¿Dachi Akõremaa joma fiestarã bustabaraka?

Jeowaba kʉ̃ria nii dachi biʼia kĩrajʉʉ nureapeɗa mauɗe ɓesesɗe fiesta aseɗayua. ¿Maamina Dachi Akõremaa bustabaraka joma fiestarã? ¿Saka dachia unubi panua ichi kʉ̃ria nuree mauɗe kʉ̃risiabadau saka ichi sentibarima?

1. ¿Sakayua Jeowaba bustakaba jomaurã fiestarã?

Bichia adua niibʉrã, fiestarã neebadau puururãɗe june diosrã setaa nuree kʉ̃riaɗapeɗa ũribachiɗaa, maebʉrã ãiɗebena nee panuu chi Bibliaɗe eɗa jaradeawẽeɗebena. Jãarã fiestarã religiona setaa jarabadauɗebena neei ɓua, jauri kachiruaɗebena, makawẽebʉrã ẽbẽrarãmaa kawabiɗapeɗa dachi jauri biubaiɗebena. Maubapeɗa, chi nureeba ãchi tradicionɗeeba asebadau ãchi kʉ̃risiaɗeburu ne kachirua ɓee neebiɗaamaaba (Isaías 65:11). Mauɗeeba Jeowaba naka a ɓua: “Ãi wã́sturu [...] mauɗe chi mititia ɓuu waa waurã́baɗa” (2 Corintios 6:17).a

2. ¿Kãare kʉ̃risiabaraa Jeowaba fiestarã ẽbẽrarãmaaburu respeto unubiɗayuɗebena asebadauɗe?

Jeowaba dachimaa jarabarii ẽbẽrarãka duanuumaaba ãchia “ijãabadau ẽbẽrarãɗeburu”, jãu enebeka ɓuuɗeeba (Jeremías 17:5 leas). Chi ɓee fiestarã asebadau gobernanterã mauɗe chi puuru aiɗabachiɗaurã baita. Chi ɓeeɗe bandera maebʉrã himno puuruɗebenamaa ãrĩã respeto unubibadaa maebʉrã aɓa puuru libre duaneeɗaɗebena akordaɗayua (1 Juan 5:21). Baraa fiestarã kʉ̃risiabibadau política ʉ̃rʉbena maebʉrã saka ẽbẽrarãba kambiaɗai panua chi ãchia kʉ̃riaɗayuɗebena. Dachirãba ãrĩã respeto unubibadaubʉrã ẽbẽra mauɗe organizacionmaa, naarãba kʉ̃risiabiburuuɗe chi Jeowaba bustawẽe, ¿bʉmaarã saka senti ɓua ichi jãu kakua?

3. ¿Kãare kachirua ẽbẽrarãba ase duanaa fiestaɗe?

Chi Bibliaba jara ɓuu biʼia ɓuuwẽe chi “itua ãrĩã dokuabadau”, chi “fiestarãɗe kachirua asebadau” mauɗe “chi fiestarã asebadau itua doɗai baitaburu” (1 Pedro 4:3). Chi ɓee fiestarãɗe, chi ẽbẽrarã akawa controlaɗawẽa ãiburu asebadau. Dachi Jeowa ome amiko duaneei kʉ̃ria panuubʉrã, jãka ɓee miadaa asebadauɗebena ara kaita koɓeeɗaabai.

AUDE KAWABA

4. Fiesta Jeowa respetaɗakauɗaa wãrã́ba

Efesios 5:10 leaɗapeɗa, mambea nau ʉ̃rʉbena beɗeasturu:

• ¿Kãareɗe kauwa kʉ̃risiaɗaiba fiesta aseɗayua maebʉrã aseɗaabayua?

• ¿Bichi ɓoobariimare kãare fiestarã asebadaa?

• ¿Bichia kʉ̃risiabarika Jeowaba jãarã fiestarã bustabarii?

¿Kãareɗe kʉ̃risiabaraa Dachi Akõreba fiesta asebudau cumpleañosɗebena? Bibliaba jarawẽa ɓuu ẽbẽra Dachi Akõre baita traja niiba fiesta cumpleaños aseɗaɗebena, maamina jara ɓuura ome fiesta cumpleañosɗebena asesiɗaa ẽbẽrarã Dachi Akõreɗe ijãaɗakabachiɗaurã. Génesis 40:20-22 mauɗe Mateo 14:6-10 leábaɗa. Mambea nau ʉ̃rʉbena beɗeasturu:

• ¿Cha naarã fiestarã cumpleañosɗebena kãare araɓau pasaɗaba?

• Naarã omeɗebena leaɗakare, ¿bichi baita kãare Jeowaba kʉ̃risia ɓuu cumpleañosɗebena?

Maamina, bichia maka kʉ̃risiai ɓua, “¿Jeowa baita biʼia ɓue maebʉrã biʼia ɓuuwẽka mʉ cumpleaños makawẽebʉrã fiestaɗaa Bibliaba biʼiawẽe jara ɓuuɗebena wãburuubʉrã?”. Éxodo 32:1-8 leábaɗa. BIDEO ochiaɗapeɗa, mambea nau ʉ̃rʉbena beɗeasturu:

BIDEO: Fiestarã mauɗe reuniorã ẽbẽrarãba asebadau Dachi Akõreba bustakau (5:07)

• ¿Sakayua kauwa kʉ̃risiabaraaɗai chi Jeowaba bustabariiɗe?

• ¿Saka aseɗai ɓua jãu?

Saka kawaɗai ɓua chi Dachi Akõreba bustabarii chi fiesta

• ¿Jãuɗe asebadae chi Bibliaɗe eɗa jaradeawẽeɗebena? Kawa kʉ̃ria ɓuubʉrã, jʉrʉse samabena nee ɓuu.

• ¿Ãrĩã respeto unubibadae ẽbẽra nii, organización, chi bandera, escudo maebʉrã chi himno puuruɗebenamaa? Dachirãba ãrĩã respetabadaa Jeowamaaburu june kãyabãra mauɗe kerea panuu ichia joma problemarã nau iujãaɗe solucionayua.

• ¿Naarã fiestarãɗe asebadae chi Bibliaba jara ɓuu poyaa aseɗaabaiɗebena? Dachi jayoaswẽe nureaɗayua dachi kʉ̃risiaɗe mauɗe dachi kakuaɗe biɗa.

5. Waabenarãmaa biʼia jaradeaba chi bichia kerea nii mau respetaɗayua

BIDEO: Respeto iɗaa jaraɗayua chi dachia kerea nureeɗebena (2:01)

Mateo 7:12 leaɗapeɗa, mambea nau ʉ̃rʉbena beɗeasturu:

• Nau versiculoɗe jara ɓuuɗeebara, ¿bichia chi deɗabena ichia bichi kĩra kereawẽe niimaa jarai ɓue fiesta aseemaaba?

• ¿Saka bichia unubi ɓua bichi deɗabenarã kʉ̃ria ɓuuɗebena ãchi ome fiestaɗaa wãkaumina?

6. Jeowaba kʉ̃ria ɓuu dachi kĩrajʉʉ nureaɗayua

Jeowaba bustabarii dachi biʼia meraaɗayu dachi deɗabenarã mauɗe amikorã baara biɗa kĩrajʉʉ duanai baita. Eclesiastés 8:15 leaɗapeɗa, mambea nau ʉ̃rʉbena beɗeasturu:

• ¿Nau versiculoba saka unubi ɓuu Jeowaba kʉ̃ria ɓuu dachi kĩrajʉʉ nureaɗayu?

Jeowaba kʉ̃riabarii ichi baita traja nureerã ãbua meraaɗayu kĩrajʉʉ nureaɗai baita. BIDEO ochiábaɗa kuitaaɗayua dachi asamblearã diwara druaɗebena saka kĩrajʉʉ duanabarii.

BIDEO: Asamblea diwara druaɗebenaɗe biʼia ãrĩã irsibibadau (5:40)

Gálatas 6:10 leaɗapeɗa, mambea nau ʉ̃rʉbena beɗeasturu:

• ¿Fiestarã asei nesita duanue ne bia deayua ẽbẽrarãmaa?

• ¿Sãu rekalo bichi aude dea kʉ̃ria ɓuu: aɓa fiesta baita deaburuuɗe makawẽebʉrã dachi corazonɗeeburu dea kʉ̃riaruuɗe?

• Ãrĩã Jeowa ɗebena Jaranũrẽrã ɓesesɗe ãbua reunión asebadau ãchi warrarã baita, mauɗe kawawẽa rekalo irsibiɗai ɓua. Bichi warrarã baraa niibʉrã, ¿kãare biʼia mipitaa asei ɓuu ãchirã baita?

NAU KAWASIƊAA

Jeowaba kʉ̃ria nii dachi biʼia meraaɗayua deɗabenarã mauɗe amikorã baara kĩrajʉʉ duanaɗayua, maka ɓumina chi fiestarã ichia bustaka ɓuuɗebena dachi wãɗayua kʉ̃riawẽe.

Waya berreaɗaika

• ¿Kãareɗe kʉ̃risiaɗai ɓua kuitaaɗayua sãu fiesta Jeowaba bustabarii maebʉrã bustawẽe?

• ¿Saka aiɗai panua dachi deɗabenarã mauɗe amikorã biɗa kawaɗayua chi dachia kʉ̃risiabadau fiestarã ʉ̃rʉbena?

• ¿Saka kuitaa panaa Jeowaba kʉ̃ria ɓuu dachi kĩrajʉʉ nureaɗayu?

NAU OCHIAS MAUCHABURU KAWAYUA

Leaba chi nuree fiestarã cristianorãba aseɗakau ʉ̃rʉbena.

“¿Sakayua chi Jeowa ɗebena Jaranũrẽrãba chi ɓee fiestarã aseɗakau?” (Artículo jw.org ɗebena)

Kʉ̃risiaba kimareɗebenaba unubi panuu Dachi Akõreba bustakau chi fiesta cumpleañosɗebena.

“¿Sakayua chi Jeowa ɗebena Jaranũrẽrãba fiesta cumpleañosɗebena aseɗakaba?” (Artículo jw.org ɗebena)

Chi warrarã Jeowa kʉ̃ria kirureerãba ichi kĩrajʉʉbiɗai ɓuu fiesta asebudau ewaɗe.

Jeowa baita bichidu chi kĩrawãrea ãrĩã nia (11:35)

Cristianorã ãrĩãrãba fiesta Navidad diaɗe aseɗakau. ¿Jãarã kĩrajʉʉ nureka?

“Unusiɗau chi biʼia ɓuudu” (Chi Kartaba, 1 diciembreɗe 2012ɗebena)