¿Kãare aseiba Dachi Akõre Kobiernoba?

¿DACHI AKÕRE KOBIERNOBA KÃARE ASESAA?

Naeɗebena artikuloɗe, kawasiɗaa Jesusba jaraɗabaɗa ʉ̃rʉbena. Dachia unupanuuba kuitaapanuu Jesus Rei kĩra Dachi Akõre Kobiernoɗebena ʉtʉ bajãaɗe ɓeesii.

Bibliaba jaraɓuu Jesus ʉtʉ bajãaɗe kobernakoɓeesiiɗe chi naa asesira, ichia Satanas ichi demoniorã baare awara buekasia. Jãarãba nama iujãaɗeburu nejoma aseduanua, mauɗeeburu 1914ɗeeɗa ne kachirua aude unukopaneesia (Apocalipsis 12:7, 9).

Nau iujãa aude miaɗaa koɓeeruumina, Jesus, chi Rei Dachi Akõre Kobiernoɗebenaba, nejoma asekirua ẽbẽrarã baita. Ichia uaɓua iujãaɗe chi Bibliaɗebena jaradeɗekabudau, ichia jaraɗaa jãu aseɗaiɗebena mauɗe ẽbẽrarã ãrea aiɗaɓuu chi Bibliaɗebena kawabudau asebudauba (Isaías 2:2-4). Maarã ẽbẽrarã kawasiɗaa traju baitaburu panaɗaabai, deeɗabena ome biʼia duanaɗai siɗa, chi joma baraanureedu kʉ̃riaɗapeɗa madu naa ochiaɗai siɗa ɓuiɗayua. Bibliaba ũkuru ãchi biʼia nibaɗe wãbiɓua mauɗe ẽbẽra bia baɗai baita Dachi Akõreba awara buekaɗabaɗa ichi Kobierno baita.

¿KÃARE ASEIƊE KUƁUA DACHI AKÕRE KOBIERNOBA?

Jesus ʉtʉ bajãaɗe kobernaɓuumina, ẽbẽrarãba nama iujãaɗe kobernaduanua ara maka. Maamina Dachi Akõreba Jesusmaa nakaasia: “Kobernaɓoaba bichi kĩramaaduanuumina” (Salmo 110:2). Jesusba ichi kĩramaaduanuu akabaiɗaa uaɓua mauɗe chi problema barau siɗa akabayua ẽbẽrarã ichi baare duanaɗakʉ̃riapanuuɗe.

Dachi Akõre Kobiernoba nau aseburua:

• Relijion setaa jaraɓee akabai. Bibliaba chi relijiona setaa jaraɓeerã wẽra jari ichi kakua neɗoɓuenibabarii kĩra jaraɓua, jãara nauɗe beabudau. Jãuɗeeba chi relijiona setaa jaradeɗekapanuu Dachi Akõre ʉ̃rʉbena mauɗe ẽbẽrarã biʼia biɗa nureabiaɗawẽ nurepaaɗe wãɗawẽa. Ãchi kenatabudau joma ẽbẽrarã baita pera ochiaɗayua (Apocalipsis 17:15, 16).

• Ẽbẽrarã nama iujãaɗe kobernanuree siɗa akabayua. Dachi Akõre Kobiernoba joma kobierno barau akababiyua (Apocalipsis 19:15, 17, 18).

• Ẽbẽrarã kachiruarã siɗa joma kenakuayua. ¿Kãare sakabudaa ẽbẽrarã waa ne kachirua aseduanuu mauɗe Dachi Akõre beɗea ũriɗakʉ̃riaɗawẽ? “Chi ẽbẽrarã kachiruarã nama iujãaɗebena jarekuaɗayua” (Proverbios 2:22).

• Chi jʉbawẽnii ichi demoniorã ome akabaɗayua. Chi jʉbawẽnii ichi demoniorã ome “ẽbẽrarã puuru choromaɗebenarãmaa setaa jaraɗaabayua” (Apocalipsis 20:3, 10).

¿Mauɗe sakaɗaiba ẽbẽrarã Dachi Akõre Kobierno akare duanaɗakʉ̃riapanuu?

¿KÃARE ASEIBA DACHI AKÕRE KOBIERNOBA ẼBẼRARÃ KAKUA?

Ʉtʉ bajãareba, Jesucristoba nejoma aseyua ẽbẽra nama iujãaɗe kobernaniiɗeebiɗa. Mauɗe ichi ũkuru ẽbẽrarã 144 mil ambua kobernabudaa ẽbẽrarã taẽɗebena jʉrʉpeɗaaɗarã baare (Apocalipsis 5:9, 10; 14:1, 3). Ichia Dachi Akõreba kʉ̃riaɓuu nau iujãaɗe asebiyua. ¿Kãare aseiba Dachi Akõre Kobiernoba ẽbẽrarã kakua?

• Ẽbẽrarã ẽpermaɗapeɗa biubiaabayua. “Ẽbẽra aɓa biɗa: ‘Mʉ ẽpermoɓumaʼ aɗaabai” mauɗe “biubiabarii baɗa wãʼãe bai” (Isaías 33:24; Apocalipsis 21:4).

• Pas mauɗe dauchiakirureaɗai deayua. “Chi pas bichi warrarãɗe aribia ɓooyua” mauɗe “aɓa aɓaa akaduaneeɗai ãchia chi uba uupeɗaaɗabaɗa ekare mauɗe breba bakuru ekare akaduanaɗai, mauɗe waabenarãba perabiɗaabayua” (Isaías 54:13; Miqueas 4:4).

• Trajo ariɗekiruu deɗekayua. “Mʉa jʉrʉkuaɗabaɗa ãchia trajapeɗaaɗabaɗa ãreatu bustaɗayua. Bariarã trajaɗaabai” (Isaías 65:22, 23).

• Iujãa kachiruakeɗeaɗabaɗa ɓeeɗa biʼiakeɗeepaaɗe wãyua. “Drua sirukua wãʼãeɓuuɗe mauɗe iujãa põesaaɓeera kĩrajʉʉ ãrea duanaɗayua, mauɗe chi iujãa koriiɓuuɗe bania unukaumare ãrea kĩrajʉʉɓeeyua mauɗe nepono moɗeɗebena kĩraka ponokoɓeeyua” (Isaías 35:1).

• Waabenarã ẽbẽrarãmaa jaradeɗekai kãare aseɗaiba biuwẽa nureaɗai baitaɗebena. “Waa chokae nibayua bichi ʉ̃rʉbena kawabaraɗai, chi Dachi Akõre aɓaburunii bẽrã, mauɗe chi bichia bueɗabaɗa ʉ̃rʉbena, Jesucristo” (Juan 17:3).

Dachi Akõreba kʉ̃riaɓuura bichia nau joma biʼiakeɗee kĩrajʉʉ auyua (Isaías 48:18). Aɓabena artikuloɗe kawayua kãare saka asei ɓuu ara nauɗe nama bibinibayua.