Jehovah Nih Toidormi Hna Sinah A Sunparnak A Langhter
“Bawipa kha ṭih, mi toi ah i dor law rumnak le upatnak [“sunparnak,” NW] le nun saunak kha na hmuh lai.”—PHUNGTHLUKBIA 22:4.
1, 2. (a) Lamkaltu cauk nih Steven cu “zumhnak le Thiang Thlarau in a khatmi” asi ti kha zeitindah a langhter? (b) Steven cu toidormi asi ti zei langhternak dah a um?
STEVEN cu “zumhnak le Thiang Thlarau in a khatmi” a rak si. Cun ‘thluachuahnak tampi le ṭhawnnak in a khatmi’ zong a rak si. Tuan deuh i Jesuh zultu pakhat in, a liannganmi khuaruahharnak le hmelchunhnak kha a rak ser hna. Voikhat cu, mi cheukhat he bia an i al, “sihmanhsehlaw Thlarau nih Steven cu fimnak kha a pek caah bia a chim tikah an tei kho lo.” (Lamkaltu 6:5, 8-10) Steven cu Pathian Bia teima tein a hlathlaimi asi i, a chan lio Judah biaknak lamhruaitu pawl hmaiah Pathian Bia kha thiam ngaiin a rak chim khawh. Lamkaltu angan 7 i aa ṭialmi tehte a khannak a neknok nih duhsah tein phuan asimi Pathian timhnak kha lungtak in hngalh duhnak a ngei ti a langhter.
2 An rian le an hngalhnak nih zaran minung nakin sang deuh ah a ruahtermi biaknak lamhruaitu hna he i lo loin, Steven cu mi toidor asi. (Matthai 23:2-7; Johan 7:49) Cathiang a thiam a hngal ngaimi asi ko nain, “thlacam le Pathian Bia chimnak ah” lamkaltu pawl nih an caan vialte an hman khawh nakhnga “tirawl phawtnak a tawlreltu” [NW] rian an pekmi ahkhan a lung a rak si ngaingai. Steven cu unau hna lakah minṭha a rak hmuh caah nifa tirawl i phawtnak tawlreltu dingah aa tlakmi pasarih thimmi chungah pakhat a rak si. Kha rian kha toidor tein a rak cohlan.—Lamkaltu 6:1-6.
3. Steven nih Pathian sinin a phutlomi zangfahnak asimi zei chingchiah awk tlak langhnak dah a rak hmuh?
3 Steven i thlaraulei a lungput, zumhtlak asi nak le aa toidornak kha Jehovah nih cinken loin a um lo. Sanhedrin i a ral Judah lamhruaitu pawl sin i tehte a khan lioah khan a dohtu pawl nih “a hmai cu vancungmi hmai bantuk asi kha an hmuh.” (Lamkaltu 6:15) A mithmai cu Jehovah Pathian sunparnak in a rami daihnak a hmumi Pathian bia phortu bantuk asi. Sanhedrin chungmi hna sin i ralṭha tein tehte a khan hnuah khan, Steven nih Pathian sinin a phut lomi zangfahnak asimi chingchiah awk tlak langhnak kha a rak hmuh. “Thiang Thlarau in a khatmi Steven nih khan vanlei khi a hun zoh i Pathian sunparnak kha a hmuh i Jesuh cu Pathian orhlei kam ah a dir ko kha a hmuh.” (Lamkaltu 7:55) Mah a sunglawimi langhnak nih Jesuh dirhmun cu Pathian Fapa le Messiah asi ti kha Steven caah a fehter. Cun mah nih khan toidormi Steven kha Jehovah mithmai ṭha a hmumi asi kha fektein a zumhter.
4. Jehovah nih ahote kha dah a sunparnak a hmuhsak hna?
4 Steven rak hmuhtermi langhnak nih Pathian he an i pehtlaihnak a upatmi Pathian a ṭih i mi toi ah aa dormi hna kha Jehovah nih a sunparnak le aa timhmi a hmuhsak hna ti kha a langhter. Baibal nih “Pathian kha ṭih, mi toi ah i dor law rumnak le upatnak [“sunparnak,” NW] le nun saunak kha na hmuh lai” tiah a ti. (Phungthlukbia 22:4) Cucaah toidornak taktak hi zeidah asi ti le, mah a biapimi ziaza hi zeitindah ṭhanter khawh asi ti le kan nunnak kakip ah langhternak nih zeitindah a kan ṭhathnem ti hngalhthiam hi a biapi.
Toidornak—Pathian Ziaza Pakhat
5, 6. (a) Toidornak cu zeidah asi? (b) Jehovah nih toidornak kha zeitindah a rak langhter? (c) Jehovah toidornak nih zeitindah a kan siter awk asi?
5 Vanraang i a ngan bik le sunparnak a ngei bik Jehovah Pathian cu toidornak ah zohchunh awk ṭha bik asi titik ahhin cheukhat cu an khuaruah a har ko lai. Siangpahrang David nih Jehovah kha hitin a rak ti: “Bawipa, nangmah nih na ka huhphenh i na ka khamh; na ka zohkhenhnak [“naa toidornak”, NW] nih mi ngan ah a ka ser i na ṭhawnnak nih himte in a ka umter.” (Salm 18:35) David nih Jehovah toidornak kong a rak chim tikah khan “kun” timi Hebru a hrampi biafang kha a rak hman. “Toidornak” lengah mah a hrampi biafang he aa tlaimi biafang dang hna ah “tangdornak,” “lungnemnak” le “mah le mah i niamternak” hna aa tel. Cucaah Jehovah nih mitlinglo David a pehtlaih tikah amah le amah aa niamter i Amah a aiawhtu siangpahrang in a rak hman. Salm angan 18 biatlangpi ah a langh bantukin Jehovah nih David kha a huhphenh, a zohkhenh i, ‘Saul le a ral vialte hna kut’ in a rak khamh. David thengte nih siangpa-hrang in a lianhngannak paohpaoh asilole a sunparnak hi a caah Jehovah nih toidor tein a tuahpiakmi cungah aa hngat ti kha a hngalh. Mah a hngalhnak nih khan David kha toidormi asiter.
6 Kannih tah zeitindah? Jehovah nih a kan thim i biatak a kan cawnpiak, a bupi hmangin a hleikhunmi ṭuanvo a kan pek ko lai asiloah lam dangdang in a duhnak tlinter awkah a kan hman ko lai. Mah vialte caah zei lungput dah kan ngeih awk asi? Kan i toidor awk asi lo maw? Jehovah aa toidornak kha lawmh in rawhnak a chuahpi taktakmi mah le mah i hlorhnak kha kan hrial awk asi lo maw?—Phungthlukbia 16:18; 29:23.
7, 8. (a) Jehovah toidornak kha Manasseh he an i pehtlaihnak ah zeitindah a langh? (b) Jehovah nih siseh, Manasseh nih siseh toidornak langhternak ah kan zulh awk asimi zei zohchunh awk ṭha dah an rak chiah?
7 Jehovah nih a tlinglomi minung he aa pehtlaihnak thawngin aa toidor ngainak kha a langhter lengah toidornak lungthin a ngeimi hna cungah lungtho tein zangfahnak a langhter, anmah le anmah mi toi i aa dormi hna kha a hlorh hna. (Salm 113:4-7) Tahchunhnak ah, Judah Siangpahrang Manasseh kong kha ruat hmanh. Siangpahrang asinak a tinvo sung kha a hmaanlomi biaknak karhchonak caah a pingin a rak hman i “Bawipa [“Jehovah,” NW] mithmuh i thil ṭhalo tampi kha a tuah i a thin kha a phawh.” (2 Chanrelnak 33:6) A donghnak ah, Jehovah nih a siangpahrang ṭhutdan kha Assiria siangpahrang laknak nawl a peknak thawngin Manasseh kha dan a rak tat. Thonginn ah, Manasseh nih ‘Jehovah a Pathian zangfahnak kha a nawl i fakpi in a lung aa ṭhum,’ cacaah Jehovah nih Jerusalem i siangpahrang ṭhutdan kha a pekṭhan, i Manasseh nih ‘Jehovah cu a hmaanmi Pathian asi ti kha a hun hngalh.’ (2 Chanrelnak 33:11-13) Asi, a donghnak bik ah, Manasseh toidornak nih Jehovah lung a ton caah amah kha a ngaihthiam i siangpahrang a ṭuanter ṭhannak in khan Pathian nih toidornak a rak langhter ve.
8 Jehovah i ngaihthiam duhnak le Manasseh i i ngaihchihnak lungput in toidornak kongah a biapimi zohchunh awk kan hmuh. Kan thin a kan phawhtu hna he kan i pehtlaihning le sualnak kan tuah tikah kan langhtermi kan lungput nih Jehovah he kan i pehtlaihnak a hnorsuan khawh ti kha kan i cinken zungzal ding asi. Midang sualnak lungtho tein kan ngaihthiam hna le kan palhnak toidor tein kan cohlan ahcun, Jehovah a zangfahnak kha hmuh khawh asi.—Matthai 5:23, 24; 6:12.
Pathian Nih Toidormi Hna Kha A Sunparnak A Hmuhter Hna
9. Mi toi i i dor hi derthawm asi maw? Fianter.
9 Asinain, toidornak le mah he aa tlaimi ziaza hna kha derthawmnak asiloah sualnak hmuh piak duh loin um phun in phundang in a sullam kan ruah awk asi lo. Cathiang nih a chim bantukin, Jehovah cu toidormi asi ko nain, a herh tikah a dingmi a thinhunnak le ṭih a nungmi a ṭhawnnak kha a langhter. Jehovah cu toidormi asi caah toidornak lungthin a ngeimi hna kha mithmaiṭha a pek hna asiloah a hlei in an zawn a ruah hna, nain aa porhlawmi hna sinin cun hlapi ah a um. (Salm 138:6) Jehovah nih toidormi a salle cungah zeitindah a hleiin zawnruahnak a rak langhter?
10. 1 Korin 2:6-10 ah langhter asi bantukin toidormi hna sinah Jehovah nih zeidah a phuan?
10 Jehovah nih ri a khiahmi caan ah hmanding i a thimmi pehtlaihnak lam kha hmangin, toidormi hna sinah aa timhmi zeitindah a tlinter lai nak kong kha a dikthlir in a phuan. Minung fimnak le ruahnak kha uangthlar ngaiin fektein aa tlaihmi hna caah cun mah a sunglawimi thil pawl cu an i thup. (1 Korin 2:6-10) Sihmanhsehlaw Jehovah timhmi hmaan tein hngalhthiamnak nawl a ngeimi toidormi hna tu cu lunghmui ngai asimi a sunparnak kha an upat deuh ngaingai caah Jehovah kha thang-ṭhat awkah forh an si.
11. Kumzabu pakhatnak ah, cheukhat nih toidornak an rak ngeih lo kha zeitindah an rak langhter i, mah nih khan annih cu zeihmuh lo awk dah a dawnh hna?
11 Kumzabu pakhatnak ah, Khrihfa ka si aa timi mi cheukhat telin mi tampi hna cu, lamkaltu Paul nih Pathian timhmi kong a rak phuan tikah khan toidornak an ngeih lo caah an rak tlu. Paul cu “Jenṭail mi sin lamkaltu” a hung si, asinain cucu a miphun, a fimcawnnak, a kum asiloah rian ṭha a ṭuanmi ruangah asi lo. (Rom 11:13) Minung hmuhning a ngeimi nih cun Jehovah hmanmi si dingah mah sining hna kha ngeih awk asi tiah an ruah tawn. (1 Korin 1:26-29; 3:1; Kolose 2:18) Sihmanhsehlaw, Jehovah nih a dawt zangfahnak le a dingmi a timhnak he aa tlak in Paul cu a rak thim. (1 Korin 15:8-10) Paul nih “lamkaltu ṭhakhun” tiah a timi hna nih si hna seh, dotu pawl nih si hna seh amah Paul le Cathiang in a hrilhfiahnak hna kha an rak pom duh lo. Toidornak an ngeih lo ruangah Jehovah timhmi tlinternak a sunglawimi lam hngalhthiamnak kha an hngal kho lo. Pathian nih aa timhmi tlam a tlin nakhnga hman awkah a thimmi hna kha zeitik hmanhah nauta in hmu hna hlah asiloah a hlan kan in bia khiak chung hlah.—2 Korin 11:4-6, NW.
12. Toidormi cu Jehovah mithmaiṭha an hmu ti kha Moses sining nih zeitindah a langhter?
12 Khattalei ahcun, Baibal chungah toidormi nih Pathian sunparnak zeitindah an hmuh ti a langhtermi zohchuh awk tampi a um. Mi vialte lakah “lungnem bik [“toidor bik,” NW] asi” mi Moses nih Pathian sunparnak kha a rak hmuh i Pathian he aa hawikawmmi le aa theihngal ngaingaimi a rak si. (Nambar 12:3) Toidor ngaimi tuukhal pakhat in kum 40 chung tuu a rak khalhnak Arabia vawlei fonghlei ah sau bik um dawh asimi mah mi toidor pa cu Sertu mithmaiṭha kha lam phunphun in a rak hmu. (Exodus 6:12, 30) Moses cu Jehovah ṭanpinak in Israel miphun ca i aiawh biachimtu le timhtuahtu ngan bik a hung si. Pathian he bia i ruahnak nawl a rak ngei. Langhnak pakhat ah, ‘Jehovah mui’ kha a rak hmuh. (Nambar 12:7, 8; Exodus 24:10, 11) Mah toidormi rianṭuantu pa kha Pathian aiawhtu in a rak cohlangmi hna zong nih thluachuah an rak hmuh. Cubantuk cun, kannih zong profet Moses nakin a ngan deuhmi Jesuh siseh, a mah nih rian a pekmi “zumhawk a tlakmi le a fimmi sal” si hna seh kan cohlan hna i an bia kan ngaih hna ahcun thluachuah kan hmu ve lai.—Matthai 24:45, 46; Lamkaltu 3:22.
13. Jehovah nih Kumzabu pakhatnak i toidormi tuukhal hna sinah khan a sunparnak kha zeitindah a rak langhter?
13 ‘Jehovah sunparnak cu a ceu’ i vancungmi hna nih ‘Khamhtu Khrih Bawipa’ chuahnak thawng ṭha kha ahote sinah dah an rak thanh? Aa porhlawmi biaknak lamhruaitu hna asiloah an sining a sangmi hna sinah si loin “an turun a zohkhenh i ramlak i a riakmi” toidormi tuukhal hna sinah an rak thanh. (Luka 2:8-11) Annih cu an thiamnak le an rian ruangah mithmaiṭha pekmi an si lo. Asinain, Jehovah nih aa chingchiah hna i Messiah chuahnak kong kha hmasa bik ah a rak theihter hna. Asi, Jehovah nih cun a sunparnak kha toidormi hna le Pathian a ṭihmi hna sinah a rak langhter.
14. Toidormi hna nih Pathian sinin zeithluachuah dah an hmuh?
14 Mah zohchunh awk hna nih zeidah a kan cawnpiak? Toidormi hna nih Jehovah mit-hmaiṭha an hmuh ti le aa timhmi hngalhnak le hngalhthiamnak a pek hna ti kha a kan cawnpiak. Minung nih an tumhtahmi thiamnak a tlinhlomi hna kha Pathian nih a thim hna i a sunglawimi a timhnak midang va theihter tu in a hman hna. Mah nih hin a profet chimchungbia le a bupi hmangin Jehovah nih lam a kan hruainak kha kawl peng awkah a kan forh ding asi. Jehovah nih toidormi a salle sinah a sunglawimi aa timhmi a phuan lengmang lai ti kha fektein kan zumh khawh. Profet Amos nih hitin a rak thanh: “Bawipa Pathian nih aa tinhmi kha, a sal profet hna theihter hmasa loin zeihmanh a tuah bal lo.”—Amos 3:7.
Toidornak Kha Ṭhanter Law Pathian Mithmaiṭha Kha La
15. Zeiruangah toidornak kan ngeih peng awk asi, i khakha Israel siangpahrang Saul nih zeitindah a langhter?
15 Pathian mithmaiṭha hmuh zungzal awkah toidornak ngeih peng awk asi. Hlan i a rak i toidormi pakhat cu a zungzal in aa toidor lai ti khawh asi lo. Toidornak kha thlau in porhlawtnak le mah le mah i thangṭhatnak kha aa teiter khawh, mah nih khan luarparkaiter in harnak a pek khawh. Israel siangpahrang in hmasa bik ah chiti thuh asimi Saul cu cu bantuk cun a rak si. Hmasa bik i thim a rak si lioah, “mi hmete” in a rak i hmu. (1 Samuel 15:17) Sihmanhsehlaw, uktu kum hnih men lawng a ṭuan hnuah, luarpar a rak kai. Profet Samuel lawng nih raithawinak pekchanh ding asimi Jehovah timh-tuahnak kha zei ah a rak rel lo i amah theng nih raithawinak kha a rak pekchanh. (1 Samuel 13:1, 8-14) Mah cucu toidornak a ngeih lomi fiangtein a langhtermi aa tlai thluahmahmi thil i a hramthawk men asi. Mah nih Pathian thlarau le mithmaiṭha kha a sunghter i, a donghnak ah ningzak in a rak thi. (1 Samuel 15:3-19, 26; 28:6; 31:4) A fiang ko mi cu: toidornak le tangdornak kha ngeih peng awkah kan i zuam hrimhrim ding asi ti le mah le mah biapi ngaiin i ruahnak kha tei ding asi, cuticun Jehovah duh lomi zei bantuk luarparkainak paohpaoh kha kan hrial khawh hna lai.
16. Jehovah siseh kan hawikawm si hna seh anmah he kan i pehtlaihnak fak piin ruahnak nih toidornak ngeih awkah zeitindah a kan bawmh khawh?
16 Toidornak hi Pathian thlarau theitlai cazin chungah aa tel lo nain, kan ṭhanter hrimhrim awk asimi Pathian lei ziaza pakhat asi. (Galati 5:22, 23; Kolose 3:10, 12) Mah cucu mah le mah le midang zeitindah kan hmuh hna timi lungput he aa pehtlaih caah toidornak kha ṭhanter awkah hramhram in i zuam a hau. Jehovah le kan hawikawm he kan i pehtlaihnak kha fakpi in kan tuaktannak le kan ruahnak nih toidornak a kan pehzulhter khawh. Pathian hmaika ah, a tlinglomi minung vialte hi chikkhatte a hring i a uai a car colhmi ram bantuk an si. Minung hi lochung i khaubawk men bantuk an si. (Isaiah 40:6, 7, 22) Ram kung pakhat cu a dang ram kung pawl nakin tlawmpal te a san deuh ruangah aa porhlawt awk a kong a um maw? Khaubawk pakhat cu a dang khaubawk pawl nakin tlawmpal hlat deuh a peh khawh caah aa uanthlar awk a kong a um maw? Cutin an i ruah ahcun nihchuak asi, cucaah, lamkaltu Paul nih a Khrihfa hawi pawl kha hitin ralrin a rak pek hna: “Midang nakin cungnung deuh ah aho nih dah an ser. Pathian pek asi lomi na ngeihmi zeital a um maw? Cucaah cun nan hmuhmi cu a lak in hei hmu hlah u law cu bang, zeitindah nan i porhlawt khawh lai?” (1 Korin 4:7) Mah bantuk Baibal cacang pawl ṭhatein ruahnak nih toidornak langhter awk le ṭhanter awkah a kan bawmh khawh.
17. Aa toidornak a ṭhan nakhnga profet Daniel kha zeinihdah a rak bawmh, i cutin tuah ve awkah zeinihdah a kan bawmh khawh?
17 Hebru profet Daniel cu toidornak lungthin a ngeih i amah le amah “mi toi aa dawr” caah “duh tlai tukmi” tiah auh a rak si. (Daniel 10:11, 12, NW) Aa toidornak ṭhanter awkah Daniel cu zeinihdah a rak bawmh? Hmasa bik ah, hmaan tein thla a cam i fekṭhup in Jehovah aa bochannak kha a langhter. (Daniel 6:10, 11) Cu pinah, Daniel cu Baibal kha tinhnak hmaan in le teima tein a rak hlathlai i mah nih khan a sunglawimi Pathian timhnak ah a lungthin a rak chiahter. A miphun lawng si loin, amah theng i a tlin lonak zong kha lungtak in a rak cohlan. Amah dinnak si loin Pathian dinnak tu kha lungthin tak in cawisan duhnak a rak ngei. (Daniel 9:2, 5, 7) Daniel i a ṭha ngaingaimi zohchunh awk kha i cawn in kan nunnak kakip ah toidornak langhter le ṭhanter awkah kan i zuam kho lai maw?
18. Nihin mi toi i aa dawrmi hna kha zei sunparnak nih dah a hngah hna?
18 “Pathian kha ṭih, mi toi ah i dor law rumnak le upatnak [“sunparnak,” NW] le nun saunak kha na hmuh lai” tiah Phungthlukbia 22:4 nih a chim. Asi, Jehovah nih mi toi ah aa dormi hna cu mithmaiṭha a pek hna caah sunparnak le nun saunak an hmu. Pathian rian a ṭuannak a rak ngol dengmang hnuah Jehovah nih a ruahning a rak remhmi kha salm caṭialtu Asaph nih toidor tein a rak cohlan i hitin a ti: “Ka kalnak ding ahkhan lungthin na ka cheuh i a donghnak ahcun upatnak [“sunparnak,” NW] he na ka cohlan lai.” (Salm 73:24) Nihin ah tah zeitindah? Toidormi hna kha zei sunparnak nih dah a hngah hna? Jehovah mithmaiṭha hmu in amah he pehtlaihnak ṭha an ngeih lengah, David Siangpahrang nih thawchuahhnawh in a chimmi hi bia a hung tlin lai zong kha an i ruahchan khawh: “Sihmanhsehlaw mi toi ah aa dormi cu ram chungah hin himte in an um lai i daihnak kha tlamtling tein an hmuh lai.” A sunglawimi ruahchannak taktak asi!—Salm 37:11.
Naa Cinken Maw?
• Zeitindah Steven cu Jehovah sunparnak a rak hmumi zohchunh awk ṭha toidormi pakhat a rak si?
• Jehovah nih zei lam hna in dah toidornak kha a rak langhter?
• Zei tahchunhnak hna nih dah Jehovah nih toidormi hna sinah a sunparnak a phuan ti kha a langhter?
• Daniel a nunning nih kan i toidornak ṭhanter awkah zeitindah a kan bawmh khawh?
[Cahmai 6nak i Hmanthlak]
A Ṭhawng Ko Nain Aa Tangdor
1919 kum U.S.A. Ohio i Cedar Point khua ah an tuahmi Baibal Siangngakchia pawl (atu Jehovah Hngaltu hna tiah theihmi) civui ah mah lio i kum 50 asimi rian zohkhenhtu J. F. Rutherford nih hotel innka cawngtu rian kha lunglawm tein a rak ṭuan, civui a rak zawhmi hna thilri bek kha a phawrh i an khaan ah a thiar piak hna. Civui hmanung bik ni ah aa pummi 7,000 kha hi bia hin an lung a rak lawmhter hna: “Nan nih cu a sunglawimi, siangpahrang hna lak i Siangpahrang, bawi hna lak i Bawi asimi kan Bawipa i a pennak kong . . . midang a va thanh-mi lamkaltu nan si.” Unaupa Rutherford cu a zumhnak a ṭhawng i, hmual ngei ngaiin phungchim a thiammi, a zumhmi biatak a ṭhum duh lomi in theih a rak si nain, Pathian hmai ah lungtak in aa toidormi asi kha Bethel zingka pumhnak i a thlacamnak hna nih a langhter tawn.
[Cahmai 7nak i Hmanthlak]