Job Nih Jehovah Min A Thangṭhat

“[Jehovah] min cu thangṭhat si ko seh.”—Job 1:21.

1. Job cauk hi aho nih dah ṭial dawh a si, zei tikah dah a ṭial?

Moses cu kum 40 hrawng a si ah a thinhung tukmi Faraoh kut in luat awkah Izipt ram in a zaam i Midian ram ah a um. (Lam. 7:23) Mah ram a um lioah a umnak pawng Uz ram i a ummi Job tonmi hneksaknak kha rak theih dawh a lo. Kum tampi a rauh hnu ah, Moses le Israel miphun ramlak an khualtlawnnak a donghnak lei ah Uz pawng i an um caah Moses nih Job a thih lai kum hna kong kha a hngalh men lai. Judah mi hna tuanbia chim ning ah Moses nih Job a thih hnu tlawmpal ah Job cauk hi a ṭial.

2. Job cauk nih tuchan Jehovah salle zumhnak kha zei lam in dah a fehter?

² Job cauk nih tuchan Pathian salle zumhnak kha a fehter. Zei lam in dah? Mah cauk nih vancung ah a cangmi a biapi tukmi thil kha a kan hngalhter i Pathian universe nawlngeihnak kong a biapi bik kha a kan theihter ṭhan. Job kong ṭialmi nih zumhfehnak hmunhternak ah zeidah aa tel kha tam deuh in a kan hngalhter i Jehovah nih zeicah a caan ah a salle sifah innak nawl a pek hna hngalh awk zong a kan bawmh. Mah lengah Job cauk nih Satan Khuachia cu Jehovah i a ral ngan bik a si lengah minung ral zong a si kha a kan hngalhter. Job bantuk in mitlinglo minung nih hneksaknak tampi ton bu in Jehovah cung zumhfehnak hmunhter khawh a si zong a langhter. Job cauk ah ṭialmi thil cheukhat kong i ruah u sih.

Satan Nih Job A Hneksak

3. Job kong zeidah kan hngalh, zeicah Satan nih a hmuichon ah a chiah?

³ Job cu mirum, thil a ti kho ngaimi le chungkhar ṭha tein a hruaimi a si. A herhbaumi hna a bawmmi le mi nih upat ngaingaimi ruahnak cheutu a si ti cu a fiang ko. A biapi bik cu Job nih Pathian a ṭihzah kha a si. Job cu “soisel awk um lo, miding, Pathian a ṭih i ṭhatlonak kha a hrialmi a si” tiah a kong chim a si. Cucu a rum ca le huham a ngeih caah si loin Pathian duh ning in a nun caah Job cu Satan Khuachia nih a hmuichon ah a chiah.—Job 1:1; 29:7-16; 31:1.

4. Zumhfehnak cu zeidah a si?

⁴ Vancungmi hna cu Jehovah hmai i chuah awkah vancung ah an i pum tiah Job cauk a hramthawk ṭialmi nih a ti. Satan zong a ra ve i Job kha sual a puh. (Job 1:6-11 rel.) Satan nih Job a ngeihchiah kong a chim nain Job zumhfehnak kha a bik in a zuamcawhmi a si. “Zumhfehnak” timi biafang cu a dik, mawhchiat awk um lo, a dingmi le soisel awk umlo timi sullam a keng. Minung zumhfehnak kha Baibal ah hman tikah lungthin dihlak in Jehovah biak kha a chim duhmi a si.

5. Satan nih Job kong ah zeidah a chim?

⁵ Job nih Pathian a biak cu a zumhnak a feh caah si loin amah ca ṭhatnak a ruah caah a si tiah Satan nih a ti. Job cu Pathian nih laksawng a pek i a zohkhenh chung lawng Jehovah cungah zumhfekmi a si lai tiah Satan nih a puh. Satan sualpuhnak a phi langhter ding ah Jehovah nih Satan kha zumhawktlak pa dohnak nawl a pek. Cucaah, nikhat chung ah a saṭil pawl fir le thah an si le a cawngtu pawl thah an si le a fale pahra an thih thawng kha Job nih a theih. (Job 1:13-19) Satan dohnak nih Job zumhfehnak kha a hrawk maw? Job nih a tonchiatnak a chimmi kha thawchuah hnawh in ṭialmi nih hitin a chim: “[Jehovah] nih a ka pek i [Jehovah] nih a lak ṭhan; [Jehovah] min cu thangṭhat si ko seh.”—Job 1:21.

6. (a) Vancung ah a hnu tan pumhnak ah zei thil dah a cang? (b) Satan nih Job zumhfehnak kong Jehovah a zuamcawh lioah a lung chungah ahotedah an um?

⁶ A hnu ah vancung ah pumhnak a um ṭhan. Tu tan zong Satan nih Job kha hitin sual a puh ṭhan: “Cuar caah cuar! Mi nih cun a ngeihmi vialte cu a nunnak caah cun a sian ko lai ta. Sihmanhsehlaw atu cu na kut hei chuah law a ruh le a sa kha tawng tuah hna ngat, na hmai hrimhrim ah an volhpamh ko lai.” Satan sualpuhmi ah midang zong an i tel kha zoh hmanh. “Mi nih cun a ngeihmi vialte cu a nunnak caah cun a sian ko lai ta” tiah a tinak thawngin Satan cu Job lawng si loin Jehovah a biami “mi” zeipaoh an zumhfehnak ah a lung a hring. Cucaah Pathian nih Satan kha Job cungah zawtnak fak tlunternak nawl a pek. (Job 2:1-8.) Asinain cucu Job tonmi hneksaknak a dihlak a si lo.

Job Lungput in Fimnak Lak Khawhmi

7. Job cu a nupi le a mileng hna sinin zei lam in dah hneknak a ton?

⁷ A hramthawk ah Job nupi cu a va bantuk in a ingtuar ve. An fale thihnak le an ngeihchiah an sunghnak nih a lung a hrawh cikcek lai. A vapa a zawtnak a fah i a intuarmi zong nih a ngaih a chiatter lai. Cutik ah Job kha “na tlinnak [‘zumhfehnak,’ Nw] cu fek tein naa tlaih peng ko rih lai maw? Pathian cu volpam law thi ko cang” tiah a ti. Cun pa pathum Elifaz, Bildah le Zofar cu Job hnemh ruah ah rat dawh an si. Asinain a si lomi a konglam hmang in an “hnemhnak cu hremnak lehlam a si” a lang. Tahchunhnak ah, Job fale cu ṭhatlonak an tuah caah kha bantuk thil an tonmi a si tiah Bildad nih a ti. Elifaz nih Job fahnak a in cu hlan a sualnak ruangah dandat a huahmi a si tiah bia am in a chim. Zumhfekmi hna hi Pathian caah mansung an si hnga maw ti tiang in biahalnak a tuah! (Job 2:9, 11; 4:8; 8:4; 16:2; 22:2, 3) Cu bantuk a fakmi hneksaknak tangah Job cu zumhfek tein a um peng. “Pathian nakin amah kha a ding deuh ah aa ruat” i a rak palh. (Job 32:2) Asinain zumhawktlak in a um peng.

8. Tuchan ruahnak cheutu hna caah Elihu nih zei zohchunh awk dah a chiah?

⁸ Cun Job a rak leng vemi Elihu kong kan rel. A hramthawk ah Elihu cu Job le a hawile bia an i almi kha a ngai hmasa. Elihu cu an pali nakin ngakchia deuh a si ko nain a fim deuh kha a lang. Upat tein Job a chawnhmi in zawnruahnak a langhter. Elihu nih Job kha ding tein a nun caah a lawmh. Asinain Job cu a palhlonak langhter i zuamnak ah a lung a um tuk zong kha a chim. Mah hnu ah zumhawktlak tein Pathian biak cu a zungzal in man a ngeih kha Elihu nih biatak tein a chim. (Job 36:1, 11 rel.) Tuchan ah mi ruahnak a cheu mi hna caah zeitluk zohchunh awk ṭha dah a si! Elihu nih lungsaunak, ṭha tein mi bia ngaihnak, a si khawhnak paoh ah mi lawmhnak le thazang a pemi ruahnak cheuh a hman kha a langhter.—Job 32:6; 33:32.

9. Jehovah nih Job kha zeitindah a bawmh?

⁹ A donghnak ah Job cu Jehovah nih a chawnhmi khuaruahhar taktak kha a ton! Ṭialmi ca nih hitin a ti: “Bawipa nih phuchim chungin Job cu a [chawnh].” Jehovah nih aa peh thluahmah in bia a hal i Job kha a ruahnak remh awkah zaangfahnak in a bawmh. Job nih remhnak kha lungtho tein a cohlan i “zei rel awk tlak a si lomi kei nih . . . leidip le vutcam lakah ṭhu in kaa ngaihchih” tiah a ti. Jehovah nih Job a chawnh hnu ah, a hawile pathum cung a thinhun kha a chimh, zeicahtiah ‘biatak’ kha an chim lo caah a si. An caah Job nih thlacampiak ding a si. Cun “Job thlacamnak kha a cohlan i . . . Bawipa nih Job cu a vanṭhatnak kha a pek ṭhan i a ngeihmi kha a let hnih in a pek ṭhan.”—Job 38:1; 40:4; 42:6-10.

Zeitluk In Dah Jehovah Kan Dawt?

10. Jehovah nih zeicah Satan kha zei rel lo in a um lo asiloah a hrawh lo?

¹⁰ Jehovah cu universe Sertu, a sermi vialte cungah Nawlngeitu a si. Khuachia sualpuhnak kha zeicah zeirel loin a um lo? Satan kha zeirel loin a um ah siseh, a hrawh ah siseh a chuakmi thil kongkau a phi a chuah lai lo kha Pathian nih a hngalh. Khuachia nih Jehovah cung zumhfekmi Job kha a ngeihchiah a sungh ahcun Pathian cungah a zumhnak a fek lai lo tiah a ti. Hneksaknak a tong nain Job cu zumhfek tein a um peng. Takpum fahnak an in ahcun mi zeihmanh Pathian an kaltak ko lai tiah Satan nih a ti ṭhan. Job cu fahnak a ing nain a zumhfehnak cu a rawk lo. Cucaah mitling lo a si nain mah zumhawktlak pa kong ah Satan cu lihchim a si kha a lang. Pathian a biami midang tah zeitin?

11. Satan zuamcawhnak kha Jesuh nih zeitindah tling tein a leh?

¹¹ Pathian sal pakhat cio nih zei thil paoh Satan nih chuahter hmanh seh zumhawktlak a si peng ahcun a puarhrangmi ral sualpuhnak a palh kha mah theng nih langhter a si. Jesuh cu vawlei ah a ra i Satan zuamcawhnak kha tling cikcek in a leh khawh. Jesuh cu hmasa bik kan pa Adam bantuk in mitling a si. Jesuh a thih tiang zumhawktlak a sinak nih Satan mi lihchim a si le a sualpuhnak a hmaan lo kha fiang tein a langhter.—Biat. 12:10.

12. Jehovah sal pakhat cio nih zei tinvo sung le rian dah kan ngeih?

¹² Asinain Satan nih Jehovah a biami pawl hneksak kha a ngol lo. Kannih pakhat cio nih mah ca ṭhatnak ruah caah si loin Jehovah kan dawt caah kan biakmi a si kha zumhfekmi sinak thawngin langhternak caanṭha kan ngei i langhter ding rian zong kan ngei. Mah rian kha zeitindah kan hmuh? Jehovah cung zumhfekmi sinak kha tinvo sung ah kan hmuh. Inkhawhnak ngeih awkah Jehovah nih thazang a kan pek ti le Job bantuk in kan tonmi hneksaknak kha ri a chiah timi hngalhnak zong nih hna a ngamter.—1 Kor. 10:13.

Satan—Doh Hmangmi Ral le Zumhpialmi

13. Job cauk nih Satan kong zei a dikthliar tiang dah a langhter?

¹³ Satan nih Jehovah a zuamcawhnak le minung lam a pialter hna nak i ningzah awk a rian kong a dikthliar kha Hebru Cathiang nih a chim. Khrihfa Greek Cathiang ah, Satan nih Jehovah a ralchanhnak kong tam deuh in kan hmuh i, Biathlam cauk ah Jehovah nawlngeihnak thianter a si lai nak le Satan a rawh lai nak kong kan hmuh. Job cauk nih Satan dohnak lam kong a kan hngalhter chap. Vancung pumhnak i Satan a phanh tikah aa tinhmi cu Jehovah thangṭhat a si lo. Khuachia cu nahchuah a ngei i aa tinhmi a ṭha lo. Job sual a puh hnu ah Job hneksaknak nawl a hmuh tikah “Bawipa hmaika cun Satan cu a chuak.”—Job 1:12; 2:7.

14. Job cungah Satan nih zei lungput dah a langhter?

¹⁴ Cucaah Job cauk nih Satan cu zaangfahnak a ngei lomi ral a si tiah a langhter. Job 1:6 le 2:1 ah langhtermi vancung pumhnak pahnih kar, chim lomi caan caan khat a luan kar ah Job cu fak piin hneksak a tong. Job cu zumhawktlak a si caah Jehovah nih Satan kha hitin a ti khawh: “Amah cu zei ruang lo ah hrawh awk in na ka canghter cang nain, a tlinnak cu fek tein aa tlaih peng ko.” Asinain Satan nih Job sual a puhmi a palh kha a cohlang lo. Mah canah Job kha voikhat hneksak ṭhan awkah a hal. Cucaah Satan nih Job kha a rum lio zong a sifah lio zongah a hneksak. Satan cu misifak asiloah harnak a tongmi cungah zaangfahnak a ngei lo ti cu a fiang. Zumhfekmi kha a huat hna. (Job 2:3-5) Asinain Job zumhfehnak nih Satan mi lihchim a si kha a langhter.

15. Tuchan zumhpialmi hna cu Satan he zei an i lawhnak dah a um?

¹⁵ Satan cu sermi ah zumhpial hmasa bik a si. Tuchan zumhpialmi hna nih Satan ngeihmi ziaza phun kha an langhter. Bu chung ummi, Khrihfa upa asiloah Uktu Bu pawl sual an kawl hna nak thawngin an lungput cu sivai a ngei lai. Zumhpialmi cheukhat nih Jehovah min hman kha an ralchanh. Jehovah kong cawn asiloah a rian ṭuan kha an lungah a um ti lo. An pa Satan bantuk in an i tinhmi cu zumhfekmi pawl harnak pek a si. (Johan 8:44) Jehovah salle nih anmah he pehtlaihnak an hrial cu khuaruahhar a si lo.—2 Johan 10, 11.

Job Nih Jehovah Min Kha A Hlorh

16. Job nih Jehovah cungah zei lungput a ngeih dah a langhter?

¹⁶ Job nih Jehovah min kha a hman i a thangṭhat. A fale thih thawng nih a lung a kuaiter lio hmanh ah Pathian cu a mawhchiat lo. A sunghralhmi kha Pathian ruangah a si tiah a ruah nain Jehovah min kha a thangṭhat. A hnu i a chimmi phungthluk bia lakah pakhat ah hitin a ti: “Zohhmanh, Pathian ṭih hi fimnak cu a si, Ṭhatlonak hrial hi hngalhthiamnak cu a si.”—Job 28:28.

17. A zumhfehnak hmunhter awkah Job cu zeinihdah a bawmh?

¹⁷ Job cu a zumhfehnak hmunhter awkah zeinihdah a bawmh? Tonchiatnak a ton hlan ah Jehovah he pehtlaihnak ṭha a rak ngei diam cang lai ti cu a fiang ko. Satan nih Jehovah a zuamcawhnak kha Job nih a hngalh ti a langhtermi thil a um lo nain, Job cu zumhfekmi si ding bia a khiak. ‘Ka thih tiangin ka zumhfehnak cu ka ngol bal lai lo’ tiah a ti. (Job 27:5, Nw) Mah pehtlaihnak ṭha kha Job nih zeitindah a ṭhanter? A rualchan hlat Abraham, Isak, Jakob le Pathian an i pehtlaih ning kong a theihmi kha a lungah a um lai ti cu a fiang ko. Cun sermi thil a zoh hnanak thawngin Job nih Jehovah sining tampi a hngalh khawh.—Job 12:7-9, 13, 16 rel.

18. (a) Job nih Jehovah sin aa pumpeknak kha zeitindah a langhter? (b) Job zohchunh awk ṭha kha zei lam in dah kan i zohchunh?

¹⁸ Job kha a cawnmi le a hngalhmi nih Jehovah lungton a duhter. A chungkhar mi pakhatkhat nih Pathian lung an tong sual lai lo asiloah “Pathian kha an volhpamh ko hnga” timi nih khangh thawinak a pekchanhter lengmang. (Job 1:5) A fakmi hneksaknak a ton hmanh ah Job cu Jehovah cungah a ṭhatnak lei in bia a chim peng. (Job 10:12) Zei tluk zohchunhawk ṭha dah a si! Kannih zong Jehovah le aa tinhmi kong a hmaanmi hngalhnak kha hmaan tein kan hlathlai lai. Jehovah he kan i pehtlaihnak a fehtermi hlathlainak, pumhnak, thlacamnak le thawngṭha chimnak ti bantuk tuahsernak ṭha kha kan ngei. Mah lengah Jehovah min hngalhternak kha kan si khawh chungin kan ṭuan. Job zumhfehnak nih Jehovah lung a ton bantuk in tuchan Pathian salle zumhfehnak nih Jehovah lung a lawmhter. Mah kong cu a hnu capar ah kan i ruah lai.

Naa Cinken Maw?

• Satan Khuachia nih zeicah Job cu a lungthin a pek?

• Job nih zei hneksaknak hna dah a in i zeitindah a leh?

• Job bantuk in zumhfehnak hmunhter awkah zei nih dah a kan bawmh lai?

• Job cauk in Satan kong zeidah kan hngalh?

[Cahmai 4nak i hmanthlak]

Job kong nih Pathian i universe nawlngeihnak a biapi bik kongkau kha a kan hngalhter

[Cahmai 6nak i hmanthlak]

Zei bantuk thil sining ah dah na zumhfehnak cu hneksak a si khawh?