Tangka in Lentecelhnak

Tangka in lentecelhnak cu a palh maw?

MI TAMPI CHIMMI

Tangka in lentecelhnak cu upadi nih a awnh ahcun nuamhnak in i celh ding a si ko tiah an ti. Mipi caah tangka a hmuhtermi upadi nih nawl a awnhmi awngbali ti bantuk tangka in lentecelhnak phun cheukhat a um.

BAIBAL CHIMMI

Baibal ah tangka in lentecelhnak he aa tlaiin zeihmanh a chim lo nain mah kha Pathian nih zeitindah a hmuh timi kong cu a chim.

Tangka in lentecelh cu midang tangka duh kha a si. Mah ruahnak cu “ralring tein um u, hakkauhnak kha i veng u” timi Baibal bia he aa ralkahmi a si. (Luka 12:15) Tangka in lentecelhnak nih hakkauhnak a chuahter. Tangka in lente aa celhmi hna nih voikhatte ah rum an duh ti kha lentelcelhnak tlangtlatu pawl nih an hngalh caah an sung lai ti an hngalh ahcun tangka tampi an thap i an lem hna. Tangka in lentecelhnak nih fawi tein tangka hmuh duhnak lungput a ngeihter chinchin.

Midang nih an sunghmi tangka kha aa lak caah tangka in lente aa celhmi cu mahzawn lawng aa ruatmi a si. Baibal nih cun “kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si” tiah tha a kan pek. (1 Korin 10:24) Mah lengah midang thil kha na mit va thi hlah tiah nawlbia a kan pek. (Exodus 20:17) Tangka in lente aa celhmi lung chungah a duhmi sung hna seh keimah nih ka tei hna ahcun a za ko timi ruahnak a um.

Baibal nih ka van a ṭhat caah thluachuah ka hmu timi bia kha sual a phawt. Hlanlio Israel mi hna nih Pathian kha an zum ti lo i ‘Vanṭhatnak pathian’ caah rawl an rak pekchanh. Cu bantuk ‘Vanṭhatnak pathian’ biak cu Jehovah Pathian nih a cohlang lai maw? A cohlang hrimhrim lai lo. Mah kong he aa tlaiin Pathian nih hitin sual a phawt hna: “Ka nawl zulh duh lo le ṭhatlonak tuahtu kha nan i thim.”​—Isaiah 65:11, 12.

Ram cheukhat ahcun upadi nih nawl a awnhmi tangka in lentecelhnak in an hmuhmi tangka kha fimcawnnak, chawlehnak le mipi ṭhatnak caah an hman. Mah tangka cu midang ṭhatnak caah kan hman tiah an ti ko nain mah nih hakkauhnak, mahzawn lawng i ruahnak le fawi tein tangka hmuh duhnak lungput tha a pekmi a si.

“Nan innpa . . . a ngeihmi thil paohpaoh si hna seh nan mit a thi lai lo.”​—Exodus 20:17.

Tangka in lentecelhnak nih tangka in lente aa celhtu kha a hnorsuang kho maw?

BAIBAL CHIMMI

Baibal nih hitin ralrin a kan pek: “Rum a duhmi hna cu tukforhnak chungah khan an tla i ṭih a nungmi le ṭhatlonak a chuahter khotu duhnak nih khan rap in a foih hna i cu nih cun rawhralnak ah khan a kalpi hna.” (1 Timote 6:9) Tangka in lentecelhnak i a hrampi cu hakkauhnak a si. Baibal nih “hakkauhnak” kha nan hrial awk a si tiah a kan ti.​—Efesa 5:3.

Tangka in lentecelhnak nih fawi tein rum duhnak lawng kha biapi ah a chiahter caah “ṭhatlonak phun kip chuahnak hram” a simi tangka duh tuknak lungput zong a ngeihter khawh. Tangka kha na hun duh tuk ahcun na lungre a thei lai i Pathian na zumhnak zong a der lai. Baibal nih “mi cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong” tiah a ti.—1 Timote 6:​10.

Na hak a kauh ahcun na ngeihmi tangka ah naa lungsi kho ti lai lo i naa nuamhnak zong a tlau kho. “Tangka duhmi na si ahcun zeitikhmanh ah kaa za cang na ti kho bal lai lo; rum a duhmi na si ahcun na duhmi vialte kha cu na hmu kho bal lai lo.”—Phungchimtu 5:​10.

Tangka in lente i celh awkah lem a simi mi tampi cu tangka in lentecelhnak nih a leem hna. Mah cu vawleicung pumpi ah a um i United States ram lawngah tangka in lentecelhnak nih a leemmi hna cu a nuai leng an si.

Phungthlukbia pakhat nih hitin a ti: “Khulrang tuk in hmuhmi chawva cu a donghnak ah thlua a chuak lai lo.” (Phungthlukbia 20:21) Tangka in lentecelhnak nih a leemmi hna cu leiba an ngei kho, an si a fak kho, rian an sung kho i an innchungkhar he zong an i ṭhencheu kho. Baibal phunglam zulhnak nih lawmhnak aan hmuhter khawh i na nunnak ah ṭih a nungmi tangka in lentecelhnak ruangah a chuakmi ṭhatlonak hna zong kha hrial awkah aan bawmh khawh.

“Rum a duhmi hna cu tukforhnak chungah khan an tla i ṭih a nungmi le ṭhatlonak a chuahter khotu duhnak nih khan rap in a foih hna i cu nih cun rawhralnak ah khan a kalpi hna.”​—1 Timote 6:9.