Rahaba merakuaɗa chi mukĩrarã

Mukĩrarã chi puuru Jericó ochiaɗe wãsiɗauɗe, wẽra Rahab abadau deɗe kopaneesiɗau. Rey Jericoɗebenaba mau kawasiiɗe, chi Rahab deemaa soldaorã bʉekasii. Rahaba chi mukĩra ome niɗau ichi de ʉtʉbenaɗe mera kuɓusii. Maabae chi wẽraba jarasii soldaorãmaa ãyaa jʉrʉɗe wãi baita. Rahaba mukĩra ome niɗaumaa naka jarasii: “Mʉa kuitaa ɓua Jeowa machi baara ɓuu mauɗe machirãba nau iujãa adauɗayu. Mauɗeeba, mʉa machi aiɗayua. Maka ɓumina, muchuburia mʉʉmaa jarábaɗa mʉ deɗabenarã aiɗaɗayua”.

Chi mukĩra ome niɗauba Rahabmaa naka jarasiɗau: “Bichia jʉ̃kara purea ɓuu ventanaɗe kuɓuubʉrã, bichi deɗabenarã karebaɗayua”.

Rahaba chi mukĩrarã aiɗasii chi ventana deɗebena jʉ̃karaɗeeba eɗaa bʉeyua. Ãchi Josuemaa wãɗai naeɗe, modeɗaa día õbeauɗe miru wãsiɗau. Maaɗakare, chi israelitarã chi do Jordanɗe kĩaraa wãuchiɗau jãu iujãa adauɗayu. Chi puuru Jericodu israelitarãba naa adausiɗau. Jeowaba ãchimaa jaraɗa baɗa chi puuru aɗu tʉábaɗa aɗa. Noremaacha maka asesiɗau seis diaɗeeba. Día sieteɗe chi puuru aɗu siete ɓesɗe tʉasiɗau. Maaɗakare, chi sacerdoterãba chi trompetarã chaapeɗaaɗa mauɗe chi soldaorã mechibena ɓiasiɗau. Maabae jãu puuru aɗu jʉ̃ka koɓooɗa ɓae wãsii mauɗe chi Rahab de aɗu jʉ̃ka koɓooɗara ɓaebasii. Rahab ichi deɗebenarã baara biuɗaabasii ichia Jeowaɗeburu ãrĩã ijãasiiɗeeba.