LESION 58
Apii jipaburu nibayua Jeowa ome
Chi cristianorã ariɗe nureeba idaarakabiɗawẽe junebenarãmaa dachia Jeowa ũripeɗa kʉ̃ria niiɗebena ida ɓuiɗayua. Dachia kuitaa panua bichi jãka kʉ̃risia nii, mauɗe Jeowaba bustabaria ãrĩã bichi ara jãka jipa nibayudu (1 Crónicas 28:9 leas). ¿Kãareba ida ɓuibi ɓua bichi jipa nii Jeowa ome? ¿Mauɗe bichia kãare asei ɓua biʼiaburu aseyua?
1. ¿Ẽbẽrarãba kãare aseɗai ɓua dachi jipa nuree Jeowa ome ida ɓuibiyua?
Chi nuree ẽbẽrarãba berekaɗai ɓua dachi Jeowa baita trajaɗaiɗebena ida ɓuibiɗayua. ¿Kaiba jãka aseiba? Chi ɓuipeɗaaɗa baɗa chi biawãra ɓuu Bibliaɗebena, mauɗe setaa jaramaa duanua chi organización Dachi Akõreɗebenaba dachi fe bara nuree akabaɗayua. Jãarã ẽbẽrarã apóstatas abadaa. Chi nuree líder religionɗebenarã ãchia biɗa setaa jarabadaa dachirã ʉ̃rʉbena chi wabiɗa biʼia kawawẽa nuree ɓuibiɗayua chi biawãra ɓuu. Jãu miadaa ãrĩã ɓua beɗea nibayu Dachi Akõre iadaa nureerã ome, ãchi librorã leayu, internetɗe kuɓupeɗaaɗaɗebena maebʉrã ãchi bideorã ochiaɗayua. Jesusba beɗeamaa ɓoosiiɗe maarã ẽbẽrarã ʉ̃rʉbena jarasii: “Ida ɓúibaɗa. Jãarãba o unubibadaumina dau pãriu nuree kĩra duanuu. Mauɗe, dau pãriu niiba aɓa dau pãriu niimaa oɗe odoemaa ɓuubʉrã, choɓeaɗe ɓae wãɗayua omea” (Mateo 15:14).
2. Dachi Jeowa omeburu jipa nureaɗayua, ¿kãare aseɗaiba?
Dachirãba Jeowa kʉ̃ria nuree bẽrã, junebena religión baara nibaɗaabayua. Jãuɗéburu dachi trajo, chi organización dachi nureeɗebena, mauɗe chi dachia asebadau, religión setaa jara nuree maarã ome nibai kʉ̃riaɗawẽa. Jeowaba naka jaraɗa basia ichi puurumaa: “Jãuɗebena awara wã́sturu”, chi Babilonia Choromaɗebena (Apocalipsis 18:2, 4).
AUDE KAWABA
Kʉ̃risiaba kãare asei ɓua bichia waabenarãba ida ɓuibiimaaba Jeowa ome jipa nibayu. Maubapeɗa, kawa nibaba sakayua Babilonia Choroma baara niiwẽeba jãkaburu jipa nibai ɓuu Jeowa ome.
3. Kauwa nibaba setaa jara nureerã ome
¿Kãare aseɗai ɓua ũri duanuubʉrã setaa jara ɓeeɗebena chi organización Jeowaɗe? Proverbios 14:15 leaɗapeɗa, mambea nau ʉ̃rʉbena beɗeasturu:
¿Sakayua ijãaɗaabaiba joma jara kopanuuɗebena?
2 Juan 9-11 leaɗapeɗa, mambea nau ʉ̃rʉbena beɗeasturu:
¿Dachi ara kaita nibai ɓue chi Jeowa ɓuipeɗaaɗarã ome?
Bariara kaitawẽe nibai siɗa chi Jeowa ɓuipeɗaaɗarã ome, ¿saka dachia ãchi kĩra kʉ̃risia ɓeeɗai ɓua?
Dachia ũribudaubʉrã miadaa jarabudau Jeowa maebʉrã ichi organización ʉ̃rʉbena, ¿bichia saka ai ɓua ichi sentibariiɗebena?
4. Jipa nibaba Jeowa ome chi ãba pekao aseburuuɗe
Dachia kawaburuubʉrã chi ẽbẽra nii konkrekasionɗebena pekao choroma aseɗa baɗa ɓuu, ¿kãare aseɗai ɓua? Kʉ̃risiaba chi Ley deaɗa baɗa Dachi Akõreba Israel naeɗebenamaa. Levítico 5:1 leábaɗa.
Nau versiculoɗe jara ɓuu kĩra, dachia kawabudaubʉrã ẽbẽra nii pekao choroma aseɗa baɗa, jarabaraaɗai chi dawaraurãmaa chi dachia kuitaa panuuɗebena. Nau asei naeɗe, biʼia ãrĩã ɓuu jarayu chi ẽbẽra pekao aseɗa ɓuumaa beɗeai baita dawaraurã ome maabea jarayu joma ichia aseɗa baɗaɗebena. Maamina, ichia naka asewẽebʉrã, dachi jipa nuree bẽrã Jeowa ome, ara dachiaburu jarai ɓua chi dawaraurãmaa. ¿Sakayua naka asebudauba unubi panua dachia ãrĩãdu kʉ̃ria nuree...
... Jeowa?
... chi ẽbẽra pekao choroma aseɗa baɗa nii?
... waabenarã konkrekasionɗebenarã?
Ãba nii problema tãeɗe niibʉrã, ¡aiɗaba!
5. Kaitawẽe nibaba Babilonia Choromaɗebena
Lucas 4:8 mauɗe Apocalipsis 18:4, 5 leaɗapeɗa, mambea nau ʉ̃rʉbena beɗeasturu:
¿Mʉ trʉ̃ wabiɗa ɓʉ kuɓue listaɗe religión setaa jara nureeɗebena?
¿Mʉ organización junebena religión ome traja kuɓuuɗe ɓue?
¿Mʉ trajoba aiɗa ɓubaaka jãarã religión setaa jara nuree?
¿Mʉ awara wãi nesita ɓue chi religión setaa jara nureeɗebena chi wabiɗa ase kuɓuuɗeeba?
Mʉa panau ɓuubʉrã “maerã” naka wiɗiburuuɗe, ¿kãare biʼia ase koɓeei ɓua?
Makarã, aseba chi bichi biʼia aka ɓeepeɗa mauɗe jipa nibaba Jeowa ome.
¿Kãare asei ɓua bichi ẽbẽraba jara ɓuubʉrã nau organización aiɗataba june religionɗebenabʉrã?
CHI NUREE ẼBẼRARÃBA NAKA JARABADAA: “Maamina, mʉa adua niibʉrã chi Jeowa ɓuipeɗaaɗarãba jarabadau Jeowa ɗebena Jaranũrẽ ʉ̃rʉbena, ¿mʉa saka defendei ɓua chi biawãra Bibliaba jara ɓuuɗebena?”.
¿Mʉa nau aseibʉrã biʼia ɓubaaka? ¿Sakayua?
NAU KAWASIƊAA
Ẽbẽrarã dachi engaña kʉ̃ria nuree ome poyaa meraɗaabayua.
Waya berreaɗaika
¿Sakayua ũriɗaabaiba chi Jeowa ɓuipeɗaaɗaba jarabudau?
¿Kãare aseɗaiba dachia chi ãba pekao choroma aseɗa baɗa ɓuu kawabudauɗe?
¿Kãare aseɗai ɓua akawara awara wãɗayua jãka religión setaa jara nureeɗebena?
NAU OCHIAS MAUCHABURU KAWAYUA
Kawaba kãare asei ɓua junebenarãba setaa jara duanuuɗe chi Jeowa ɗebena Jaranũrẽ ʉ̃rʉbena.
“¿Joma kuitaa panue chi jara kuɓuuɗebena?” (Chi Kartaba, agosto 2018ɗebena)
¿Saka kawai ɓua organización niiba aiɗamaa ɓuu Babilonia Choroma?
¿Chi iadaa nureerãba chi biawãra ɓuu Bibliaɗebena kãare aseɗa baɗa dachi fe surebaribiɗayua?
Chi nebʉrʉ ɓuu “Jʉrʉ nibaɗa basia Dachi Akõre chuburi niiɗeeɗa”, leaba saka sacerdote nii chi religión setaa jara ɓuu ɓuiɗa baɗa.
“Ãchi nibapeɗaaɗabaɗa kambiasia Bibliaɗeeba” (Chi Kartaba, 1 julioɗe 2011ɗebena)