“Hngilh Loin Hngak Ko U”!

“Nan Sin ka chimmi hi mi dihlak sin i ka chim a si: Hngilh loin hngak ko u.”​—⁠MAR. 13:⁠37.

1, 2. (a) Mipa pakhat nih a thilri runvennak kong ah zeibantuk cawnnak dah a rak hmu? (b) Mifir pakhat kong Jesuh i bianabia in i ṭhangh awk kong zeidah kan cawn?

Juan nih a thil mansung hna kha a inn ah a chiah. Mah hna kha hmun himbik a si tiah a ruahmi a ihkhun tangah a chiah. Asinain, annih nuva hna an i hngilh lioah an ihnak khan ah mifir pakhat a rak lut. Mifir nih khoika hmun ah thil an chiah tikha a hngalh dihmi a lo. Ihkhun tang i thil mansung vialte le an ihkhun pawng i thil chiahnak bizu chungah an chiahmi tangka zong kha a rak firpiak dih. A thaizing ah, Juan nih mifir nih a fir dih tikha a rak hngalh. Aa hngilhmi nihcun a thil hna kha a ven khawh lo timi hngaihchiat awk a simi cawnnak kha caan saupi tiang a philh khawh lai lo.

² Thlarau lei zong cuticun a si ve. Kan i hngilh ahcun, kan ruahchannak le kan zumhnak kha kan ven khawh lai lo. Cucaah Paul nih “mi dang bantuk kan i hngilh awk a si ti lo; kan i ṭhangh awk le lung fimte in kan um awk a si,” tiah a rak forhmi a si. (1 Thesalon 5:⁠6) I hlau awkah a biapinak kha langhter awkah, Jesuh nih mifir bianabia kha a rak hman. Amah cu Biacheihtu in a rat lainak caan ah a cang hngami thil sining hna kha a chim hnuah, hitin ralrinnak a rak pek: “Cucaah ralringte in um ko u, na Bawipa a rat lai ni nan hngalh rih lo, ralring te in um ko u. Hihi philh hlah u: Inn ngeitu nih mifir a rat lai caan kha hngalh sehlaw cu hngilh lote in a rak um hnga i mifir kha a inn chungah a luhter hnga lo. Cu ruangah cun nannih zong timhciate in nan um zungal awk a si, zeicahtiah Mi Fapa cu nan i rin lo caanpi ah a ra ko lai.” (Matthai 24:​42-44) Mifir pakhat nih a rat lai caan kha a ṭhanh hmasa lo. Ahohmanh nih an ruah lomi caan ah phanh dingah a duh. Cutin cun Jesuh a chim bangin hi vawlei a donghnak cu ‘kan ruah lomi caan’ ah a ra lai.

‘I Hlau, Zumhnak Ahkhan Fek Tein Dir u’

3. Nupi ṭhitnak puai in an Bawipa a rat lai a hngakmi sal hna bianabia hmang in i hlau awk a biapitnak kha Jesuh nih zeitindah a langhter?

³ Luka Thawngṭha ah Jesuh nih Khrihfa hna kha nupi ṭhitnak puai in an Bawipa rat lai a hngahmi sal hna he a tahchunh. A hung phanh tikah timhciate in um awkah an i hlau awk a herh. Cubantukin Jesuh nih “a ra lai tiah nan zumh lo caan ah Mi Fapa cu a ra ko lai” tiah a rak ti. (Luka 12:40) Kum saupi Jehovah a rak bia cangmi cheukhat nih kan nunnak caan he pehtlaihin a biapi ngai in ruahnak kha an hlau kho men. Donghnak cu a hlat tuk rih tiah an ruah khawh men. Sihmanhsehlaw, cubantuk ruahnak nih kan lungthin peknak kha thlarau lei in thilri chawva lei ah a kan pialter khawh i, thinlung vakvainak nih kan thlarau lei ah a kan nguhter khawh.​—⁠Luka 8:14; 21:​34, 35.

4. Zeibantuk zumhfeknak nih dah i hngilh loin hngah awkah a kan forh lai i, mahkhakha Jesuh nih zeitindah a langhter?

⁴ Jesuh i tahchunhnak in cawnnak dang kan i lak khawh rih. Sal le hna nih an Bawipa a hung phanh lai nak suimilam kha an hngalh lo nain, a rat lainak zan cu an hngalhmi a lo. An Bawipa cu zan dang ah a hung phan lai tiah an ruah ahcun, mah zan ah zankhat chung i hlau peng awk ah a har lai. Cutin si loin, an Bawipa a hung phanh lai zan kha an rak hngalh caah i hlau awk ah thazang a pek hna. Cubantuk ṭhiamṭhiam in, Baibal chimchungbia hna nih kannih cu donghnak caan ah kan nung tiah fiangte in a kan chimh; sihmanhsehlaw donghnak a ni lei a suimilam cu a kan chim lo. (Matthai 24:36) Donghnak cu a ra lio ti kan zumhnak nih ṭhangh awkah a kan bawmh, sihmanhsehlaw Jehovah ni cu a nai taktak cang ti kha kan zumh ahcun, i hngilh loin hngak awkah a kan forh deuh lai.​—⁠Zephaniah 1:⁠14.

5. “I hlau u” timi Paul forhnak kha zeitindah kan leh khawh?

⁵ Pual nih Korin khuami hna sinah hitin a rak forh hna: “Lungfimte in um u [“i hlau u,” NW], nan zumhnak ahkhan fekte in dir u.” (1 Korin 16:13) A hmaan ko, i hlau pengnak cu kan Khrihfa zumhnak ah fekte in dirnak he aa pehtlai. Zeitindah kan i hlau peng khawh lai? Pathian Bia kha thukdeuh in hngalh i zuamnak thawngin a si. (2 Timote 3:​14, 15) A ṭhami pumpak cawnnak le pumhnak ah hmaan tein kalnak nih kan zumhnak kha a fehter, cun Jehovah ni ruahnak zong cu kan zumhnak ruahchanhnak caah a biapi. Cucaah hi vawlei donghnak caan ah kan nung tiah a langhtermi Cathiang fianternak hna kha a tu le atu ruahnak nih a donghnak kong he pehtlaihmi a biapimi biatak hna kha kan philh lo nakhnga a kan bawmh lai.a Baibal chimchungbia a tlinnak a langhtermi vawlei thil sining hna kha ruah cu a ṭhahnem. Germany ram i unau pakhat nih hitin a ṭial: “Raldohnak, lihninnak, zangennak, vawlei thurhnomnak kong thawngpang hna kha ka zoh tik paoh ah donghnak a nai cang ti ka hngalh chinchin.”

6. Caan a dongh chin bantukin kan thlarau lei i hliphlaunak a tlau khawh tiah Jesuh nih zeitindah tahchunnak a pek?

⁶ I hlau u tiah a zultu hna Jesuh a forhnak kong kha Marka angan 13 ah kan hmuh rih. Mah angan ah Jesuh nih a zultu hna i sining kha khualtlawnnak in a rak kir lai caan a hngahmi innka cawngtupa he aa lo tiah a ti. Innka cawngtupa nih a Bawipa cu zei caan ah a kir lai tikha a rak hngal lo. Hngilh loin hngah peng awk a si ko. Bawipa a rak kir lai caan a caan phunli kha Jesuh nih a langhter. A voilinak caan cu zing suimilam pathum in nichuah lai tiang a si. Donghnakbik caan ah innka cawngtupa cu fawitein a ngu khawh. Ral kha ruah lo piin tuk awk a ṭhabik caan cu nichuah hlante ah a si tiah ralkap pawl nih an chim tawn. Cubantukin, hi donghnak caan ah kan pawngkam i vawlei cu thlarau lei ah aa hngilh peng ko caah kannih cu i hlau peng awkah fakpi in i zuam awk a herh. (Rom 13:​11, 12) Cucaah, Jesuh i bianabia ah hitin a forh lengmangmi a si: “Ralringte le fimhringte in um ko u. . . . [Cu] caah ṭhate in hngak ko u. . . . Nan sin ka chimmi hi mi dihlak sin i ka chim a si: Hngilh lo in hngak ko u.”​—⁠Marka 13:​32-37.

7. Zeibantuk ṭihnungmi thildah a um taktak i, mah ruangah Baibal chung i zeibantuk thazangpeknak dah kan rel lengmang mi a si?

⁷ Jesuh cu phungchim rian a ṭuan lio caan ah le a thawhṭhan hnu hmanhah i hliphlau awkah voi tampi a forh hna. Angaitein, hi sining donghnak kha Cathiang nih a langhter tik paoh ah i hlau peng awkah asilole hngilh loin hngak peng awkah ralrin a pek hna tikha kan hmuh.b (Luka 12:​38, 40; Biathlam 3:2; 16:​14-16.) Thlarau lei ah i hngilh cu ṭihnung a si taktak ti a fiang ko. Cubantuk ralrinpeknak hna kha kan zapi in kan herh cio!​—⁠1 Korin 10:12; 1 Thesalon 5:​2, 6.

Hngilh Loin a Um Kho Lomi Lamkaltu Pathum

8. Gethesemane dum ah Jesuh i zultu pathum nih hngilh loin hngah awk a rak halnak kha zeitindah an leh?

⁸ Piter, Jeim le Johan te pawl kha kan zoh ahcun i hlau peng awkah tinhnak ṭha ngeih lawngin a za lo. Hi pathum hna cu zumhfek tein Jesuh hnu a zulhmi hna an si i, Jesuh a daw ngaimi thlarau lei a ṭha ngaimi an si. Asinain, C.E. 33, Nisan 14 zan ah i hlau awk an rak tlorh. Lanhtak paui an tuahnak inncung khan in an chuak i Gethsemane dum ah Jesuh kha mah lamkaltu pathum nih an zulh. Cuka hmun ah Jesuh nih “ka lungchung hi ngaihchiatnak in a khat tuk i ka thi rua lai tiah ka ruah. Cucaah cun hika ah hin rak um u law hngilh lote in rak ka hngak u,” tiah a rak ti hna. (Matthai 26:38) Jesuh nih vancung a Pa sinah lungtho ngaiin voithum tiang thla a rak cam i voithum chung an i hngilh kha a rak hmuh hna.​—⁠Matthai 26:​40, 43, 45.

9. Lamkaltu hna an ngutnak cu zeiraungah a si?

⁹ Mah zan ah mah zumhfekmi hna nih Jesuh kha zeiraungah a lung an donghter? Titsa lei batnak cu a kong pakhat a si. A caan cu a tlai tuk cang i, zanṭim hnu ah a si kho men, “an mit a au in an au kho lo.” (Matthai 26:43) Asinain, Jesuh nih hitin a rak chim hna: “Tukforhnak chungah nan luh nak hnga lo hngilh lote in um u law thlacam tuah u. Thlarau nih cun a huam ko, sihmanhsehlaw titsa cu a der ko hi ta.”​—⁠Matthai 26:⁠41.

10, 11. (a) Jesuh cu a ba tuk ko nain Gethsemane dum ah zeiruangah i hngilh lo tein a rak um khawh? (b) Jesuh nih hngilh loin hngah awkah lamkaltu pathum kha a rak chim tikah a cangmi thil in zeidah kan i cawn khawh?

¹⁰ Mah zan ahcun Jesuh cu a ba taktak ko. Asinain i hngilh lote in mah a biapimi donghnak caan ah lungtho tein thla a rak cam. Mah hlan ni tlawmpal ah Jesuh nih a zultu hna kha hitin a rak forh hna: “Hi a tlung hnga dingmi thil vialte hi himte in chuak lak in nan tan khawh nakhnga, thazang nan ngeih nak hnga le Mi Fapa hmai ah nan dir khawhnak hnga ralringte in um u law thla va cam zungzal ko u.” (Luka 21:36; Efesa 6:18) Jesuh cawnpiaknak kha zul in thlacamnak he aa tlaiin amah kha kan i zohchunh ahcun, Jehovah sinah lungtak tein thla kan camnak nih thlarau lei ah i hlau peng awkah a kan bawmh lai.

¹¹ A rauh hlan ah tlaih in thah ka si cang lai tikha Jesuh nih a hngalh ko nain, mah lioah a zultu hna nih an rak hngalh lo. A in mi hneksaknak hna lakah a harbikmi fahnak cu hremnak tung cungah a in cang lai. Jesuh nih mah kong hna kha a zultu hna sinah a rak chim ko nain, a chimmi a sullam kha annih nih an rak hngalh piak lo. Cucaah i hlau in thla a cam lioah annih cu an rak i hngilh ko. (Marka 14:​27-31; Luka 22:​15-18) Lamkaltu hna bantukin kannih zong kan titsa tha a der i kan hngalh rih lomi a kong hna zong a um rih. Asinain, kan nunnak caan i a biapit nak kha kan philh sual ahcun, thlarau lei ah kan i hngilh khawh. Kan i hliphlau lawngah ralring tein kan i hlau peng khawh lai.

A Biapimi Sining Pathum

12. Lung fimte in umnak kha zeibantuk sining pathum he dah Paul nih a pehtlaihter?

¹² A biapi ngai timi kan ruahnak kha zeitindah kan ngeih peng khawh lai? Thlacam a biapinak le Jehovah ni philh lo awk a herhnak kha kan hngalh cang. Cun, kan ṭhanchoter awk a simi a biapimi sining pathum kha Paul nih a langhter. Amah nih hitin a ti: “Kannih cu chunmi kan si caah lung fimte in kan um awk a si. Zumhnak le dawtnak cu kan phaw ah kan i hruk awk a si i khamh kan i ruahchannak cu luchin ah kan i chinh awk a si.” (1 Thesalon 5:⁠8) Thlarau lei ah kan i hlau peng nakhnga zumhnak, ruahchannak le dawtnak kong hna kha a tuainak in ruat hmanh u sih.

13. Kan i hliphlau peng awkah zumhnak cu zei lam indah aa tel?

¹³ Jehovah cu a um taktak i “amah a kawlmi cu laksawng a pek hna” timi zumhfeknak kan ngei awk a si. (Hebru 11:⁠6) Donghnak caan he aa pehtlaihmi Jesuh i profet chimchungbia hna kum zabu pakhatnak i a tlin hmasa nak nih kannih chan chungah a ngandeuh in a tling lai timi kan zumhnak kha a fehter. Cun kan zumhnak nih Jehovah ni kha lungtho tein a kan ruahchanter i “[profet chimchungmi langhnak cu] pello in a ra hrimhrim ko lai” tiah kan hna a ngamter.”​—⁠Habakkuk 2:⁠3.

14. Kan i hlau peng nakhnga ruahchannak cu zeitindah a biapi?

¹⁴ A fiangmi kan ruahchannak cu Pathian biakamnak hna a tling taktak nakhnga kan hngahmi a si hmanhah harnak hna kha in khawhnak a kan ngeihter khawhmi ‘nunnak caah thir cangai’ bantuk a si. (Hebru 6:​18, 19) A luan ciami kum 70 lio ah tipil a rak ingmi kum 90 hlei a si cangmi thlarau chiti ṭhuhmi unuanu pakhat nih hitin a ti: “1963 kum ah kensa zawtnak in ka vapa a thih hlante ah donghnak khulrang in a rat ah a ṭha lai tiah ka rak ruah. Sihmanhsehlaw keimah ca lawngah ka rak ruah tikha atu ah ka hngalh. Kan rian hi vawlei cungah zeitluk tiang in a karh lai tikha mah caan lioah kan rak hngalh lo. Atu hmanh ah, rian an hunkaami hmun tampi a um. Cucaah Jehovah a lungsaunak kha ka lawmh ngaingai.” Lamkaltu Paul nih hitin kan hna a kan hngamhter: “In khawhnak nih cun hneksaknak kan in khawh kha a langhter i cu a langhternak cu ruahchannak hrampi kha a si. . . . Ruahchannak cu pakpalawng men a si lo.”​—⁠Rom 5:​3-5.

15. Caan saupi kan rak hngah cang tiah kan ruah hmanhah dawtnak nih zeitindah a kan forh lai?

¹⁵ Khrihfa dawtnak cu kan tuahmi thil vialte i a hrampi forhnak a si caah a lang ngaimi sining pakhat a si. A caan cu zeitin a si hmanhah Jehovah kan dawt caah amah kha kan biak a si. Pennak thawngṭha chim awk a si timi Pathian a duhnak zeitluk tiang a sau hmanhah, kan kal ciami inn hna ah kal ṭhan lengmang awkah innpa kan dawtnak nih a kan forh lai. Paul nih a ṭial bantukin “a hmun zungzalmi thil pathum an um, cu hna cu zumhnak le ruahchannak le dawtnak an si i cu hna lak i a nganbikmi cu dawtnak a si.” (1 Korin 13:13) Dawtnak nih in khawhnak a kan ngeihter i, i hlau peng awkah a kan bawmh. “[Dawtnak] nih zeizong vialte ah ruahchannak a ngei, zeizong vialte ah a in khawh. Dawtnak cu dongh a ṭhiam lo.”​—⁠1 Korin 13:​7, 8.

‘Nan Ngeihmi Kha Ṭhate In I Tlaih’

16. I nuarhnak chain zeibantuk lungputning dah kan ṭhanchoter awk a si?

¹⁶ Ni hmanungbik i donghnak caan ah kan nung tiah ralrinnak a kan pekmi vawlei sining hna kha kan hmuh lio caan a biapi ngaimi caan ah kan nung. (2 Timote 3:​1-5) Atu caan cu kan i nuarh awk caan a si lo i ‘kan ngeihmi kha ṭhate in i tlaih’ awk caan a si. (Bithlam 3:11) ‘Thlacam awk ralringte in umnak’ thawngin le zumhnak, ruahchannak le dawtnak kha ṭhanchoternak thawngin hneksak kan si tikah timhcia kan si lai. (1 Piter 4:⁠7) Bawipa rian ah ṭuanding tampi a um. Pathian pumpeknak rian hna ah kan riantamnak nih i hlau peng awkah a kan bawmh lai.​—⁠2 Piter 3:⁠11.

17. (a) A caancaan ah lungfahnak hna ruangah zeicah kan lung a dongh awk a si lo? (Cahmai 14 i ringli kulh kha zoh.) (b) Jehovah kha zeitindah kan i zohchunh khawh i, a zohchunhmi hna caah zeibantuk thluachuah dah a um?

¹⁷ “Ka ngeihmi dihlak cu BAWIPA hi a si ko, ka ti; Cucaah amah cu lungsau in ka ngan ko lai; BAWIPA cu amah a hngaktu hna cungah le amah a kawltu vialte hna cungah khan a ṭha; BAWIPA nih a kan chuahter lai ding cu lungsau in hngah i daite i um zong ah a ṭha ko” tiah Jeremiah ni a ṭial. (Ṭahnak hla 3:​24-26) Kan lak i mi cheukhat cu caan tuaite lawng an rak hngah. Midang hna cu Jehovah i khamhnak kha hmuh awkah kum tampi an rak hngah cang. Asinain, kan hngahmi caan cu kan hmai i zungzal a hmunmi caan he kan tahchunh ahcun a toi tuk ko! (2 Korin 4:​16-18) Jehovah nih a khiahmi caan kha kan hngah lioah a herh hrimhrimmi Khrihfa sining hna kha kan ṭhanchoter khawh i Jehovah i lungsaunak chungah midang zong nih biatak an cohlan nakhnga kan bawmh khawh. Cucaah kan zapi in hngilh loin hngak peng ko u sih. Jehovah kha i zohchunh in lung sua in um u sih. A kan pekmi ruahchannak kha lawmh u sih. Zumhfek tein kan i hliphlau lioah zungzal nunnak ruahchannak kha fek tein i tlaih peng u sih. Cuti cun Profet chimchungmi hi biakamnak hna cu kan caah a taktak a si te lai: “[Jehovah] cu i bochan u law a nawl kha zul tuah u; ram kha co awkah thazang an pek hna lai i miṭhalo cu pawnchuah an si kha nan hmuh lai.”​—⁠Salm 37:⁠34.

[A Tanglei Fianternak Hna]

Zeitindah Na Leh Lai?

• Hi thil hna ningcang a dong cang lai timi kan zumhnak kha zeitindah kan fehter chin khawh?

• Piter, Jeim le Johan te pawl an nunning in zeidah kan cawn khawh?

• Thlarau lei ah kan i ralring khawh nakhnga zeibantuk sining pathum nih dah a kan bawmh lai?

• Atu caan cu ‘kan ngeihmi kha ṭhate in i tlaih’ awk caan zeiruangah a si?

[Cahmai 14nak i Hmanthlak]

“Zumhawktlak Tein A Ummi Hna Cu Thluachuak mi An Si”​—⁠Daniel 12:⁠12.

[Cahmai 14nak i Hmanthlak]

Innka cawngtupa pakhat nih a cawnghmi inn kha mifir pakhat nih fir awk a timh kha a hngalh hei ti u sih. A cawngtupa nih a mui chinchin tikah mifir a lut tiah ruah khawh a simi aw poahpoah kha lungthin pek in a ngai lai. A hna le a mit in lungthin pek in a ngai lai. Thli aw, chizawh pakhat nih pakhatkhat a khawnsualnak aw tibantuk aw hna nih amah kha phundang in a ruahter khawh men.​—⁠Luka 12:​39, 40.

‘Bawipa Jesuh Khrih a langh lai nak a hngahmi’ hna zong cutin a si khawh. (1 Korin 1:⁠6) Jesuh a thawhṭhan hnu a rauh hlanah ‘Israelmi cu uknak kha a pek ṭhan lai’ tiah lamkaltu hna nih an ruah. (Lamkaltu 1:⁠6) Kum tlawmpal a luan hnu ah, Jesuh a phan lai nak caan cu hmailei caan khatkhat ah a si lai tiah Thesalon khua i Khrihfa hna kha a theihter hna. (2 Thesalon 2:​3, 8) Asinain, Jehovah ni he pehtlaihin phundang in ruahsualnak nih Jesuh i hmasa zultu pawl kha nunnak lam in a pialter hna lo.​—⁠Matthai 7:⁠13.

Kannih chan ah hi vawlei donghnak caan cu a nuarmi a lo caah lungdongh in kan i ralringnak kha kan nuarhter awk a si lo. Aa hliphlaumi cawngtupa pakhat nih phundang in a ruah khawh ko nain, hngilh loin a hngah peng awk a si! Mahcucu a rian a si. Khrihfa hna zong cutin ṭhiamṭhiam an si ve.

[Cahmai 14nak i Hmanthlak]