“Ka Zul Peng U”
“Cu bantuk mi si awkah cun Pathian nih an kawh hna cu a si; zeicah tiah Khrih hrimhrim nih nan caah khan a in cang i ka keneh ka zul hna seh tiah i zohchunh awk an chiah piak cang hna.”—1 PITER 2:21.
1, 2. Cawnpiaktu pakhat in a tlingmi Jesuh a nunning kha i zohchunh awkah kan caah zeiruang ahdah a sang tukmi a si lo?
JESUH KHRIH cu vawlei cungah khua a rak sa balmi vialte lakah a lianngan bikmi Cawnpiaktu a rak si. Cu hlei ah, amah cu mitling a rak si, minung in a rak nun chung pumpi ah sualnak a rak tuah bal lo. (1 Piter 2:22) Asinain, mah nih khan saya pakhat in Jesuh a nunning kha kannih a tling lomi minung nih i zohchunh awkah a sang tukmi a si tinak a si maw? Asi hrimhrim lo.
2 A hmasa deuh capar ah kan rak hmuh cang bantuk khan, Jesuh a cawnpiaknak a hrampi cu dawtnak a si. Mah dawtnak cu kan dihlak in kan ngeih khawhmi thil a si. Pathian Bia nih atu le atu midang cungah dawtnak ngeih awkah le ṭhanchoter awkah a kan forh. (Filipi 1:9; Kolose 3:14) A sermi hna nih an tuah khawh lomi thil kha Jehovah nih zeitikhmanh ah a hal bal hna lo. A ngai tein, “Pathian cu dawtnak a si” i amah a mui kengin a kan sermi kan si, mah nih khan dawtnak a langhter khomi in a kan ser tiah ti khawh a si. (1 Johan 4:8; Genesis 1:27) Cucaah kan cherhchanmi Baibal cangah aa ṭialmi lamkaltu Piter a bia kan hun rel tikah, kan hlawh a tling lai tiin hnangamnak kan hun ngei kho. Khrih a keneh kha naih tein kan zulh khawh. Angai tein, Jesuh theng nih hitin nawl a kan pekmi kha kan ngaih khawh: “ka zul peng u.” (Luka 9:23, NW) A hmasa bikah a rak cawnpiakmi hna biatak cungah, cun a rak cawnpiakmi minung hna sinah Jesuh Khrih nih a rak langhtermi dawtnak kha zeitindah kan i zohchunh lai ti kha kan i ruah hna hmanh lai.
Kan Cawnmi Biatak cungah Duhnak Ngeih I Zuamnak
3. Mi cheukhat nih cawnnak cu zeiruang ahdah a har in an hmuh, sihmanhsehlaw Phungthlukbia 2:1-5 ah zeibantuk forhnak bia dah kan hmuh?
3 Midang kan cawnpiakmi hna biatak kha duh awkah, cu bantuk biatak cawnnak kha kanmah theng nih kan duh awk a si. Nihin kan vawlei ah hin, cu bantuk phun duhnak cu a fawi tein a rami a si zungzal lo. Sianginn ah a za tawk in ca a cawng lomi le a no lioah ziaza ṭhalo a ngeimi hna nih cawnduhnak hi an ngei tawn lo. Asinain, hi cu Jehovah sinin kan cawnmi a si caah a biapi tukmi a si. Phungthlukbia 2:1-5 ah hitin a ti: “Ka fapa ka bia kha naa lak hna i ka nawlbia kha na lung chungah naa khon hna i fimnak lei ah na hna na chit i hngalhthiamnak lei ah na lungthin na pek ahcun, a hmaan le hmaanlo thleidan khawhnak lungthin kha na auh i hngalhthiamnak kha na kawh ahcun, ngun bantuk in na kawl i thuhmi ro bantuk in nan kawl ahcun, khi tikah BAWIPA ṭihnak cu na hngalh lai i Pathian hngalhnak cu na hmuh lai.”
4. Lungthin “pek” timi nih zeidah a chim duhmi a si i cutin tuah awkah zeibantuk hmuhning nihdah a kan bawmh lai?
4 Ahme 1 in 4 tiangah khan, i “lak” le i “khon” awk lawngah si lo in “kawl” peng rih awk zongah khan thazang chuahin i zuam awkah atu le atu forh kan si. Asinain, hi rian vialte tuah awkah zeinihdah a kan forh lai? A ṭha, “hngalhthiamnak lei ah na lungthin na pek ahcun,” timi bia kha i chingchiah hmanh. Biafang fianternak pakhat ah hi forhfialnak bia cu “lungthin pek awk lawnglawng ah nawlmi a si lo; lungthin putning pakhat khat halmi kha a si: cawnpiaknak hna kha lungtho tein cohlannak a si” tiah ati. Asi ahcun zei nih cundah Jehovah nih a kan cawnpiakmi cu cohlan in lungtho tein a kan cawnter khawh lai? Kan hmuhning hi a si. “Pathian hngalhnak” kha “ngun” bantuk in le “thuhmi ro” bantuk in kan hmuh a hau.
5, 6. (a) Caan khatkhat ah zeidah a cang kho i, mahkha kha zeitindah kan hrial khawh lai? (b) Baibal ah kan rak hmuhmi hngalhnak ro sung kha zeiruang ahdah kan bet chap a hauh?
5 Cubantuk hmuhning kha ngeih awkah a har tukmi a si lo. Tahchunhnak ah, kan rak cawnmi “Pathian hngalhnak” ah vawlei cung Paradis ah zumh awk tlakmi minung zungzal in nun awk timi Jehovah a timhnak kong biatak kha aa tel kho men. (Salm 37:28, 29) Biatak kha na rak theih hmasabik lioah khan, mahkha kha na ruahnak le na lungthin kha ruahchannak le lunglawmhnak in a khahtermi hngalhnak pakhat, rosung pakhat taktak in na rak hmuh lai ti cu a fiang ko. Atu tah zeitindah a si? Caan a hun liam bantukin, na rosung na sunlawiternak cu a zorchuk ve maw? Cutin a si ahcun, thil pahnih kha tuah awkah i zuam. Hmasabik ah, a man na sunternak kha hrimhter ṭhan, mah cu na rak cawnnak in kum zeizat hmanh a liam cang ko zongah, Jehovah nih an rak cawnpiakmi biatak pakhat cio i a man na rak sunternak a kong hna kha na lungthin ah hmaan tein tharter ṭhan.
6 A pahnihnak ah, na rosung kha bet chap rih. A ngaite in cun, a man a sungmi lungvar kha na cawh phum a si ahcun, mah pakhat te kha na zal chungah i sanh menmen in na lung a tling ko lai maw? Asiloah a um chap ti hnga maw tiah na cawh chap hnga dah? Pathian Bia cu lungvar le biatak a tlangtlang in a khatmi a si. Zeizatpi na va hmuh cang hmanhah, na hmuh khawh chap rih. (Rom 11:33) Biatak a tlangpi pakhat kha na hun cawh khawh tikah, nangmah le nangmah kha hitin i hal hmanh: ‘Zeinihdah hihi ro sung ah a canter? Mah nih hin Jehovah a pumpak sining ah le asiloah a timhnak leiah a thuk deuh in hngalhthiamnak a ka pe maw? Hi nih hin Jesuh a keneh zulh awkah a ka bawm khomi a ṭhami lamhruainak cheukhat kha a ka pe maw?’ Cubantuk biahalnak hna fakpi in ruahnak nih Jehovah nih an cawnpiakmi biatak hna na duhnak kha a fehter lai.
Kan Cawnpiakmi Hna Biatak Kan Duhnak Kha Langhternak
7, 8. Baibal in kan rak cawnmi biatak kan duhnak hna kha midang sinah zeitindah kan langhter khawh? Tahchunhnak pakhat in pe.
7 Midang kan cawnpiak hna tikah, Pathian Bia in kan rak cawnmi biatak kan duhnak cu zeitindah kan langhter khawh? Jesuh a nunning kha zul in, kan phungchimnak le kan cawnpiaknak cu Baibal cungah aa hngat taktakmi a si. Kan hnu nai te ah khan, vawlei pumpi i Pathian mi hna cu zapi sin i phung an chimnak ah Baibal kha a bikin hman awkah thapek an si. Mah ruahnak cheuhnak kha na zulh tikah, Baibal in na chimhmi hna kha nangmah theng nih a man na sunter tikha inngeitu na hngalhter nakhnga i zuam.—Matthai 13:52.
8 Tahchunhnak ah, kan hnu kum i mi puarhrangmi hna nih New York Khualipi kha an hun doh dihka te ahkhan, Khrihfa unau nu pakhat nih Salm 46:1, 11 kha phungchim a vahnak i a tonmi hna kha a rak rel piak hna. Kha harnak caan a chuah hnu khan zeitindah an nun ti kha a hal hmasa hna. An lehnak kha ralring tein a rak ngaih i a rak hnatlakpi hna hnu ah, hitin a rak ti hna: “Hi harnak caan ah hnagamnak a ka pe taktakmi Baibal cang kha kan rel piak kho hnga maw?” Tlawmpal te lawngnih an rak al i, mi tampi he ṭha tein an i ruah khawh. Mino he bia a chim tikah, mah unau nu nih hitin a ti ṭheu tawn hna: “Atu ah kum 50 chung Baibal ka cawnpiak cang hna. Hi cauk nih a remhchunh khawh lomi harnak pakhat te hmanh ka tong bal rih lo.” Lungthin takte le, lungtho thanuam tein kan naihnak hna thawngin, Pathian Bia in kan rak cawnmi hna kha a man kan sunter i kan duh ti kha mi sinah kan langhter.—Salm 119:97, 105.
9, 10. Kan zumhnak kong he aa tlaimi biahalnak hna kha kan leh tik hna ah, zeiruang ahdah Baibal hman cu a biapimi a si?
9 Mi nih kan zumhnak kong a kan hal tikah, Pathian Bia kan duhnak langhter awkah caanṭha kan hun ngei. Jesuh a nunning kha zul in, kan bialehnak hna kha kanmah kan ruahnak cungah kan hngatter men lo. (Phungthlukbia 3:5, 6) Mah nakin, Baibal in kan leh deuh hna. Pakhat khat nih na leh khawh lomi biahalnak a ka hal sual lai ti kha na phang maw? Naa lak khawhmi a ṭhami kehlan pahnih kha ruat hmanh.
10 Na si khawh chungin i timchung. Lamkaltu Piter nih hitin a rak ṭial: “Nan lungthin chungin Khrih kha upat u law nan Bawi ah ser u. Ruahchannak nan ngeihmi kong kha, kan chim tuah u, an timi hna an um ahcun, zeitik caan paoh i chim kho dingin timh cia tein um zungzal u.” (1 Piter 3:15) Na zumhnak hna kha dirhkamh awkah timhcia na si maw? Tahchunhnak ah, Baibal cang he aa ralchanhmi phunglam le tuahsernak cheukhat hna ah naa tel lomi kha mi pakhat khat nih hngalh a duh a si ahcun, “Hi cu ka biaknak he aa ralchanh,” tinak men in na lung a tlin awk a si lo. Cubantuk bialehnak nih nangmah caah midang nih rikhiahnak an in tuahpiak i cucaah nangmah cu biaknak aa hruhchihmi bu pakhat chungah aa tel vemi pakhat in a ruahter lai. “Pathian Bia, Baibal nih a thlauhmi a si,” asiloah, “Hihi ka Pathian nih a duh lai lo,” ti in chim. Cun zeiruang ahdah ti kha aa tlak ningin na fianter ahcun a ṭha deuh lai.—Rom 12:1.
11. Pathian Bia biatak kong hna he aa tlai in biahalnak hna kha leh awkah timhcia kan si khawh nakhnga zeibantuk hlathlainak thilri nihdah a kan bawmh lai?
11 Timhcia ka si lo tiah naa ruah a si ahcun, Baibal in Ruahnak (Reasoning From the Scriptures) cauk kha nangmah na holhte in na hmuh khawh a si ahcun, a caan la law cawng.a Mi nih biahalnak an tuah ṭheu tawnmi a kong tlawmpal hna kha thim law, Baibal cang cheukhat hna kha i cinken awk i zuam. Na Ruahnak cauk kha le na Baibal cu na kut chungah chia hna. Baibal nih zeitindah a leh timi kha hmuh awkah hman na duhmi thilri pakhat na ngei timi kha chim law, mah pahnih hna kha hman awkah i cawngor in um hlah.
12. Baibal biahalnak pakhat kha a leh awk kan hngalh lo a si ahcun zeitindah kan leh khawh?
12 A luantuk in na thin phang hlah. Mitlinglo a simi minung nih biahalnak kip kha a let dih kho lai lo. Cucaah na leh khawh lomi hna Baibal kong an in hal tikah, hi ti hin a zungzal in na leh khawh hna: “Cubantuk theihduh awk ngai a simi biahalnak na tuah caah kaa lawm tuk. A hmaan tein ka chim ahcun, a lehnak ka hngal lo, asinain Baibal nih hi kong a leh khawh ti cu ka zumh. Baibal hlathlainak tuah cu ka huam ngaimi a si, cucaah na biahalnak kha ka va kawl ta lai i a hnu ah ka rak in leh ṭhan te lai.” Cubantuk phehthuh lo tein chimnak, toidawr tein naihnak nih a hnu ah i ruahceih ṭhan awkah lam ṭha a sial.—Phungthlukbia 11:2.
Kan Cawnpiakmi Minung Hna Kha Dawtnak
13. Phung kan chimhmi hna he aa tlai in zeiruang ahdah a ṭhatnak in kan hmuh hna awk a si?
13 Jesuh nih a rak cawnpiakmi minung hna sinah khan dawtnak a rak langhter. Hi konghe aa tlai in zeitindah amah kha kan i zohchunh lai? Kan pawngkam i a ummi minung hna sinah zeitikhmanh ah mi lungthin hak kan si awk a si lo. A hmaan tein, “Lianngan Bik Pathian ni lianngan ni,” cu a hun naih thluahmah cang i, nuai thong tampi cu hrawh an si lai. (Biathlam 16:14; Jeremiah 25:33) Asinain, ahodah a nung lai i ahodah a thi lai tikha kan hngal lo. Mah biaceihnak cu hmailei ah ceih dingmi a si i, Jehovah nih rian a pekmi, Jesuh Khrih nih a ceih dingmi a si. Biaceih a si hlan lo cu, mikip kha Jehovah a sal pakhat a si khomi in kan hmuh hna.—Matthai 19:24-26; 25:31-33; Lamkaltu 17:31.
14. (a) Mi sinah zawnruahnak a ngeimi kan si le si lo, zeitindah kanmah le kanmah kha kan i hlathlai khawh? (b) Midang cungah zawnruahnak le pumpak siaherhnak kan ngei tikha zeitindah kan langhter khawh?
14 Cucaah Jesuh bantuk in, mi zawnruahnak kha kan kawl. Kanmah le kanmah kha hitin kan i hal kho: ‘Vawlei cung biaknak, nainganzi, le chawlet hna nih fimzer ngaiin a hlen khawhmi hna hi ka zang an fak maw? Kan chimhmi hna thawngṭha kha zei ah a rel lomi an lawh ahcun, zeiruang ah hitin an ruah ti kha hngalhthiam awkah kaa zuam maw? Atu ah zumhawktlak tein Jehovah a rian a ṭuanmi keimah, asiloah midang hna zong nih, hi bantuk in kan rak ruah ve bal tikha kaa cinken ti maw? Ka phungchimning hi aa tlak ningin ka mersang maw? Asiloah hi mi hna hi ruahchan awk an um lo tiah ka hlaw hna maw?’ (Biathlam 12:9) Mi nih an cungah zawnruahnak taktak kan langhtermi kha an hun theihhngalh tikah, kan thanhmi thawngṭha kha an hun lehrulh duh deuh lai. (1 Piter 3:8) Zawnruahnak nih phungchimrian kan ṭuannak i kan tonmi minung hna sinah siaherhnak kha langhter awk zong a kan forh. An biahalnak hna le an lung retheihnak hna kha a tawinak in i chingchiahnak kan tuah awk a si. An sin kan kal ṭhan tikah, a luan ciami zarh ah an rak chimmi kong kan philh lo ti kha kan hmuhsak hna lai. Atu hrimhrim ah hngalh an duhmi a um a si ahcun, a si khomi bawmhnak cheukhat kha kan pek khawh hna.
15. Mi kha a ṭhatnak in zeiruang ahdah kan zoh hna awk a si i, cuti cun zeitindah kan tuah khawh lai?
15 Jesuh bantuk in, mi cungah an ṭhatnak kha kan kawl hna. Kawp a ngei lomi nu asiloah pa nih a fale a cawmken hnanak ah thangṭhat awktlak in aa zuam ko lai. Pa pakhat nih a innchungkhar kha bawmhchanh awkah thazang chuahin aa zuam ko lai. A kumkhua a upa ngaimi pakhat nih thlarau lei kongah lungthawhnak a langhter ko lai. Kan tonmi minung hna sinah cubantuk sining kha hmuhthiam piakin kan thangṭhat hna maw? Cutin kan tuah tikah, pakhat le pakhat i theihthiamnak kha kan chuahter kho i Pennak kong tehte khannak lam a hun khawh.—Lamkaltu 26:2, 3.
Dawtnak Langhternak ah Toidawrnak cu A Herhtukmi A Si
16. Phung kan chimhmi hna sinah lungnemnak le upatnak ngeih cu zeiruang ahdah biapi a si?
16 Kan cawnpiakmi hna dawtnak nih a fim ngaimi Baibal ralrin peknak bia kha zulh awkah a kan forh lai: “Hngalhnak nih cun mi kha an lung a puamter tawn hna; dawtnak bel nih a sersiam hna.” (1 Korin 8:1) Jesuh cu hngalhnak tampi a rak ngeimi a si, asinain zeitikhmanhah a lung a rak puam bal lo. Cucaah na zumhnak kong hna kha na chimh ve tik hna ah, i al duhnak awcawi asiloah i porhlawtnak biaka kha hrial hna. Kan timhnak cu mi lungthin chungah a phak nakhnga kan duh tukmi biatak kha an duh ve nakhnga a si. (Kolose 4:6) Piter nih Khrihfa hna kha bia leh awkah timhcia an si nakhnga ruahnak a rak cheuh hna lio ah, “lungnem le upatnak in bia leh” awkah ralrin a rak pek hna mi kha kanmah zong nih kan zulh ve awk a si. (1 Piter 3:15 Lai Biakam Thar Baibal) Kan lung a nem i upatnak kan ngeih hna a si ahcun, a rian kan ṭuanmi Pathian sinah mi kan hnuh khawh deuh hna lai.
17, 18. (a) Phungchimtu in kan thiamnak kongah, kan sualnak kawl duhnak lungput a ngeimi hna kha zeitindah kan lehrulh hna awk a si? (b) Hlanlio Baibal chan lio i holh hna thiam cu Baibal siangngakchia hna caah zeiruang ahdah a biapi tukmi a si lo?
17 Kan hngalhnak asiloah kan fimthiamnak hna in mi kha lem awkah a herh lo. Na hmunhma i mi cheukhat hna nih sianghleirun in degree asiloah minṭhatnak a hmu lomi hna bia kha ngaih an duh lo ahcun, an lungputning nih khan na tha an chiatter awk a si lo. Jesuh nih amah a chan lio i a min a thang ngaimi rabbi sianginn a rak kai lo ti in an rak dohnak bia kha zei ah a rak rel lo; a cawnnak a liannganmi in khan mi kha an lung lak awkah i zuamnak thawngin mi tampi ruahning kha aa teiter fawn lo.—Johan 7:15.
18 Khrihfa phungchim rianṭuannak ah toidawrnak le dawtnak cu vawlei lei fimthiamnak a zei bantuk nak hmanh in a biapibik mi a si. A lianngan bikmi cawnpiaktu, Jehovah nih phungchim rianṭuannak caah thiamnak a kan pek. (2 Korin 3:5, 6) Khrihfaram siangbawi cheukhat nih zeitin an chimmi hmanh kha biapi ah chia lo in, kannih cu Pathian Bia cawnpiaktu kan si nakhnga hlanlio Baibal he aa pehtlaimi holh kha kan cawn a herh lo. Jehovah nih Baibal kha a fiang tein, a hmaanmi bia in ṭial awkah thaw a rak chuahhnawhmi a si caah mikip nih kha a man a sungmi biatak hna kha an theihthiam taktak ko lai. Holh phun zakip in an leh ṭhan hmanhah cu biatak hna cu aa thleng kho lo. Cucaah hlanlio holh hna hngalhnak cu a caan caan ahcun san a tlai ngai ko nain, a biapi tukmi a si lo. Asinain, holh a phunphun thiam ruangah i uahnak nih a hmaanmi Khrihfa hna caah a biapi tukmi—cawnpiak khawhmi sinak kha a lohter khawh.—1 Timote 6:4.
19. Kan Khrihfa phungchim rianṭuannak cu zeibantuk indah rianṭuannak pakhat a si?
19 Kan Khrihfa phungchimnak rian cu toidawrnak lungput a herh ngaimi rian a si ti cu a fiang ko. Ralchanhnak, zeirel lonak, hremnak tiang khan kanmah le kanmah kan i tlunter. (Johan 15:20) Asinain, kan phungchim rianṭuannak ah zumh awk tlak tein kan ṭuannak thawngin, a biapimi rian kha kan ṭuan. Hi rian ah midang kha toidawr tein kan bawmh peng rih hna a si ahcun, Jesuh nih mi sinah a rak langhtermi dawtnak kha kan i zohchunhmi a si. Ruat hmanh: tuu bantuk thinlung ṭha a ngeimi pakhat kan hmuh khawh nakhnga zei ah a kan rel lomi asiloah a kan ralchanhmi minung thongkhat sinah kan va chimhmi hna cu aa tlak ngaimi zuamnak a si ko lo maw? A si tuk ko! Rianṭuannak ah teimak tein i zuamnak, zeitikhmanh ah ngol lonak thawngin, kan hmuh khawh rihmi tuu bantuk asimi pakhat kha hmuh awkah zumh awktlak tein kan ṭuan. Jehovah le Jesuh nih a donghnak a phak hlanah cu bantuk a man a sungmi tampi kha hmuhter in an kan bawmhter rih lai ti cu a fiang ko.—Haggai 2:7.
20. Zohchunh awk ṭha nunning kha hmangin kan cawnpiak khawhmi hna lam cheukhat cu zei hnadah an si?
20 Zohchun awk ṭha nunning in cawnpiak cu midang rian kan ṭuan duhnak langhternak a dang lam pakhat a si. Tahchunhnak ah, “thangṭhatnak in a khatmi Pathian,” Jehovah a rian ṭuan cu a ṭhabikmi a si, nunnak lam tampi ah a tlam a tlinter khotu bik a si ti kha cawnpiak kan duh hna. (1 Timote 1:11) Kan ziaza le kan innpa, kan rianṭuanṭi hawi hna he kan i pehtlaihnak kha an zoh tikah, aa nuammi le a lung a tlingmi in an kan hmu maw? Cu he aa lo in, Baibal a cawng liomi kha a king i ṭih a nungmi vawlei ah Khrihfa bu cu dawrnak pakhat a si ti kha kan cawnpiak hna. Kan cawnpiakmi nih khan khrihfabu chung i a ummi vialte kan i dawtnak le pakhat le pakhat karlak ah daihnak a um nakhnga kan i zuam ciomi kha fawi tein a hmu kho maw?—1 Piter 4:8.
21, 22. (a) Kan phungchim rianṭuannak he aa tlai in mah le mah fiangte in i hlathlainak nih zeibantuk caanṭha hna dah i lak awkah a kan hruai? (b) A hun zulmi Vennak Innsang chuahmi, capar hna ah zeidah kan i ruah hna lai?
21 A caan caan ah, kan rian kha lungtho tein ṭuan duhnak nih, kanmah le kanmah kha i hlathlai ṭhan awkah a kan forh. Dingte in cutin kan tuahnak nih, mi tampi kha caantling phungchimtu ṭuan dingin asiloah a herh deuhnak ah kal in rianṭuan duhnak ah anmah theng an i tel kho ve ti kha a hmuhter hna lai. Mi cheukhat cu anmah an ram chungte ahkhan a rak pemmi hna kha an bawmh khawh deuh hna nakhnga ramdangmi hna holh kha an cawng. Cubantuk caanṭha kha na hmuh khawh ve a si ahcun, biatak tein ruat law thlacam. Hi rian ṭuanak nih lunglawmhnak nganpi, lungtlinnak le, lungdaihnak hna kha a chuahter.—Phungchimtu 5:12.
22 Kan cawnpiakmi hna biatak kha le kan cawnpiakmi minung hna cungah lam a phunphun in, dawtnak kha kan fehternak thawngin Jesuh Khrih kha i zohchunh peng ko u sih. Hi a kong pahnih ah hin dawtnak ngeih in hun langhternak nih Khrih bantuk in cawnpiaktu si awkah a ṭhami hrampi chiah awkah a kan bawmh lai. Asinain, mah a hrampi cungah cun zeitindah kan sak khawh lai? Jesuh a rak hmanmi cawnpiakning lam cheukhat hna kha a hun zulmi Vennak Innsang chuahmi, capar hna nih a kan ruah te lai.
[A Tanglei Fianternak]
a Jehovah Hngaltu hna nih an chuahmi a si.
Zeitindah Na Leh Lai?
• Cawnpiaktu in Jesuh a nunning i zohchunh cu a sang tukmi a si lo ti kha zeibantuk hnangamnak hna dah kan ngeih?
• Baibal in kan rak cawnmi biatak kan duhnak hna kha zeitindah kan langhter lai?
• Hngalhnak ah kan ṭhan bu in toidawrnak zong kha ngeih peng awkah zeiruang ahdah biapi a si?
• Cawnpiak kan i zuammi hna sinah dawtnak kha zeibantuk lam hna indah kan langhter lai?
[Cahmai 24nak i Hmanthlak]