¿Kãare jaraɓua Bibliaɗe kãare sakabudau chi relijionamaa?

1. ¿Joma relijiona biʼia ɓeebaka?

Joma relijionɗe ẽbẽrarã biakiruree baraa Dachi Akõreɗe kʉ̃risianuree. Naarã ẽbẽrarã Dachi Akõreba kawa ochiapeɗa ãchiɗe kʉ̃risiania. Mia chuburi, jãarã relijion kakua nejoma kachiruarã asepanua (2 Corintios 4:3, 4; 11:13-15). Notisiaɗe dachia ũribadau wabenarã relijionɗebena chĩoɗayua wãuribadau, warchekerã siɗa embiolaɗapeɗa mauɗe nejoma kachirua asekuabadau aɓabena beaɗayua. Ẽbẽrarã sõbiakirureerãba ũribudauɗe ãchiɗe ijãaɗawẽa duaneebadaa. Mateo 24:3-5, 11, 12 leas.

Chi relijion ariɗe jaradeaɓuubara Jeowa respetapanabaria, wabenarã relijion setaa jaraduanuubara Dachi Akõredu kĩrubipanua. Jãarãba Dachi Akõre ʉ̃rʉbena setaa jaraɗapeɗa, kãare sãabarii dachi biupeɗaaɗakare ʉ̃rʉbena biɗa jarabadau, maarã Bibliaɗe eɗa ɓʉkuɓuuwẽ. Maamina, Jeowaba kʉ̃riaɓuu ẽbẽrarãba ichi ʉ̃rʉbena ariɗe kawaɗai baita. Ezequiel 18:4; 1 Timoteo 2:3-5 leas.

2. ¿Kãare jaraɓua Bibliaɗe kãare sakabudau chi relijionamaa?

Dachi Akõreba ida enkañabikau wabenarã relijiosorãba ichi kʉ̃rianiɗau abudauɗe. Ãchia kachirua asebadau chi jʉbawẽnii juaɗe duanuu kĩra (Santiago 4:4). Bibliaba ẽbẽrarã chi relijion setaa jaraɓuuɗe duanuu “Babilonia Choromaɗebena” a trʉ̃jaraɓua. Jãka trʉ̃asii chi puuru chi relijion setaa jarabariiɗebena neesii Noe diaɗe Kue mimichia cheɗakare. Dachi Akõreba relijiona setaa jaraɓuu kawawẽa akuɓuuɗe akabaiɗaa iraɓua. Naarã relijionaba ẽbẽrarã daño aseɗapeɗa mauɗe setaa jaraduanua. Apocalipsis 17:1, 2, 5, 16, 17; 18:8 leas.

Maamina, Jeowaba kuitaaɓuu sãarã ẽbẽrarã biarã relijion setaa jarabadauɗe duanuu nama iujãaɗe, ichia ambua buekamaaɓuu relijion ariɗe jaraɓuuɗaa, biawãra ʉ̃rʉbena jaradeɗekai baita. Miqueas 4:2, 5 leas.

3. ¿Kãare aseɗaiba ẽbẽrarã sõbiakirureeba?

Jeowaba kʉ̃risia uaɓua ẽbẽrarã biawarã ʉ̃rʉbena kawaɗakʉ̃riapanuu mauɗe chi bia aseɗai kʉ̃riaduanuu. Mauɗeeba jaraɓua chi relijion setaa jaraɓuu ɓuiɗai baita. Ãchia Dachi Akõre ariɗe kʉ̃riapanuubʉrã kambiaɗayua chi ne kachirua asepanuuɗebena ichi kĩrajʉʉbiɗayua. Apocalipsis 18:4 leas.

Jesus biuɗakare, ãrea ẽbẽrarã sõbiakirureeba kĩrajʉʉ ũrisiɗaa chi beɗea apostolerãba jaradeapeɗaaɗa. Jeowaba jãarã ẽbẽrarãmaa chi biʼia nureaɗaiɗebena jaradeɗekasia mauɗe kĩrajʉʉduanaɗai kãare aseɗai ãchi bida ome. Ãchi kĩraka, dachirã biɗa ũribaraɗai beɗea Bibliaɗe ɓʉkuɓuu Jeowadu naa kuɓuɗapeɗa. 1 Tesalonicenses 1:8, 9; 2:13 leas.

Ẽbẽrarãba chi relijion setaa jaraɓuu ɓuiɗapeɗa mambea chi relijion ariɗe jaraɓuuɗaa wãbudau, Jeowaba ãchi kĩrajʉʉ adaukuabaria. Jãarã joma ichi amikorã baɗai mauɗe dachi ãbachekerã Jesusɗe ijãanureeba kʉ̃ria adauɗayua mambea biuɗawẽa nureaɗai. ¿Bichia jãu ne biarã unukʉ̃riaɓue? Marcos 10:29, 30; 2 Corintios 6:17, 18 leas.

4. ¿Kãare aserua Dachi Akõreba pas nau iujãaɗe ɓuyua mauɗe ẽbẽrarã kĩrajʉʉnureabiɗai baita?

Jeowaba chi relijion setaa jaraɓuu akababuruuɗe, nau iujãaɗe jomaurã biʼia duanaɗayua. Nau relijionba ẽbẽrarã waa setaa jaradeɗekaabai ni waa ẽbẽrarã awara awaraa buekaabai. Joma ẽbẽrarãba ũriɗapeɗa kʉ̃riaɗai Dachi Akõre aɓaniidu. ¿Bʉmaa nau beɗea chi mipitaa ãrea ɓuume? Apocalipsis 18:20, 21; 21:3, 4 leas.