Jesuh Khrih A Lianngan Bik Missionary
“Kei cu a sinin a rami [‘aiawhtu,’ NW] ka si i a ka thlahtu cu amah kha a si.”—JOHAN 7:29.
1, 2. Missionary cu zeidah a si, ahodah a lianngan bik Missionary tiah ti khawh a si?
“MISSIONARY” timi bia na theih tikah zeidah na lung ah a hung chuak colh. Cheukhat cu Khrihfaram i thawngṭha chimtu hna kha an lung ah a chuak men lai. Annih cu rian an ṭuannak ram ah nainganzi le sipuazi kongkau ah aa teltummi an si. Asinain Jehovah hngaltu pakhat nih cun vawlei ram kip i thawng ṭha chim awkah Uktu Bu nih thlahmi thawngṭha chimtu pawl kha an mitthlam ah a cuang lai. (Matt. 24:14) Annih cu mi kha Jehovah Pathian naih awk le amah he pehtlaihnak ṭha ngeih awk bawmhnak rian sungah an caan le an thazang aa pemi an si.—Jeim 4:8.
2 “Missionary” timi biafang hi Vawlei Thar Lehnak Baibal ah a um lo. Asinain Efesa 4:11 i thlaihhlei ah “thawngṭha chimtu” tiah lehmi Grik biafang kha “missionary” ti zong in leh khawh a si tiah Fianter chapnak a ummi Baibal nih a ti. Jehovah cu Cungnung Bik Thawngṭha Chimtu a si nain ahohmanh nih thlahmi a si lo caah a lianngan bik Missionary tiah ti khawh a si lo. Vancung a Pa kong kha Jesuh nih hitin a chim: “Kei cu a sinin a rami [‘aiawhtu,’ NW] ka si i a ka thlahtu cu amah kha a si.” (Johan 7:29) Jehovah nih a fapa ngeihchunte vawlei cungah a thlahnak thawngin minung a dawt tuk hringhran hna kha a langhter. (Johan 3:16) Jesuh vawlei cungah thlah a sinak a ruang pakhat cu “biatak kong chim” awk a si caah a lianngan bik le a ṭha bik Missionary tiah ti khawh a si. (Johan 18:37) Thawng ṭha chimnak ah a hlawh a tling i a phungchim rianṭuannak khan atu tiang ṭhatnak kan hmu kho peng rih. Tahchunhnak ah, missionary in thlah kan si zong si lo zongah a cawnpiak ning kha kan hman khawh.
3. Zei biahalnak hna dah kan i ruah lai?
3 Pennak thawng ṭha chimtu Jesuh kong he aa tlaiin a tanglei biahalnak hna hi a chuak: Jesuh nih vawlei cung phung a chim lioah zeidah a ton? Zeicah a phungchimnak cu hmual a ngeih? Zei nih dah a phungchimnak kha hlawh a tlinter?
Pawngkam Thar Ah Lungthawhnak Langhter
4-6. Jesuh cu vawlei ah thlah a si caah zei thlennak hna dah a ton?
4 Pennak kong chim a herh deuhnak hmun ah aa ṭhialmi tuchan missionary pawl le Khrihfa cheukhat cu cuka hmun i nunning niam deuhmi hna nunning he aa tlak in an nung lai. Asinain Jesuh vawlei a nuncan le vancung a nuncan zeitluk in aa dan kha cu ruah khawh a si lo. Vancung ah Jehovah rian lungtak in a ṭuanmi vancungmi hna lakah a Pa he an um ṭi. (Job 1:6; 2:1) Cucu a rawkralmi vawlei ah mi sualmi hna lak i nunnak he a va thleidang dah! (Mar. 7:20-23) Jesuh nih amah he aa naih bikmi a zultu pawl pakhat le pakhat an i zuamnak kha a rak remh hna. (Luka 20:46; 22:24) A si ko, Jesuh nih vawlei cung i a tonmi thil paoh kha a ṭha bik in a rak tonghtham.
5 Jesuh nih minung holh kha cawn loin khuaruahhar in a rak thiammi a si lo, a ngakchiat liote in a rak cawn. Cucu vancungmi lam a hruai hnanak he aa va thleidang dah! Vawlei cung a nun lioah a tlawm bikin “minung holh” phun khat kha a rak hman. Mah cu “van mi holh” he aa dang tuk hringhran. (1 Kor. 13:1) Mi zei hmanh Jesuh tluk in bia dawh a hmang thiammi an um lo.—Luka 4:22.
6 Vawlei cung a rat lioah Pathian Fapa nih a tonmi thlennak dang kong zong ruat rih hmanh. Jesuh cu Adam sinin sualnak ro cu a co lo nain, “a unau hna” asiloah chiti thuhmi a zultu a si hngami hna bantukin minung pakhat a rak si. (Hebru 2:17, 18 rel.) Jesuh nih vawlei cung a nunnak a dongh lai zan ah “vancungmi ralkap bu hleihnih” thlahpiak awkah vancung a Pa kha a hal lo. Asinain Vancungmi Bawi Bik Mikhael in vancungmi hna cungah nawl a ngeih kha ruat ko hmanh! (Matt. 26:53; Judah 9) Jesuh cu vawlei cungah khuaruahhar thil tampi a tuah ko nain vancung i a tuahmi he tahchunh ahcun thil tetuai men a si.
7. Judah mi hna nih Nawlbia kong ah zeitindah an tuah?
7 Jesuh cu minung in a nun hlan ah “Bia” a rak si i Israel mi ram lak an kal lioah lam a hruaitu hna, Pathian Biachimtu a si. (Johan 1:1; Ex. 23:20-23) Asinain Israel mi hna cu ‘Vancungmi nih an pekmi Pathian phungbia a latu an si nain a zul lomi’ an si. (Lam. 7:53; Heb. 2:2, 3) Kum zabu pakhatnak Judah biaknak lam hruaitu hna cu Nawlbia sullam an hngal lo. Tahchunhnak ah Sabbath nawlbia kha ruat tuah hmanh. (Marka 3:4-6 rel.) Phungbia cawnpiaktu saya hna le Farasi mi hna cu “Nawlbia nih biapi taktak a si a timi dinnak le mi zaangfahnak le zumhtlakmi sinak hna cu zeihmanh ah [an] rel ṭung lo.” (Matt. 23:23) Asinain Jesuh nih lung dong lo in biatak kha a rak thanh peng.
8. Jesuh nih zeicah a kan bawmh khawh?
8 Jesuh cu lungthawhnak a ngei. Mi kha a dawt hna i lungtak in bawmh a duh hna. Thawngṭha chim duhnak zong a ngei peng. Jesuh cu vawlei cung a um lioah Jehovah cungah zumhawktlakmi a si caah “amah nawl a ngaimi vialte hna caah zungzal khamhnak hram ah a cang.” Culengah “amah hrimhrim nih khan tukforhnak le temhinnak kha a rak in cang caah tukforhnak a ingmi kha a bawmh khawh hna.”—Heb. 2:18; 5:8, 9.
Cawnpiaktu Pakhat Si Awkah Ṭha Tein Cawnpiak A Si
9, 10. Vawlei ah thlah a si hlan ah Jesuh cu zeitindah cawnpiak a si?
9 Uktu Bu nih tuchan Khrihfa hna kha missionary in thlah an si hlan ah ṭha tein a cawnpiak hna. Jesuh tah cawnpiak a si maw? A rak si ve. Asinain Messiah in rian pek a si hlan ah rabbi sianginn a rak kai lo lengah min thangmi biaknak lamhruaitu pawl sin zongah a cawng lo. (Lam. 22:3 he tahchunh; Johan 7:15 .) Cu a si ahcun Jesuh cu zeicah cawnpiak a thiam tuk?
10 A nu Mary le fa in a cawmtu Josef nih Jesuh kha zei an va cawnpiak hmanh ah a phungchimnak rian caah a bikin a cawnpiaktu cu cungnung bik Jehovah a si. Cu he aa tlaiin Jesuh nih hitin a chim: “Keimah nawl in ka chim lo, ka chimmi cu a ka thlahtu ka Pa nih na chim lai tiah a ka fialmi kha an si.” (Johan 12:49) Fapa cu zeidah cawnpiak ding timi kongah lamhruainak a dikthliar in a hmuh kha hngal. Vawlei cung a rat hlan ah a Pa cawnpiaknak kha ṭha tein a ngaih lai ti cu a fiang ko. Cu nakin a ṭha deuhmi cawnpiaknak a um ti lai maw?
11. Minung cung i a Pa lungput kha Jesuh nih zeitluk in dah a langhter?
11 Jesuh cu ser a si hram thawk in a Pa he pehtlaihnak ṭha a ngei. Minung a si hlan ah a Pa le minung an i pehtlaihnak a zohnak thawngin minung cung i Pathian lungput kha a hngalh. Jesuh nih mi kha Pathian nih a dawt hna bantukin a dawt ve hna. Cucaah fimnak tiah ti a simi Jesuh nih “kaa nuamhnak cu minung hna chungah khan a si” tiah a ti.—Ptb. 8:22, 31.
12, 13. (a) Israel miphun le a Pa an i pehtlaihnak zohnak in Jesuh nih zeidah a hngalh? (b) Jesuh nih cawnpiak a simi kha zeitindah a hman?
12 A Pa nih a harmi thil sining zeitin a tonghtham zohnak zong in Fapa cu cawnpiak a si. Tahchunhnak ah, nawl a ngai lomi Israel mi hna le Jehovah pehtlaihnak hi ruat hmanh. Nehemiah 9:28 nih hitin a ti: “Dinhnak an hmuh tikah na hmai ah ṭhatlonak an tuah ṭhan i an ral hna kut chungah khan na kaltak hna i cucaah annih nih an uk hna; asinain an i mer i nangmah kha an in auh tikah nangmah nih vancung khin na run theih hna i na zaangfahnak thawngin voi tampi na chuah hna.” Jesuh cu Jehovah he rian an ṭuan ṭinak le a zohnak thawngin a umnak hmun i mi hna cungah cu bantuk zawnruahnak a langhter.—Johan 5:19.
13 Jesuh nih a zultu pawl kha zawnruahnak ngei in a pehtlaihnak hna thawngin a cawnmi kha a hman. A thih lai zan ah a dawt tukmi a zultu pawl nih “an zamtak.” (Matt. 26:56; Johan 13:1) Lamkaltu Piter nih Khrih kha voi thum tiang a rak hlawt! Asinain lamkaltu pawl kha a sin ra ṭhan ding in lungtho tein a rak sawm hna. Piter kha hitin a ti: “Na zumhnak a pur nakhnga lo nangmah caah thla ka cam. Cun keimah lei ah na hon i mer ṭhan tikah na unaule kha thazang na pek ve hna lai.” (Luka 22:32) Thlarau Israel kha “lamkaltu hna le profet hna” cungah hlawh tlingte in dirh a si i Jerusalem khua thar ralhau hrampi ah Tuufa Jesuh Khrih ta a simi zumhawktlak lamkaltu 12 min aa ṭial. Atu tiang chiti thuhmi Khrihfa hna le an hawile a simi aa pumpe cangmi “tuudang” cu a liannganmi Pathian kut le a dawtmi a Fapa lam hruainak tangah thawngṭha a chimmi bu in an ṭhangcho.—Efe. 2:20; Johan 10:16; Biat. 21:14.
Jesuh Cawnpiak Ning
14, 15. Jesuh cawnpiak ning cu phungbia cawnpiaktu le Farasi pawl cawnpiak ning he zeitindah aa dan?
14 Jesuh nih cawnpiak a simi kha a zultu pawl a cawnpiak chin tik hna ah zeitindah a rak hman? Jesuh cawnpiak ning kha Judah biaknak lamhruaitu pawl cawnpiak ning he tahchunh tikah a let tampi in a ṭhat deuh kha fiangte in hmuh khawh a si. Phungbia cawnpiaktu hna le Farasi pawl cu “Pathian bia zei ah an rel lo i an mah cawnpiak ning lawng zulh an duh.” Jesuh tu cu amah duhning in chim lo in Pathian Bia lawng a cawnpiak zungzal hna. (Matt. 15:6; Johan 14:10) Kannih zong cuticun tuah ding a si.
15 Jesuh cu Judah biaknak lam hruaitu hna he aa dannak a kong dang a um rih. Phungbia cawnpiaktu hna le Farasi pawl kongah hitin a chim: “An in chimhmi hna paoh cu nan ngaih le nan zulh a herh. Asinain anmah nawl bel i cawn hlah u, zeicahtiah an chimmi kha an tuah lo.” (Matt. 23:3) Jesuh cu a chimning in a tuah. Mah kha a hmaan a langhtermi tahchunhnak pakhat zoh u sih.
16. Jesuh cu Matthai 6:19-21 bia he aa tlak in a nung tiah zeicah chim khawh a si?
16 Jesuh nih a zultu pawl kha “vancung khua tu ah khin nan chaw cu va khong u” tiah a forh hna. (Matthai 6:19-21 rel.) Cuti a forh hna ningin Jesuh tah a tuah maw? A tuah taktak, zeicahtiah “Cenghngia nih kua an ngei i vate nih bu an ngei, sihmanhsehlaw Mi Fapa hi cu riahnak hmun hmanh ka ngei lo” tiah a kong kha amah theng nih a chim. (Luka 9:58) Phungchimnak rian lawngah a lungthin a chiah i sawhsawh tein a nung. Vawlei chawva khonnak ruangah a chuakmi lungre theihnak ngeih lo timi zeidah a si kha a langhter. “Rungrul le cirik nih an ei khawh lonak le mifir nih an baoh i an fir khawh lonak” vancung khua ah chaw khon zei tlukin a ṭhat kha a langhter. Vancung ah nan chaw khong u timi Jesuh forhnak hi na zul maw?
Lungthin a Lami Duhnungmi Jesuh Sining Hna
17. Zei a sining nih dah Jesuh cu aa thleidangmi thawngṭha chimtu a siter?
17 Zei sining hna nih dah Jesuh cu aa thleidangmi thawngṭha chimtu a siter? Pakhat cu a bawmhmi hna cung i a ngeihmi a lungput a si. Toidornak, dawtnak le zawnruahnak tibantuk Jehovah ngeihmi sining ṭha hna kha Jesuh nih aa cawn. Cu sining hna nih Jesuh sinah zeitindah mi lungthin a lak kha philhhlah.
18. Jesuh cu toidormi a si tiah zeicah ti khawh a si?
18 Jesuh nih vawlei cung rat ding rian kha a cohlan caah “amah lungtho tein cu vialte cu a hlawt dih hna i sal sinak tu kha aa lak. Minung bantuk ah a cang i minung mui in a lang.” (Fil. 2:7) Mah cu toidornak tuahsernak a si. Culengah Jesuh nih mi kha a zohchuk bal hna lo. ‘Vancung in a rami ka si caah ka bia nan ngaih lai’ timi lungput a ngei lo. Messiah ka si aa timi Messiah deu pawl he i lo lo in Messiah taktak a sinak ah aa porhlaw lo. A caancaan ah mi zei a si le zeidah a tuah kha midang chimh lo awkah mi kha a thlauh hna. (Matt. 12:15-21) Anmah theng hmuhmi kha zoh in a hnu zulh awkah biakhiahnak tuahter a duh hna. Vancung a hawikom a tlingmi vanmi hna bantuk si awkah a zultu pawl sinin aa ruahchan lo caah zei tluk in dah an i lawmh lai!
19, 20. Dawtnak le zaangfahnak nih mi bawmh awkah Jesuh kha zeitindah a bawmh?
19 Jesuh Khrih nih vancung a Pa sining lakah a lang bikmi dawtnak zong a langhter. (1 Johan 4:8) Jesuh nih mibu kha dawtnak in a cawnpiak hna. Tahchunhnak ah, mirum tlangval pa cung i a lungput kha zoh u sih. (Marka 10:17-22 rel.) A cungah Jesuh cu “dawtnak lungthin” a ngei i bawmh a duh ko nain Khrih zulh awkah a thilri kha a hlaw siang lo.
20 Jesuh i duhnungmi a sining pakhat cu zawnruahnak a si. A tlinglomi mi vialte bantukin a cawnpiaknak a ngaimi hna cu harnak nih a nenh ve hna. Khakha a theih caah zawnruahnak le zaangfahnak in a cawnpiak hna. Tahchunhnak ah, voikhat cu Jesuh le lamkaltu hna cu einak caan ngei lo tiangin an rian a tam. Asinain mibu an i pumh a hmuh tikah Jesuh nih zeidah a tuah? “A zaang an fak ngaingai, zeicahtiah khaltu a ngei lomi tuu bantuk kha an si. Cucaah thil tampi a cawnpiak hna.” (Mar. 6:34) A umnak hmun i a ummi hna zaangfah awktlak an sining kha a hmuh tikah a cawnpiak hna i an caah khuaruahhar thil a tuahpiak hna. Mi a cheu cu a sining nih, a cheu cu a bia nih an lungthin a lak hna i zultu an hung si.
21. A hnu capar ah zei kong dah kan i ruah hna lai?
21 Vawlei cung Jesuh a rianṭuannak kong cawn awk tampi a um rih kha a hnu capar nih a fianter lai. A lianngan bik Missionary Jesuh Khrih kha a dang zei lam in dah kan i cawn khawh?
Zeitindah Na Leh Lai?
• Jesuh vawlei cung a rat hlan ah zei cawnnak dah a rak hmuh?
• Jesuh cawnpiak ning cu phungbia cawnpiaktu le Farasimi hna cawnpiak ning nakin zeitindah a ṭhat deuh?
• Jesuh i duhnungmi zei a sining hna nih dah mi kha an lungthin a lak hna?
[Cahmai 15nak i hmanthlak]
Mibu kha Jesuh nih zeitindah a cawnpiak hna?