KŨUDRÃARÃ AWẼRARÃ OMEBA WIƊI PANUU
¿Saka Bibliaba aiɗai ɓua mʉ? Parte ome: Kawase chi Bibliaɗebena leaburuu ãrĩãdu bustai baita
“Bibliaba bichi aburribarii kĩra senti ɓua. Maamina aburribiburuudu bichia Biblia biʼia leawẽebʉrã”, mau jara ɓua kũudrãaba ichi trʉ̃ Will.
¿Bichia bustai ɓue kawayu Biblia leaburuuɗe bichia aude bustai baita? Nama jara kuɓuuba bichi aiɗayua.
Chi bichia leamaa ɓuu kĩrabara dauba unuuruu kĩra leas
Kawa kʉ̃risias kĩrabara bichi chi leamaa ɓuuɗe eɗa akʉ nuɓuu kĩra:
Jʉrʉs Bibliaɗebena jara ɓuu bichia kawa kʉ̃ria ɓuu. Chi Bibliaɗe pasapeɗaaɗa eɗa jara ɓuu, Jesús ʉ̃rʉbena jara ɓuu, maebʉrã jw.org ɗe eɗa jarabari ɓuu ũriɗai baita.
Leas chi Bibliaɗebena jara ɓuu. Bichi istu leai ɓuu maebʉrã jĩwa leai ɓuu deɗabenarã maebʉrã amikorã ome. Aɓa nii ẽbẽraba nebʉrʉbarii kĩra leai ɓuu mauɗe waarã leai panuu chi junebenarã ẽbẽra jara panuu kĩra.
Berekas nau asei baita:
Diujo aseba waarãmaa jarayua chi yataɗeeɗa pasa ɓoaɗa. Ɓʉchãu ɓaʼãra nau diujo kãare jara kʉ̃ria ɓuu ʉ̃rʉbena.
Ẽbẽra aɓaburu bichia bustaaruu maabea kuadro kĩra waupeɗa mama aria ichi ne biarã aseɗa baɗa mama ɓʉ ɓuekai, mauɗe kãare ne bia adausii ɓʉchãu siɗa.
Nau ẽbẽra kĩrabara bichia ne joma wiɗiiruu kĩra aseba. Jãma bichia chi nau ẽbẽramaa “wiɗikai” ɓuma mauɗe waabenarã ẽbẽrarãmaa biɗa chi ãchia kãare unusiɗau ʉ̃rʉbena.
Ẽbẽra aɓa bichia lea ɓuuɗebena ãyaa aseɗabasirã, kʉ̃risiachãu saka ichi biʼia asei baɗa basirã. Kʉ̃risiachãu saka Pedroba aseɗa baɗa, ichia Jesús unukau aɗa basiiɗe (Marcos 14:66-72). ¿Pedroba nama saka ãyaa kʉ̃risia ɓoosama chi ẽbẽrarãba ne joma jara kopaneesiiɗe?
Bichia kʉ̃riabʉrã, ɓʉse bichia pasaɗa baɗa ʉ̃rʉbena Bibliaɗe eɗa lea ɓoosii kĩra. Mauɗe ɓʉchãu kãare bichia kawaɗa baɗa Bibliaɗe eɗa ɓʉ kuɓuu ʉ̃rʉbena (Romanos 15:4).
Kʉ̃risias kĩrabara bichia chi leamaa ɓuuɗe eɗa akʉ nuɓuu kĩra
Kawa jʉrʉs
Kawa kʉ̃risiarã bichia chi joma Bibliaɗe pasaɗa baɗa, bichia unui ɓua kĩrabara perlarã meraa keɗeerã unuuruu kĩra. Ɓesesɗe aɓa ɓuu maebʉrã ome ɓuu beɗearãba dachimaa arikʉɗe kawabiɗai ɓua.
Bichia kawa ochias saka a ɓuu Mateo 28:7 mauɗe Marcos 16:7ɗe jara ɓuu ome.
¿Sakayua jarasaa Marcosba Jesusba ichi kaaɗe ãda nureerãmaa “mauɗe Pedromaa” waya unubiyu?
Aiɗa ɓuu: Marcos aria wãʼãe basia; maamina Pedroba joma jarasii.
Biʼia ɓuu Bibliaɗebena: ¿Sakayua Pedro biʼia ãrĩã akʉ ɓeesaa Jesusba ichi waya unu kʉ̃ria ɓuu kawasiiɗe? (Marcos 14:66-72). ¿Jesusba saka unubisaa Pedromaa ichira amiko ariɗe kiɗii? ¿Saka bichia ara Jesús kĩra asei ɓua bichi amiko bia kiɗiiba kʉ̃ria niibʉrã?
Bichia leaburuuɗe kĩrabara eɗa ɓuu kĩra sentiyua mauɗe waaburu jãu ʉ̃rʉbena kawaaruuɗe, makaburu bichia chi leaburuu Bibliaɗe aude bustai ɓua.