Phungchimnak ah Lungsau A hau
1. Jehovah nih minung cungah a lung a sau zeitindah a langhter?
1 Pathian cu minung he an i pehtlaih tikah a lung a sau tuk. (Ex. 34:6; Salm 106:41-45; 2 Pit. 3:9) A lung a sau tuk kha vawlei pumpi Pennak kong chimnak rian ah hmuh khawh a si. Jehovah cu minung cungah a lung a sau cu kum 2,000 hrawng a si cang i lungthin ṭha a ngeimi kha a sin ah a hnuh rih hna. (Johan 6:44) Jehovah lungsaunak kha phungchimnak ah zeitindah kan i cawn khawh?
2. Phungchimnak rian ah zeitindah lungsaunak kan langhter?
2 Innkhat hnu Innkhat Phungchimnak: Thawngṭha ngaih a duh lomi an umnak sang ah phung kan ‘chim lengmangnak’ thawng in Jehovah lungsaunak kan i cawn khawh. (Lam. 5:42) Zei rellonak, nihsawhnak le khenkhamnak hna kha lungsau tein kan in. (Mar. 13:12, 13) Thawngṭha ngaih a duhmi cu ton a har hmanh ah biatak thlaici ti toih awk ngol loin i zuamnak thawng zong in lungsaunak kan langhter.
3. Lennolh le Baibal cawnpiaknak tuah tikah zeicah lungsau a herh?
3 Baibal Cawnpiaknak: Thingkung cin tikah lungsau a hau. Ṭha tein zohkhenh khawh a si nain a ṭhan zokzok nakhnga kan tuah kho lo. (Jeim 5:7) Cu bantukin thlaraulei ṭhannak zong duhsah in le a dotdot in a si. (Mar. 4:28) Baibal a cawngmi cu a hmaanlomi zumhnak le Baibal phunglam he aa ralchanmi phungphai kaltak aa harh men lai. Mah tikah thlennak tuah zokzok awk hnek chih in ṭhancho zokzok awk tuah ding a si lo. A lungthin ah Pathian thiang thlarau rian ṭuannak caan a zatawk pek tikah lungsau a hau.—1 Kor. 3:6, 7.
4. Lungsaunak nih zumlotu chungkhat phung chimh khawh awkah zeitindah a kan bawmh khawh?
4 Zumlotu Chungkhat: Zumlotu kan chungkhat pawl biatak hngal hna seh ti kan duh. Asinain kan zumhnak kong chim awk aa tlakmi caan hngahnak in le voikhat ah a kong tamtuk chim lonak in lungsaunak kan langhter. (Pct. 3:1, 7) Mah lioah biatak kan hngalh caah kan tuahsernak a ṭhat hngalhter kan i zuam, cun nem te le hmaizahnak he kan zumhnak chim awk timhcia in kan um. (1 Pit. 3:1, 15, 16) Phungchimnak ah lungsaunak nih ṭhatnak tampi a chuahter i vancung kan Pa a lawmhter.