KAWABIYU KÃARE BIʼIA ƁUU MAUƊE KÃARE KACHIRUA ƁUU

¿MAU KÃAREBA?

Chi ẽbẽra jipa nureeba kuitaa duanuu kãare kachirua ɓuu mauɗe kãare biʼia ɓuu. Ãchi baita chi kachirua ɓuu mauɗe chi biʼia ɓuu ara jãka ɓoi, bariara biʼia aseburuuba biʼia ɓeeka adua, junebenaba unuɗakauɗe biʼia ɓuu aseburuu siɗa.

¿SAKÃERA MAU IMPORTANTE ƁUA?

Iɗibae, ãchi baara nureabadau claseɗe, chi musicarã, chi pelicularã, chi televisión siɗa, jãuɗe kachiruaburu kawabi panuu. Ãchia kʉ̃risiaɗai ɓuu chi akõrerãba jaradeabadau biʼiwãe ɓuu.

Nau ãrĩã pasa panua ãchi kũudrãa babudauɗe. Chi libro Beyond the Big Talk (Después de “la charla padre e hijo”) jãuɗe jara ɓuu, “chi kũudrãarã “biʼia ãrĩã preparaɗayu ichi baara nureabadaurãba kosa biʼiwẽe ɓeedu jaradeabadauɗeeba. Ãchia kawaɗaibaraa chi biʼia ɓeedu ase nibayu, kʉ̃risiaburuu chi akõrerãba kawabipeɗaaɗa, bariara chi amikoba jarabudau siɗa aseebayua”. Nau kawabiyua ichi kũudrãa o awẽra bai naeɗe.

¿SAKA KAWABIYU KÃARE BIʼIA ƁUU, KÃARE KACHIRUA ƁUU WARRARÃMAA?

Kawabiba kãare biʼia ɓuu, kãare kachirua ɓuu

CHI BIBLIABA JARA KUƁUU: “Ẽbẽrarã dawaraurã [...] biʼia kʉ̃risiabadauɗe kãare biʼia ɓuu mauɗe kãare kachirua ɓuu ʉ̃rʉbena” (Hebreos 5:14).

• Jãu biʼia ɓua, jãu kachirua ɓua, jãka jaraba. Noremaacha kawabiba chi pasa kuɓuuɗebena. Jari jarai ɓua: “Cha nii orroabarii mauɗe cha nii orroakau”. “Cha nauba unubi ɓua kĩra jipa nii. Nauba kĩra jipa nii unubiwẽe”, “jãkaburu ase nibayua kʉ̃riaba. Jãka aseebayua jãkara kʉ̃ria niiwãema”. Jãkaburu kawa nibaɗe wãyua bichi warrba kãare kachirua ɓoapeɗa mauɗe kãare biʼia ɓuu.

• Jaraba sakãera aseɗaiba chi biʼia ɓúdu mauɗe kachirua ɓuubʉrã aseebayu. Bichi warr ome beɗeaba ɓiɗĩi ɓiɗĩia kawai baita. Wiɗiba: “¿Sakãe biʼia ɓuu setaa jarawẽa jipa nibayu?”, “¿Sakayua setaa jarabariibʉrã amikowẽa ɓee ɓua?” maebʉrã “¿Sakãe kachirua ɓua orroa nibayu?”.

• Kawabiba sakãe biʼia ɓuu kuitaayua sãu kachirua ɓuu mauɗe sãu biʼia ɓuu. Bichia jarayua: “Bichi setaa jarakau mauɗe orroakaubʉrã, junebenaba kʉ̃riaɗayua bichi ome nibaɗai baita” maebʉrã “bichi ẽbẽra formal kiɗiibʉrã , ẽbẽrarã bichi baara niba kʉ̃riaɗayua”.

Biʼia unubiyua junebenarãmaa chi deɗabenarãba kuitaa duanuu kãare biʼia ɓuu kãare kachirua ɓuuɗebena

CHI BIBLIABA JARA KUƁUU: “Machia kawa kʉ̃risiábaɗa chi ase bara ɓuu biʼia ɓuu o maebʉrã biʼiwẽe ɓuu” (2 Corintios 13:5).

• Bichi deɗabenaba kawaɗayua kãare biʼia ɓuu mauɗe kãare biʼiwãe ɓuuɗebena, jãka jaraɗai ɓua:

  • “Dairã setaa jaraɗakau”.

  • “Dai deeɗa sĩɗaabapeɗa mauɗe ɓiaɗakau”.

  • “Daimaa bustaɗakau atua jaraɗai baita”.

Makaburu bichi warrba kuitaa ɓooyua kãare biʼia ɓuu mauɗe kãare kachirua ɓuu, mauɗe joma chi deɗabenarã biɗa ara maka aseɗayua.

• Noremaacha beɗeaba bichi warr ome kãare biʼia kuɓuu kãare kachirua kuɓuu bichi deɗabenarã baita. Ichi baara meraa nibabarii kachirua aseeruubʉrã maebʉrã televisionɗe o ichi celularɗe kachirua ɓuu unubiiruubʉrã, bichia naka wiɗi ɓua: “¿Bichi kãare asei basaa?” maebʉrã “¿Kãare aseɗai basaa dachi deɗabena?”.

Noremaacha kawabi ɓua bichi warrmaa kãare biʼia ɓuu kãare miadaa ɓua

CHI BIBLIABA JARA KUƁUU: “Ara machi du aɓa kuitaa panásturu kachirua wauɗawẽa nuree” (1 Pedro 3:16, Biblia Chamí, WPS.).

• Ãchi biʼia asebudauɗe mipitaa asesia ásturu. Jaraba sakãera biʼia jãu asesii. Bichia naka jarai ɓua: “Bichia setaa jarawẽa orroawẽe basiiɗeeba, bichi kakua mʉ ãrĩã kĩrajʉʉruu”. Bichi warrba jaraburuubʉrã kachirua aseɗa, jaraba jãka ariɗe ɓoosia ichia meraabasiiba iadaai naeɗe.

• Necio asebudauɗe iadaakuase. Kawabiba bichi warrmaa ãchi kachirua asebudauɗe ara ichi du aɓaburu jʉrʉ kawayua saka arreglayu. Chi warrarãba kawa nibayua kãare kachirua aseɗa mauɗe sakãera deɗabenaba bustaɗakau jãka aseyu. Chi ɓee akõrerãba ãchi warrarãmaa nomaa sentibi kʉ̃riaɗawẽe, maamina ãchi ome beɗeaburuubʉrã chi pasaɗa ʉ̃rʉbena, makaburu kuitaabibudau kãare bia ɓuu mauɗe kãare miadaa ɓua.