¿Saka Jesús biuɗaba ‘jomaurã aiɗa ɓuaʼ?
Chi Bibliaba panau ɓuu
Jeowaba Jesús biuɗa baɗaɗeeba ẽbẽrarãmaa karebakuayua ãchi pekaoswẽa nibapeɗa mauɗe biuɗaamaaba. Chi Bibliaba jara ɓuu Jesús oa chesiiɗeeba Dachi Akõreba dachi kachiruaɗebena karebasii (Efesios 1:7; 1 Pedro 1:18, 19). Mauɗeeba Jesusba jarasii “ichi chokae nibaɗa deayua kabanaarã pekao kakua karebayua” (Mateo 20:28).
¿Sakayua Jesús ichi chokae nibaɗa dea ɓoosaa “kabanaarã pekao kakua karebayua”?
Chi mukĩra naa Jeowaba wauɗa baɗa jipa nibaɗa basia, Adán abadau pekaoswẽa nibasii. Dachi Akõreba Adán wau ɓoosii biuɗawẽa nibai baita maamina ichia Dachi Akõre beɗea ũriɗaabasiiɗeeba biuyua (Génesis 3:17-19). Adán ichi pekao aseɗaɗeeba chi warrarã adausiɗau siɗa pekao baara (Romanos 5:12). Bibliaba jara ɓuu Adanba ichi pekao warrarãmaa deapeɗa mauɗeeba biubadau (Romanos 7:14). Ẽbẽrarã pekao baara nureeɗeeba waabenarã pekaoswẽa nureabiɗaabayua (Salmo 49:7, 8).
Dachi Akõreba miachuburi ãrĩã sentisia chi Adán warrarã baɗa unusiiɗe ãchi kawaɗawẽa duanasiiɗeeba (Juan 3:16). Dachi Akõre jipa nii bẽrã, ichia bariarã perdonaabai basii (Salmo 89:14; Romanos 3:23-26). Dachi Akõreba dachi chi kʉ̃ria ãrĩã ua niiɗeeba ichia perdonasia mauɗe pekaoswẽa nureabiɗayua (Romanos 5:6-8). Mau asei baita Dachi Akõreba Jesús nau iujãaɗaa bʉesii jomaurã aiɗayua.
Jesús biuɗaba jomaurã aiɗai ɓua, ¿mau kãareba?
Bibliaba jara ɓuuɗe chi beɗea aiɗai ɓua maebʉrã karebakuayua, maarã beɗearã naka jara ɓua:
Jãuburu paabaria junebena kakua (Números 3:46, 47).
Paaburuuba junebena karebabaria chi naa perdeɗa baɗa waya adaubaria (Éxodo 21:30).
Chi paaburuu ara aɓau ɓooyua chi perdeɗa baɗáturu.a
Kawaɗaika saka chi aretea jaraɗa baɗa araɓau ɓuu chi Jesús aseɗa baɗa ome.
Jãuburu paabaria junebena kakua. Chi Bibliaba jara ɓuu chi cristianorãɗebena “Dachi Akõreba machi nedosii” (1 Corintios 6:20, Biblia Chamí, WPS.; 7:23). Jesús oaba paasii mauɗeeburu “ẽbẽrarã didiwaraacha jomaɗebena, beɗea didiwaraacha jomaɗebena, puurucha mauɗe drua jomaɗebena chi nuree nedosii” (Apocalipsis 5:8, 9, Biblia Chamí, WPS.).
Junebena karebabaria. Chi Jesús biuɗaba dachi kachirua ase nureeɗebena karebasii (1 Corintios 1:30; Colosenses 1:14; Hebreos 9:15).
Ara aɓau ɓuu Adán perdeɗa baɗa. Jesús jipa nibaɗa Adán kĩraka ichi vida deasii mauba paasii Adán perdeɗa baɗa (1 Corintios 15:21, 22, 45, 46). Chi Bibliaba naka jara ɓuu: “Ẽbẽra aɓaba [Adán] Dachi Akõreba jaraɗa waubasiiɗeeba ẽbẽrarã ãrea kachirua waubadaurã paneesiɗau. Mauɗe ẽbẽra aɓaba [Jesucristo] ichiba jaraɗa joma wausiiɗeeba ẽbẽrarã ãrea Dachi Akõreba jipa nuree a jarai” (Romanos 5:19, Biblia Chamí, WPS.). Nauba kawabi ɓuu chi biuɗa aɓa ẽbẽra aɓaburu karebakuayua ãrĩã pekadorna nureerãmaa. Mauɗeeba Jesusba ichi vida “deasia joma ẽbẽrarã aiɗakuayua” ãchi karebaɗa kʉ̃ria nureerã (1 Timoteo 2:5, 6).
a Chi beɗearã chi Bibliaba ɓʉɗa baɗa “karebayua” a ɓuuɗe paapeɗa junebena adauyua jara ɓuu. Por ejemplo, chi beɗea hebreoɗe kafár abadau “tapayu” kĩraka ɓuu (Génesis 6:14). Chi Bibliaba nau beɗea jara ɓuuɗe dachi pekaorã perdonaiɗebena jara ɓuu (Salmo 65:3). Chi beɗea kófer abadau nau chi dachi paayuɗe junebena karebai baita ɓuu (Éxodo 21:30). Chi beɗea griegoɗe lýtron abadau jãu beɗeaba “karebayuɗebena” a ɓuu mauɗe mau siɗa jãuburu “paabaria junebena kakua karebai baita” (Mateo 20:28). Chi ẽbẽrarã griegoɗe ɓʉbasiɗauba jãka beɗea ɓʉsiɗau jarayua chi paaɗayuɗebena guerraɗe o aɓa bari traja nibabii baita odoepeɗaaɗa baɗa karebayua.