Jesuh Cu Toidornak Ah Zohchunhawk Ṭha A Si
“Nan caah i zohchunawk kan tuahpiak cang hna: nan ca i ka tuah bantuk khan nannih zong nih nan tuah ve awk a si.”—JOHAN 13:15.
ZEITINDAH NA LEH LAI?
Pathian Fapa nih vawleicung a rat hlan ah zeitindah toidornak a langhter?
Jesuh nih vawleicung a um lioah zeitindah toidornak a langhter?
Jesuh aa toidornak nih zei ṭhatnak dah a chuahter?
1, 2. Jesuh nih a thih lai zan ah a zultu pawl kha zeidah a cawnpiak hna?
MAH hi Jesuh a thih lai zan ah a cangmi a si. Jesuh cu a zultu pawl he Jerusalem i inn cungdot ah an um. Zanriah an ei lioah Jesuh cu a tho i a angki leng kha aa phoih. Cun kut hnawhnak puan kha a tai ah aa ṭem i khengpi chungah ti a tlen. Mah hnuah a zultu pawl kha an ke a ṭawl hna i puan in a hnawh hna. A dih tikah a angki leng kha aa hruk ṭhan. Jesuh nih zeicah cu bantuk a nautami thil cu a tuah?—Johan 13:3-5.
2 Amah theng nih hitin a chim: “Atu i kaan tuahpiakmi hna kha a sullam nan hngal maw? . . . Nannih nih kei cu, Saya le Bawipa nan ka ti i cucu ka si taktak caah nan ka ti cu a hmaan ko. Kei nan Saya le nan Bawipa a simi nih nan ke kan ṭawl hna ahcun nannih zong pakhat le pakhat nan ke nan i ṭawlpiak awk a si. Nan caah i zohchunawk kan tuahpiak cang hna: nan ca i ka tuah bantuk khan nannih zong nih nan tuah ve awk a si.” (Johan 13:12-15) Cu bantuk a nautami thil a tuahnak thawng in Jesuh nih a zultu pawl kha an philh khawh lai lomi le hmailei ah toidornak ngeih awk a bawm hngami thil a cawnpiak hna.
3. (a) Thil sining pahnih ah, Jesuh nih toidornak a biapitnak kha zeitindah a langhter? (b) Hi capar ah zei kong dah kan i ruah lai?
3 Jesuh nih a zultu an ke a ṭawlmi hna hi toidornak a biapit a langhter hmasa biknak a si lo. A hmasa deuh ah a zultu pawl nih ahodah a ngan bik ti an i al lioah Jesuh nih ngakchiapa kha a pawng ah a dirter i hitin a chimh hna: “Ka min in hi ngakchiate tluninn a awnhtu nih keimah tluninn a ka awnh a si, cun keimah tluninn a ka awnhtu nih keimah a ka thlahtu tluninn a awnh kha a si. Zeicahtiah nan lak i a hme bikmi cu a ngan bikmi a si.” (Luka 9:46-48) Farasi mi hna nih langh an duh kha a hmuh tikah Jesuh nih hitin a chim: “Amah le amah a ngan ah aa chiami cu nauta ah chiah a si lai i mi toiah aa dormi cu mi ngan ah ser a si lai.” (Luka 14:11) Jesuh nih a zultu pawl kha aa toidormi si hna seh ti a duh ti cu a fiang ko. Aa porhlawmi, midang nakin ka biapi deuh timi ruahnak a ngeimi siter a duh hna lo. Jesuh kan i zohchunh khawh nakhnga aa toidornak kong kha ṭha tein i ruah hna u sih. Toidornak nih mah ziaza a langhtertu lawng si lo in midang zong zeitindah a bawmh hna timi zong kan i ruah lai.
‘Ka Pialtak Lo’
4. Jesuh nih vawleicung a rat hlan ah zeitindah toidornak a langhter?
4 Pathian fapa nih vawleicung a rat hlan hmanh ah toidornak a langhter. Jesuh cu van ah a Pa he caan saupi an rak umṭi. Isaiah Baibal cauk ah Fapa le Pa an i pehtlaihnak a fehnak kong kha hitin kan hmuh: “BAWIPA nih chim awk kha a ka cawnpiak caah tha a bami kha thazaang ka pek khawh hna. Zing fate in a ka cawnpiak ding theih kha a ka ngangnganter. BAWIPA nih hngalhthiamnak a ka pek caah amah cu ka do lo i ka pialtak fawn lo.” (Isa. 50:4, 5) Jesuh nih a hmaanmi Pathian sinin cawn kha a duh tuk. Toidornak a langhter i Jehovah nih a cawnpiakmi kha ṭha tein a ngaih. Cun Jehovah nih sualnak a ngeimi minung cungah toidor tein zaangfahnak a langhtermi zong a rak hmuh lai.
5. Jesuh nih Khuachia he bia an i al lioah zeitindah toidornak le nemnak a langhter?
5 Vancungmi cu an dihlak in Jesuh bantukin aa toidormi an si lo. A hnuah Satan Khuachia a hung simi vancungmi cu Jehovah sinin cawn a duh lo. A hun i porhlaw i midang nakin ka biapi deuh tiah a hun i ruat. Mah cu toidornak he aa ralchanhmi a si. Mah ruangah Jehovah kha a doh. Jesuh tu cu cutin a si lo, van ah Pathian nih a pekmi leng in nawlngeihnak kha hmuh a duh lo. Cun a nawlngeihnak kha a ṭhalomi lam in hman zong a duh bal lo. Tahchunhnak ah, Jesuh cu vancungmi bawi bik, Michael a si ko nain Moses ruak kong ah “Khuachia he an i al lioah” tuahnak nawl a ngeihmi leng in a rak tuah lo. Mah canah Pathian Fapa nih toidornak le nemnak tu a rak langhter. Van le vawlei ah Biaceihtu Ngan Bik Jehovah nih mah kong kha aa tlakmi caan ah aa tlakmi lam in a tawnghtham lai kha lunglawm tein a hngah.—Judas 9 rel.
6. Jesuh nih Messiah si awk a cohlannak thawng in zeitindah toidornak a langhter?
6 Jesuh nih van ah a um lio in Messiah pakhat in a ton hngami chimchungbia vialte kha a hngalh dih ko lai. Cucaah harnak ka tong lai ti kha a hngalh ko lai. Asinain, Jesuh nih biakammi Messiah in vawleicung ah um ding le thih ding kha a cohlan. Zeicah? Lamkaltu Paul nih Jesuh aa toidornak kha langhter khun in hitin a ṭial: “Pathian sinak kha a ngeih zungzalmi a si ko nain hramhram in Pathian tluk si awk kha a ruat lo. Amah lungtho tein cu vialte cu a hlawt dih hna i sal sinak tu kha aa lak. Minung bantuk ah a cang i minung mui in a lang.”—Fil. 2:6, 7.
Minung pakhat in “Mi Toi ah aa Dor”
7, 8. Jesuh nih a ngakchiat lio le phung a chim lioah zeitindah toidornak a langhter?
7 Jesuh cu minung pakhat in a nun lioah “mi toi ah aa dor i nawlngaihnak lam kha thih tiangin a zulh, vailam cung thihnak kha” tiah Paul nih a ṭial. (Fil. 2:8) Jesuh nih a ngakchiat lio tein toidornak he aa tlai in zohchunhawk ṭha a chiah. A nu le a pa, Mari le Josef cu mitlinglo an si ko nain an nawl a ngaih hna. (Luka 2:51) Mah cu ngakchia pawl caah zohchunhawk ṭha taktak a si. Ngakchia pawl nih an nu le an pa bia an ngaih ahcun Jehovah nih thluachuah a pek hna lai.
8 A hun upat tik zongah Jesuh nih amah duhnak nakin Jehovah duhnak biapi deuh ah a chiahnak thawng in toidornak a langhter. (Johan 4:34) Phung a chim lioah Pathian min kha a hman i mi kha Jehovah sining le minung ca i aa tinhmi hngalh awk a bawmh hna. Cun Pathian duhning in nun ding a cawnpiak hna lawng si lo in amah theng cutin a nung. Tahchunhnak ah, a zultu pawl kha thlacam ning a cawnpiak hna lioah a hmasa bik i a chimmi cu “vancung khua i a um kan Pa, Na min thiang cu upat si ko seh” ti a si. (Matt. 6:9) Cuticun Jesuh nih a zultu pawl kha an tuah awk a simi a biapi bikmi cu Jehovah min thianter a si ti kha a chimh hna. Amah theng zong cutin a rak tuah. Cucaah vawleicung a nunnak a dih lai ah “hi vawlei chungin na kawh hna i na ka pekmi hna sinah hin na min cu ka langhter cang” tiah Jehovah sinah a rak chim khawh. (Johan 17:6) Cun Jehovah bawmhnak lo in cun zeihmanh ka tuah kho lo ti zong in a chim lengmang.—Johan 5:19.
9. Zekhariah nih Messiah kong kha zeitindah a chimchung? Mah kha Jesuh nih zeitindah a tlinter?
9 Zekhariah nih Messiah kong kha hitin a chimchung: “I lawm tuah, i lawm tuah, Zion fanu, Fakpi in au tuah, Jerusalem fanu, Zeicahtiah zohhmanh na siangpahrang cu na sinah a ra lio, Amah cu teitu a si, teinak cu amah ta a si, Toidor tein laa cungah i cit in, laa fa note cungah i cit in a ra.” (Zek. 9:9) Mah bia cu AD 33, Lanhtak Puai hlan ah Jesuh, Jerusalem i a luh lioah a rak tling. Mi tampi nih an puan le thingnge kha lam ah an phah hna. Jesuh, Jerusalem ah a lut cang ti thawng an theih tikah khuami tampi cu an lung a cawlcang tuk. Annih nih Jesuh kha kan Siangpahrang tiin an thangṭhat ko nain Jesuh cu aa toidor.—Matt. 21:4-11.
10. A thih tiang zumhfek tein a umnak thawng in Jesuh nih zeidah a langhter?
10 Jesuh Khrih nih vawleicung a um lioah tung cung i a thih tiang toidornak le nawlngaihnak a langhter. Cuticun minung nih hneksaknak nganpi ton hmanh ah Jehovah cung ah zumhfek tein um khawh a si ko ti kha a ṭha bikmi lam in a langhter. Cun mi nih Jehovah an biak cu anmah ṭhatnak caah a si timi Satan bia a palh ti zong a langhter. (Job 1:9-11; 2:4) Jehovah nawl tling tein a ngaihnak thawngin Jehovah cu uknak nawl a ngeitu le ding tein mi a uktu a si ti a cohlan kha a langhter. Aa toidormi a Fapa a dongh tiang zumhfek tein a ummi a hmuh tikah Jehovah cu aa lawm tuk lai.—Phungthlukbia 27:11 rel.
11. Jesuh tlanhnak thawng in amah a zummi hna cu zeidah an hmuh khawh?
11 Tung cung i Jesuh a thihnak thawng in mi cu sualnak le thihnak in kan luat kho. (Matt. 20:28) Jesuh tlanhnak man thawng in Jehovah nih a dingmi a phunglam ning in kan sualnak a kan ngaihthiam khawh i zungzal nunnak a kan hmuhter khawh. Paul nih hitin a ṭial: “Dinnak pakhat tuahmi nih mi vialte kha a luatter hna i nunnak a pek hna.” (Rom 5:18) Jesuh thihnak thawng in thlarau chiti thuhmi hna cu vancung ah zungzal nunnak an hmu kho i “tuu dang” cu vawleicung ah zungzal nunnak an hmu kho.—Johan 10:16; Rom 8:16, 17.
“Toidornak Lungthin a Ngeimi Ka si”
12. A tlinglomi minung a pehtlaih hna tikah Jesuh nih toidornak le nemnak zeitindah a langhter?
12 Jesuh nih a tha a bami le a lung a dongmi kha a sinah rat awk a sawm hna. Hitin a chim: “Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai.” (Matt. 11:28, 29) Jesuh cu aa toidormi le a nun a nemmi a si caah a tlinglomi minung kha thleidannak ngei lo in zaangfahnak he a pehtlaih hna. A zultu pawl tuah khawh lai lomi thil kha aa ruahchan lo. A thangṭhat hna i tha a pek hna. Thiamnak ka ngei lo asiloah man ka ngei lo timi ruahnak a ngeihter hna lo. Jesuh cu mi puarhrang a si lo asiloah a lungton a harmi a si lo. “Ka seihnam cu a bei a nuam i ka thil cu a zaang” ti tu in a chim. A chim duhmi cu a zultu si khawh awkah tuah a herhmi thil cu a har tuk lo tinak a si. A nawl an i cawn i a cawnpiaknak an zulh ahcun thazaang an ngei lai. Cucaah nu zong pa zong, ngakchia zong upa zong nih Jesuh he um kha an duh.—Matt. 11:30.
13. Jesuh nih harnak a tongmi hna cung ah zeitindah zaangfahnak a langhter?
13 Jesuh nih harnak a tongmi Israel mi hna kha a zaangfah hna i a si khawh chung in a bawmh hna. Jeriko khua pawng ah rawlhal in a vakmi mitcaw pahnih, Bartimu le a hawipa he an i tong. An pahnih in Jesuh kha bawmhnak an hal, asinain mibu nih daite in um u tiah an ti hna. Jesuh zong nih mitcaw pahnih kha zeirello in um khawh a si ko, asinain a zaangfah hna caah a auh hna i khua a hmuhter ṭhan hna. Jesuh nih a tlinglomi minung cungah toidornak le zaangfahnak a langhternak thawng in a Pa, Jehovah kha aa zohchunh.—Matt. 20:29-34; Mar. 10:46-52.
‘Aa Toidormi cu Mingan ah Ser an si lai’
14. Jesuh aa toidornak thawng in zei ṭhatnak hna dah a chuak?
14 Jesuh aa toidornak nih nuamhnak le ṭhatnak tampi a chuahter. A Fapa cu nawl a ngaih caah Jehovah cu aa nuam. Zultu le lamkaltu pawl cu Jesuh nih nemte le toidor tein a pehtlaih hna caah hnemhnak le thazaang an hmu. A nunning, a cawnpiaknak le a thangṭhat hnanak nih thlaraulei ṭhancho awk a bawmh hna. Cun mi tampi kha a cawnpiak hna, tha a pek hna i an herhmi a pek hnanak thawng in a bawmh hna. Jesuh tlanhnak thawng in amah a zummi vialte cu zungzal in thluachuah an hmu lai.
15. Jesuh cu aa toidor caah zei ṭhatnak dah a hmuh?
15 Jesuh tah zeitin? Aa toidor caah ṭhatnak a hmu maw? A hmuh. Zeitin in dah? Hitin a chim: “Mi toi ah aa dormi cu mingan ah ser an si lai.” (Matt. 23:12) Jesuh cungah cutin a si taktak kha Paul nih hitin a chim: “Cunglei a sannak bik hmun ah khin Pathian nih a cawi i min vialte lakah a ngan bik min kha a pek. Cucaah Jesuh min upat awk caah vancung i a um mi vialte hna le vawlei i a ummi vialte hna le vawlei tang vawlei i a ummi vialte hna nih an khuk an i bil lai i Pathian kan Pa thangṭhat awk caah Jesuh Khrih cu Bawipa a si, an ti lai.” Jesuh cu vawleicung ah toidor te le zumhfek tein a um caah Jehovah nih van le vawlei i a ummi vialte cungah nawlngeihnak a peknak thawng in “a cawi” asiloah a hlorh.—Fil. 2:9-11.
Jesuh cu ‘Biatak le Toidormi hna caah’ Ral a Do lai
16. Hmailei ah Pathian Fapa nih zeitindah toidornak a langhter zungzal lai?
16 Pathian Fapa nih hmailei zongah toidornak a langhter zungzal lai. Salm caṭialtu nih van ah Siangpahrang a ṭuanmi Jesuh nih Pathian ral pawl zeitindah a tuah hna lai timi kong kha hitin a chimchung: ‘Sunparnak he teinak hmu tuah. Biatak le dinnak caah le toidormi hna caah ral do tuah.’ (Salm 45:4, NW) Armageddon ah Jesuh Khrih cu aa toidormi, a dingmi le biatak a duhmi hna huhphenh awkah ral a do lai. Khrih Kum Thongkhat Uknak a dih i “thlaraulei uktu hna le nawlngeitu hna le ṭhawnnak vialte kha a tei dih” hna tikah zeidah a cang lai? Toidornak a langhter ti lai maw? A langhter lai. Mah caan ah ‘pennak cu Pa Pathian sinah a pek ṭhan lai’ tiah Baibal nih a ti.—1 Korin 15:24-28 rel.
17, 18. (a) Jehovah salle caah Jesuh toidornak i zohchunh cu zeicah a biapit? (b) A hnu capar ah zei kong dah kan i ruah lai?
17 Kannih tah zeitin? Jesuh kha i zohchunh in toidornak kan langhter lai maw? Armageddon ah Siangpahrang Jesuh Khrih nih aa toidormi le a dingmi lawng a khamh hna lai. Cucaah khamhnak hmuh kan duh ahcun kan i toidor a hau. Jesuh cu aa toidor caah amah theng le midang ṭhatnak an hmuh bantukin kannih zong kan i toidor ahcun ṭhatnak tampi a chuak ve lai.
18 Jesuh toidornak i zohchunh awkah zeinihdah a kan bawmh khawh? Toidornak ngeih a har caan hmanh ah zeitindah ngeih kan i zuam khawh? Mah kong cu a hnu capar ah kan i ruah lai.
[Cahmai 12nak i hmanthlak]
Jesuh aa toidornak nih zei ṭhatnak dah a kan pek?
[Cahmai 13nak i hmanthlak]
Jesuh nih zaangfahnak a langhtermi kha kan i zohchunh awk a si