua mapa, tabla, mauɗe beɗea chaarea ũrikaurã biʼia jara ɓuu.
5. Estudiai naeɗe naa biʼia kawaɗauba
Salmo 119:34 leaɗapeɗa, mambea nau ʉ̃rʉbena beɗeasturu:
¿Sakayua biʼia ɓua dachia naa ʉtaa wiɗii chi Biblia leai naeɗe maebʉrã estudio baita kawai naeɗe?
¿Bichia saka biʼia kawai ɓua bichimaa jaradeabudauɗe? Bichia chi lesiona nau libroɗebena kawaburuuɗe, nau berekachase:
Leas chi párrafo joma chi nabena jara kuɓuu lesionaɗebena.
Jʉrʉs chi textorã Bibliaɗe, maabea leapeɗa kʉ̃risiáse chi Bibliaɗe ara maka jara ɓuu kawa.
Arriatase chi beɗearã panau ɓee chi wiɗi ɓeeɗebena. Bichia chi lesion estudia koɓooɗa ara mauɗeeba waya kawai ɓua bichimaa jaradeabarii omeeba.
¿Bichia kuitaa ɓoosee?
Dai Jeowa ɗebena Jaranũrẽba Bibliarã kabanaarã estudia panua. Maka ɓumina, daiba ira pana kʉ̃riabarii chi Traducción del Nuevo Mundo ɗebenadu. Ichia jãu jipa waa jarapeɗa mauɗe biʼiaburu kawabia ɓuu, maubapeɗa jãma eɗa chi Dachi Akõre trʉ̃ nee ɓuuɗeeba (ochias chi artículo jw.org ɗebena: “¿Jeowa ɗebena Jaranũrẽrã chi Biblia inuree ãyaa ɓea junebenaɗeebiɗa?”).
CHI NUREE ẼBẼRARÃBA NAKA JARABADAA: “Mʉ baita chaarea ɓoobaria Biblia leapeɗa kawai baita. Mʉ tiempo wãʼãe mauɗe akawa lea kʉ̃riawẽa koɓeebarii”.
¿Bichiara saka kʉ̃risia ɓua?
NAU KAWASIƊAA
Bichia Bibliaɗebena biʼia kawai baita, ara kapichia lease ara mau chi horaɗe, Dachi Akõremaa wiɗis leamaa ɓuu kawabiyua mauɗe estudiai baita naaburu biʼia kawase.
Waya berreaɗaika
¿Bichia kãare asei ɓua Bibliaɗebena biʼia kawai baita?
¿Kãare hora biʼia ɓee ɓua chi Biblia leai baita?
¿Sakayua biʼia ɓua kawa koɓeei estudiai naeɗe?
NAU OCHIAS MAUCHABURU KAWAYUA
Kʉ̃risiaba chi ɓeerãɗebenaba bichi aiɗai ɓua aude kawayua Bibliaɗebena learuuɗe.
“Kĩrajʉʉ ãrĩã koɓeese chi Biblia leamaa ɓuuba” (Chi Kartaba, 2017ɗebena chi 1)
Ochiaba chi õbeaɗebena saka leayu chi Biblia.
“¿Saka Bibliaba aiɗai ɓua mʉ? Parte aɓa: Jʉrʉs netaa kĩra ɓee Bibliaɗe” (Artículo jw.org ɗebena)
Kawaba saka ãrĩã bustai ɓuu chi Biblia leayu.
Unuchãu saka jara panuu ẽbẽra ãrĩãba Bibliaɗebena tiempo yataɗeeɗabena leamaa ɓuuɗe.