JUAKAYASWẼE NIBAYU

¿MAU KÃAREBA?

Ẽbẽrarã juakayaswẽe nureeba jomaurã respetabadaa. Ẽbẽra kachiruaswãe nibaɗayu, esperaɗakau ãchíturu biʼia ãrĩã adau unibaɗai baita. Waabenarã́turu aiɗaɗai kʉ̃risia nureabarii mauɗe junebenaba ãchimaa jaradeaɗaíturu busta nureabarii.

Chi nuree ẽbẽraba chi juakayaswẽe niibʉrã surenaka nii abadaa, maamina dachi juakayaswẽe niibʉrã, jãu biʼia nii, dachi error ara du aɓa unubaria mauɗe ɓoobaria kosarã dachia poyaabai ɓuu kʉ̃risiabarii.

¿SAKÃERA MAU IMPORTANTE ƁUA?

• Bichi warr amikorã ãrĩã bara nibayua. Chi libro La epidemia el narcisismoba jara ɓuu “juakayaswẽe niibʉrã junebenarã baara meraa ãrĩã nibabaria” mauɗe “ẽbẽra jãka nii junebenarã baara berrea ɓeebarii”.

• Bichi warr jãka niibʉrã biʼia wã nibayua. Bichi warr juakayaswẽe nibaaruubʉrã, ara jãka biʼia nibayu mauɗe wariiruuɗe biɗa, ichi trajo jʉrʉburuuɗe. Chi doctor Leonard Saxba naka ɓʉɗa baɗa: “Kũudrãa nii juakaya ãrĩã nii, biʼia wã nibaabayua ichi trajo baita jʉrʉburuuɗe, juakayaswẽe nibapeɗa mauɗe biʼia ũri niibʉrã chi trajo deamaa ɓuu ome makarã trajo eteuɗe uni nibayua.”a

¿SAKA CHI WARRMAA JARADEAIBA DU AƁA KɄ̃RISIABIPEƊA JUAKAYASWẼE NIBAYU?

Aiɗa kʉ̃risiabiba ichíturu junebena aude nii kĩra nibaabayu

CHI BIBLIABA JARA KUƁUU: “Chi mechiuwãe ɓuuba ichi chi mechiu nii kʉ̃risia ɓuubʉrã, ara ichi du aɓa setaa kũrua ɓuu” (Gálatas 6:3, Biblia Chamí, WPS.).

• Kʉ̃risiabirã́ba ichidu aude nii. Bichi warrmaa naka jararã́ba “bichia kʉ̃ria kuɓuu joma unuyua” jomaurã ẽbẽraba jãka unuɗakauɗeeba. Bariara bichia jãka jara kʉ̃ria kuɓuu ichi kĩrajʉʉbiyua, ara ãchidu aɓa kʉ̃risiaɗayu kãare aseɗai ɓuu mauɗe bereka aseɗai baita jãkaburu biʼia wã nibayua.

• Felicitaba ãchi biʼia ase nureeɗeeba. Bichia bichi warrmaa bichíturu biʼia ãrĩã nii aaruubʉrã mauba bichi warr aude juakaya nibabiyua. Ichia biʼia ɓuu aseɗaɗeburu “biʼia ase nima” aba.

• Ichi celular ãrĩã ochia nuɓuumare idaarabiibayua. Internetɗe unubibadaa ãchi asepeɗaaɗa mauɗe ãchia unuree siɗa ãchia junebenamaa unubi kʉ̃ria nuree ãchíturu chi biʼia nuree. Maka asebadaurã juakaya nurea.

• Kawabiba bichi warrmaa perdón a jarayu ara jãuɗe. Bichi warr ãyaa aseburuuɗe aiɗaba ara ichia kawayua.

Jaradeaba ara kiruma a kawai baita.

CHI BIBLIABA JARA KUƁUU: “Ara kiruma ásturu” (Colosenses 3:15).

• Dachi Akõreba aseɗa baɗa kakua. Chi warra chekerãba kawaɗayua chi do, chi mode, chi bakururã kʉ̃riaɗai baita mauɗe kawa baraaɗai jãarãɗebena nesita panuu dachi nureaɗayu baita. Chi pua koɓeebarii, chiko kobadau mauɗe bania wãʼãebʉrã dachi biuɗayua. Jãka kawabiiruubʉrã, ãchia respetaɗayua chi Dachi Akõreba aseɗa baɗa mauɗe ara kiruma a kawaɗayua.

• Ẽbẽrarã biʼia nuree kakua. Nauɗe kawabiba junebenarã ichi aude nuree, maarã atua jara nibai baɗa baara maarãɗebena kawayua.

• Ara kiruma a kawabiba. Ara kiruma a kawabiba beɗea barawãe dachi sõɗeeba. Ẽbẽra juakayaswẽe kiɗiiba ara kiruma abadaa.

Kawabiba importante ãrĩã ɓua waabenarã aiɗaɗayu.

CHI BIBLIABA JARA KUƁUU: “Waabenarã audeara biꞌia nuree kʉ̃risia panuuɗeeba ne aɓa biɗa waurã́sturu. Mauɗe waurã́sturu machi báitaburu biꞌia nureaɗai baita. Maumaarã kʉ̃risiásturu waabenarã machi audeara biꞌia nuree. Machicha biꞌia nureaɗai baita jʉrʉrã́sturu, maumaarã jʉrʉ́sturu waabenarã siɗa biꞌia nureaɗamera” (Filipenses 2:​3, 4, Biblia Chamí, WPS.).

• Jaradeaba bichi warrmaa trajo deɗabena aiɗaɗai baita. Bichi warrmaa trajo deɗabena ase kawabiwẽebʉrã mauba kawabi ɓua bichi warrmaa: “Bichíturu aude nii mauɗeeba jãu poyaa aseebai ɓuu” ayua. Deɗabena naa asepeɗa, maabaeburu jemeneɗe wã nibayua. Jaradeaba trajo deɗabena ase nibai jãuba junebenamaa biʼia unubi ɓua jãkaburu ichi respetaɗapeɗa kʉ̃ria unibaɗayua.

• Jaradeaba junebena aiɗa nibayu jãka biʼia ɓuu. Bichi warrba junebena aiɗa niibʉrã ichi wariburuuɗe kuitaa ãrĩã nibayua. Mauɗeeba ãbua beɗeásturu kaiba ichi aiɗai nesita ɓuu mauɗe saka bichi warrba aiɗai ɓuu. Felicitaba maebʉrã jaraba “biʼia ɓuu” aɓaumaa aiɗaburuuɗe.