Jacoba adauɗa chi akõreba deai aɗa

Isaac 40 año nibaɗa Rebeca ome kimabaraasiiɗe. Ichia ichi wẽra kʉ̃ria ãrĩã unibasia. Maaɗakare ãchia warrarã gemelo adaupeɗaaɗa.

Chi imina warr Esaú basii, mauɗe chi kaaɗebena Jacob basii. Esaú modeɗaa ãnimara beaɗe ãrĩã wãbachia. Maamina, Jacob aude bustabachii deɗe ɓeeyua.

Yataɗeeɗa, akõre biusiiɗe ichi warr iminamaa drua maebʉrã chi nejarra aude deabachiɗau chi kaaɗebena warr kãyabãra. Mau herencia abadau. Maka ɓumina, Isaac deɗabenarã baita chi herencia drua maebʉrã chi nejarradu ɓuwẽe basii. ¿Kãare maucha adauɗayua? Ãchirãɗeeba neeyua joma Jeowaba deayu jaraɗa baɗa Abrahanmaa. Jacoba kʉ̃risiaɗa baɗa mau chi bia ãrĩã ɓoosii, Esaubara jãka kʉ̃risiawẽe basii.

Día aɓa ɓuuɗe, Esauba chi día joma ãnimararã beasiiɗeeba ãrĩã ãkaa nee ɓoosii. Deemaa neesiiɗe, Jacoba chiko piumaa chuumaa ɓuu, maabae Esauba jarasii: “¡Mʉ jarrbaba biumaa ɓuma! ¡Mʉʉmaa dease jari purea chuumaa ɓuu!”. Jacoba naka asii: “Maerã, maamina mʉʉmaa jarase mʉa adaui ɓuu mʉ akõreba bichimaa deai aɗa baɗa”. Esauba maabae jaraɗa: “¡Jãu mʉ baita balewẽa ɓuu akawa! Jãu bichia adaus. Mʉa koyúturu kʉ̃ria ɓuu”. Chi Esauba jaraɗa baɗa, ¿jãu biʼia ɓoosẽe? Makawẽma. Ichia kʉ̃risiasii chi chiko aude ɓoosia chi Jeowaba deayu jaraɗa baɗa kãyabãra.

Isaac chõra nibasiiɗe, ichi imina warr Esaumaa chi biʼia ɓuudu deayua. Maka ɓumina, Rebecaba aiɗasii Jacobmaa mau adauyua. Esauba mau kawasiiɗe, ichi ãba bea kʉ̃riaɗa baɗa ãrĩã kĩru ɓuuɗeeba. Isaac Rebeca omeeba Jacob kareba kʉ̃ria panasii, mauɗeeba naka jarasiɗau: “Wãse bichi tío Labanmaa, maabae jãma ɓeeba bichi ãba Esaú kĩruwẽa ɓeeruuɗaa”. Jacoba ũrisii chi akõrerãba jarasiɗauɗebena mauɗe isa wãsii ichi ãbamaa beabiimaaba.