Zumhawktlak le a Fimmi Sal cu Ahodah a si?

Jesuh nih a thih lai ah a zultu pali, Piter, Jeim, Johan le Andru kha bia a rak ruah hna. Jesuh nih donghnak caan a phan cang ti a langhtermi hmelchunhnak kha a rak chimh hna hnuah, a biapimi bia kha hitin a rak chimh hna: “Zumh awk a tlak i a fimmi sal cu, a Bawipa nih a sal hawi zohkhenhtu dingah, a caan hmaan tein an rawl a petu dingah, a chiahmi kha a si.” (Matthai 24:3, 45; Marka 13:3, 4) An “Bawipa” a simi Jesuh nih donghnak caan ah thlarau rawl aan pe zungzal hna hngami sal kha rian ka pek hna lai tiah a zultu kha a rak ti hna. Mah sal cu ahote dah an si?

Thlarau in chiti thuhmi, Jesuh zultu phu hmete an si. Mah “sal” cu Jehovah Tehte Hna i Uktu Bu he naih tein rian a ṭuanṭi i vawleicung ah a ummi Jehovah salle kha thlarau rawl a caan hmaan tein a petu an si. ‘Amahle a caan te ah kan co awk hnga rawl’ hmaan tein a kan petu dingah mah zumhawk a tlakmi sal kha kan i bochan hna.—Luka 12:42.

An Bawipa nih a thilri vialte zohkhenh a fialmi hna an si. (Luka 12:44) Jesuh nih mah sal hna kha a ngan ngaimi rian a pek hna, mah rian cu vawleicung i a ummi Jehovah bupi zohkhenh kha a si, mah cu bupi thilri zohkhenh, phungchimnak rian lamhruai le Khrihfabu hmang in cawnpiak kha a si. “Zumh awk a tlak i a fimmi sal” nih cauk phunphun in le pumhnak le civui i an chimmi in kan herhmi thlarau rawl kha kan herh caan ah a kan pek.

Mah sal hna cu Baibal biatak le thawngṭha chimnak rian ah zumhawktlak an si, vawleicung i a ummi Khrih thilri vialte an zohkhenhnak ah fimnak an ngei. (Lamkaltu 10:42) Jehovah nih a tehte si awkah mi tampi a hnuh hna i zumhawktlak le a fimmi sal kha thlarau rawl tampi peknak ah a bawmh hna.—Isaiah 60:22; 65:13.

• Jesuh nih a zultu pawl thlarau rawl pek awkah ahote dah rian a pek hna?

• Mah sal hna cu zeitindah zumhawktlak an si i an fim?