Dachi Akõreba nabena mukĩra wẽra baara wauɗa basia

Jeowaba drua mipitaa kiruu wau ɓoosii, Edén abadau. Chi nau drua mipitaa ãrĩã kiruu neponorã, kiɗuarã, bakururã mauɗe ãnimararã siɗa ãrĩã bara ɓoosia. Maaɗakare, Jeowaba wausii chi nabena mukĩra, Adán abadau. Jeowaba ioroba wauɗa baɗa maabae Adán kũɗe eɗa jãripuaɗa baɗa. ¿Kuitaa ɓuẽ kãare pasaɗa maaɗakare? ¡Mau tõpe chi ẽbẽra chokae nibaɗe wãsii! Jeowaba Adanmaa jãu drua ochia ua nibapeɗa mauɗe joma ãnimara chekerã trʉ̃ jarakuábaɗe aɗa baɗa.

Jeowaba nau siɗa jaraɗa basia Adanmaa: “Koi ɓua chi jõ barikiau bakuruɗebena, maka ɓumina aɓa nuɓua jãmabena koobai. Bichia jãu jõ bakuruɗebena kooruubʉrã, biuyua”.

Maabae, Jeowaba naka jara ɓoosii: “Mʉa wauyu aɓa ẽbẽra Adán aiɗa nibai baita”. Jeowaba Adán kãi nuɓubisii, chi Adán orr aɓa ɓuuba chi wẽra wauɗa basii. Chi wẽra Eva basia. Adán Eva ome jãarã́turu naa nibapeɗaaɗa. ¿Saka ɓeeɗa basaa Adán ichi wẽra unusiiɗe? Ichia ãrĩã kĩrajʉʉpeɗa naka jaraɗaa: “¡Ochiábaɗa Jeowaba saka wausii mʉ orrɗebenaba! ¡Ay ɗuuya! Ichi mʉ kĩraka nii”.

Jeowaba jaraɗa baɗa Adán mauɗe Evamaa warrarã ãrĩã́turu adau nibaɗayu nau iujãaɗe. Jeowaba kʉ̃ria ɓoosia ãchi kĩrajʉʉ traja nibapeɗa joma nau iujãa mipitaa kiruu babiiduumisa, drua mipitaa Edenɗebena kĩraka. Maamina makawẽe basii. ¿Sakayua? Mauɗebena kawaɗaika chi lección warebenaɗe.