Chi Dachi Akõre Kobiernoɗebena beɗeabadaurãba jarabadaa
Jãabera kĩrajʉʉ ɓeesia
JESUSBA jarabarii ichia unukua nii ichi oeja chekerã (Juan 10:14). Chi ẽbẽra corazón biʼia nii, bustakau chĩoyu, bustabarii jipa nibayu, makarã mauba bustayua kawayu chi Jesús kaaɗe tʉa nureerãɗebena. Makarã ichi siɗa kĩrajʉʉ ãrĩã nibayua, wẽra Belgicaɗebena pasaɗa kĩra. Cha naubʉ chi historia:
“Jeowa ɗebena Jaranũrẽrã neesiɗau mʉ deemaa, mʉ ãrĩã nomaapeɗa mʉ du aɓa biuidu kʉ̃ria nibaɗa. Mʉá jarasiɗau chi problema iujãaɗebena acababuruu jãu mʉa bustaɗaa, chi mʉa bustawẽebasii jarasiɗau bari Dachi Akõreburu mau aseyu. ocho año ba ɓoosii iglesiaɗaa wãwẽa nii, mʉa bustawẽebasiiba chi setaa jarabadau jãmaria. Mʉa kawasii chi Jeowa ɗebena Jaranũrẽrãba chi ariɗe ɓúdu jarabadau Dachi Akõrewãe poyaa nibawẽa.
”Ãchi neebachiɗaa mʉ deemaa, maka ɓumina waya beɗeaɗaabasii. Mʉ kachirua ãrĩã sentiɗa baɗa. Día aɓauɗe caja ome cigarrillo dobachii, mauɗe drogarã siɗa do ɓeeɗa baɗa. Mʉ papito biuɗa baɗa ome beɗea kʉ̃ria ɓooɗa, jãuɗeeburu mʉa bustaɗa baɗa chi espiritismoɗebena. ¡Kachirua wãsma! Jãu aseɗaɗeeba, ẽsebuɗe du aɓa ɓeeruuɗe, sentibachii chi demonio neeburuu. Tiempo ãrĩã́turu mʉ kachirua ãrĩã sentibipeɗaaɗaa. Ẽsebuɗe mʉ ãrĩã perabachii du aɓa ɓeeyu.
”Día ɓoosii mʉ ãda wãsiiɗe, junebena oɗeburu wãɗaa, mʉ neesiimare unusii edificio mechibena ɓuu waumaa panuu. Jãma ẽbẽra ãrĩã trajamaa panasii, mʉa kawasii chi Jeowaɗebenarãba karaamaa duanasii chi Jeowa ɗebena Jaranũrẽ De, mʉa recordasii jãarã mʉ deemaa neepeɗaaɗa baɗa, mʉa kʉ̃risiasiiɗe mipitaa ãrĩã ɓuu joma jãka nureapeɗaaɗa basirã ãchi kĩra.
”Mʉa kʉ̃ria ɓoosii mʉ deemaa neeɗai baita, mauɗeeba beɗeasii chi jãma trajamaa duanasii ome. Mʉa Dachi Akõremaa ʉtaa wiɗisii mauɗe diez días baɗakare chi naeɗe mʉ deemaa ochiaɗa baɗa waya neeɗa basii. Mʉʉmaa waya estudiaɗaika asiiɗe, mʉa maerã aɗa baɗa. Ara jãma mʉʉmaa jarasiiɗe reunionɗaa wãs asii, maabae mʉa maerã asia. ¡Mʉa akawa unukaabasii jãka! Jomaɗe jʉrʉ ɓeeɗa baɗa jãka ẽbẽra ara ãchi chiya kʉ̃ria ãrĩã nureeɗebena, jãabera unuɗa basia.
”Ara jãuɗeeɗa wã koɓeeɗa basia reunionɗaa. Semana õbea pasasiiɗe akawa ida ɓusia cigarillo dobarii baɗa. Baataɗa baɗa chi libro astrologiaɗebena mauɗe chi música Satanasɗebena siɗa, jãka sentiɗa baɗa chi demoniorã waya neewẽa diɗipeɗaaɗa. Jãabera nibasii Jeowaba jarabarii kĩra saka nibayu, 3 mes baɗakare jaradeɗeka koɓeesia. Mauɗe 6 mes baɗakare bautizaɗa basia, 2 días baɗakare precursora auxiliar basia mʉ.
”Mʉa ara kiruma ayu Jeowamaa joma ichia mʉ baita ase niiɗeeba. Jãabera mʉa kuitaa ɓuu kãare aseyu kĩrajʉʉ nibai baita. Jeowa trʉ̃ torre choroma kĩraka ɓua jãmaburu ichia mʉ karebasia (Proverbios 18:10). Mʉ senti ɓuu ara aɓau chi Salmo ɓʉɗa baɗa kĩraka, ichia naka a ɓuu: ‘Día aɓa ɓooyu bichi deɗe biʼia ɓua mil días ɓooi baɗa barã junebenaɗe. Mʉ piradru aka noɓooyu kʉ̃ria ɓuu Dachi Akõre De kĩraiɗe, kachirua ãrĩã nuree deɗe ɓooi kãyabaraʼ”.
Cha nii wẽra corazón biʼia nii jãabera kawasia saka kĩrajʉʉ nibayu. Barikia nii ẽbẽra corazón biʼia niiba Jeowa jʉrʉ niibʉrã, ara jãka nibaɗe wãyua.