Jacob Esaú ome kĩru nibapeɗaaɗa waya meraa nibaɗe wãsiɗau

Jeowaba Jacobmaa jaraɗa ichia ochia ua nibayua, jari Abrahán Isaac baara ochia ua nibaɗa kĩra. Maabae Jacob nibaɗe wãsii drua Harán abadauɗe. Jãma kimabaraapeɗa, warrarã mauɗe chi nejarra ãrĩã adausii.

Maabae, Jeowaba Jacobmaa jarasii: “Waya wãs bichi akõrerã nibasiɗaumaa” aɗa basii. Jacob wãsiɗaa ichi deɗabenarã baara, bariara kaitawẽe ãrĩã ɓosmina. Oɗe niɗauɗe, ichi baita traja nibabadauba jarasiɗau ichimaa: “Bichi ãba Esaú uruuburuu 400 mukĩrarã baara”. Jacob ãrĩã peraɗa baɗa Esauba kachirua asei ɓua ichi mauɗe ichi warrarãmaa. Mauɗeeba ʉtaa wiɗisii Jeowamaa: “Mʉ ochia nibaba, mʉ ãbaba mʉ kachirua asei idaarabirã́ba”. Norema Jacoba ãrĩã bʉekasii Esaú baita: oejarã, cabrarã, pakarã, camellorã mauɗe burrorã siɗa.

Mau ẽsabuɗe, Jacob du aɓa ɓuuɗe unusii chi ángel. Maabae chi ángel ichi ome chĩo koɓeeɗa dapeɗeeɗaa. Jacob ichi puʼua ɓosmina chĩomaa ɓoosii. Angelba jarasia: “Mʉ ida bʉes”. Jacoba jarasia: “Makawẽma, naa bichia mʉʉmaa bibuara ɓuu jarase maabea mʉa ida bʉeyua”.

Maaɗakare, angelba chi bibuara ɓuu jarasii Jacobmaa. Mauɗeeba Jacoba kuitaa ɓoosii Esauba kachirua asei baɗa Jeowaba ida asebiibai ɓuu.

Jãu dapeɗe, Jacoba unusii Esaú ichi 400 mukĩrarã baara neemaa panuu. Jacob pira wãsii unuyua Esaú ome, jãabae Jacob kĩadarr jeeɗa koɓeeɗa Esaú kĩraare, 7 ɓes ara jãka ase ɓoosii. Esaú pira wãɗa baɗa Jacob oresii. Omea jẽa kopaneesii mauɗe waya ãbua nibasiɗau. ¿Jeowaba bustasaaka chi Jacoba asesiiɗebena?

Maaɗakare, Esaú waya wãsii ichi deeɗaa, Jacob wãsii ichi wãi baɗaɗaa. Jacob 12 warrarã baraaɗa baɗa: Rubén, Simeón, Leví, Judá, Dan, Neftalí, Gad, Aser, Isacar, Zabulón, José mauɗe Benjamín. Earaɓa, Jeowaba karebasii ichi puuru Joseɗeeba. ¿Kawa kʉ̃ria ɓuẽ saka aseɗa baɗa? Kawaɗaika.