“Ra Law Ka Zul”

“Ahohmanh nih zulh nan ka duh ahcun mah zawnruahnak kha nan ngol lai i nifa tein nan vailam kha nan i put lai i nan ka zulh lai.”—Luka 9:23.

1, 2. (a) Zeibantuk sawmnak bia dah Jesuh nih a chim? (b) Jesuh sawmnak kha zeitindah na leh?

Jesuh cu a phungchimnak a dih lei ah Judea ram chaklei Jodan tiva ral, Perea ah phung a chim. Mino pakhat nih a fuh i zungzal nunnak hmuh awkah zeidah ka tuah lai tiah a hal. Mah pa cu Moses Nawlbia ṭha tein a zulmi a si kha a hngalh hnu ah Jesuh nih a biapi ngaimi pakhat a sawm. “Va kal law na ngeihmi thil vialte kha va zuar law tangka cu sifakmi kha va ṭhen hna, cun vancung ah rothil na ngei lai; cun ra law ka zul” tiah a ti. (Mar. 10:21) Cungnung Bik Pathian Fapa ngeihchun, Jesuh hnu zulh ding sawmnak khi ruat ko hmanh!

² Mah mino pa nih kha sawmnak kha a al nain midang nih cun an cohlan. Tuan ah, Jesuh nih Filip kha “ka zul” tiah a ti. (Johan 1:43) Filip nih a cohlan i a hnu ah lamkaltu pakhat a hung si. Jesuh nih Matthai zong a sawm i a cohlan ve. (Matt. 9:9; 10:2-4) A ngaitein Jesuh nih dinnak a duhmi vialte kha cuticun a sawm hna. Hitin a ti: “Ahohmanh nih zulh nan ka duh ahcun mah zawnruahnak kha nan ngol lai i nifa tein nan vailam kha nan i put lai i nan ka zulh lai.” (Luka 9:23) Cucaah a duh taktakmi mi zeipaoh Jesuh zultu si khawh a si. Nang tah na duh maw? Kannih a tam deuh cu Jesuh i duhnungmi sawmnak kha kan cohlan cang i phungchimnak ah midang kha kan theihter ve hna.

3. Jesuh hnu zulhnak in a ping ah kal kha zeitindah hrial khawh a si?

³ Asinain ngaihchiat awk cu Baibal biatak a duhmi cheukhat cu cawn an duh ti lo. An tha a hung der i a donghnak ah Jesuh hnu zulhnak in ‘a ping ah an kal.’ (Heb. 2:1) Mah rap chung tlak kha zeitindah hrial khawh a si? Hitin i halnak nih a kan bawmh: ‘Jesuh hnu zulh kha zei ruang set ah dah kaa thim? A hnu zulh cu zei sullam dah a ngeih?’ Mah biahalnak pahnih a phi i cinkennak nih kan i thimmi nunnak lam cung kal peng awk kan biakhiahnak a fehter lai. Cu nih midang zong Jesuh hnu zulh ding forh awkah a kan bawmh lai.

Zeicah Jesuh Hnu Zulh Awk A Si?

4, 5. Jesuh cu hruaitu si awkah zeicah aa tlak?

⁴ Profet Jeremiah nih hitin a ti: “Maw Bawipa, minung nih a zulhmi a lam hi amah nih aa thimmi an si lo i a nun chung i a kalnak lam zong hi amah nih aa ser khawhmi an si lo ti kha ka hngalh.” (Jer. 10:23) Minung tuanbia nih Jeremiah bia a hmaan kha a langhter. A tlinglomi minung nih anmah tein ṭha tein an i uk khawh lo kha a lang chin lengmang. Jesuh hnu zulh awk sawmnak kha kan cohlan, zeicahtiah minung ahohmanh tluk khawh lomi lam in hruaitu si aa tlak kha kan hngalh. Jesuh sining cheukhat zoh u sih.

⁵ Pakhatnak ah, Jesuh cu Jehovah theng nih Hruaitu Messiah in a thim. Kan ca Hruaitu ah aho thim ding kha Sertu nakin a hngal deuhmi ahodah a um? Pahnihnak, Jesuh cu a ṭhami le kan i cawn khawhmi ziaza a ngei. (Isaiah 11:2, 3 rel.) A tlingmi zohchunh awk a si. (1 Pit. 2:21) Pathumnak, Jesuh nih a hnu a zulmi hna ca i a nunnak pek tiangin an zawn a ruah tuk hna. (Johan 10:14, 15 rel.) Cun atu ah nuamhnak a pe i a sunglawimi zungzal hmunmi hmailei i a kalpimi nunnak ah a kan hruai tikah siaherhnak a ngeimi tuukhal a si kha a langhter. (Johan 10:10, 11; Biat. 7:16, 17) Mah le a dangdang ruangah a hnu zulh ding kan i thim tikah biakhiahnak hmaan kan tuah a si. Asinain Jesuh hnu zulhnak ah zeidah aa tel?

6. Jesuh hnu zulhnak ah zeidah aa tel?

⁶ Khrih zultu sinak ah Khrihfa kan si i ti men lawng a za lo. Tuchan ah minung nuaithong hnih hrawng nih Khrihfa kan si an ti nain an tuahsernak nih “ṭhatlonak a tuahtu” an si a langhter. (Matthai 7:21-23 rel.) Jesuh hnu zulh awk sawmnak kha mi nih an duh tikah a hmaanmi Khrihfa hna cu an nunning vialte ah Jesuh cawnpiaknak le a keneh ningin nifate an nun kha kan chimh hna. Mah nih a chim duhmi fianter awkah Jesuh kong kan hngalhmi cheukhat i ruah u sih.

Fimnak Kongah Jesuh Nawl I Cawn

7, 8. (a) Fimnak cu zeidah a si, zeicah Jesuh cu fimnak tampi a ngeih? (b) Jesuh nih zeitindah fimnak a langhter i zeitindah kan i cawn khawh?

⁷ Jesuh nih a lang khunmi sining ṭha tampi a langhter, cu lakah a fimnak, aa toidornak, tei a maknak le a dawtnak, hi hna pali hi kan zoh lai. Hmasa bik ah, hmantlakmi lam in hngalhnak le hngalhthiamnak a hmang khomi a fimnak kha ruat hmanh. Lamkaltu Paul nih hitin a ṭial: “Khrih cu Pathian fimnak le hngalhnak aa thupmi hunnak tawh a si.” (Kol. 2:3) Jesuh nih mah fimnak cu khoika in dah a hmuh? Amah theng nih hitin a chim: “Ka Pa nih a ka cawnpiakmi lawnglawng ka chim.” (Johan 8:28) Jehovah nih fimnak a pek caah Jesuh biakhiah thiamnak ah kan khuaruah a har lo.

⁸ Tahchunhnak ah, Jesuh nih a nunnak lam aa thim tikah biakhiah thiamnak kha a hman. Nunning sawhsawh in nun i Pathian duhnak tuahnak lawngah lungthin pek awk bia a khiak. Pennak hmasa bik kawlnak ah a caan le a thazang kha fim ngai in a pek. ‘Mit fim tein’ chiah i zuamnak le kan thazang le kan lungthin a sawksam dihmi a herh lomi thil i nenhter lonak thawngin Jesuh nunning kan i cawn. (Matt. 6:22) Khrihfa tampi cu phungchimnak ah caan tam deuh pek khawh awkah nunning sawhsawh in khua an sa. A cheu cu hmaikal rian an ṭuan kho. Cu chungah naa tel ve ahcun thangṭhat awk tlak taktak na si. ‘Pennak hmasa bia chiahnak’ nih lawmhnak le lungtlinnak nganpi a chuahter.—Matt. 6:33.

Jesuh Bantukin I Toidor

9, 10. Jesuh nih aa toidornak kha zeitindah a langhter?

⁹ Kan zoh dingmi Jesuh sining pahnihnak cu toidornak a si. A tlinglomi minung cu nawlngeihnak pek an si tikah luarpar kai an hmang. Jesuh he an hei i thleidang dah! Jehovah tinhmi tlinternak ah rian ngan bik pek a si nain tlawmte hmanh aa porhlaw lo. Cucaah aa toidornak i cawn awkah kan lung a tho. Lamkaltu Paul nih hitin a ṭial: “Nan lungputning cu Khrih nih a rak ngeihmi lungputning kha si seh; cucu hi ti hin a si: Pathian sinak kha a ngeih zungzal mi a si ko nain hramhram in Pathian tluk si awk kha a ruat lo. Amah lungtho tein cu vialte cu a hlawt dih hna i sal sinak tu kha aa lak. Minung bantuk ah a cang i minung mui in a lang.” (Fili. 2:5-7) Cu ah zeidah aa tel?

¹⁰ Jesuh cu a Pa umnak vancung ah umnak nawl a ngan ngaimi tinvo sung a ngei nain, ‘cu vialte cu hlawt dih’ duhnak a ngei. A nunnak cu Judah ngaknu thiang nauinn chungah ṭhial a si i a niammi lettama inn ah hnuk ding ngakchia pakhat in a chuah hlan tiang a nu paw chungah thla kua chung duhsah in a ṭhang. Jesuh cu Josef inn ah, lamkal thiamka, ngakchiate in kum hra fai a si tiang duhsah in a ṭhang. Anih cu sualnak ngei lo a si. Asinain, a ngakchiat chung vialte a tlinglomi misual tefa a simi a nu le a pa nawl a ngai peng. (Luka 2:51, 52) Zeitluk toidornak dah a si!

11. Jesuh toidornak kha zeilam in dah kan i cawn khawh?

¹¹ Rian nauta a lomi rian lungtho tein kan cohlan tikah Jesuh toidornak kan i cawn a si. Tahchunhnak ah, thawngṭha chimnak rian kong hi ruat hmanh. Mah rian hi a nautami a lo ko lai, mi nih ngaih an duh lo le an kan nihsawh le an kan doh tikah a lo khun lai. Asinain, phungchimnak rian ah tei kan maknak thawngin ka hnu ka zul u timi Jesuh sawmnak leh awkah midang kha kan bawmh hna. Cuticun nunnak khamh awk kan bawmh hna. (2 Timote 4:1-5 rel.) Tahchunhnak dang pakhat cu kan Kingdom Hall zohkhenhnak a si. Hmunthur pung chung hmunthur va hlawnh, zelṭuang ṭaih le zuninn thianh ti bantuk rian nauta ṭuan aa tel kho! Asinain hmun pakhat i a thiangmi biaknak hmun laicer a simi Pumhnak inn remhnak cu a sungmi rian phun khat a si kha kan cohlan. Lungtho tein rian nauta si dawh a lomi kan ṭuannak thawngin toidornak kan langhter i Khrih keneh kan zulh a si.

Jesuh Bantukin Teima

12, 13. (a) Jesuh nih teimaknak zeitindah a langhter, zeinihdah a forh? (b) Phungchimnak i teimak awkah zeinihdah a kan forh?

¹² Phungchimnak ah Jesuh teimaknak kha ruat hmanh. Jesuh vawlei cung a nun lioah rian tampi a rak ṭuan. A hmasa a nunnak ah lettama pakhat in a cawmtu a pa Josef he rian an ṭuan ṭi. Jesuh nih phung a chim lioah a zawmi damter le a thimi thawhter telin khuaruahhar thil tampi a rak tuah. Asinain a rian biapi bik cu thawngṭha chim le ngaih a duhmi hna cawnpiak a si. (Matt. 4:23) A zultu hna in cu bantuk rian kan ṭuan. Zeitindah a keneh zulh khawh a si? Pakhat cu Jesuh lungput ngeihnak in a si.

¹³ A bik in, Jesuh kha phungchim awk le cawnpiak awkah a forhtu cu Pathian a dawtnak a si. Asinain Jesuh nih a chimmi biatak zong a duh. A caah mah biatak cu man khiah khawh lomi thil a si i midang hrawm chin kha a duh ngaingai. “Cawnpiaktu” in kannih zong cu bantuk lungput kan ngei ve. Pathian Bia in kan hngalhmi man sungmi biatak cheukhat hi ruat ko hmanh! Universe nawlngeihnak kongkau le zeitindah tonghtham a si lai kha kan hngalh. Mithi umtuning Baibal cawnpiakmi le Pathian vawlei thar ah a um dingmi thluachuah hna kha ṭha tein kan hngalh. Mah biatak kan hngalhnak a naih ah siseh, a rauh cang ah siseh, a man a ṭum bal lo. Mah biatak cu a hlunh zong a thar zong ah, a man khiah khawh lomi ro an si. (Matthai 13:52 rel.) Lungtho thanuam tein phungchimnak thawngin Jehovah cawnpiakmi kan duh kha midang sinah kan langhter.

14. Jesuh nih mi a cawnpiak hna ning kha zeitindah kan i cawn khawh?

¹⁴ Jesuh nih zeitindah mi a cawnpiak hna zong kha zohhmanh. A bia a ngaimi hna kha atu le atu Cathiang a sawhpiak hna. “Cathiang nih pei . . . a ti cu” tiah a tinak in a biapitnak zawn kha atu le atu a sawh. (Matt. 4:4; 21:13) A bia ṭialmi ah, Hebru Cathiang a cheu nak tam kha dairek in a lak asiloah a vel in a sawhpiak hna. Jesuh bantukin, phungchimnak ah Baibal kha kan i bochan zungzal i a si khawh tik paoh ah Baibal bia chim kan i zuam. Cuticun, kanmah ruahnak si loin Pathian ruahnak kan cawnpiak hna kha lungthin ṭha a ngeimi nih an hmuh nakhnga kan bawmh hna. Baibal relpiak le Pathian Bia a man le a sullam i ruah kha pakhatkhat nih a cohlan tikah zeitluk in dah kan i lawmh! Cu bantuk mi nih Jesuh hnu zulh ding sawmnak a cohlan tikah kan i lawm tuk hringhran.

Jesuh Hnu Zulh timi Cu Midang kha Dawt Tinak A Si

15. A lang khunmi Jesuh sining pakhat cu zeidah a si, cu kong fakpi in ruahnak cu kan cungah zeitindah hmual a ngeih khawh?

¹⁵ Jesuh sining hmanung bik kan i ruah dingmi cu lung a nuamhter bikmi minung a dawt hnanak a si. Lamkaltu Paul nih hitin a ṭial: “Khrih nih kan ca i a ngeihmi dawtnak nih cun a kan uk.” (2 Kor. 5:14) Zapi le pakhat cio cung i Jesuh ngeihmi dawtnak ruah tikah kan lung a kan suk i a keneh zulh awk a kan forh.

16, 17. Midang a dawt hna kha Jesuh nih zei lam in dah a langhter?

¹⁶ Jesuh nih midang a dawt hna kha zeitindah a langhter? Minung caah a nunnak lungtho tein a peknak cu a dawtnak nganpi langhternak a si. (Johan 15:13) Asinain, phung a chim lio ah, lam dang zongin dawtnak a langhter. Tahchunhnak ah, harnak a tongmi hna cungah zaangfahnak a ngei. Lazaruh a thih ruangah a ṭapmi Mari le a sinah a ummi kha a hmuh hna tikah an ngaihchiatnak kha ṭha tein a hngalhpiak hna. Tlawmpal ah Lazaruh kha a thawhter lai nain a lung a hno tuk caah “a ṭap.”—Johan 11:32-35.

¹⁷ A phungchim hramthawknak ah, Jesuh cu thinghmuimi pakhat nih a fuhpanh i “na duh ahcun na ka thianter khawh ko” tiah a ti. Jesuh nih zeitindah a leh? Hitin aa ṭial: “Jesuh nih cun a zaang a fak ngaingai.” Cucaah aa thleidangmi thil pakhat a tuah. “A hei banh i a hei tongh. ‘Nangmah thianter kha ka duh, va thiang cang,’ tiah a ti. Chikkhatte ah thinghmui zawtnak nih khan cu pa cu a kaltak i a thiang.” Moses Nawlbia tangah thinghmuimi cu thiang lo an si, a ngaingai ah Jesuh nih mah pa kha tongh loin a damter khawh ko. Asinain Jesuh nih a thinghmui kha a damter lioah a rak tongh, cucu kum tampi chungah hmasa bik tongh a tonmi a si kho. Zeitluk zaangfahnak ngeimi tuahsernak dah a si!—Mar. 1:40-42.

18. Zeitindah “zawnruahnak” langhter khawh a si?

¹⁸ Khrih zultu cu “zawnruahnak” in dawtnak langhter awkah nawlpek kan si. (1 Pit. 3:8, Nw) A ngormi le a hnabei a dong tukmi zumtu hawi pakhat a intuarmi hngalhpiak cu a fawi lo, a hlei in cu bantuk ton bal lo ahcun hngalhpiak a har khun. Jesuh cu a zaw bal lo nain mizaw cungah zawnruahnak a ngei. Zeitindah zawnruahnak ngeih khawh a si? Harnak a tongmi nih an lung ummi an kan chimh tikah lungsau tein ngaihpiaknak thawngin a si. Hitin i hal khawh a si, ‘Anmah hei si ning law zeitindah ka tuar hnga?’ Midang intuarmi ah zawnruahnak kan ngeih ahcun “a ral a chiami kha ralṭhatnak” kan pek khawh hna lai. (1 Thes. 5:14) Cuticun Jesuh hnu kan zulh lai.

19. Jesuh nunning cu kan cungah zei lam in dah hmual a ngeih?

¹⁹ Jesuh Khrih chimmi le tuahsernak kong hlathlai cu lungtho tuk a si! A kong hngalh deuhdeuh ah amah lawh kan duh deuhdeuh lai i midang cungah cutin tuah duhnak kan ngei deuhdeuh lai. Cuticun Messiah Siangpahrang hnu zulhnak thawngin atu le zungzal in lunglawmhnak hmu u sih!

Na Fianter Kho Maw?

• Jesuh bantukin zeitindah fimnak langhter khawh a si?

• Zei lam in dah toidornak langhter khawh a si?

• Phungchimnak ah teimaknak zeitindah ngeih khawh a si”?

• Midang cung dawtnak ngeihnak ah zeitindah Jesuh nawl i cawn khawh a si?

[Cahmai 5nak i rinli kulh]

Khrih Nawl I Cawn Awk A Kan Bawmmi Cauk

2007 district civui program ah, “Ra Law Ka Zul” timi cahmai 192 a ummi cauk kha mirang ca in chuah a si. Mah cauk thar cu Jesuh kong, a hlei in a sining hna le a tuahsernak i lungthin pek awkah Khrihfa pawl bawmhnak caah timhmi a si. Ṭhen hnih in biahram a thawk hnu ah a hmasa bik ṭhen nih Jesuh ah a langmi sining hna toidornak, ralṭhatnak, fimnak, nawlngaihnak le inkhawhnak kong kha a fianter.

Mah hnu ah cawnpiaktu le thawngṭha chimtu pakhat in Jesuh tuahmi le a dawtnak ngan a langhtermi lam cheukhat he aa tlaimi ṭhen a um. Khrihfa pakhat Jesuh nawl i cawn awk a bawmmi kong kha mah cauk chungah a um dih.

‘Jesuh hnu ka zul taktak maw? Zeitindah Jesuh kha naih deuh in ka zulh khawh?’ tiah i check awkah mah cauk nih kan zapi in a kan forh lai ti kan zumh. ‘Zungzal nunnak hmuh a duhmi vialte’ kha Khrih zultu si awk zong a bawmh hna lai.—Lam. 13:48, Nw.

[Cahmai 4nak i hmanthlak]

Jesuh cu vawlei i rat awk le ngakchiate in hrin awkah a hna a tla. Cuti si awkah zei sining dah a herh?

[Cahmai 6nak i hmanthlak]

Phungchimnak ah teimami si awkah zeinihdah a kan forh lai?