Voi Dang Nakin Atu I Hlau Deuh U!

“Midang bantukin kan i hngilh awk a si ti lo; kan i ṭhangh awk le lungfim tein kan um awk a si.”​—⁠1 THESALON 5:⁠6.

1, 2. (a) Pompeii le Herculaneum khuapi hna cu zeibantuk khua hna dah an si? (b) Pompeii le Herculaneum khuami tampi nih zeibantuk ralrinpeknak dah zeirelloin an rak um i, zeithil dah a rak cang?

KANNIH chan kum zabu pakhatnak ah Pompeii le Herculaneum khuapi hna cu Vesuvius tlang thladem tangah a ummi a rummi Rom khuapi pahnih an si. Mah khuapi hna ah Rom mirum hna caah zapi nih an duhmi hrimhnak hmun hna an um. Mah hna ah minung thawngkhat hlei a tlummi puai tuahnak inn hna a um i Pompeii ah khuachungmi vialte a tlummi puai tuahnak inn nganpi pakhat a um. Pompeii khua a cawhtu hna cu zu dorhnak le khual tlunnak inn 118 an rel i cheukhat cu phekahnak le hlawhhlangnak hmun hna an si. Vanpang i hmanthlak hna le thildang hna nih zong ziaza ṭhatlonak le thilri chawva lawnglawng kawlnak a kark ti kha an langhter.

² C.E. 79 kum, August 24 ah Vesuvius tlangkangh cu puak hram aa thawk. Voikhatnak a puak caan lio i cu khuapi pahnih cungah a tlami lungkor le vutcam hna in a luatmi an um kho lai lo tiah tlangkangh mifim hna nih an zumh. Angaitein, a luatmi tampi an um komi a lo. Asinain, ṭihnung a sinak kha tlawm deuh in a ruahmi, asilole ralrinpeknak hmelchunhnak hna kha zeirello in a ummi hna cu cuka hmun ah an rak um peng ko. Cuticun, zanṭim hrawngah Herculaneum khuachung ah a lin ngaimi gas hna, lungkor hna le lungpi hna cu an rak tla i khuachung i a ummi vialte kha a thah dih hna. A thaizing zingkate ah tlangcimnak nih Pompeii khua i mi vialte kha a thah dih hna. Ralrin peknak hna zeirellonak nih ngaihchiatnak a tlunter!

Judah Thil Hna Ningcang Donghnak

3. Jerusalem rawhnak le Pompeii, Herculaneum khua hna rawhnak ah aa khatmi sining cu zeidah a si?

³ A hmasa deuh kum kua lioah minung kut in Jerusalem khua hrawh a sinak cu Pompeii le Herculaneum khua hna ah a cangmi nakin ṭih a nungdeuh. Jerusalem rawhnak cu “minung tuanbia dihlak ah ṭih a nungbikmi kulhnak pakhat” a si tiah thanh a si caah Judahmi naui khat leng an rak thi. Asinain, Pompeii le Herculaneum khua hna bantukin Jerusalem khua cu ralrinpek loin hrawhmi a rak si lo.

4. Thil hna ningcang donghnak a nai cang ti kha a zultu hna sinah zeibantuk hmelchunhnak dah Jesuh nih a rak chimchung i, mahcucu kum zabu pakhatnak ah zeitindah a rak tling?

⁴ Jesuh Khrih nih khuapi cu hrawh a si lai tiah a rak chimchung, mah hlanah raldohnak hna, mangṭam hna, lihnihnak hna le zangennak hna tibantuk ṭih a nungmi thil hna a cang hmasa lai tiah a rak chimchung. Nal profet hna an chuak lai, sihmanhsehlaw Pathian Pennak thawng ṭha cu vawlei dihlak ah chim a si lai. (Matthai 24:​4-7, 11-14) Nihin ah Jesuh bia hna cu a ngan deuh in a tling lio a si nain, mah caan lioah cun tlawmpal lawng a rak tling. Judah ram ah a fak ngaimi manṭam a tlung tiah tuanbia nih a langhter. (Lamkaltu 11:28) Jerusalem hrawh a si hlante ah li a hnin tiah Judahmi tuanbia ṭialtu Josefas nih a ti. Jerusalem khua donghnak a nai chin bantukin raldohnak, lungrualnak a ngei lomi nainganzi bu hna lak i dohnak, cun Judahmi le Gentailmi hna an umṭinak khua hna ah thahnak tampi a rak um. Asinain, Pennak thawng ṭha cu “van rang tang khuazakip ah sermi thil vialte ah chim” a rak si.​—⁠Kolose 1:⁠23.

5, 6. C.E. 66 ah Jesuh i zeibantuk profet chimchung bia hna dah a rak tling? (b) C.E. 70 lio Jerusalem khua a rawk tikah zeiraungah a thimi an tamtuk hnga?

⁵ A donghnak ah, C.E. 66 ah Judahmi hna nih Rom kha an rak doh. Jerusalem khua kulh awkah Sestias Gallas nih a ralkap bu kha a rak hruai tikah Jesuh zultu hna cu Jesuh i mah bia hna hi an lungah a pem ṭhan: “Nannih nih Jerusalem khua kha ralkap i an kulh nan hmuh tikah a rauh hlanah a rawk cang lai ti kha nan hngalh lai. Khi tikah Judea ram i a ummi hna cu tlang ah zam hna sehlaw; khuapi chungah a ummi hna cu chuak hna sehlaw khualeng ramlak i a ummi hna cu khuapi chungah khan lut hna hlah seh.” (Luka 21:​20, 21) Jerusalem khua cu zamtak awk a caan a phan cang​—⁠asinain, zeitindah an zamtak lai? Gallas i ralkap bu cu ruahlopi in an kir ṭhan caah Jerusalem khua le Judah ram i Khrihfa hna cu Jesuh nawl kha ngaih in tlangcung ah zam awkah lam a rak hung.​—⁠Matthai 24:​15, 16.

⁶ Kum li a luan hnu Lantakpuai tuahnak caan hrawngah Judahmi dohtu hna kha tuk awkah aa timhmi, ralbawi Titas i Rom ralkap cu an ra ṭhan. A ralkap bu nih cun an luat khawh lo nakhnga Jerusalem khua kha ‘raltuknak chuntlung in an rak kulh.’ (Luka 19:​43, 44) Rom Empire chung i Judahmi hna cu raldohnak lakah Lantakpuai caah Jerusalem khua ah an rak ra. Atu cu kulh an si cang. Josefas chimningin Rom hna i kulhnak thawngin a thimi tamdeuh cu khual hna an si.a A donghnak ah, Jerusalem khua a rawk tikah Rom Empire chung i Judahmi cheu sarih cheukhat cu hrawh an si. Jerusalem khua le a biaknak rawhnak cu Judah ram le Moses nawlbia cungah aa ngatmi biaknak a donghnak a si.b​—⁠Marka 13:​1, 2.

7. Zumhfekmi Khrihfa hna cu zeiruangah Jerusalem rawhnak in an luat?

⁷ C.E. 70 ah Judahmi Khrihfa hna cu Jerusalem khua i midang hna he thah an si, asilole sal ah an cang kho men. Asinain, tuanbia langhternak ah annih cu hmasa kum 37 ah Jesuh i ralrinpeknak kha an rak ngai. Khuapi kha an zamtak i an rak kir ṭhan ti lo.

Lamkaltu Hna i A Caan he Aatlakmi Ralrinpeknak

8. Zei herhnak dah Piter nih a rak hngalh i, Jesuh i zei bia hna dah a lungah a rak pem ṭhan hnga?

⁸ Nihin hi thil hna ningcang dihlak kha a donghter hngami a ngandeuhmi rawknak cu a phan cang lai. Jerusalem khua a rawk hlan kum ruk ah lamkaltu Piter nih i hliphlau u tiah a biapi in le caan hman tein a rak chim i, mahcucu kannih chan i Khrihfa hna he a hleikhun in aa pehtlai! Bawipa Jesuh Khrih i ‘nawlbia’ kha kan philh lo nakhnga Khrihfa hna nih ‘ruahnak thiang ṭhanghter’ awk a herh ti kha Piter nih a rak hngalh. (2 Piter 3:​1, 2) I hliphlau awkah Khrihfa hna kha Piter nih a forh tikah Jesuh a thih hlan ni tlawmpal ah lamkaltu hna sinah a rak chimmi hi bia hna hi a lungah a rak pem caah a si men lai: “Cu caan cu zeitik ah a si lai kha nan hngalh lo caah i ralringte le fimhringte in um ko u.”​—⁠Marka 13:⁠33.

9. (a) Zeibantuk ṭihnungmi lungputning dah cheukhat nih an rak ngei? (b) Lungawkṭawmmi lungputning cu zeiruangah a hleikhun in ṭihnung a si?

⁹ Nihin ah mi cheukhat nih “ ‘Ka ra ṭhan lai,’ tiah bia aa kam a si lo mei? Atu khuazei ahdah a um kun?” tiah an serhsat lai. (2 Piter 3:​3, 4) Thil hna cu vawlei ser ri in a si bantukin pei a si peng ko i zeitik hmanhah aa thleng bal ṭung lo tiah an ruah caah a si ti cu a fiang. Cubantuk lungawṭawmnak cu ṭihnung a si. Lungawṭawmnak nih a biapi ngai timi lungputning kha a derter khawh i, kan lungthin duhnak kha a kan zulhter khawh. (Luka 21:34) Cu hleiah, Piter nih a langhter bantukin a serhsatmi hna nih vawlei ningcang pakhat a rak hrawhmi Noah chan i buanchukcho kha an rak philh. Mah lioah vawlei sining cu a rak thleng taktak ko!​—⁠Genesis 6:​13, 17; 2 Piter 3:​5, 6.

10. A lung a sau lomi hna kha Piter nih zei bia in dah thazang a pek hna?

¹⁰ Pathian cu a caancaan ah zeiruangah a lehrul cawlh lo ti kha ralrinpeknak thawngin Piter nih a ca reltu hna kha lungsaunak a ngeihter hna. Hmasabik ah hitin a ti: “Pathian hmuhning ah cun ni khat le kum thong khat hi an i dang lo, an i khat ko.” (2 Piter 3:⁠8) Jehovah cu zungzal in a nung caah a konglam vialte kha ruah in lehrul awkah a ṭhabikmi caan kha a thim khawh. Cun Jehovah duhnak cu khauzakip i mi hna nih sual i ngaihchih awk a si tiah Piter nih a langhter. Pathian i lungsaunak cu mi tampi caah khamhnak a si, Pathian khulrang in a ceih ahcun mi tampi an thi lai. (1 Timote 2:​3, 4; 2 Piter 3:⁠9) Asinain, Jehovah cu a lung a sau caah zeitik hmanhah a lehrul lai lo tiah a chimduhmi a si lo. “Bawipa Ni cu ruahlopi ah mifir bantuk in a ra lai,” tiah Piter nih a ti.​—⁠2 Piter 3:⁠10.

11. Thlarau lei ah i hlau peng awk zeinih dah a kan bawmh lai i, mahnih cun Jehovah ni kha zeitindah ‘khulrangter’ bantuk in a siter lai?

¹¹ Piter i tahchunhnak cu i chingchiah awk tlak a si. Mifir kha tlaih awk a fawi lo, sihmanhsehlaw zan khuadei aa hlaumi congtu cu aa hngilh pengmi congtu nakin mifir kha a tlaih khawh. Congtu pakhat cu zeitindah aa hliphlau khawh? Zan khuadei ṭhutnak nakin i chawhnak nih a hliphlauter khawh deuh. Cuticun, thlarau lei ah i chawhnak nih Khrihfa hna in a hliphlauter lai. Cucaah Piter nih “nan nunning cu a thiangmi le Pathian sin i pekmi an si awk a si” tiah a kan forh. (2 Piter 3:11) Cutin tuahnak nih ‘Pathian Ni kha hngah peng’ awkah a kan bawmh lai. “Hngah” tiah lehmi Grik biafang cu cafang ningin “Khulrangternak” tiah leh khawh a si. (2 Piter 3:​12, NW; thlaihhlei) Jehovah i a caan cu kan thlen khawh lo. A khiahmi caan ah A ni cu a phan lai. Sihmanhsehlaw Pathian rian ah kan rian a tam ahcun a caan cu a rang deuhmi a lo lai.​—⁠1 Korin 15:⁠58.

12. Jehovah lungsaunak in zeitindah ṭhathnemnak kan i lak khawh?

¹² Cucaah, Jehovah ni cu a nuartuk tiah a ruahmi paoh cu Jehovah nih a khiahmi caan kha lungsau ngaiin hngak u timi Piter i cawnpiaknak kha ngaih awk forh an si. Angaitein, Pathian nih lungsau ngaiin a pekmi caan kha fim ngaiin kan hman khawh. Tahchunhnak ah, a biapimi Khrihfa sining hna kha kan ṭhanchoter peng khawh lengah mi tampi nih theih loin an um khawhmi thawngṭha kha kan chim khawh. Kan i hlau peng ahcun hi thil hna ningcang donghnak ah Jehovah hmai ah “a thiangmi le soi awk um lo” in kan um khawh lai. (2 Piter 3:​14, 15) A ṭha ngaimi thluachuah a si ko!

13. Thesalon Khrihfa hna sinah a ṭialmi Paul i zeibantuk bia hna dah nihin caah a hleikhun in a tlak?

¹³ Paul nih Thesalon khua i Khrihfa hna sinah a ṭialmi cakuat pakhatnak ah zong i hlau awk a herh tiah a langhter. Hitin a ti: “Midang bantuk in kan i hngilh awk a si ti lo; kan i ṭhangh awk le lung fimte in kan um awk a si.” (1 Thesalon 5:​2, 6) Nihin vawlei ningcang dihlak rawhnak cu a nai chin cang caah mah cawnpiaknak cu a herh taktak ko! Jehovah a biami hna cu thlarau lei zei a rellomi vawlei ah an nun caah mahnih a hnorsuang khawh hna. Cucaah Paul nih hitin a chimhrin hna: “Kannih cu chunmi kan si caah lung fimte in kan um awk a si. Zumhnak le dawtnak cu kan phaw ah kan i hruk awk a si i khamh kan i ruahchannak cu luchin ah kan i chinh awk a si.” (1 Thesalon 5:⁠8) Pathian Bia hmaanhmaan cawnnak le pumhnak hna ah kan unau pawl he hmaanhmaan i kawmhnak nih Paul chimhrinnak kha ngai awk le a biapi in ruahnak ngeih awkah a kan bawmh khawh.​—⁠Matthai 16:​1-3.

Nuai Tampi Hna Hngilh Loin An Hngak Peng Ko

14. Nihin ah mi tampi cu i hlau peng u timi Paul chimhrinnak kha an ngaih tiah zeibantuk cazin nih dah a langhter?

¹⁴ Nihin i hliphlau awk thazangpeknak kha a zulmi tampi an um hnga maw? An um ko. 2002 rianṭuannak kum chungah 2001 kum nakin zatuak 3.1 a tamdeuh i a tambik thawngthanhtu 6,304,645 hna nih Pathian Pennak kong kha midang hna sinah suimilam 1,202,381,302 tiang an chimhnak thawngin thlarau lei an i hlaunak kha a langhter. Annih cu an ṭuan sawhsawhmi a si lo. An nuncan ah a biapimi rian a si. Tamdeuh i an lungputning kha El Salvador ram i Eduardo le Noemi nih an langhter.

15. El Salvador ram i zeibantuk hmuhtonnak nih dah mi tampi cu thlarau lei ah an i hliphlau tiah a langhter?

¹⁵ ‘Vawlei thil umtuning cu aa thleng peng’ timi Paul a bia hna kha a luanciami kum tlawmpal ah Eduardo le Noemi nih an rak hngalh. (1 Korin 7:31) An nuncan kha an tluangtlamter i caantling hmaikal phungchim rianṭuannak ah an i tel. A caan a tling tikah thluachuah phunphun an hmuh i, peng le district rianṭuannak ah an i tel. Harnak nganpi an ton ko nain Eduardo le Noemi nih an thilri chawva kha an kaltak i caantling rian an ṭuanmi cu a hmaanmi khiahnak a si tiah fek ngaiin an zumh. El Salvador ram i hmaikal 2,454 tel in thawngthanhtu 29,269 chung i tamdeuh cu mahzawn ruah lonak kha an langhter, cucaah ni kum ah thawngthanhtu zatuak 2 a karhnak a si.

16. Côte d’Ivoire ram i unaupa pakhat nih zeibantuk lungputning dah a langhter?

¹⁶ Côte d’Ivoire ram i Branch zung ah hitin ca a ṭialmi Khrihfa mino pa pakhat nih cubantuk lungputning kha a langhter: “Keimah cu khrihfabu bawmtu pakhat ka si. Sihmanhsehlaw keimah lila hi zohchunh awk ṭha ka si lo ahcun zeitindah unau hna kha hmaikal rian ṭuan awk ka chim khawh lai. Cucaah tangka tampi hmuhmi rian kha ka kaltak i a zatawk in hmuhmi keimah pumpak rian kha ka ṭuan, mah ruangah phungchim rianṭuannak ah a caan ka pek khawh deuh.” Mah mino pa cu zatuak 5 a ṭhangcho i thawngthanhtu 6,701 a ummi Côte d’Ivoire ram ah hmaikal rian a ṭuanmi 983 lakah pakhat asi.

17. Belgium ram i mino Hngaltu pakhat nih thleidannak a ṭih lo ti kha zeitindah a langhter?

¹⁷ Ngaihthiamlonak, huatnak le thleidannak nih Belgium ram i Pennnak thawngthanhtu 24,961 caah harnak a chuahter peng ko. Asinain, annih cu lungthawhnak an ngei peng i an ṭih lo. Jehovah Hngaltu hna cu bu sawhsawh pakhat an si tiah an chimmi kha kum16 a simi unaunu pakhat nih a theih tikah mah kong kha chim awk a nawl hna. Jehovah Hngaltu hna​—⁠Min Hnulei ah a Ummi Bu video le Jehovah Hngaltu hna​—⁠Annih Cu Ahodah An Si? timi brochure hmangin Jehovah Hngaltu hna an sining taktak kha a chim khawh hna. A chimmi a kong cu lawmh a si i a zulmi zarh ah tuahmi camipuai i biahalnak vialte cu Jehovah Hngaltu hna i Khrihfa Biaknak he aa pehtlaihmi an si.

18. Argentina le Mozambique ram i thawngthanhtu hna kha chawlehnak harnak hna nih Jehovah rianṭuannak ah an lung a vakvaiter lo ti kha zeinih dah a langhter?

¹⁸ Hi ni hmanungbik caan ah Khrihfa tamdeuh cu harnak nganpi hna an ton. Asinain, an lung a vakvai lo nakhnga an i zuam. Chawlehnak (sipuazi) lei harnak a tlung ko nain Argentina ram ah ni kum ah a tambik Hngaltu 126,709 an um. Mozambique ram ah sifahharnak cu a tlung peng rih ko. Sihmanhsehlaw, zatuak 4 a ṭhangcho i tehte khannak rian ah 37,563 an i tel. Albania ram i mi tampi caah nuncan cu a har tuk ko nain, a tambik thawngthanhtu 2,708 a phan i zatuak 12 a rak ṭhangcho. Jehovah sal le hna nih Pennak ṭhatnak kha hmasa an chiah ahcun harnak hna nih Jehovah thlarau kha a khamh khawh lo ti cu a fiang tuk ko.​—⁠Matthai 6:⁠33.

19. (a) Baibal biatak a duh taktakmi tuu bantuk lungthin a ngeimi tampi an um rih ko ti kha zeinih dah a langhter? (b) Jehovah sal le hna cu thlarau lei ah an i hlau peng ko tiah a langhtermi kum khat chung an rianṭuannak cheukhat cu zeidah an si? (Cahmai 6-9 i cazin kha zoh.)

¹⁹ Vawlei khuazakip ah thla fate buaktlak in an tuahmi Baibal cawnpiaknak 5,309,289 nih Baibal biatak kha a duh taktakmi tuu bantuk lungthin a ngeimi tampi an um rih ko ti kha a langhter. Ruahnolhnak a kaimi 15,597,746 chungah a tamdeuhcu Jehovah rian kha lungtho tein a ṭuanmi an si rih lo. Annih pawl i Jehovah le an unau hna hngalhnak le an dawtnak hna cu ṭhangcho peng ko seh. ‘Tuu dang’ chung i ‘mibu nganpi’ cu thlarau chiti thuhmi an unau hna he kawmh in ‘biaknak inn ah chun le zan’ in Sertu rian an ṭuan lioah an ṭhancho pengnak kha kan hmuh caah lung lawmg awk ngai a si.​—⁠Biathlam 7:​9, 15; Johan 10:⁠16.

Lot Sinin Cawnnak Pakhat

20. Lot le a nupi tahchunhnak in zeidah kan cawn khawh?

²⁰ Zumh awk tlakmi Pathian sal le hna hmanh a biapi timi ruahnak kha an thlau khawh. Abraham i a tupa Lot kha ruat hmanh. Pathian nih Sodom le Gomorrah kha a hrawh cang lai ti kha vancungmi pahnih sinin a rak theih. “Nawlbia zeihmanh i a rel lomi hna nih awlok an chonhmi” Lot caah mahcu khuaruah har awk a simi thawngpang a si lo. (2 Piter 2:⁠7) Asinain, vancungmi pahnih nih Sodom khua in an chuahpi tikah “nuainai” in a rak um. Vancungmi hna nih amah le a innchung kha an hnuh i khua lenglei ah an chuahpi. A donghnak ah Lot nupi cu hnu leiah i mer hlah timi vancungmi hna i ralrinpeknak kha zeirelloin a rak um. A lungputning nih a nunnak a sunghter. (Genesis 19:​14-17, 26) “Lot nupi kha va philh hlah u” tiah Jesuh nih ralring a rak pek.​—⁠Luka 17:⁠32.

21. Atu ah voidang nakin zeiruangah kan i hlau awk a biapi?

²¹ Pompeii le Herculaneum khua hna i tlangkang le Jerusalem khua rawknak pawngkam i a cangmi thil hna lengah Noah chan i buanchukcho le Lot chan i zohchunhnak hna nih ralrinpeknak kha a biapi in ruah awk a si ti a langhter hna. Jehovah sal le hna in donghnak caan hmelchunhnak kha kan hngalh. (Matthai 24:⁠3) A hmaan lomi biaknak in kan i ṭhen. (Biathlam 18:⁠4) Kum zabu pakhatnak Khrihfa hna bantukin ‘Pathian Ni hngah peng’ awk kan herh. (2 Piter 3:12) A hmaan ko, atu cu voidang nakin kan i hlau hrimhrim awk a si! Zei kehlan hna dah kan i lak khawh i, i hlau peng awkah zeibantuk sining hna dah kan ṭhanchoter khawh? A changmi capar ah mah kong hna kha kan ruahte lai.

[A Tanglei Fianternak Hna]

Zeitindah Na Leh Lai?

• Zeibantuk thil nih dah Judahmi Khrihfa hna kha Jerusalem rawknak in a luatter hna?

• Lamkaltu Piter le Paul i chimhrinnak nih zeitindah i hlau awk a kan bawmh lai?

• Nihin ah aho nihdah i hlaunak kha a langhter?

• Lot le a nupi kong in zeidan kan cawn khawh?

[Cahmai 10nak i Hmanthlak]