¿Nau iujãa akababaaka?
Chi Bibliaba panau ɓuu
Makawẽma, nau iujãa acabaɗaabayua, junebena kuɓuɗaabayua mauɗe bataɗaabayua. Bibliaba jara ɓuu chi ẽbẽra ara jãmaburu nureaɗayu.
“Ẽbẽrarã biarãdu nau iujãaɗe waaburu biuɗawẽa duanaɗayua”(Salmo 37:29).
“Ichia chi iujãa madu kuɓuɗa baɗa jãmabena akawa ãyaa kuɓuuwẽa”(Salmo 104:5).
“Chi iujãa wauɗa baɗa akawa apii kuɓui baita”(Eclesiastés 1:4).
“Ichiaburu chi iujãa wauɗa baɗa, chi iujãa waubasia bari koɓooi baita, ichia wausiira chi iujãaɗe nureaɗai baita”(Isaías 45:18).
¿Chi ẽbẽrarãburu chi iujãa acabaɗai ɓubaaka?
Chi ẽbẽra nau iujãaɗebena jayoa ase duanuuba chi bania, chi pũarã, chi iujãa poyaa acabaabai, guerra mauɗe junebeɗeeba Dachi Akõreba idaarabiibayua chi iujãa acababii baita. Chi Bibliaba jara ɓuura ichia “kenayua chi jari iujãa kiruu dañamaa panuu” (Apocalipsis 11:18). ¿Saka baiba mau?
Dachi Akõreba acababuruu kobiernorã ẽbẽrarã nau iujãaɗebena chi iujãa acabamaa panuuɗeeba, chi Kobierno bajãaɗebenáturu kuɓuburuu, jãu Kobiernodu biʼia ãrĩã ɓuuɗeeba (Daniel 2:44; Mateo 6:9, 10). Jesucristoba, chi Dachi Akõre Warr, chi Kobierno bajãaɗebena goberna ɓoi (Isaías 9:6, 7). Jesús nau iujãaɗe nibasiiɗe joma iujãaɗebena dachi puʼuayu nii apii kuɓubibachii daño asebiɗaamaaba (Marcos 4:35-41). Ichíturu chi rey nau iujãaɗebena baburuuɗe joma ichi juaɗeburu koɓeeyua. Chi iujãa koɓeeyu waya naeɗe jardín Edenɗe koɓooɗa kĩraka(Mateo 19:28; Lucas 23:43).
¿Makarã Bibliaba jara ɓuu chi iujãa bari baatayuẽ?
Makawẽma, nauɗebena biʼia kawaɗakau, Bibliaba naka jara ɓuu: “Dachi Akõre beɗeaba nau iujãa mauɗe bajãa nu uru ɓuu mauɗe ichiba kastikai ewariɗe tʉbʉchiaɗe baai” (2 Pedro 3:7, Biblia Chamí, WPS.). Kawaɗaika kãare ʉ̃rʉbena jara ɓuu nau beɗearãɗebena Bibliaɗe:
Chi beɗea “bajãa”, “iujãa” mauɗe “baai” ãrĩãɗeburu jarayu ɓua. Génesis 11:1ba jara ɓua: “Joma iujãaɗe ara aɓa ɓuu beɗeáturu beɗea noɓoosia”. Nama “iujãa” aburuuɗe ẽbẽrarãɗebenadu beɗea kuɓua.
Chi versiculorã 2 Pedro 3:7ɗe naeɗe kuɓuuba jara ɓua kãareba“chi bajãa”, “chi iujãa” mauɗe “baai” kuɓuuɗebena. Chi versiculorã 5 mauɗe 6ba jara ɓuu chi Kue mechibena chesiiɗebena Noé nibasiiɗe. Chi iujãara acabaabasia, chi Kue mechibenaba acabaɗa baɗara chi ẽbẽra kachirua ãrĩã nureapeɗaaɗáturu. Cha naarã versiculorãba “iujãa”aburuuɗe ẽbẽrarãɗebenadu beɗea kuɓua (Génesis 6:11). Maaɗaba “chi bajãa” acaba ɓoosii aburuuɗe chi ara jãuɗe gobierna nureapeɗaaɗa baɗaɗebena beɗea kuɓua. Mauɗeeba chi iujãara acabaabasia, ẽbẽrarã kachirua ãrĩã nureapeɗaaɗáturu acabasii. Noé ichi deɗabenarã ɓaʼãraburu chokae paneeɗa maabea ãchirã warrarã ãrĩãturu baraasiɗaa ãyaa iujãaɗe ẽbẽrarã ãrĩã baraabiɗayua Kue mechibena cheɗakare (Génesis 8:15-18).
2 Pedro 3:7ɗe jara ɓuu “baai” kuɓuuɗebena, nauba jara ɓuu acabayu chi ẽbẽra kachirua ãrĩã nureerã, dachi iujãa acabawẽe, jari Kue mechibena chesiiba Noé nibasiiɗe kĩraka. Dachi Akõreba dachimaa jara ɓuu: “Bajãa wiɗi mauɗe iujãa wiɗi [...] mama jomaurãba jipa wau nureaɗai” (2 Pedro 3:13, Biblia Chamí, WPS.). “Bajãa wiɗi mauɗe iujãa wiɗi” aburuuɗe chi ẽbẽrarã jipa nureerã gobierno chi wiɗíturu unii baɗayu beɗea kuɓua. Jãu gobiernoChi Kobierno Dachi Akõreɗebʉ. Ichiaburu kobernaburuuɗe chi iujãa mipitaa kiruu bayua(Apocalipsis 21:1-4).