Inkhawhnak Le Zumhfehnak A Ngeimi Job
“Ka sal Job hi na ruat bal maw? Vawlei cungah hin amah bantuk soisel awk um lo, miding, Pathian a ṭih i ṭhatlonak a mertakmi hi an um lo.”—JOB 1:8.
1, 2. (a) Ruah lopi in zei a fakmi harnak dah Job nih a rak ton? (b) A fakmi harnak a ton hlan i Job nuncan kong kha chim.
RUMNAK, upatnak, ngandamnak le a nuammi chungkhar ti bantuk thil ṭha phun zakip ngeih dawh a lomi pa a rak um. Cun ruah lopi ah ngaihchiatnak phun thum nih pakhat hnu pakhat in a rak tlun hnawh. A ngaihchiah vialte cu zan zan khat ah a rak sung dih. Cun thlichia fakpi a hran ruangah a fale an thi dih. Cu hnuah, tha a dihtermi zawtnak ṭhalo a simi hmachia nih a kechik in a luthlung tiang a tlunh. Mah pa cu Job a si i a min pekmi Baibal cauk ah a biapi bik in amah kong kha aa ṭial.—Job, a ngan 1 le 2.
2 “Hlan lio thla hna chung i ka rak um bantuk khan um ning law ka hei duh dah!” tiah a rak hrum. (Job 3:3; 29:2) Sifah harnak ton tikah ahodah a luancia caan a ngai lomi a um lai? Job cu miding a si i sifah harnak a tong lomi a lo. Hmaizahmi upa hna nih an upat i ruahnak cheuhnak an rak hal. (Job 29:5-11) Mirum a si nain tangka he aa tlaiin a tlarimi hmuhnak a ngei. (Job 31:24, 25, 28) A herhbaumi nu-hmei le ngakṭah a hmuh tik hna ah a rak bawmh hna. (Job 29:12-16) A nupi cung zongah zumhawktlakmi a rak si.—Job 31:1, 9, 11.
3. Jehovah nih Job kha zeitindah a hmuh?
3 Job cu Pathian a biami a si caah soisel awk umlo in a rak nung. Jehovah nih “vawlei cungah hin amah bantuk soisel awk um lo, miding, Pathian a ṭih i ṭhatlonak a mertakmi hi an um lo” tiah a ti. (Job 1:1, 8) Job nih dinnak ziaza aa tlaih ko nain, ṭihnungmi harnak nih a nuammi a nuncan cu a rak hrawh dih cikcek. A ngaihmi vialte an tlau dih, a hma fahnak le a lungretheihnak nih awlok a chonh i a rak ngeihmi a lungput kha a thlau dengmang.
4. Job tonmi hneksaknak kong ruah cu zeiruangah bawmtu a si?
4 Job lawng hi Pathian salle lakah harnak a tongmi a si lo. Tuchan Khrihfa tampi zong Job bantukin an tong ve. Cu ruangah hi biahalnak pahnih hi ruah awk tlak an si: A fakmi harnak ton tikah Job tonmi hneksaknak kong ruahnak nih zeitindah a kan bawmh khawh? Mah nih harnak a tongmi hna cung zawnruahnak ngeih awkah zeitindah a kan cawnpiak khawh?
Zumhawktlak Sinak Kongkau le Zumhfehnak Kha Hneksaknak
5. Satan nih Job Pathian a biakmi cu zei caah a si tiah dah a ti?
5 Job kong hi aa phundang ngaimi a si. Khuachia nih Job Pathian a biak hnawhchannak kong ah biahalnak a rak chuahter kha Job nih a hngal lo. Vancungmi pawl pumhnak an tuah lio ah Jehovah nih Job kong a chim tikah Satan nih “amah le a inn le a ngeihmi vialte cu hau in na kulh hna lo maw?” tiah a rak ti. Cucaah Satan nih Job Pathian a biakmi cu a ca ṭhatnak caah pei a si ko cu tiah a puh i Pathian salle dang vialte zong cuticun a puh hna. “Na kut hei chuah law a ngeihmi thil vialte khi tawng tuah ngat, na hmai hrimhrim ah an volhpamh ko lai” tiah Jehovah kha a rak leh.—Job 1:8-11.
6. Zei a biapimi kongkau dah Satan nih a chuahter?
6 Hi kongkau hi a biapimi a si. Satan nih Jehovah a nawlngeihnak a hmannak kongah zuamcawhnak a chuahter. Pathian nih vanrang hi dawtnak in a uk taktak kho lai maw? Cun Satan nih a chim bantukin minung nih a donghnak ah mah ca ṭhatnak ah a biak maw a si? Jehovah nih Job zumhawktlak sinak le a zumhfehnak cungah zumhnak ngeiin Khuachia kha hneksaknak nawl a rak pek. Cucaah Satan nih Job cungah harnak kha pakhat hnu pakhat a rak tlunter. Cuti a tuahnak in Job kha a tei lo caah fih a nungmi hma in a hrem. “Cuar caah cuar! Mi nih cun a ngeihmi vialte cu a nunnak caah cun a sian ko lai ta” tiah Khuachia nih a rak puh.—Job 2:4.
7. Tuchan ah Pathian salle nih Job bantukin zei harnak dah an in?
7 Tuchan Khrihfa tampi hna cu Job tonmi harnak tluk an tong lo nain harnak phun dang dang an tong. Tam deuh cu hremnak asiloah chungkhar buainak an tong. Khuasak harnak le zawtfahnak zong kha in awkah a har ngaingai ko lai. Cheukhat cu an zumhnak caah an nunnak tiang an pek. Asinain tonmi harnak kip hi Satan nih a tluntermi a si lo. A ngaingai ti ahcun harnak cheukhat tonmi hi misual kan si ruangah asilole cikor ruangah a si kho. (Galati 6:7) Ahohmanh tarnak le leiser ral in kan luat kho lo. Tuchan ah, Jehovah nih a salle kha cu bantuk harnak khan khuaruahhar in a khamh hna lai tiah Bibal nih a ti lo.—Phungchimtu 9:11.
8. Kan inmi harnak kha Satan nih zeitindah a hman?
8 Satan nih kha bantuk harnak hna kha hmangin kan zumhnak a kan hneksak men lai. Lamkaltu Paul nih “fahnak Satan thil . . . dawntu” ruang i a temh innak kha a rak chim. (2 Korin 12:7) Cu thil cu mitfahnak asilole a dang a tonmi harnak pakhatkhat a si kho. Satan nih kha harnak kha hmangin cu ruang i lungdonghnak nih kaa nuamhnak le ka zumhfehnak a tlauter khawh ti kha Paul nih a hngalh. (Phungthlukbia 24:10) Tuchan ah, Satan nih innchungkharmi, sianginn kai ṭi hawi le cozah hna hmangin Pathian salle pawl kha lam pakhatkhat in a hrem men hna lai.
9. Zeicahdah harnak le hremnak ton tikah khuaruahhar awk a si lo?
9 Mah bantuk harnak hna kha zeitindah kan tei khawh lai? Kha harnak hna kha Jehovah kan dawtnak le a nawlngeihnak kan cohlannak zei tik hmanh ah aa thleng lai lo ti langhternak caan ṭha in hmuhnak thawngin tei khawh a si. (Jeim 1:2-4) Zeiruang i kan lungre a theih hmanh ah, Pathian cung zumhawktlak sinak a biapi ti hngalhthiamnak nih kan thlaraulei khing kha a rualter peng lai. Lamkaltu Piter nih Khrihfa hna sinah hitin ca a rak ṭial: “Ka dawtmi ka hawile hna, a fakmi temh innak nan in caah hin nan khuaruahhar hlah u, kan cungah a um bal theng lomi thil a tlung tiin ruat hlah u.” (1 Piter 4:12) Paul nih “Khrih Jesuh he i pehtlai i Pathian nunning in nun a duhmi paoh cu hremnak an ing ko lai” tiah a rak ti. (2 Timote 3:12) Satan nih Job kongah a tuah bantukin Jehovah Hngaltu hna an zumhfehnak kongah atu tiang a zuamcawh peng rih ko hna. Satan nih donghnak caan chungah Pathian mi hna kha fakpi in a doh hna lai tiah Baibal nih a ti.—Biathlam 12:9, 17.
I Hngalhsualnak Le I Theihsualnak
10. Job nih zeidah a rak hngalh lo?
10 Job he kan i lawh lonak cu zeiruangah harnak a ton aa hngalh lomi kha a si. “BAWIPA nih a ka pek i BAWIPA nih a lak ṭhan” tiah Job nih a rak ruah sual. (Job 1:21) Pathian ruangah sifah harnak ka in tiah Job nih zum seh tiin Satan nih hramhram in a tuahmi a si kho.
11. Job nih harnak a tonmi a leh ning kha fianter.
11 A nupi nih Pathian chiatserh ding a forh bantukin a rak tuah lo, asinain Job cu a lung a rak dong ngaingai. (Job 2:9, 10) ‘Mi ṭhalo kha keimah nakin an hungcho deuh’ tiah a rak ti. (Job 21:7-9) ‘Zeiruangah dah Pathian nih dan a ka tat hnga’ tiah a khuaruah a rak har ngai lai. Thih a duh caan zong a rak um. “Pathian, Sheol ah khin ka thup law ka duh; Na thinhunnak a daih tiangin ka thup tuah” tiah a rak nawl.—Job 14:13.
12, 13. A hawile pathum chimmi nih Job kha zeitindah a hnorsuan?
12 Job “hramh ding le hnangamter awkah” a hawile pathum an rak ra. (Job 2:11) Asinain, an “hnemhnak cu hremnak lehlam” tu a rak si. (Job 16:2) Job cu a harnak kong i a lungretheihnak a zorter kho mi a hawile pathum sinin bawmhnak hmuh ding a si nain, a lungtuainak le a awlokchonnak tu an rak zualter.—Job 19:2; 26:2.
13 Job nih ‘zeicahdah keimah cung theng ah hi thil hi a tlun, zei ṭhatlonak ko dah ka tuah?’ tiah aa ti ko lai. A hawile nih a hmaan lopi in an rak chim. Sualnak ngan na tuah ruangah harnak na tonmi a si tiah sual an phawt. Elifaz nih “zeihmanh a suallo mi cu a rawkral bal maw?” tiah biahalnak a tuah hnu ah “keimah hmuhning ahcun, ṭhatlonak lei a thuangtu hna le harnak a tuhtu hna nih cun, cu ṭhiamṭhiam cu an zun tawn” tiah a rak ti.—Job 4:7, 8.
14. Thil ṭhalo tuah ruangah harnak kan tong tiah zeicah ti colh awk a si lo?
14 Thlarau lo tuh loin pumsa lo ah tuh ahcun harnak a chuak kho ticu a hmaan ko. (Galati 6:7, 8) Asinain hi chan ah zeiti kan tuah hmanh ah harnak a chuak kho ko. Cuhleiah, sualnak a ngei lomi hna cu zei harnak hmanh an tong lai lo tiah ti khawh a si lo. ‘Sualnak a ngei lo i misual mi hna lak in ṭhen’ a simi Jesuh Khrih cu hremnak tung cungah fahnak nganpi tuar in a rak thi, cun lamkaltu Jeim zong nih a zumhnak caah a nunnak a rak pek. (Hebru 7:26; Lamkaltu 12:1, 2) Elifaz le a hawile nih a hmaan loin sual an puh ruangah Job nih a minṭhatnak le a suallonak kong runvennak bia a rak chim. Asinain harnak in awk naa tlak hrimhrim ko tiah an ti chih caah Pathian dinnak cungah a lung a hring.—Job 34:5; 35:2.
Harnak Ton Tikah Bawmhnak Kawlnak
15. Harnak ton tikah zei bantuk ruahning dah bawmtu a si?
15 Job kong in zeidah kan i cawn khawh? Ngaihchiatnak, zawtnak asilole hremnak hna hi a ding lo ngaimi a lo men lai. Midang tu cu kha bantuk harnak kha a tong lomi an lo. (Salm 73:3-12) A caancaan ah, hi bia halnak hna hi i hal a herh men lai: ‘Zei ka ton hmanh ah Pathian a ka biakter kho pengmi dawtnak ka ngei maw? Jehovah nih a soitu Satan kha let kho seh ti ka duh maw? (Phungthlukbia 27:11; Matthai 22:37) Midang nih ruat setsai loin an chimmi bia ruangah vancung kan Pa cungah lunghrinnak zei tik hmanh ah ngei hlah u sih. Kum tampi chung a ngormi zumhawktlak Khrihfa pakhat nih hitin a ti: “Jehovah nih zeipaoh sinak nawl a pekmi kha ka in khawh ko lai. Zeicahtiah a herhmi ṭhawnnak a ka pek lai kha ka hngalh caah a si. A pek zong a ka pek lengmang.”
16. Harnak a tongmi hna kha Pathian Bia nih zeitindah a bawmh hna?
16 Kannih nih Satan hlen thiamnak asilole “Satan thil ti ning” kong Job nih a hngalh lomi kan hngalh. (2 Korin 2:11) Mah lengah, hmantlakmi ruahnak cheuhnak tampi zong kan ngei. Harnak phun tampi a rak ingmi zumhawktlak nule pa pawl kong Baibal ah a um. Khrihfa dang nakin harnak tam deuh a tongmi lamkaltu Paul nih hitin a rak ṭial: “Cathiang nih lungsaunak le lungthin ṭhawnnak kha kan ngeih khawh nakhnga Ca Thiang chung i aa ṭialmi vialte cu kanmah cawnpiaknak caah a si.” (Rom 15:4) Ralpi pahnihnak ah a zumhnak ruangah thong a rak tlami Zurop ah a ummi Hngaltu pakhat nih nithum chung a ei ding rawl kha Baibal ca he a rak thlen. “Cutin ka thlen kha man a rak ngei tuk! Ka paw cu a rak ṭam ngai ko nain, mah harnak caan chungah keimah he midang he in khawhnak a kan ngeihtermi thlarau rawl kan hmu. Cu Baibal cauk cu atu tiang kaa chiah ko” tiah a ti.
17. In khawhnak ngeih awk bawmtu ah Pathian nih zeidah a kan timhpiak?
17 Cathiang in hnemhnak kan hmuh hlei ah, harnak tei khawh awkah lamhruainak ṭha a ummi Baibal hlathlainak bawmtu cauk tampi zong kan ngei. Vennak Innsang Index Cauk ah na kawl ahcun, na tonmi harnak bantuk a tongmi Khrihfa pakhat kong na hmuh men lai. (1 Piter 5:9) Mi a hngalthiammi Khrihfa upa asiloah Khrihfa nutling patling a simi he na sining kong i ruahceih ṭinak zong bawmtu a si lai. A bik in, thlacamnak in Jehovah le a thiang thlarau kha naa bochan khawh. Paul nih Satan ‘dawnhnak’ kha zeitindah a rak tei khawh? Pathian ṭhawnnak aa bochannak thawngin a si. (2 Korin 12:9, 10) “Khrih nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna” tiah a rak ṭial.—Filipi 4:13.
18. Zumtu khat pawl cu zeitindah man khiah khawh lomi thazang petu an si khawh?
18 Kha bantuk hmuh khawhmi bawmhnak kha lak awkah i cungcang hlah. “Harnak caan i na der a si ahcun na der taktak a si” tiah phungthlukbia nih a ti. (Phungthlukbia 24:10) Ṭuangṭuan nih inn pakhat pur lak tiangin a ei khawh bantukin hnabei donghnak nih Khrihfa pakhat a zumhfehnak kha a hrawh khawh. Kha thil ṭihnung chung tlak lo awkah Jehovah nih zumtu khat pawl hmangin a kan bawmh. Jesuh kha an tlaih zan ah vancungmi pakhat a rung lang i a hnemh. (Luka 22:43) Paul cu thongtla pakhat in Rom lei a kal lioah, Appius Chawdawrnak Hmun le Khualbuk Pathum ah unau pa hna he an rak i ton tikah “Pathian kha a lawmh i a thazang a tlung.” (Lamkaltu 28:15) Kum hra hrawng a si lioah Ravensbrück thongah a tlami Germany Hngaltu unau nu pakhat cu bawmhnak a hmuhmi kha atu tiang aa cinken. “Unau pakhat nih a ka hmuh i ṭha tuk in a ka chawnhbiak. Zumh-awktlak unau nu dang pakhat nih thlaraulei nu pakhat bantukin a ka kilven peng” tiah a ti.
“Zumhawktlak Tein Um”
19. Satan aa zuamnak kha doh awkah Job cu zeinihdah a rak bawmh?
19 Jehovah nih Job cu “a tlinnak cu fekte in aa tlaih peng” tiah a ti. (Job 2:3) A lung a dong ngai i zeiruangah harnak a ton kha a rak hngal lo nain a biapimi zumhawktlak sinak kong lawngah a lungthin a rak pek. A zumh- fehnak kha aa tlaih peng. ‘Ka thih tiangin, ka zumhfeknak cu ka hlaw bal lai lo’ tiah fek tein a rak chim.—Job 27:5, NW.
20. In khawhnak ngeih cu zeicah man a ngeih?
20 Cu bantukin biakhiahnak tuahnak nih tukforhnak, ralchannak le harnak ti bantuk kha zei sining tang i kan ton hmanh ah zumhfekmi si khawh peng awk a kan bawmh lai. Jesuh nih Smarna Khrihfabu kha hitin a rak ti hna: “Sifahnak na in ding mi kha zeihmanh ṭih hna hlah. Hi bia hi ngai hmanh. Khuachia nih khan nangmah hneksaknak caah nanmah lak i a cheu cu thong ah a thlak hna lai. Thihnak a si hmanh ah ka cungah zumh awk tlak tein um ko u: cun nunnak sui lu-chin kha kan pek hna lai.”—Biathlam 2:10.
21, 22. Harnak ton lioah zei hngalhnak nih dah a kan hnemh khawh?
21 Satan ukmi hi vawlei ah in khawhnak kan ngeihmi le kan zumhfehnak cu hneksak a si ko lai. Asinain hmailei ruahchannak kan hngah lioah ṭih awk a si lo tiah Jesuh nih bia a kan kamh. A biapi bikmi cu zumhawktlak tein um a si. Harnak cu caan tawite lawng kan in nain Jehovah nih a kan kamh- mi cu “a let tampi in a ngan deuhmi zungzal sunparnak” asilole laksawng a si tiah Paul nih a ti. (2 Korin 4:17, 18) Job harnak a ton hlan le a ton dih hnu aa nuamh caan kum hna he tahchunh ahcun harnak a in caan cu caan tawite lawng a si.—Job 42:16.
22 Asinain kan tonmi hneksaknak hna hi a dong kho lomi le in khawh lomi a lo men ko lai. Job kong in khan in khawhnak ngeihnak he aa tlaimi cawn awk dang hna lengah harnak a tongmi hna thazang pek ningcang kha a hnu capar ah kan i ruah lai.
Zeitindah Na Leh Lai?
• Job zumhfehnak he aa tlaiin Satan nih zei a biapimi kongkau dah a chuahter?
• Harnak ton tikah zeicah khuaruahhar tuk awk a si lo?
• Jehovah nih in khawhnak ngeih awkah zeitindah a kan bawmh?