Jambera Dachi Akõre Kobierno ome duanaɗai
Nauɗe kʉ̃risiachãu: bichi de kaita ioro eɗa kuaɓaeruu unupanuu mambea bichimaa chi kabildoba neeɗapeɗa: “¡WÃABAƊA JÃMABENA!” abudau. ¿Kãare asei ɓua bichi? ¿Bʉmaa añaa aude biʼiakunuɗaa wãi ɓuume?
Jambera dachirãmaa “ioro aribiaɓuukua” uruburua. Jesusba jãu “chi dia ãreadu supriduanaɗai” a trʉ̃aɗabasia (Mateo 24:21). Mauɗe, dachi jãuɗebena ãijĩa jĩdru wãɗawẽmina, jʉrʉɗai ɓua sãma miruɗayu. ¿Kãare aseɗaiba?
Jesucristoba Eaɗe Ẽbẽrarãmaa Beɗea Kĩrawãrea Jaramaaɓoosiiɗe, dachia nau aseɗai jaradeɗekasia: “Dachi Akõre Kobiernodu naa jʉrʉkopaneeɗapeɗa mauɗe ichia jaradeɗekaɓuu asekopanesturu” (Mateo 6:33). ¿Kãare jarakʉ̃riaɓua nauba?
“Dachi Akõre Kobiernodu naa jʉrʉkopanesturu”. Jãuba jarakʉ̃riaɓuu Dachi Akõre Kobiernodu aude importanteɓuu waabenarã ʉ̃rʉ dachirã baita (Mateo 6:25, 32, 33). ¿Sakayua jãka kʉ̃risiaɗaiba? Dachi ẽbẽrarãba nama iujãaɗe problemarã baraura poyaa biʼia ochiaɗawẽ bẽrã. Dachi Akõreburu jãu asei ɓua.
“Ichia jaradeɗekaɓuu asekopanesturu”. Nauba jarakʉ̃riaɓuu dachia Dachi Akõre beɗea kawa ũriɗai mauɗe ichia jaradeɗekaɓuu aseɗai. ¿Sakayua? Dachi du aɓauba kãare biʼiaɓuu mauɗe kãare kachiruaɓuu, dachi baita jʉrʉɗarã, joma añaa ɓeeyua (Proverbios 16:25). Junebenare, dachia Jeowaba jaraɓuu aseɗarã, ichi kĩrajʉʉbiɗapeɗa, mauɗe dachirã siɗa biʼia wãɗai ɓua (Isaías 48:17, 18).
¿Sakayua Jesusba nakaasia: “Dachi Akõre Kobiernodu naa jʉrʉkopaneeɗapeɗa mauɗe ichia jaradeɗekaɓuu asekopanesturu”? Ichia chi nuree ẽbẽrarã añaa ochiaɗai ɓuu bẽrã jaraɗabasia mauɗe chi nejarra aribiadu adaubudau o kananibaɗe baruuba mauba ariɗe nibai kʉ̃risiaruuba. Chi nuree ropa jʉ̃ɗaidu, de baraanureaɗai, deeɗa nejoma baraanureaɗai, madu kʉ̃risiaɗapeɗa mauɗe Dachi Akõre Kobiernora jʉrʉɗawẽa (Mateo 6:19-21, 25-32).
Maamina, Jesusba jarasii chi ẽbẽrarã Dachi Akõre Kobierno ome duaneebudaurãba nesitaduanua iɗi baraaduanaɗayua, mauɗe biʼiakeɗee siɗa aribiadu baraaduanaɗai (Mateo 6:33).
Jesus kaaɗe ãdanureabariirãba Dachi Akõre Kobiernodu mauɗe ichia jaradeɗekaɓuu naa jʉrʉsiɗaamina, ãchia chi supriduanuu akabaruu unuɗaabasia. Maamina, ãchirãra Dachi Akõreba aiɗakuasia. ¿Mau saka basaa?
Ũripanasiiɗeeba kawaɗaabasii saka supriduanuu chi Jeowa beɗea ũriɗaabasiirãba. Ãchia pe ãrea baraapanasii bẽrã Dachi Akõre Kobierno uruburuu ʉ̃rʉbena ãchia choroasiɗaa problemarã ãrea barau nau bidaɗebena. Mambea Dachi Akõreba ẽbẽrarãmaa “poder ẽbẽraɗewẽɓuu deɗekasia” ãchia choroaɗayua (2 Corintios 4:7-9).
¿BICHIA DACHI AKÕRE KOBIERNODU NAA JɄRɄYUE?
Siklo naeɗebena Jesusɗe ijãanureabariirãba ũrisiɗaa chi Jesusba jaraɗa Dachi Akõre Kobiernodu naa jʉrʉɗai ʉ̃rʉbena. Beɗea kĩrawãrea jaradeɗekasiɗau chi ãchi druaɗe bibinureemaa (Colosenses 1:23). ¿Barae ẽbẽrarã ara jãka jãma jaraɓuu kĩra aseɗayu iɗi?
¡Maera! Jeowa ɗebena jaranũrẽba kawapanua chi Dachi Akõre Kobiernoba ẽbẽrarã kachiruarã akabaiɗaa iraɓuu. Mauɗeeba ãchirã berekaduanua aseɗayua Jesusba jaraɗabaɗa: “Chi beɗea kĩrawãreaɓee Dachi Akõre Kobierno ʉ̃rʉbena kawabiɗai ẽbẽrarã jomaurãmaa unubiɗayua, mambeaburu chi kachirua barau akabayua” (Mateo 24:14).
¿Kãare aseiba bichira jãu beɗea kĩrawãrea ũriruuɗe? Bichi siɗa ẽbẽrarã siklo naeɗeeɗabena puuru Berea, Macedoniaɗebena nureasiɗau kĩra nibaba. Ãchia apostol Pabloba chi beɗea kĩrawãrea jaramaaɓuu ũrisiɗauɗe, chi ichia jaraɓuu “kʉ̃ria” adausiɗaa, “chi Ɓʉkuɓuu ãchia kawa ochiasiɗaa” ariɗeɓuu kawaɗayua chi ãchia ũripeɗaaɗa ome, mambea ãchia kawasiɗaaɗabaɗa asekopaneesiɗaa (Hechos 17:11, 12).
Bichia biɗa ara jãka asei ɓua. Bichia Dachi Akõre Kobiernodu naa jʉrʉkoɓeeruubʉrã mauɗe ichia jaradeɗekaɓuu bichia aseɓuubʉrã, ichia bichi ara naka aiɗapeɗa karebayua, mauɗe chĩoɗawẽa kĩrajʉʉ duanaɗai.