Jehovah Lungsaunak Kha I Zohchunh

‘Bawipa cu a biakam tlinter awkah a khul a nuar lo, . . . lungsaunak a ngeih ca tu ah hin a si.’​—2 Piter 3:9.

1. Jehovah nih minung a kan pekmi tahchunh khawh lomi laksawng cu zeidah a si?

Ahohmanh nih pek khawh lomi kha Jehovah nih a kan pek. Cucu duh a nung i a man a suntuk caah cawk khawh le hlawh khawhmi a si lo. Mah laksawng a kan pekmi cu zungzal nunnak​—kan caah donghnak ngei lomi nunnak vawlei paradis kha a si. (Johan 3:16) Zeitluk lunglomh awk dah a si! Ngaihchiatnak a chuahtermi​—i sik i remlonak, zaangennak, sifahnak, sualnak, zawtfahnak le thihnak hmanh an lo dih cang lai. Dawtnak in ukmi Pathian Pennak tangah mi vialte cu daihnak in le lungrual te in nun a si cang lai. Mah Paradis cu kan duh ngai ko!​—Isaiah 9:​6, 7; Biathlam 21:​4, 5.

2. Zeicah Pathian nih Satan vawlei ṭhalo hi atu tiang a hrawh lo?

² Jehovah zong nih vawlei Paradis aa thawk lai caan kha aa ruahchan ve. Zeicahtiah dinnak le ṭhatnak a duhmi a si ruangah a si. (Salm 33:5) A dingmi a phunglam zei i a rel lomi, a nawl ngeihnak a almi, a mi hna a hremmi hi vawlei kha a hmuh tikah aa nuam lo. Asinain Satan vawlei a hrawh rih lomi hi a kong ṭha a um caah a si. Cu a kong ṭha cu Pathian nawlngeihnak he aa tlaimi a hmaan hmaan lo kongkau a si. Cu kongkau a ​tonghtham tikah nihin minung tampi ​sinah hmuh lomi a hleiin duh a nungmi sining pakhat a simi lungsaunak kha Jehovah nih a langhter.

3. (a) Baibal ah “Lungsaunak” tiah lehmi Grik le Hebru biafang a sullam cu zeidah a si? (b) Atu zei biahalnak hna dah kan i ruah lai?

³ New World Translation (Vawlei Thar ​Baibal Lehnak) ah “lungsaunak” ti in voithum ​lehmi Grik biafang a um. A biafang ning tein “thinsaunak” ti sullam a ngei. “Lungsaunak” caah  Grik le Hebru biafang a pahnih hmanning ah inkhawhnak le thinhun fawi lomi timi sullam aa tel. Jehovah a lungsaunak in zeitindah ṭhathnemnak kan hmuh? Jehovah le a salle pawl lungsaunak le inkhawhnak in zeidah kan i cawn khawh? Jehovah lungsaunak cu ri a ngei tiah zeitindah kan hngalh? Cucu zoh u sih.

Jehovah Lungsaunak Zohnak

4. Jehovah lungsaunak kong he aa tlai in lamkaltu Piter nih zeidah a ṭial?

⁴ Jehovah lungsaunak kong he aa tlai in lamkaltu Piter nih hitin a ṭial: “Ka dawtmi ka hawile hna, hi bia hi philh hlah u. Pathian hmuhning ah cun ni khat le kum thong khat hi an i dang lo, an i khat ko. Bawipa cu a biakam tlinter awkah a khul a nuar ko ti in mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitintiah pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.” (2 Piter 3:​8, 9) Jehovah a lungsaunak kan hngalhthiam khawh nakhnga hi a biapimi a kong pahnih hi zaangfahnak in i cinken.

5. A caan cung i Jehovah hmuh ning nih a tuahmi cungah zei thil dah a chuahter?

⁵ Pakhatnak ah a caan kan hmuh ningin Jehovah nih a hmu lo. Zungzal in a nungmi Pathian caah kum thongkhat cu nikhat bantuk a si. A caan nih Pathian cu nawl a pe kho lo nain ṭhatlonak hrawh awkah a khul a nuar lo. Ri a ngeilomi fimnak a ngeimi Jehovah nih mi vialte caah ṭhatnak tuah zeitik ahdah a ṭhat bik lai kha fiangte in a hngalh i mah ni a rat lai kha lungsau in a hngah. Asinain cu caan chung i a salle harnak in mi kha Jehovah nih hngalh lo in a um tiah kan ti awk a si lo. Amah cu “zaangfah thiammi” Pathian a si i dawtnak zong a si. (Luka 1:78; 1 Johan 4:8) Caan tawite chung um awk a awnhmi ruang i a chuakmi harnak vialte kha hrawh khawhnak ṭhawnnak a ngei.​—Salm 37:10.

6. Pathian kong he aa tlai in zeidah kan ruah lo awk a si i zeiruangah?

⁶ A hmaan ko, i ruahchanmi pakhatkhat hngah cu a fawi lo. (Phungthlukbia 13:12) Cucaah mi nih an biakam khulrang in an tuah lo tikah tuah duhnak taktak a ngei lo tiah midang nih an ruah hna. Pathian zong cutin a tuah ko lai ti ruah cu hruhbia a si! Pathian a lungsaumi kha a khul a nuar tiah kan ruah ahcun duhsah duhsah tein zumhlonak le hnabeidonghnak kan ngei lai i thlaraulei ah kan ngu kho. Mah nakin a zual deuhmi cu tuan deuh i Piter ralrin pekmi bia i nihsawh a hmangmi hna le zumhnak a ngei lomi hna i hlen khawhmi kan si kho. “‘Ka ra ṭhan lai,’ tiah bia aa kam a si lo mei? Atu khuazei ah dah a um kun? Kan pupa hna cu an thi diam cang, sihmanhselaw thil cu vawlei ser ri in a si bantukin pei a si peng ko hi,” an ti lai.​—2 Piter 3:4.

7. Jehovah a lungsaunak le mi hna ngaihchihter a duhnak kha zeitindah aa pehtlaih?

⁷ Piter a bia in kan hngalhmi a pahnihnak cu Jehovah nih mi vialte hi sual ngaihchihnak ngei hna seh ti a duh caah a lung a sau hi a si. Ṭhatlonak lam in kir a duh lomi hna mi lunghak pawl kha Jehovah nih a hrawh hna lai. Asinain miṭhalo mi a thih kha Pathian nih a duh lo. Miṭhalo nih an ziaza ṭhalo kha an hlawt i an nun kha a duh deuh. (Ezekiel 33:11) Cu a si caah mi nih nunnak an hmuh khawh nakhnga a caan a zaa in pek awkah a lung a sau i vawlei cung pumpi ah thawngṭha bia kha a salle a chimhter hna.

8. Hlan lio Israel miphun le Pathian an i pehtlaihnak ah a lungsaunak kha zeitindah kan hmuh?

⁸ Hlan lio Israel miphun le Pathian an rak i pehtlaihnak zongah a lungsaunak kha kan hmuh. Kum zabu tampi chung a nawl an ngai lo nain a rak in hna. A profet hna hmangin hitin atu le tu a rak forh hna: “A ṭhalomi nan lam hi mertak hna u law, nan pupa hna sinah ka rak pekmi phungbia vialte ning khan le ka sal profet hna sinin nan sinah kan pek hna ning hin, ka phungbia le ka nawlbia cu zul hna u.” A phi chuak cu zeidah a si? Ngaihchiat awk cu a mi hna nih “ngaih an duh lo.”​—2 Siangpahrang 17:​13, 14.

9. Jesuh nih a Pa lungsaunak kha zeitindah a rak langhter?

⁹ A donghnak ah Jehovah nih a Fapa kha a rak thlah. A Fapa nih cun Judah mi hna kha Pathian he i rem ṭhan awkah fakpi in a rak nawl hna. Jesuh nih a Pa lungsaunak kha tlingte in a rak langhter. A rauh hlan ah thah a si cang lai kha a hngalh i Jesuh nih “maw Jerusalem, Jerusalem, Profet kha na rak thah hna i nangmah sinah Pathian nih a run thlah mi lamkaltu hna kha lung in na rak den hna. Arpi nih a fale cu a thla tangah a huh hna bantukin na fale cu voi zeizat dik ka kut in huh ka timh hna i an duh lo” tiah a rak ṭah. ​(Matthai 23:37) Mah bantuk lung a su ngaimi bia hi zaangfahnak a ngei lomi biaceihtu chimmi bia si loin mi cung le hawile cungah a lung a sau i dawtnak a ngeimi hawikom pakhat bia a si. Vancung a Pa bantukin Jesuh nih minung kha i ngaichih hna seh law biaceihnak in luat hna seh ti a duh. A cheu nih cun Jesuh ralrin pekmi kha lungtak tein an ngaih caah A.D. 70 kum ah Jerusalem khua i a tlungmi ṭihnungmi biaceihnak in an luat.​—Luka 21:​20-​22.

10. Pathian a lungsaunak nih zei lam in dah a kan ṭhathnem?

¹⁰ Pathian lungsaunak hi khuaruahhar awk tlak taktak a si lo maw? Mi nih hi tluk in a nawl an ngai lo ko nain kannih pakhat cio le minung nuai tampi hna kha Jehovah nih a kong a kan hngalhter i khamhnak ruahchannak a kan pek. Piter nih Khrihfa hawi sinah “Bawipa nih kan cungah lungsaunak a ngeih cu kannih kha khamh a kan duh caah a si” tiah a ṭial. (2 Piter 3:​15) Jehovah lungsaunak nih khamhnak hmuhnak ding lam a kan hun piak caah kan i lawm tuk a si lo maw? Nifate Jehovah rian kan ṭuan tikah kan cungah lungsaunak ngei peng ko tiah thla kan cam a si lo maw?​—Matthai 6:12.

11. Jehovah a lungsaunak kan hngalhthiamnak nih zeidah a kan tuahter?

¹¹ Jehovah a lungsaunak kong kan hngalh thiam a si ahcun a biakam tlinter awkah a khul a nuar tiah zeitikhmanh ah kan ruat lai lo i a kan khamh lai caan kha kan hngah lai. (Ṭahnakhla 3:​26) Pathian Pennak tlung ko seh tiah thla kan cam lengmang lioah mah kan thlacam leh caan a ṭhat bik caan kha Pathian nih a hngalh kha kan zumh. Cuhleiah kan unau pawl le phung kan chimhmi hna he kan i pehtlaihnak ah Pathian bantuk ​lungsau-nak langhternak thawngin Jehovah kha i zohchunh kan duh. Ahohmanh rawk loin i ngaichih hna seh law zungzal nunnak hmu hna seh ti kha kan duhmi a si ve.​—1 Timote 2:​3, 4.

Profet hna Lungsaunak Zohnak

12, 13. Jeim 5:​10 ningin profet Isaiah cu lungsaunak langhternak ah zeitindah a hlawh a rak tlin?

¹² Jehovah a lungsaunak zohnak thawngin mah a sining kha duh in ngeih awkah a kan bawmh khawh. Mitling lo minung nih lungsaunak ngeih hi a fawimi a si lo nain kan ngei kho ko. Hlan lio Pathian salle sinin kan i cawn khawh. Zultu Jeim nih hitin a ṭial: “Bawipa min in bia a rak chimmi profet hna kha, ka u le ka nau hna, philh hna hlah u. Harnak chung i lungsau in sifahnak a ingmi an si caah i zohchunh hna u.” (Jeim 5:​10) Kan tonmi harnak hna hi midang nih an tei khawh nak kong kan theih tikah hnemhnak le thazang kan hmu.

¹³ Tahchunhnak ah, profet Isaiah cu a rian-ṭuannak ah lungsaunak ngeih a rak herh. Jehovah nih mah kong kha hitin a chimh: “Va kal law hi mi hna hi hi bia hi va chim hna: ‘Ngai lengmang hmanh u law a sullam cu nan hngal bal lai lo. Zoh lengmang hmanh u law a um lio lengmang mi hi zei thil dah a si ti kha nan hngal bal lai lo,’ va ti hna, a ti. Cun a ka thawh ṭhan i, ‘Hi mi hna nih an hmuh khawh nakhnga lo le an theih khawh nakhnga lo le an hngalh khawh nakhnga lo, an lung pihter hna, an hna chehter hna law an mit cawtter hna. An hmuh khawh le an theih khawh le an hngalh khawh ahcun keimah lei ah an i mer sual lai i damnak an hmu sual lai,’ a ti.” (Isaiah 6:​9, 10) Isaiah nih a thanhmi kha an cohlang lo nain Jehovah ralrin pekmi thawngpang kha kum 46 reng lo lungsau tein a rak thanh! Cu bantukin lungsaunak kan ngeih a si ahcun mi tampi nih thawngṭha an cohlan lo hmanh ah phungchimnak rian ah inkhawhnak ngeih awk a kan bawmh lai.

14, 15. Jeremiah kha harnak le lungdonghnak hna tei awkah zei nih dah a rak bawmh?

¹⁴ Profet hna nih Pathian rian an ṭuan tikah mi nih an ngaih duh lo lengah hremnak hmanh an tong. Jeremiah cu hreng khenh, ‘thong thlak’ le tikhor chungah thlak a tong. (Jeremiah 20:​2; 37:​15; 38:6) Amah nih bawmh a duhmi hna i hremnak hmanh kha a tong. Asinain Jeremiah nih aa fahsak lo i teirul a cham hna lo. Kum zabu tampi chung lungsau in a rak in hna.

¹⁵ Hremnak le nihsawhnak ruangah Jeremiah nih chim lo in a rak um lo bantukin nihin ah cu hna ruangah chim lo in kan um ve lo. A caancaan ahcun kan lung a dong kho men. Jeremiah zong a lung a rak dong bal ve. “Bawipa, na bia ka chim ruangah serhsat le nihsawh ka si thluangthluan ko. Bawipa kong cu ka lung chungah ka riahter ti lai lo i a min zongin bia ka chim ti lai lo” tiah a ti. Khi tikah zeitindah a rak um? Jeremiah nih phungchimnak kha a rak ngol maw? Hitin a rak peh: “A bia cu ka lung chungah hin mei bantukin a alh i ka ruh chungah hin aa khumh. Ka chung i tlaih peng kha ka celh ti lo i chuak lo in ka tlai kho ti lo.” (Jeremiah 20:​8, 9) A nihsawhtu hna kong lawng a ruah ah aa nuamh lo kha philhhlah. Asinain a biapi i duh a nungmi thawngpang kha a lungthin a pek ṭhan caah a rak i nuam ṭhan. Cuhleiah Jehovah cu Jeremiah lei ah “a ṭang i ṭhawng ngai” in a um caah Pathian bia kha lungthote le ralṭha tein thanh awkah thazang a hung ngei ṭhan.​—Jeremiah 20:​11.

16. Thawngṭha bia chimnak rian ah zeitindah kan i lawmh peng khawh?

¹⁶ Profet Jeremiah cu a rian ah a rak i nuam maw? Aa nuam! Jehovah kha hitin a rak ti: “Na bia zei ah a rel lomi cu ka in hna a hau, Na bia cu kei ka caah cun ​lawmhnak le thanuamnak a si; Zeicahtiah ​nangmah nih keimah cu na ta si awkah min na ka bunh cang, maw Bawipa.” (Jeremiah 15:16) Jeremiah cu a hmaanmi Pathian aiawhtu le a bia chimtu a rak simi ah aa lawm ngai. Kannih zong kan i lawm kho ve. Cun vawlei cung pumpi ah hi tlukin a tammi hna nih Pathian Pennak thawngṭha kha an cohlan, an i ngaichih i zunzal nunnak lam cungah an kal mi kha hmu in vancung mi hna an i lawmh bantukin kan i lawm ve.​—Luka 15:10.

“Job lungsaunak”

17, 18. Job nih zeidah a rak ton i zei thil dah a chuak?

¹⁷ Zultu Jeim nih hlan lio profet hna kong a chim dih hnu ah hitin a rak ṭial: “Job lungsaunak kha nan theih i Pathian nih a donghnak ah a pek ṭhannak kong kha nan theih. Bawipa cu zaangfahnak le zawnruahnak in a khat mi a si.” (Jeim 5:​11) “Lungsaunak” tiah lehmi a hrampi Grik holh biafang le a hmasa deuh ah Jeim nih a hmanmi “lungsaunak” hi tlawmpal aa dang. Baibal thiamsang pakhat nih mah biafang pahnih an i dannak kha hitin a ṭial: “A hmasa baifang nih pakhatkhat sinin volhpamh kan ton tik i lungsaunak langhter kha a chim duhmi a si i a hnu biafang nih sifahharnak lak ah ralṭha tein lungsaunak langhter kha a chim duhmi a si.”

¹⁸ Job tonmi harnak hi a fak ngaingaimi a si. Pawcawmnak a ngei ti lo, a fale vialte an thi dih, hmafak a ing fawn. Jehovah nih dan an tat tiah a si lopi in an puh rih fawn. Job nih daite in um lo in a sining kha aihram in Pathian nakin ka ding deuh ti tiang a vel in a rak chim. (Job 35:​2) Asinain a zumhnak cu a tlau bal lo i zumhawktlak a sinak zong a rawk bal lo. Satan nih Pathian cu a volhpamh ko lai a ti bantukin a rak volpam lo. (Job 1:​11, 21) Zei thil dah a chuak? Jehovah nih “Job cu a chan a dongh lei kha a thawk lei nak khan thluachuahnak tam deuh in a pek.” (Job 42:12) Jehovah nih Job kha a damter ṭhan, chawva kha let hnih tam in a pek i a dawtmi hna he nuam tein khua a sa ṭhan. Job nih zumhawktlak tein a um ruangah Jehovah kong kha tling deuh in a rak hngalh.

19. Job lungsaunak in zei cawn awk dah kan hmuh?

¹⁹ Job lungsaunak in zeidah kan i cawn awk a si? Job bantukin zawtfahnak asiloah a dang harnak hna kan tong kho men. Hneksaknak in awkah Jehovah nih nawl a pekmi kha tling tein kan hngal kho lo men. Asinain zumhawk tlak tein kan um a si ahcun thluahchuah kan hmuh lai cu a fing ko. Jehovah nih amah kha lungthin tak tein a kawl mi hna cu laksawng a pek hna. (Hebru 11:6) Jesuh nih hitin a ti: “A dongh tiangin aa tlaih pengmi cu khamhnak an hmu lai.”​—Matthai 10:22; 24:13.

‘Jehovah Ni Cu A Ra Lai’

20. Jehovah ni cu a ra hrimhrim lai tiah zeiruangah kan ti khawh?

²⁰ Jehovah cu a lung a sau ko nain a din caah miṭhatlo hna kha a zungzal in a zuah hna lai lo. A lungsaunak cu ri a ngei. Piter nih hitin a ṭial: “Hlanlio vawlei zong kha Pathian nih a rak zuah lo.” Buanchukcho kha a tlunter i ​Pathian zei i a rel lomi hna kha an thi dih nain Noah le a innchungkhar tu cu himte in an um. Sodom le Gomorrah khua zong kha dan a tat hna. Cu tin bia a ceih hna cu “Pathian zei i a rel lomi hna caah zohchunh awkah a ser.” Cucu kan zohnak thawngin ‘Jehovah ni cu a ra lai’ tiah kan chim khawh.​—2 Piter 2:​5, 6; 3:​10.

21. Lungsaunak kha zeitindah kan langhter khawh i a hnu capar ah zei kong dah kan i ruah lai.

²¹ Cucaah mi kha i ngaichih awk le khamh-nak hmuh awk i kan bawmh hna nak thawngin Jehovah lungsaunak kha i zohchunh hna u sih. Kan chimmi thawngṭha kha mi nih an cohlang lo nain lungsau tein chimnak thawngin profet hna kha i zohchunh hna u sih. Cu-lengah Job bantukin hneksaknak kha kan inkhawh i zumhawk tlak tein kan um a si ahcun Jehovah nih thluachuah a kan pek lai kha kan zumh khawh. Jehovah nih vawlei cung pumpi thawngṭha bia chim awkah a salle an i zuamnak thluachuah a pek hna ning kan hngalhthiam tikah kan phungchim ​rianṭuannak ah lunglawmh awk a kong ṭha a um. A  hnu capar ah cu kong cu kan hmuh lai.

Naa Cinken Maw?

• Jehovah nih lungsaunak kha zeiruangah a langhter?

• Profet hna lungsaunak in zei cawn awk dah kan hmuh?

• Job nih lungsaunak kha zeitindah a langhter i zei thil dah a chuak?

• Jehovah lungsaunak ri a ngeih hi zeitindah kan hngalh?