‘Jehovah Cu Khuazei Ahdah A Um’ Tiah Na Hal Maw?
“Ka sinin lamhlatpi ah an kal i . . . [“Jehovah,” NW] ‘Khuazei ahdah a um?’ an ti lo.”—JEREMIAH 2:5, 6.
1. “Pathian cu khuazei ahdah a um?” tiah mi nih an hal tikah, an thinlung ah zeidah a um?
“PATHIAN cu khuazei ahdah a um?” Hi biahalnak cu mi tampi nih an hal cang. Cheukhat nih cun Sertu khuazei ahdah a um timi a hrampi kong kha hngalh menmen an duh caah a si. Midang nihcun sifahharnak a karh hnuah asilole annih pumpak nih harnak nganpi an ton tikah Pathian nih zeiruangah a khamh lo tikha an hngalh duh caah an halmi a si. Cutin biahalnak a tuah hrimhrim lomi zong an um ve, zeicah tiah Pathian a um tikha an cohlan lo caah a si.—Salm 10:4.
2. Pathian kawlnak ah ahohna dah hlawhtlinnak an hmu?
2 Pathian pakhat a um ti langhternak tampi kha a cohlanmi tampi an um taktak ko. (Salm 19:1; 104:24) Mah hna lakah cheukhat cu biak menmen in an biak ko. Sihmanhsehlaw, ram phunphun in minung nuai tampi nih cun biatak kha an duh taktak caah a hmaanmi Pathian kha an kawl cang. An thazang chuahnak cu pakpalawng ah a cang lo, zeicahtiah Pathian cu “aho kan sin hmanh hin aa hlat lo.”—Lamkaltu 17:26-28.
3. (a) Pathian cu khuazei ahdah a um? (b) ‘Jehovah cu khuazei ahdah a um’ timi Baibal biahalnak cu zei sullam dah a si?
3 Jehovah kha an hmu taktak tikah “Pathian cu thlarau a si” caah mit in hmuh khawh lomi a si tikha an hngalh. (Johan 4:24) Jesuh nih a hmaanmi Pathian kha “vancung i a ummi ka Pa” tiah a rak ti. Zei dah a chim duh? Vancung kan Pa a umnak hmun cu thlarualei in a sang ngaimi hmun a si, vancung cu vawlei in a sang ngaimi hmun ah a um bantuk in a si. (Matthai 12:50; Isaiah 63:15) Pathian cu mit taktak in hmuh khawh a si lo nain, amah kha hngalh awkah le a timhnak hna kha tampi hngalh khawh awkah a kan timhtuahpiak. (Exodas 33:20; 34:6, 7) Pathian nih cun nunnak a sullam kha lungthin tak tein a kawlmi hna i biahalnak kha a leh piak hna. Kan nuncan he aa pehtlaimi kong hna ah Pathian nih zeitindah a ruah i, kan duhnak hna cu Pathian timhnak he aa ruang le ruang lo a dirhhmun kha kan hngalh khawh nakhnga a fekmi a konglam a kan pek. Mah kong hna kha hlathlai i, a phi hmuh awk thazang chuahter a kan duh. Hlanlio Israel miphun nih cun cutin an rak tuah lo caah Jehovah nih profet Jeremiah in a rak chimhrin hna. Pathian min cu an hngalh ko nain ‘Jehovah cu khuazei ahdah a um? tiah biahalnak an rak tuah lo. (Jeremiah 2:6) Jehovah timhnak kha a biapi in an ruah lo. Pathian lamhruainak an kawl fawn lo. Biakhiahnak angan le ahme tuah awk a si tikah ‘Jehovah cu khuazei ahdah a um’ tiah na hal maw?
Pathian A Kawlmi Hna
4. Jehovah kawlnak ah, David i zohchunhnak thawngin zeitindah a kan ṭhathnem khawh lai?
4 Jesse fapa David cu a no lio hmanhah Jehovah kha a rak bochan ngaingai. Jehovah cu “Pathian nung” a si ti a rak hngalh. Jehovah kilvennak kha David theng nih a rak ton. Zumhnak le ‘Jehovah min’ a dawtnak thawngin David nih ralthuam tling tein aa hrukmi Filistin mikei Goliath kha a rak thah. (1 Samuel 17:26, 34-51) Asinain, David i teinak nih mah pumpak cungah bochannak a rak ngeihter lo. Atu a tuahmi paoh kha Jehovah nih thluachuah a pek lai tiah a ruah lo. Mah hnu kum tampi a ruah hnuah biakhiahnak a tuah tik caan paoh ah David nih cun Jehovah kha a hal lengmang tawn. (1 Samuel 23:2; 30:8; 2 Samuel 2:1; 5:19) Hitin thla a rak cam: “Maw BAWIPA, na lam kha ka cawnpiak hna law ka hngalhter hna. Nangmah cu ka Khamhtu na si caah na biatak ningin nun cu ka cawnpiak tuah. Chun ni tlak nangmah kha kan bochan.” (Salm 25:4, 5) Kan caah zohchunhawk ṭha a si ko!
5, 6. Jehoshafat nih a nuncan ah Jehovah kha zeitindah a rak kawl?
5 David hrinchuah panganak Jehoshafat siangpahrang chan ah ram thum komhmi ralkapbu nih Judah ram kha tuk awk an rak i thawk. A miphun le a ram caah Jehoshafat nih cun “BAWIPA kawl awk kha aa tim.” (2 Chanrelnak 20:1-3) Jehoshafat nih Jehovah a rak kawlnak cu a voikhatnak a si lo. Mah siangpahrang nih cun zumhpialmi chaklei Israelram ah an biakmi Baal biaknak kha a rak hrial i, Jehovah duhmi lam kha zulh awk a rak thim. (2 Chanrelnak 17:3, 4) Asi ahcun atu harnak a ton tikah Jehoshafat nih ‘Jehovah kha zeitindah a kawl?’
6 Hi harnak caan ah Jerusalem khua, mi zapi hmai a thlacamnak ah Jehoshafat nih Jehovah i ṭhawnnak a philh lo tikha a langhter. Ramdangmi hna kha ṭhawl i, Israelmiphun hna caah ram pakhat ro a peknak thawngin a langmi Jehovah timhnak kha fakpi in a rak ruah. Jehovah bawmhnak a herh tikha siangpahrang nih a rak hngalh. (2 Chanrelnak 20:6-12) Mah caan ah Jehovah cu a hmu maw? A hmu ko. Levimi pakhat a simi Jahaziel sinin Jehovah nih lamhruainak a rak pek i, a thaizing ah a miphun hna kha a teiter. (2 Chanrelnak 20:14-28) Nangmah zong Jehovah sinin lamhruainak na hal tikah na hmuh lai tiah zeitindah na zumh khawh lai?
7. Ahopawl i thlacamnak dah Pathian nih a ngaihpiak?
7 Jehovah cu duhdanhnak a ngei lo. Thlacamnak in amah kha kawl awk mi vialte kha a sawm hna. (Salm 65:2; Lamkaltu 10:34, 35) A sinah zangfahnak a halmi hna lungthin kha a hngalhpiak hna. Mi dingmi hna i thlacamnak kha a theihpiak tikha a zumhter hna. (Phungthlukbia 15:29) Hmasa ah Pathian a hngalh duh lo nain atu toidorte in lamhruainak a kawlmi hna nih zong an hmu lai. (Isaiah 65:1) A nawlbia kha a zulh lo nain atu toidorte in aa ngaichihmi hna i thlacamnak hmanh kha a ngaihpiak hna. (Salm 32:5, 6; Lamkaltu 3:19) Asinain, minung pakhat nih nawl ngainak a ngei lo ahcun a thlacamnak cu pakpalawng ah a cang ko lai. (Marka 7:6, 7) Bianabia cheukhat kha ruat hmanh u sih.
An Hal Nain An Hmu Lo
8. Saul siangpahrang thlacamnak kha zeiruangah Jehovah nih a cohlan lo?
8 Sual siangpahrang kha a nawlngaihlonak ruangah Jehovah nih an kaltak cang tiah profet Samuel nih a chim hnu ah Sual nih Jehovah kha a rak biak. (1 Samuel 15:30, 31) Sihmanhsehlaw mahcucu bia menmen lawng a si. Sual duhnak cu Pathian nawlngaihnak siloin mi hmai ah thangṭhatnak hmuh awk caah a si. A hnu ah, Filistinmi hna nih Israelmi hna kha an rak tuk tikah, Sual nih a tuah tawn bantukin Jehovah kha a rak kawl. Asinain, letpiak a si lo tikah thitlawnthiam nu kha a rak kawl, mahcucu Jehovah nih sual a phawtmi a si ti a hngalh ko. (Deuteronomi 18:10-12; 1 Samuel 28:6, 7) A toinak in chim ahcun, Sual nih ‘Jehovah kha a rak kawl lo’ tiah 1 Chanrelnak 10:14 nih a ti. Zeiruangah? Sual thlacamnak cu zumhnak cungah aa hngat lo caah a si. Cucaah thlacam lo bantuk in a si.
9. Jehovah lamhruainak caah Zedekiah i nawlnak ah zeidah a palh?
9 Cubantukin, Judah ram donghnak a nai chinchin tikah, thla an cam i Jehovah profet hna kha an kawl i an rak hal. Asinain, Jehovah ka ṭih a timi hna nih milem zong an biak pah fawn. (Zephaniah 1:4-6) Mi hna nih Jehovah kha a menmen in an kawl nain, a duhnak kha toidor in ngai awk an lungthin kha timhcia in an chiah lo. Siangpahrang Zedekiah nih Jehovah rak ka kawl piak tiah Jeremiah sinah a rak nawl. Jehovah nih mah siangpahrang kha zeidah tuah ding a si tikha nawl a rak pek hnik cang. Sihmanhsehlaw zumhnak a ngei lo ruangah le mi a ṭih ruangah Jehovah nawl kha mah siangpahrang nih a rak ngaih lo, cucaah siangpahrang duhmi lehnak kha Jehovah nih a rak pek lo.—Jeremiah 21:1-12; 38:14-19.
10. Jehovah i lamhruainak a kawlmi ningcang ah Johanan cu zeidah a palh i, a palhnak in zeidah kan cawn khawh?
10 Jerusalem khua hrawh a si i Babilon ralkap nih Judahmi hna kha an hruai hnuah, Johanan nih Judah ram ah a tangmi Judahmi tlawmpal kha Izipt ram ah hruai awk a rak timh. An timhtuah dih cang, sihmanhsehlaw an chuak hlan ah thlacampiak awk le Jehovah sinin lamhruainak hal awk Jeremiah kha a rak nawl. Asinain, a duhmi lehnak a hmuh lo tikah a timhcia bantukin ningcanglopi in a tuah peng ko. (Jeremiah 41:16–43:7) Nangmah tah Jehovah na kawl tikah hi kong hna in na caah a ṭhami cawnnak hna na hmu maw?
“Kawl i Zuam u”
11. Efesa 5:10 kha zeiruangah kan zulh awk a herh?
11 A hmaanmi biaknak ah tipil innak thawngin pumpeknak langhternak, Khrihfa pumhnak ah hmaanhmaan kainak le phungchim rianṭuannak ah i telnak lawng a za lo. Kan nuncan dihlak aa tel. Nifate hneknak hna kan ton, cheukhat cu nemnak phun in a ra i, cheukhat cu a fak deuh lai, mah hna nih Pathian sin pumpeknak in a kan pialter khawh. Mah hna kha zeitindah kan leh lai? Efesa khua i zumhfekmi Khrihfa hna sinah lamkaltu Paul nih ca a ṭial tikah hitin a rak forh hna: “Bawipa a lawmhtertu thil kha kawl i zuam u.” (Efesa 5:10) Cutin tuah cu fimnak a si tikha Baibal chung i sining tampi nih a langhter.
12. David nih biakamnak kuang kha Jerusalem khua ah a ṭhial tikah zeiruangah Jehovah nih a rak duh lo?
12 Biakamnak kuang kha Israel ram ah kalpi a si i Kiriath-jearim ah kum tampi chiah a si hnuah, David siangpahrang nih Jerusalem khua ah a rak ṭhial duh. Mah miphun haotu hna he an ceih hnu ah ‘annih nih a ṭha tiah an ruah i Bawipa kan Pathian duhnak a si ahcun’ mah kuang cu kan ṭhial ko lai tiah an ti. Sihmanhsehlaw mah kong ah Jehovah duhnak kha ṭhate in an rak hlathlai lo. An rak hlathlai ahcun kuang kha leng in an ṭhial lai lo. Pathian nih fiangte in a rak chim hna bantukin Kohath miphun a simi levimi hna nih an liang in an rak put lai. Jehovah sinah David nih a hlathlai lengmang ti cu a hmaan ko nain, hi kong ah tlakte in a rak hlathlai lo. Mahcaah thil ṭhalo a rak cang. A hnu ah David nih hitin a rak ti: “BAWIPA kan Pathian nih kan cungah thinhunnak a langhter; zeicahtiah kannih nih hitin tuah awk a si lai ti i fehter ciami ning khan kan zohkhenh lo.”—1 Chanrelnak 13:1-3; 15:11-13; Nambar 4:4-6, 15; 7:1-9.
13. Kuang kha hlawhtlingte in an ṭhial khawh tik i phuahmi hla ah zeibantuk ralrinpeknak dah aa tel?
13 Hnubik ah, Obed-edom in Jerusalem khua ah kuang kha levimi hna nih an put tikah David nih hla pakhat a rak phuah. Cu ka ah lungthin takin pekmi ralrin peknak aa tel: “BAWIPA le a ṭhawnnak kha kawl tuah u, a hmai kha kawl lengmang tuah u. A tuah-mi khuaruahhar rian le khuaruahharnak a tuah-mi hna le biakhiahnak a chim-mi hna cu philh hlah u!”—1 Chanrelnak 16:11, 12.
14. Solomon i zohchunhawk ṭha le a tar tikah a palhnak in zeitindah ṭhathnemnak kan i lak khawh lai?
14 David a thih hlan ah a fapa Soloman kha hitin a rak chimhhrin: “[Jehovah] cu na kawl ahcun na hmuh lai.” (1 Chanrelnak 28:9) Soloman a bawi lioah mibu an i pumhnak thlam a umnak Gibeon khua ah a kal i Jehovah sinah rai a rak thawi. Cu ka ah Jehovah nih Solomon kha hitin a rak sawm: “Zeidah kan pek lai, ka hal tuah.” Soloman nih a hal bantukin in Israelmi hna kha biaceih khawh nakhnga fimnak le hngalhnak kha Jehovah nih tampi a pek lengah rumnak le hmaizahnak zong a pek chih. (2 Chanrelnak 1:3-12) David sinah Jehovah nih a pekmi inn pungsan kha hmang in solomon nih a ṭha ngaimi biakinn kha a rak sak. Sihmanhsehlaw Solomon nih a innchungkhar kong hna he pehtlaiin Jehovah kha a rak kawl ti lo. Jehovah a bialomi nu hna kha Solomon nih a rak ṭhit. A tar tikah mah nu hna nih a lungthin kha Jehovah sinin an pialter. (1 Siangpahrang 11:1-10) Zeitlukin minthangnak, fimnak le hngalhnak a ngeimi kan lo ko hmanhah “Bawipa a lawmhtertu thil kha kawl i zuam” awk a biapi ngaingai!
15. Ethiopia Siangpahrang Zerah nih Judahram a rak tuk lioah, Jehovah nih Judahram kha a khamh lai ti zumhnak in Asa nih zeiruangah thla a cam khawh?
15 Solomon tefa a simi Asa siangpahrang kong ṭialnak nih cutin tuah awk a herh tikha a fehter. Asa bawi a si hnu kum hleikhat a rauh tikah Ethiopia siangpahrang Zera nih ralkap thawng zakhat hruai in Judah ram kha a rak doh. Judah ram kha Jehovah nih a khamh lai maw? Ahlan kum 500 hlei ahkhan Jehovah nih a miphun kha Pathian nawl ngaih i a nawlbia an zulh ahcun zeitin an si lai, an al ahcun zeitin a si lai tikha fiangte in a rak chim cang. (Deuteronomi 28:1, 7, 15, 25) Asa a bawi ka lioah a ram chung i a hmaanlomi biaknak ah hmanmi biakṭheng hna le khuahrum bo hna kha a rak hrawh dih. Mi hna kha “Pathian kha kawl awk” a rak forh hna. Harnak a ton tik lawngah Asa nih a tuahmi a si lo. Jehovah sinah bawmhnak caah Asa nih zumhnak in thla a rak cam khawh. Zei thil dah a chuak? Judah nih a rak tei cikcek khawh.—2 Chanrelnak 14:2-12.
16, 17. (a) Asa cu teinak a hmu ko nain, Jehovah nih zeitindah ralrin a rak pek? (b) Asa cu hrut ngaiin a rak tuah lioah, zeibantuk bawmhnak dah pek a si i, zeitindah a rak lehrulh? (c) Asa tuahsernak in zei ṭhathnemnak dah kan i lak khawh?
16 Asinain Asa nih ral a tei i a rak kir ṭhan tikah Jehovah nih mah siangpahrang kha dawn awk Azariah kha a thlah i hitin a chimter: “Asa le Judahmi vialte le Benjaminmi vialte hna ka bia ngai tuah u: Amah sinah nan um chung cu BAWIPA cu nan sinah a um. Nan kawl ahcun amah cu nan hmuh lai, sihmanhsehlaw nan hlawt ahcun an hlawt ve hna lai.” (2 Chanrelnak 15:2) Asa nihcun thazang thar chuah in a hmaanmi biaknak kha a rak karhter. Sihmanhsehlaw kum 24 a rauh hnuah raldohnak a ton tikah Asa nih Jehovah kha a rak kawl lo. Pathian Bia kha a hlathlai lo i, Judahram kha Ethiopia ralkap nih a tuk lioah Jehovah nih a tuahpiakmi thil kha a rak cinken lo. Hrut ngaiin Siriaram he a rak komh.—2 Chanrelnak 16:1-6.
17 Hi ruangah Jehovah nih cun Asa siangpahrang kha profet Hanani in a rak chimhrin. Jehovah hmuhning a rak fianter lio caan hmanh ah Asa cu ṭhathnemnak a hmu khawh rih. Asinain a thin a hung i Hanani kha thawng a rak thlak. (2 Chanrelnak 16:7-10) Ngaichiat awk ngai a si! Kannin tah zeitindah? Pathian kan kawl ko nain ahnuah chimhrinnak kha kan al maw? Hi vawlei he kan i hnok ti a hngalhmi khrihfa upa pakhat nih thinphannak in Baibal he a kan chimhrin tikah “Bawipa a lawmhtertu thil kha” hngalhter awk dawtnak in a kan bawmhnak kha kan lawmh maw?
Hal Awk Philh Hlah
18. Job sinah Elihu nih a chimmi bia nih zeitindah a kan ṭhathnem khawh lai?
18 Jehovah rianṭuannak ah min ṭhatnak a ngeimi pakhat hmanh siseh hneknak a ton tikah a palh khawh. Job nih fih a nungmi zawtnak hmu i fale hna le thil hna a rak thlau lengah a hawile hna i sualphawtnak a ton tikah amah pumpak zawn lawng a rak ruah. Cutikah Elihu nih “ ‘A ka Sertu Pathian . . . khuazei ah dah a um?’ an ti lo” tiah ralrin a pek. (Job 35:10, 11) Job cu Jehovah sinah lungthin pek ṭhan awk le cu sining kha Pathian zeitindah a ruah tikha ruanṭhan awk a herh. Cucaah Job nih ralrinpeknak kha toidorte in a cohlan i, kannih zohchunh awk a kan bawmh.
19. Israelmi hna nih zeidah tuah awk an rak tlorh tawn?
19 Pathian cu a mi hna he zeitindah aa pehtlaih tikha Israelmiphun nih ṭhate in an hngalh. Sihmanhsehlaw an nuncan he pehtlaiin sining pakhatkhat kha an remhter tikah tamdeuh cu an i cinken tawn lo. (Jeremiah 2:5, 6, 8) Biakhiah awk a kong a chuak tikah ‘Jehovah cu khuazei ahdah a um?’ tiah hal loin an duh bantukin an tuah.—Isaiah 5:11, 12.
‘Jehovah Cu Khuazei Ahdah a Um’ Tiah Hal Peng U
20, 21. (a) Pathian lamhruainak kawlnak ah Elisha lungthin bantuk kha nihin ah aho pawl nih dah an langhter?(b) Zohchunhawktlakmi an zumhnak kha zeitindah kan zohchunh khawh lai i, mah in ṭhahnemnak kan i lak khawh lai?
20 Elijah cu a phungchim rian a lim deng tikah a hawi Elisha nih Elijah sinin a rung tlami puan kha aa lak i Jodan tiva ah a va kal, cun puan in ti kha a rak tuk i “Elijah i Pathian cu khuazei ahdah a um?” tiah biahalnak a rak tuah. (2 Siangpahrang 2:14) Pathian thlarau cu atu Elisha cungah a um tikha langhternak thawngin Jehovah nih a leh. Hi kong in zeidah kan cawn khawh?
21 Tuchan ah cu bantuk thil pakhat a cang ve. Phungchim rianṭuannak ah lam a hruaimi vancuung a kai hngami cheukhat cu an thi cang. Mah caan lio ah zohkhenh awk ṭuanvo a ngeimi hna cu Baibal kha hlathlai le thla cam in Jehovah lamhruainak an kawl. ‘Jehovah cu khuazei ahdah a um?’ tiah hal loin an um lo. Cucaah Jehovah nih annih kha lam a hruai peng i an rianṭuannak kha a ṭhanchoter cang. An zumhnak kha kan i zohchunh maw? (Hebru 13:7) Asiahcun, Jehovah bu he komh ngai in le Jesuh Khrih lamhruainak tang ah mah bu i rianṭuannak ah tlamtling in kan i tel lai.—Zechariah 8:23.
Zeitindah Na Leh Lai?
• Zeibantuk timhnak indah ‘Jehovah khauzei ahdah a um’ tiah kan hal awk a si?
• ‘Jehovah khuazei ahdah a um’ timi biahalnak kha leh awkah nihin khuazei ahdah kan hmuh khawh lai?
• Pathian lamhruainak hmuh awk thlacamnak cheukhat cu zeiruangah leh a si lo?
• ‘Bawipa a lawmhtertu thil kha kawl i zuam [“peng,” NW]” awkah a herh tikha zeibantuk Baibal zohchunhnak hna nihdah a langhter?
[Cahmai 6nak i Hmanthlak]