Dachi Akõreba kobernaɓoosiiɗe, ẽbẽrarã joma chĩoɗawẽa ambua duanasiɗaa.

¿Sakayua nesitapanaa Dachi Akõre Kobierno?

Aɓaeɗeeɗa, dachi Waukaɗabaɗa, ichi trʉ̃ Jeowaba, ichidu basia chi aɓaɓuu kobernante, mambea kʉ̃ria iɗaa kobernaɓoosia. Mauɗeeba, ichia ẽbẽrarã duanai baita iujãa kĩrawãreakiruu asesia, chi iujãa mipitaakiruu kuɓusia neponorã taẽɗe Eden druaɗe, mama aria chiko ãreadu baraasia. Kĩrajʉʉ trajaɗayua ɓuɓoosia (Génesis 1:28, 29; 2:8, 15). Dachia Dachi Akõremaa ida kobernabipeɗaaɗabasirã, dachi ẽbẽrarãba pas ãreadu iraduanaɗai basia.

Adanba adaumaaɓuu chi jõ koobai aɗaɗebena Evaba deasii. — Naabena ẽbẽrarãba Dachi Akõreba ãchi kobernai kʉ̃riaɗaabasia.

Bibliaɗe jaraɓuu anjel chi kĩrubiniiba, ichi trʉ̃ Satanasba, maebʉrã Diabloba, jarasia Dachi Akõreba ariɗe kobernawẽ. Ẽbẽrarã Dachi Akõreba kobernawẽbʉrã ariɗe kĩrajʉʉ nureai jarasia. Chuburi ãrea, naabena ẽbẽrarã, Adan Eva omeba, Satanas laoburu wãurisiɗaa mambea Dachi Akõre ome kĩruwãsiɗaa (Génesis 3:1-6; Apocalipsis 12:9).

Ãchia Jeowamaa akarr deasiɗaa bẽrã, mauɗe ichi ãchi kobernanteka adauɗaabasii bẽrã, Adan Eva omeba ãchi de chi Iujãa Mipitaakiruuɗe mauɗe ãchi ẽpermaɗawẽa nibaɗai baɗa perdesiɗaa (Génesis 3:17-19). Ãchi warrarã baita biɗa mau ɓuisiɗaa. Bibliaba jaraɓuu Adan pekaɗa bẽrã, “chi pekao nau iujãaɗe neesii mauɗe mau pekaoɗeeba dachi biuɗai neesii” (Romanos 5:12). Chi pekao biɗa nau deasia: “Ẽbẽraba waabenarã ẽbẽrarã koberna uaɓuuɗe istu daño aseɓua” (Eclesiastés 8:9). Jarai bʉrã, ẽbẽrarã ãsdu kobernakʉ̃riabudauɗe, daño asepanua joma iujãaɗe.

ẼBẼRABA KOBERNAKOƁEESIA

Nemrod miamaa akuɓuu. Mauɗe chawi ẽbẽrarãba chi torre ʉtaa karaamaaduanuu. — Nemrodba Dachi Akõre beɗea ũrikʉ̃riaabasia.

Chi naabena kobernador Bibliaba jaraɓuu Nemrod basia, ichia Dachi Akõreba kobernai kʉ̃riaabasia. Mamaeɗeeɗabena, kobernanterã ãchi autorida baraapanuuɗeeba, añaa aseduanua. Mauɗeeba, 3 mil año basii, chi rei Salomonba ɓʉsia: “Mʉa unusia chi dauɓaa ẽbẽrarã abusakeɗearãɗe, wãʼãebasia ẽbẽra kĩrajʉʉnureabii baita. Chi ãchi abusabadaurãba poder baraapanasiɗaa” (Eclesiastés 4:1).

Iɗibea, ara jãka naeɗebena kĩra kuɓua. Naciones Unidasba 2009ɗe jarasiɗaa ẽbẽrarã aribiaurãba jarabadau “chi kosarã aude supribipanuu kobernante malorãba, ẽbẽrarã baita problema ãrea deapanuu”.

DACHI AKÕRE KOBIERNOBA IUJÃA KOBERNAYUA

Ẽbẽrarãba kobernante bia mauɗe chi kobernaburuu ariɗe ɓoi nesitaɓuma. Madu dachi Waukaɗabaɗaba jaraɓua asei baita.

Poto ambuara ãreaɓuu: Kachiruaɓee ẽbẽra kobiernorãba uneepeɗaaɗa. 1. Wẽra Asiaɗebenaba kĩrare awanii chi wawa jẽamaaɓua ãchi chi jeeɗa jayoakuɓuuɗepanuu. 2. Chõra ẽpermokiruu kamaɗeɓuu ospitalɗe. 3. Chi soldaorã batamaapanuu chĩomaaduanuuɗe. 4. Ẽbẽrarã juaɗe karta ɓʉɓee iranureeba wiɗikamaaduanuu. 5. Wẽra chi kau ome akutupanuu ãchi de kĩrare ochiamaapanuu chi bidrio poroaɗebena ãriɗa. 6. Chi puuru jayoa ãreakuɓuu kable enerkia ãrea iɗaa. — Kobiernorã biarã baraamina, jarbisia duanuu, ẽpermaduanuu mauɗe ãchi chiya chĩoduanuu maka ɓee ãchia poyaa akababiɗawẽa.

Dachi Akõreba ichi Kobierno jambera kuɓusia, chi jãu kobiernoba, nama iujãaɗebena kobiernorã ẽebariipeɗa ichiɗe kuɓuburua, “mauɗe aɓa ichi jãdu nama iujãaɗe ɓeeburua mambea” (Daniel 2:44). Nau Kobiernodu ẽbẽrarãba ãrea wiɗipanuu chi padrenuestroɗe (Mateo 6:9, 10). Maamina Dachi Akõredu chi Rei chi mau Kobiernoɗebena wẽbayua, ichia aɓa trʉ̃jarasia nama iujãaɗe ẽbẽraka neeɗa. ¿Ichia kai jʉrʉsaa?