“Nan Caah I Zohchunh Awk Kan Tuahpiak Cang Hna”
“Nannih cu saya hmanh si awk nan si cang.”—HEBRU 5:12.
1. Hebru 5:12 bia hna nih Khrihfa pakhat kha zeiruang ahdah thinphannak zeimaw tal a hun ngeihter khawh men?
KAN CHERHCHANMI, thawchuahhnawhmi Baibal cang bia na hun rel tikah, nangmah theng he aa tlaiin na thin a hun phang pah maw? Cutin a si ahcun, nangmah pakhat lawnglawng na si lo. Khrih a zultu hna in, cawnpiaktu kan si awk a si ti kha kan hngalh. (Matthai 28:19, 20) Atu kan nunnak caan cu kan si khawh chungin mi kha cawnpiak awkah a biapitukmi caan a si ti kha kan hngalh. Cun kan cawnpiaknak nih hin kan cawnpiakmi hna sinah nunnak-asiloah-thihnak hmanh kha a chuahter khawh ti kan hngalh! (1 Timote 4:16) Kanmah le kanmah kha aa tlak ngai in hitin kan i hal kho: ‘Ka si awktlak a simi saya cu ka si maw? Zeitindah ka ṭhancho khawh lai?’
2, 3. (a) A ṭhami cawnpiaknak i a hrampi kong he aa tlai in saya pakhat nih zeitindah a rak fianter? (b) Jesuh nih cawnpiaknak kongah kan zulh awkhnga lam zeidah a kan chiahpiak?
2 Cubantuk thinphannak hna nih kan tha a kan chiatter awk a si lo. Cawnpiaknak kha a ṭha khunmi fimthiamnak cheukhat ti lawng lawngin kan ruah a si ahcun, ṭhancho awkah a hartukmi a si tiah kan ruah kho men. Asinain, a ṭhami cawnpiaknak hrampi cu fimthiamnak ngeih kha a si lo i mah nakin a biapi deuhmi kha a si. Hmuhtonnak a ngeimi saya pakhat nih cauk pakhat ah hi kong a rak ṭialmi hi ruat hmanh: “Cawnpiaknak ṭha timi cu a hlei in fimthiamnak hna asiloah um ningcang hna, timhtuah ningcang asiloah tuahsernak cungah khan aa hngatmi a si lo. . . . Cawnpiaknak cu a hrampi in dawtnak he aa tlaimi a si.” Vawlei lei rian i saya a ṭuanmi pakhat kong kha a chimduhmi a si cu a hmaan ko. Asinain, a chimmi bia cu Khrihfa hna in kan ṭuanmi phungchimnak rian he aa tlai deuh kho men. Zeitindah?
3 Cawnpiaktu pakhat in kan i zohchunh awk cu “Nan caah i zohchunh awk kan chiahpiak cang hna,” tiah a zultu hna sinah a rak titu, Jesuh Khrih ti lo cun a dang a um lo. (Johan 13:15) Toidawrnak langhternak kha i zohchunh awkah a sawhduh hnawhchanmi a si ko nain, vawlei cungah mi pakhat in a rak um lioah Jesuh nih kan caah a kan chiahpiak takmi i zohchunh awk hna ah a biapi bikmi a rian—Pathian Pennak kong thawngṭha mi sinah va cawnpiaknak kha aa tel. (Luka 4:43) Atu ah, Jesuh a phungchim rianṭuannak kong kha fianter awkah biafang pakhat na thim a si ahcun, “dawtnak” timi biafang kha na thim ko lai, a si ko lo maw? (Kolose 1:15; 1 Johan 4:8) Vancung a pa, Jehovah sinah a ngeihmi Jesuh dawtnak cu a sangbikmi a si. (Johan 14:31) Asinain, cawnpiaktu pakhat in Jesuh nih dawtnak kong kha lam pahnih in a rak langhter. A rak cawnpiakmi hna biatak kha a rak duh i, a rak cawnpiakmi minung hna zong kha a rak dawt hna. Kan caah a kan chiahtak piakmi kan zulh awk hnga lam pahnih hi fiang deuhin kan zoh hna hmanh lai.
Caan Saupi Lio In A Rak Ngeihmi Pathian Biatak Cungah Duhnak
4. Jesuh nih Jehovah cawnpiaknak duhnak kha zeitindah a rak ṭhancho ter?
4 A cawnpiakmi hna a kong cung i cawnpiaktu nih a ngeihmi a lungputning nih a cawnpiaknak cungah a hmual a ngeihter ngai. Zeihmanh lungthawhnak a ngeih lonak kha a langhter a si ahcun mah kha a siangngakchia sinah a phan kho ve. Jesuh tu cu a rak cawnpiakmi hna a man a sungmi biaktak a simi Jehovah le A Pennak kong ah khan lungthawhnak a rak ngei. Jesuh nih a rak cawnpiakmi hna kong cungah duhnak a rak ngei taktak. Cawnpiak a rak si ve lio in mah duhnak kha a rak ngei cang. Minung in a rat hlan chung pumpi ah khan, Pathian Fapa ngeihchunh cu duhnak taktak he a rak cawngmi pakhat a si. Isaiah 50:4, 5 ah aa tlak ngaimi hi bia hna hi ṭial a si: “BAWIPA nih chim awk a ka cawnpiak caah tha a bami kha thazang ka pek khawh hna. Zing fate in a ka cawnpiak ding theih kha, a ka ngangngan ter. BAWIPA nih hngalhthiamnak a ka pek caah amah cu ka do lo i ka pialtak fawn lo.”
5, 6. (a) Jesuh nih tipil a rak in lioah khan zeidah a rak ton, mah nih khan a cungah zei thil dah a rak chuahter? (b) Pathian Bia hmannak kong he aa tlai in Jesuh le Satan an i dannak zeidah kan hmuh?
5 Vawlei cungah minung in a ṭhan lioah, Jesuh nih Pathian fimnak kha a rak duh peng ko. (Luka 2:52) Cuticun, tipil a rak in lioah khan, ahohmanh nih an ton bal lomi hmuhtonnak pakhat a rak ton. Luka 3:21 nih, “van cu aa hung” tiah a ti. Mah lioah khan Jesuh nih minung a rak si hlan i a nunnak kha hun hngalh ṭhandawh a si. Mah hnu ah ram car chungah ni 40 chung rawl a rak ulh. Vancung a rak um lioah Jehovah sinin a rak hmuhmi cawnpiaknak tampi kha fakpi in a rak ruah ṭhannak ah aa lawm ngaingai ko lai. Asinain, caan sau a rauh hlan ah, Pathian biatak a duhnak cu hneksak a rak si.
6 Jesuh cu a tha a dih i a rawl a ṭam lioah khan, Satan nih tukforh awkah a rak i zuam. Hi Pathian fapa pahnih hna cu an va i dang thiam dah! An pahnih in Hebru Baibal cang kha la in an chim veve—sihmanhsehlaw an lungput cu aa ralkah taktak. Satan cu Pathian Bia kha zei rel lo ngaiin amah pumpak ṭhatnak caah khan hmang in a duhnak lei ah a rak koih. Angai tein, hi midotupa nih hin Pathian biatak nautat lawnglawng kha a rak thiam. Sihmanhsehlaw, Jesuh nih a lehnak kipah ralring tein Pathian Bia kha hmangin, duhnak taktak he Baibal cang hna kha a rak lak i a chim. Mah thawchuahhnawhmi bia hna an rak ṭial hmasabik hlan hmanh khan Jesuh cu a rak um cang ko nain, mah bia hna kha a rak upat. Hi hna cu vancung a Pa sinin a rami a man a sungmi biatak an si! Jehovah sinin a rami cubantuk bia hna cu rawl nakin an biapi deuh ti kha Satan kha a chimh. (Matthai 4:1-11) A si, Jehovah nih a rak cawnpiakmi biatak paohpaoh kha Jesuh nih a rak duh dih. Asinain, cawnpiaktu pakhat in mah a duhnak kha zeitindah a rak langhter?
A Rak Cawnpiakmi Hna Biatak A Rak Duhnak
7. Jesuh nih amah pumpak cawnpiaknak hna kha zeiruang ahdah a thar in a rak phuahchawm lo?
7 Jesuh nih a rak cawnpiakmi hna biatak a duhnak cu a zungzal in a rak lang. Amah a ruahnak kha karhter duh seh law cu fawi tein a rak tuah khawh ko. Hngalhnak le fimnak tampi a rak ngeimi a si. (Kolose 2:3) Asinain, a bia a ngaimi hna kha a rak cawnpiakmi hna hi amah sinin a hram aa thawkmi a si lo, vancung a Pa sinin aa thawkmi a si ti kha atu le atu ralrin a rak pek hna. (Johan 7:16; 8:28; 12:49; 14:10) Pathian biatak kha a rak duh tuk hringhrin i amah a ruahnak in a rak rolh lo.
8. A phungchim rian ṭuan hram aa rak i thawk lioah, Jesuh nih Pathian Bia i bochannak ah zohchunh awk kha zeitindah a rak chiahtak?
8 Jesuh nih mi zapi sinah phungchim hram aa rak i thawk lioah, zulh awk lam kha a rak chiahtak. Amah cu bia rak kammi Messiah a si ti kha Pathian mi hna sinah a rak thanh hmasabik ning kha ruat hmanh. Mibupi hmai ah rak chuah in, amah le amah kha Khrih tiah i chim in, a chimmi kha a hmaan ti langhternak ah zoh a nuam ngaimi khuaruahharnak pipi kha a rak tuah maw? Cutin a rak tuah lo. Pumhnak inn, Pathian a mi hna nih Cathiang an rel tawnnak hmun ah khan a rak kal. Mahka ah Isaiah 61:1, 2 chimchungbia kha aw thangpi in a rak rel i kha chimchungmi bia le amah aa pehtlaihning kha a rak fianter. (Luka 4:16-22) Khuaruahharnak a rak tuahmi tampi nih Jehovah nih a rak bawmh ti kha an langhter. Asinain, a cawnpiaknak cu Pathian Bia cungah aa hngat zungzal.
9. Farasimi hna he aa pehtlaihnak ah, Jesuh nih Pathian Bia zumh awk tlak tein a duhnak kha zeitindah a rak langhter?
9 Biaknak lei ralchanhtu hna nih Jesuh cu an rak zuam lioah khan, bia i alnak ah hin amah nih fawi tuk in a tei khawh ko hna nain, a fimthiamnak in tei aa rak i zuam lo. Mah nakin, Pathian bia in a rak leh hna. Tahchunhnak ah, Jesuh a zultu hna nih leikuang kha an tan pah in facang zi an zun i an bar pahmi kha Sabbath an ul lo tiah Farasi mi hna nih sual an rak phawt hna lio kha ruat ṭhan hmanh. Jesuh nih hitin a rak leh hna: “David le a mi hna cu an rawl a ṭam tikah khan, David nih zeidah a rak tuah, ti kha nan rel bal lo dahra?” (Matthai 12:1-5) Anmah le anmah miding tiah aa hmumi hna nih kha thawchuahhnawhmi 1 Samuel 21:1-6 i aa ṭialmi kha an rak rel bal hrimhrim lai ti cu a fiang ko. An rak rel bal a si ahcun, mah chung i a ummi a biapimi cawnpiaknak pakhat kha an rak hngalthiam lo. Asinain, Jesuh nih cun a kong kha a rel lawngin a rel menmen hna lo. Mahkha kha a rak ruah ṭhan hna i a lungthin chung taktak ah a rak khumh hna. Mah Baibal cang hna hmangin Jehovah nih a rak cawnpiakmi hna phunglam kha a rak duh taktak hna. Cucaah mah a kong kha le Moses Nawlbia in tahchunhnak pakhat kha a rak hman i Nawlbia i aa tlari a ngeihnak kha a rak langhter. Mah he aa lo in, zumhawktlak tein kha Pathian Bia a duhnak nih khan biaknak lei lamhruaitu hna i Pathian bia anmah ṭhathnemnak ca lei ah mernak asiloah minung phunglam nawncek tangah phum awkah an i zuamnak hna in khan kilven awkah a rak forh.
10. A cawnpiaknak a thiamning he aa tlai in zeitindah Jesuh nih chimchungbia kha a rak tlinter?
10 Jesuh cu a rak cawnpiakmi hna biatak a rak duhnak nih khan mi a normi phun in asiloah seh (mechanical) rianṭuan phun in zeitikhmanh ah cawnpiaknak a tuahter lo. Thawchuahnawhmi chimchungbia nih Messiah cu ‘biachim a thiam ngaingaimi’ a si lai, “bia thlumthlum” kha a hman lai tiah a rak chimchung. (Salm 45:2; Genesis 49:21, NW) Jesuh nih a rak duh ngaimi biatak kha “bia dawh dawh” in a rak cawnpiak hna tikah a thanhmi thawng ṭha cu theih nuam le a fiangmi a siternak thawngin mah chimchungbia kha a rak tlinter. (Luka 4:22) A tha a nuamhnak kha a muihmai aa panh ningah le a chimmi biatak cung i lungthawhnak a ngeihning kha a mit au ah a lang lai ti cu a fiang ko. A chimmi ngaih cu zeitluk indah a rak nuamh hnga i, kan cawnmi kong he aa tlai in midang sinah kan chim ṭhan tikah mah kha zulh awkah zeitluk ṭha dah a si!
11. Zeiruang ahdah saya pakhat in Jesuh nih thiamnak a ngeihmi nih khan amah kha zeitik hmanhah a rak porhlawtter lo?
11 Jesuh nih hin Pathian biatak hna kha a rak hngalh cikcek i duhnung ngaiin a rak chim thiam ruangah khan aa rak i uangthlar maw? Hi cu minung cawnpiaktu hna sinah a cang tawnmi a si. Asinain, Jesuh tu cu Pathian ṭihzahnak a langhtermi lam ah mifim pakhat a si kha philh hlah. Cubantuk fimnak nih ruamkainak kha a awnh lo, zeitintiah “tangdornak a ngeimi hna sinah fimnak cu a um.” (Phungthlukbia 11:2 NW) Jesuh kha a porhlawtter lomi le a ruam a kaiter lomi adang pakhat a um rih.
Jesuh Nih A Rak Cawnpiakmi Minung Hna kha A Rak Dawt Hna
12. A zultu hna nih hin amah an ṭihmi kha a rak duh lo tikha Jesuh nih zeitindah a rak langhter?
12 Jesuh nih mi cungah dawtnak taktak a ngeihnak kha a cawnpiaknak ah a rak langhter zungzal. Minung cawnpiaktu saya hna he i lo lo in, a cawnpiaknak nih zeitikhmanh ah mi kha ṭihphang in a rak umter bal hna lo. (Phungchimtu 8:9) Jesuh nih a rak tuahmi khuaruahharnak pakhat kha a hmuh hnu ah, Piter cu a khuaruah a rak har tuk i, Jesuh a ke tangah a rak bawk. Sihmanhsehlaw Jesuh nih a zultu hna nih an ṭihtukmi kha a rak duh lo. Zangfahnak he, “Na thinphang hlah” tiah a ti i Piter nih a hun ṭuan laimi lungthawh awk ngai a simi zultu si ternak rian kong kha a rak chimh. (Luka 5:8-10) A zultu hna nih an lamhruaitu kha an ṭih caah si lo in, Pathian he aa tlaimi a man a sungmi biatak hna an duhnak tu nih khan forh hna seh ti kha Jesuh nih a duh.
13, 14. Jesuh nih mi cungah zawnruahnak kha zeitindah a rak langhter?
13 Jesuh nih a rak cawnpiakmi hna cung i dawtnak a ngeihnak cu an zawn a rak ruah hnanak zongah a lang. “Mizapi kha a hmuh hna tikah, khaltu a ngei lomi tuu bantuk in lung rethei le awlok chong in an um kha a hmuh hna caah a zaang an fak ngaingai.” (Matthai 9:36) Zangfah awktlak an sinak kha a rak hmuhthiam piak hna i anmah kha bawmh a rak duh hna.
14 Jesuh a mi zawnruahnak a kong dang pakhat hi zoh hmanh. Thichuak zawtnak a ngeimi nu nih mibu lakin amah kha a hun naih i a puantlang kha a hun tongh tikah, khuaruahhar awktlak ngai in a mah cu a rak dam taktak ko. Jesuh nih a sinin a ṭhawnnak a chuah kha aa theih nain, ahodah damtermi cu a si ti kha a rak hngal lo. Minu kha kawl awkah aa zuamchih. Zeiruang ahdah? Minu nih a thin a rak phan bantuk tein, Nawlbia asiloah Farasimi hna le phungbia cawnpiaktu hna i an phung kha a buar ruangah amah kha mawhchiat awkah a si lo. Mah nakin, minu sinah hitin a rak ti: “Ka fanu, na zumhnak nih an damter cang. Dai tein va kal law na zawtnak cun va dam ko cang.” (Marka 5:25-34) Khabia hna ah khan zangfahnak aa telning kha ruat hmanh. “Va dam cang,” ti men in a rak ti lo. Mah nakin, hitin a rak ti: ‘A zual ngaimi na zawtnak cun va dam ko cang.’ Hi ka ah a cafang ningin “hremnak,” tiah a sullam a ngeimi bia kha Marka nih a hman, hremnak caah fung kha an rak hman tawn. Cuticun, minu cu a zawtnak nih a zual ngaimi pum nganfahnak le lungthin lei fahnak zong kha a intuar lai ti kha Jesuh nih a rak hngalhthiam piak. Minu kha a zawn a rak ruah.
15, 16. Jesuh nih phungchim rian a rak ṭuan lioah, zei bantuk a cangmi hna konglam hna nih dah mi kha an ṭhatnak lawng a rak zoh piakhna ti kha an rak langhter?
15 An ṭhatnak kawlnak thawng zongin Jesuh nih mi cungah dawtnak kha a rak langhter. A hnu ah lamkaltu a hung simi, Nathanael he an i ton lioah zeidah a rak cang ti kha ruat hmanh. “Jesuh nih cun Nathanael cu amah lei i a rat kha a rak hmuh i, ‘Israelmi taktak a simi khi zoh hmanh u; amah khi hlenthawinak lungthin zeihmanh a ngei lomi a si,’ tiah a ti.” Khuaruahhar awk tlak in, Jesuh nih Nathanael a lungthin chunglei kha a rak zoh, mah in khan a kong tampi kha a rak hngalh khawh. Angai tein, Nathanael cu mitling a rak si lo. Kanmah bantuk in, palhnak a rak ngeimi a si ve. A ngai tein, Jesuh kong kha a rak theih tikah, hlangkaro in hitin a rak chim: “Nazareth khua cun thil ṭha zeital a chuak kho hnga maw?” (Johan 1:45-51) Asinain, Nathanael kong a chim khawhmi vialte lak ah khan, Jesuh nih a hmuhpiakmi a ṭhatnak a simi, a dinfelnak kha chim awkah a rak i thim.
16 Cubantuk in, ralbawi pakhat a simi—Jentailmi pakhat, Rommi si dawh a simi—nih khan a rak naih i a zawmi a salpa kha damhpiak awkah a rak nawl lio ah khan, Jesuh nih ralkap pa nih palhnak a ngei ti kha a rak hngalh ko. Mah chan lio i ralbawi pakhat nih cun puarhrannak, thisen luanhnak, le a hmaan lomi biaknak ah aa tel ko lai. Asinain, Jesuh nih a ṭhatnak kha a rak zoh piak i—mipa i a lang ngaimi a zumhnak kha a rak hmuh piak. (Matthai 8:5-13) A hnu ah, Jesuh nih amah a pawng i an thlai ṭimi pa sualnak a tuahmi he bia an i ruah tikah khan, a luan ciami a palhnak ruangah mipa kha sual rak phawt loin hmailei ruahchannak he tu tha a rak pek. (Luka 23:43) Midang an ṭhatlonak le an palhnak lawng hmuhnak nih anmah caah thachiatnak lawnglawng a siter lai ti kha Jesuh nih ṭha tein a rak hngalh. Midang an ṭhatnak lei kap kha hmuhpiak awkah aa zuamnak nih ṭhatnak kha tuah deuh awkah tha a rak pek ngaingai hna lai ti cu a fiang ko.
Mi Ca Rianṭuanpiak Duhnak
17, 18. Vawlei cungah rat in rianpek a sinak a cohlannak ah, zeitindah Jesuh nih midang rianṭuan piak duhnak kha a rak langhter?
17 A rak cawnpiakmi hna cungah Jesuh dawtnak a langhnak adang pakhat cu an caah rianṭuanpiak a rak duhnak kha a si. Minung in a rak nun hlanah, Pathian Fapa nih minung cungah a zungzal in dawtnak a rak ngei cang. (Phungthlukbia 8:30, 31) Jehovah a Bia, asiloah a biachimtu in, minung he aa rak i pehtlaihnak ah khan aa rak i lawm ngai ko lai. (Johan 1:1) Asinain, vancung i a sunglawimi a sining kha kaltak in, “amah lungtho tein cu vialte cu a hlawt dih hna i sal sinak tu kha aa lak,” mi cu minung kha hmaitonh tein cawnpiak awkah a si. (Filipi 2:7; 2 Korin 8:9) Vawlei cung a rak um lioah, Jesuh nih amah kha conghkhalh ding le a rian kha ṭuanpiak dingah a rak i ruahchan lo. Mah he aa ralchanh in, hitin a rak ti: “Cuti cun pei Mi Fapa hi a si cu, rian ṭuan piak dingah ka rat ṭung lo, mi tampi an rian ṭuan piak awk le annih tlanhnak ca i ka nunnak pek awkah pei ka rat cu.” (Matthai 20:28) Cu a bia ningte cun Jesuh cu a rak nung taktak.
18 Jesuh nih a rak cawnpiakmi minung hna i an herhnak kha zeihmanh cawngornak um lo in an caah toidawr tein a rak ṭuan piak hna. Biakammi ram ah a ke in meng a za in a rak tlawng i, a si khawh chungin mi tampi sinah phung kha a rak chim. Aa porhlaw ngaimi Farasimi hna le phungbia cawnpiaktu saya hna bantuk kha si lo in, amah cu mi toidawr a si i mi nih naih khawhmi a rak si. Mi phun zakip—hmaizah awk tlak a simi hna, ralkap hna, phungbia thiam hna, nu hna, ngakchia hna, mi sifak, mi damlo, mi bupi nih an hlawtmi hna tiang khan—amah kha lungtho tein, ṭihnak ngei lo in an rak naih ngam. Jesuh cu mitling si ko hmanh sehlaw minung in a rak nungmi a si i a tha a ba kho i a rawl a ṭam kho ve. A tha a rak ba asiloah i dinh a rak herh caan ah asiloah thlacam awkah hmunking i um a rak duh hmanhah khan amah a herhnak nakin midang herhbaunak tu kha hmasa deuhah a rak chiah.—Marka 1:35-39.
19. A zultu hna he a rak i pehtlaihnak ah toidawrnak, lungsaunak, le zangfahnak a langhtermi nunning kha i zohchunh awkah Jesuh nih zeitin dah a rak chiah tak?
19 Jesuh nih amah a zultu hna an rian zong kha cu bantuk tein ṭuanpiak duhnak a rak ngei ve. Zangfahnak le lungsaunak in a rak cawnpiak hna nak thawngin cuti cun a rak tuah. A biapimi cawnpiaknak cheukhat hna kha an hun theihthiam colh lo tikah, a lung a rak dong lo, a thin a rak hung lo, asiloah a rak mawhchiat hna lo. An hngalhthiam nakhnga lamdang a thar kha hman awkah aa zuam. Tahchunhnak ah, atu le atu a zultu hna cu an lakah a hodah a nganbik tiah an i al tawnmi kha ruat hmanh. Amah an thah hlan zan tiang, pakhat le pakhat karah toidawrnak he i pehtlaihning kha rak cawnpiak hna awkah atu le atu, adang lam thar kha a rak kawl. Hi toidawrnak kong zongah, adang thil hna dihlak lio bantuk khan, Jesuh nih hitin a ti khawh taktak ve: “Nan caah i zohchunh awk kan tuahpiak cang hna.”—Johan 13:5-15; Matthai 20:25; Marka 9:34-37.
20. Zeibantuk cawnpiakning nih dah Jesuh kha Farasimi hna he a danter i, mah cawnpiakning cu zeiruang ah hmual a ngeih?
20 Jesuh nih zulh awk lam cu zeidah a si ti kha a chimh menmen in a rak chim hna lo; ‘zulh awk lam kha a rak chiahtak.’ Tahchunhnak hmangin a rak cawnpiak hna. A rak chimhmi hna tuah awkah an sinah khan amah le amah kha sang ngai in i ruat in, anmah kha cu namneh in a rak chim hna lo. Mah cu Farasimi hna phung a rak si. “An chimmi kha an tuah lo,” tiah Jeuh nih an kong kha a rak chim. (Matthai 23:3) Jesuh nih a siangngakchia hna sinah a rak cawnpiakmi hna cu zeidah an si taktak ti kha amah theng nih a zulhnak, a tuah taktaknak thawngin toidawr ngai in a rak langhter. Cucaah pumsa thilri kha biapi ah chia lo in a fawinak in nunnak (simple life) in nun awkah a zultu hna kha a rak forh hna lioah, a chim duhmi kha hngalthiam piak setsai lo in an rak um lo. Hi bia hna cu a hmaan taktak ti kha an rak hmuh khawh ko: “Cenghngia nih cun kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo.” (Matthai 8:20) Jesuh nih an zulh awk hnga lam kha toidawr tein a rak chiahtaknak thawngin a zultu hna an rian kha a rak ṭuan.
21. A hun changmi capar ah zei kongdah kan i ruah hna lai?
21 Vawlei cung i a nung balmi vialte lakah Jesuh cu a liannganbikmi Saya a si ti cu a fiang ko! Amah a hmumi le a bia a theimi thinlung ṭha a ngeimi vialte nih a rak cawnpiakmi hna biatak le a rak cawnpiakmi minung a rak dawtnak hna cu an hngalh. Jesuh nih a rak chiahtakmi lam kha nihin ah a cawng a zulmi kanmah ca zongah hi cu fiang tuk in kan hmuh khawh ve. Asinain, a tlingmi Khrih a nunning cu zeitindah kan zulh khawh lai? Mah biahalnak kha a hun zulmi capar nih a kan ruahte lai.
Zeitindah Na Leh Lai?
• A ṭhami cawnpiaknak a hrampi cu zeidah a si, mah kha i zohchun awkah aho nihdah a langhter?
• Jesuh nih a rak cawnpiakmi hna biatak cungah duhnak a ngeihnak kha zeitindah a rak langhter?
• Jesuh nih a rak cawnpiakmi minung hna cungah dawtnak a ngeihnak kha zeitindah a rak langhter?
• Jesuh nih a rak cawnpiakmi hna an rian kha toidawr tein ṭuan piak a duh hna nak kha zeibantuk tahchunhnak hna nih dah an langhter?
[Cahmai 18nak i Hmanthlak]