Chi do choma Purea ɓuuɗe pasaɗa

Chi faraonba ũrisiiɗe israelitarã Egiptoɗebena wãpeɗaaɗa baɗa, ichia kʉ̃risiasii, mʉa ãchi bʉekaabai ɓoosiiɗe aɗa. Maabae ichi soldaorãmaa naka jarasia: “Chi carrorã chĩoɗai baita biʼia bʉekábaɗa, maabae israelitarã kaaɗe wãɗaika. Ãchi bʉekaɗaabai ɓoosiiɗe”. Maabae, ichi mauɗe ichi baara nureabadaurã ome israelitarã kaaɗe wãsiɗau.

Jeowaba israelitarãmaa unubi ɓoosii samare wãɗayu jʉ̃rʉara tawa kuɓuuba dapeɗeeɗa mauɗe ẽsebuɗe aoko koɓooɗaɗeeba. Maabae adoesii chi do choroma ɓuuɗaa mauɗe jãma duanébaɗa aɗa.

Maaɗakare, chi israelitarãba unusiɗau chi faraón ichi soldaorã baara ãchi kaaɗe wãmaa panasii. Chi israelitarã ãyaa biɗa poyaa wãɗaabai basii, ãchi mar kĩraare duanaɗapeɗa mauɗe ãchi kaaɗe chi soldaorã duanasiiɗeeba. Maabae mechia ɓiaɗapeɗa jarasiɗau Moisesmaa: “¡Dai biubudaa! ¿Sakayua dai Egiptoɗebena uaɗosaa?”. Maamina Moisesba naka jarasia: “Perarã́baɗa. Jãma apii duanábaɗa, kawaɗayua saka Jeowaba dachi karebakuayua”. Moisesba Jeowadu ãrĩãdu confia nibasme, ¿maka ɓuẽ?

Maabae, Jeowaba jaraɗa israelitarãmaa jãmabena wã́sturu aɗa. Jãu ẽsebuɗe, Jeowaba chi israelitarã mauɗe chi Egiptoɗebenarã kẽsaeɗa chi jʉ̃rʉara kuɓusii. Chi ẽbẽrarã Egiptoɗebena duanuumare joma pãriu koɓooɗaa, mauɗe chi israelitarã duanuumare ʉ̃ɗaa koɓoosia.

Jeowaba jaraɗa Moisesmaa, bichi jua ʉaba chi do choroma ʉ̃rʉ, aɗa baɗa. Maabae mechibena pũabisii joma ẽsebuɗe. Chi do choroma omeɗe ewa diɗiɗa, mau tãeɗe o wau diɗisia. Ãrĩã israelitarã kĩaraa wãurisiɗaa do choroma tãeɗe, põesãa kuɓuuɗe mauɗe chi bania apii koɓeeɗa.

Chi faraón ichi soldaorã baara chi jãu o põesãa kuɓuuɗe chi israelitarã kaaɗe wãsiɗau. Jeowaba chi carro jʉ̃rʉ Egiptoɗebenarãɗe awara ẽe wãuribisii. Maabae chi soldaorãba naka ɓiasiɗau: “¡Namabena wãɗaika! Jeowa ichi ẽbẽrarã kakua chĩomaa ɓuu”, asiɗau.

Jeowaba Moisesmaa naka asia: “Bichi jua ʉtʉ ʉaba chi do choroma ʉ̃rʉ”, aɗa. Maabae chi do choroma apii koɓooɗa baɗa, chi Egiptoɗebenarã ʉ̃rʉ ɓaebisii. Chi faraón mauɗe ichi baara nureabadau, maarã biusiɗau. Aɓa biɗa chokae ɓeebasii.

Maabae chi do choroma kĩraare, chi ẽbẽrarã naka kari koɓeesiɗau Jeowamaa: “Mʉ Jeowamaa kariburuu, ichi chaarea nii unubisiiɗeeba. Chi mura mauɗe chi ẽbẽra ichi ʉ̃rʉ wã ɓuu doiɗeeɗa ɓataɗakasii”. Joma chi ẽbẽrarã karimaa duanuuɗe, chi wẽrarã baera paneeɗapeɗa maabae chi pandereta chaa bara ɓeesii. Joma kĩrajʉʉ bara ɓeeɗa, ãchi naeɗe Egiptoɗe jʉ̃apeɗaaɗa, jãmabaerã awara duaneesiɗauɗeeba.