Dawtnak He Cawnpiaknak Ah Jesuh I Zohchunh
“Hi pa bantuk hin ahohmanh nih bia an chim bal lo.”—JOHAN 7:46.
1. Jesuh cawnpiak ning kha mi nih zeitindah an lehrulh?
JESUH cawnpiaknak theih cu zeitluk in dah a nuamh lai na mitthlam ah cuanter hmanh! Amah a tongmi cungah ṭhathnemnak a um kha Baibal nih a thluamthlam in a chim. Tahchunhnak ah, Thawngṭha Luka ṭialtu nih Jesuh a chuahkehnak khuami hna cu “bia dawhdawh a chimmi nih khan an khuaruah a harter dih hna” tiah a tial. Matthai nih Jesuh Tlang Cung Cawnpiaknak a ngaimi mibu cu “a cawnpiak hna ning ah khan an khuaruah a har ko” tiah a ti. Cun Johan nih Jesuh tlaih awkah an thlahmi hna cu an lawng in an rak kir i “hi pa bantuk hin ahohmanh nih bia an chim bal lo” tiah an ti kha a ṭial.—Luka 4:22; Matt. 7:28; Johan 7:46.
2. Jesuh nih zei cawnpiaknak lam dah a hman?
2 Mah palik pawl an chimmi cu a palh lo. Jesuh cu a nung balmi lakah a lianngan bikmi Saya a si cu zumh lo awk zeihmanh a um lo. A cawnpiaknak cu a fiang i hngalh a fawimi, al khawh lomi sul le lam zulhmi a ngei. Bianabia le biahalnak kha ṭha tein a hman. A bia a ngaimi hna an sining a san, a niam zoh in a cawnpiaknak kha aa tlak ning in a thlen. A thukmi Biatak kong a si hmanh ah fawi tein an hngalhthiam nakhnga in a cawnpiak hna. Asinain Jesuh cu mah ruang lawngah a liannganmi Cawnpiaktu a si lo.
A Biapi bik Sining—Dawtnak
3. Cawnpiaktu in Jesuh cu a chan i biaknak lamhruaitu hna he zeitindah aa dan?
3 Phungbia cawnpiaktu le Farasi mi lakah hngalhnak a ngei i mah kha mi cawnpiak a thiammi an um ko lai. Jesuh cawnpiaknak lam cu annih he zeitindah aa dan? Mah lio chan ah biaknak lamhruaitu pawl cu mi zaran cungah dawtnak an ngei lo. An nautat hna i ‘chiatserhmi minung’ in an hmuh hna. (Johan 7:49) Jesuh cu anmah bantuk a si lo, mi zapi kha a zaang an fak ngaingai i “khaltu a ngei lomi tuu bantuk in” a hmuh hna. (Matt. 9:36) Nun a nem i zawnruahnak le zaangfahnak a ngei. Biaknak hruaitu pawl cu Pathian a daw taktak lomi an si. (Johan 5:42) Asinain Jesuh cu a Pa kha a dawt i a duhnak tuah ah aa lawm. Biaknak hruaitu hna cu Pathian bia kha anmah duhnak in an merh nain Jesuh tu cu “Pathian bia kha” a duh i a cawnpiak hna, a fianter, a ṭanh i a nunnak ah a hman. (Luka 11:28) Khrih cu dawtnak in a khah kha a cawnpiaknak le mi he an i pehtlaih ning le a cawnpiak hna ning ah fiang tein kan hmuh.
4, 5. (a) Dawtnak he cawnpiak cu zeicah a biapit? (b) Cawnpiaknak ah hngalhnak le thiamnak zong zeicah a biapit?
4 Kannih tah zeitin? Khrih hnu zultu hna in phungchim rian le kan nunnak ah amah kha i zohchunh kan duh. (1 Pit. 2:21) Cucaah kan i tinhmi cu Baibal hngalhnak chimh lawng silo in Jehovah sining hna, a hlei in a dawtnak langhter kha a si. Hngalhnak tam kan ngeih ah siseh, tlawm kan ngei ah siseh cawnpiak thiamnak tampi kan ngeih ah siseh, tlawm kan ngeih siseh kan langhtermi dawtnak nih phung kan chimhmi hna an lung a suk khawh. Zultu siternak rian ah hmual a ngeih nakhnga dawtnak he cawnpiaknak in Jesuh kan i zohchunh lai.
5 Cawnpiaktu ṭha si awkah a konglam kan hngalh a herh i mah hngalhnak kha ṭha tein chimthiam a herh. Mah kha a zultu pawl nih an tuah thiam nakhnga Jesuh nih a bawmh hna, tuchan zongah Jehovah nih a bupi in a kan bawmh ve. (Isaiah 54:13; Luka 12:42 rel.) Asinain kanmah thluak leng in kan lungthin tak in cawnpiak awk a si. Hngalhnak, thiamnak le dawtnak in kan cawnpiak tik hna ah lungsinak tam deuh kan hmu kho. Cucaah cawnpiaknak ah dawtnak kha zeiti lam in dah kan langhter khawh? Jesuh le a zultu pawl nih zeitindah an langhter? Zoh u sih.
Jehovah Kan Dawt Lai
6. Kan dawtmi pakhatkhat kong kha zeitindah kan chim tawn.
6 Kan dawtmi kong kan chim tikah kan i nuam. Kan lung nih a duhmi pakhatkhat kong kan chim tikah kan tha a nuam i kan umtu dan ah kan lungthawhnak le kan duhnak a lang. Kan dawtmi pakhatkhat kong kan chim tikah a hlei in a hmaan. Amah kong kan hngalhmi kha midang chimh awkah a tam deuh cu kan tha a tho. Kan thangṭhat, kan upat i kan bia in kan bawmh. Cu ti kan tuah cu a sining kha kan duh bantuk in midang zong nih duh ve hna seh ti kan duh caah a si.
7. Jesuh cu Pathian a dawtnak nih zeidah tuah ding in a forh?
7 Midang nih Jehovah kha an dawt nakhnga kan tuah hlan ah kanmah theng nih ṭha tein kan hngalh lai i kan dawt lai. A taktak ti ahcun a hmaanmi biaknak cu Pathian dawtnak cungah hram aa bunh. (Matt. 22:36-38) Jesuh nih a ṭha bik zohchunhawk a chiahtak. Jehovah kha a lungthin, a ruahnak, a nunnak le a thazang dihlak in a dawt. A si khomi cu vancung a Pa he van ah kum billion in an um ṭi i Jesuh nih ṭha tein a hngalh. Aphichuak zeidah a si? Jesuh nih “ka Pa ka dawt” tiah a chim. (Johan 14:31) Jesuh nih a chimmi le a tuahmi zeizong kip ah a dawt kha a langhter. Mah nih Pathian duhnak kha tuah zungzal awkah a forh. (Johan 8:29) Pathian aiawhtu tiah aa timi chungthu lengnal Biaknak lamhruaitu pawl kha mawhchiat awkah mah dawtnak nih khan a forh. Cun Jehovah kong chim le midang nih Pathian kong hngal in an dawt nakhnga bawmh awkah a forh.
8. Pathian an dawtnak nih Jesuh zultu pawl cu zeidah tuah awk a forh hna?
8 Jesuh bantuk in kum zabu pakhatnak zultu pawl nih Jehovah kha an dawt i mah dawtnak nih thawngṭha bia kha ralṭha te le teima tein chim awkah a forh hna. Biaknak lamhruaitu nih an ralchanh hna nain Jerusalem cu an cawnpiaknak in a khat. Zultu pawl cu an hmuhmi le an theihmi kha chim lo in an um kho lo. (Lam. 4:20; 5:28) Jehovah kan sinah a um i thluachuah a kan pek lai ti kha an hngalh, thluachuah a pek taktak hna. A si, Jesuh a thih hnu kum 30 a tlin hlan ah lamkaltu Paul nih thawngṭha cu “vanrang tang khuazakip ah sermi thil vialte sinah chim” a si cang tiah a ṭial khawh.—Kol. 1:23.
9. Pathian kan dawtnak zeitindah kan fehter khawh?
9 Hmualngeimi cawnpiaktu si kan duh ahcun Pathian kan dawtnak a feh peng a herh. Zeitindah kan tuah khawh? Thlacam in atu le atu pehtlaihnak bia chimnak thawng in a si. Pathian Bia hlathlainak, Baibal hrambunhmi cauk relnak le Khrihfabu ah i pumhnak in Pathian kan dawtnak zong kan fehter. Pathian kong kan hngalh deuh tluk in kan lungthin cu kan dawtnak in a khat lai. Khitik ah Pathian kan dawt kha kan bia chim le tuahsernak in kan langhter tikah midang nih mah kha an hmuh lai i Jehovah naih awkah a si kho.—Salm 104:33, 34 rel.
Kan Cawnpiakmi Kong Kan Duh Lai
10. Cawnpiaktu ṭha pakhat hmelchunh cu zeidah a si?
10 Cawnpiaktu ṭha hmelchunh pakhat cu a cawnpiakmi kong duh kha a si. Mah kha a hmaan, a biapi, mansung a si a zumh lai. Cawnpiaktu pakhat cu a cawnpiakmi kong a duh ahcun a thanuamnak a lang lai i a cawnpiakmi hna minung cungah huham a ngei lai. Phun dang in, cawnpiaktu pakhat cu a cawnpiakmi kong a duh theng lo ahcun a siangngakchia pawl nih an theihmi kha mansung ah an chiah lai tiah zeitindah aa ruahchan ngam lai? Pathian Bia cawnpiaktu pakhat in nangmah zohchunhawk ṭha kha a biapi tuk. Jesuh nih hitin a chim: “Ṭha tein cawnpiakmi siangngakchia cu a saya bantuk a si lai.”—Luka 6:40, The New Berkeley Version in Modern English.
11. Jesuh nih a cawnpiakmi hna kong kha zeicah a duh?
11 Jesuh nih a cawnpiakmi hna kong kha a duh. Vancung a Pa kong biatak, “Pathian bia” le “zungzal nunnak bia” mansungmi hrawm awk a ngeih kha a hngalh. (Johan 3:34; 6:68) A ceu tukmi ceunak bantuk in Jesuh cawnpiakmi biatak nih ṭhatlonak kha a phuan i ṭhatnak kha a langhter. A hmaan lomi biaknak hruaitu pawl hlenmi le Satan hremnak a ingmi, toidormi hna kha Biatak nih ruahchannak le hnemhnak a pek hna. (Lam. 10:38) Jesuh nih biatak a duh kha a cawnpiaknak lengah a tuahsernak dihlak ah kan hmuh.
12. Thawng ṭha kongah Paul nih zeitindah a ruah?
12 Jesuh bantuk in a zultu pawl nih Jehovah le Khrih kong an duh i mansung ah an chiah caah midang chimh lo awkah ralchanhtu hna nih an thloh kho hna lo. Paul nih Rom Khrihfabu sinah hitin a ṭial: “Thawng ṭha chim ka duhnak cu . . . thawng ṭha hi ka zumh hrimhrim ko, zeicahtiah a zummi vialte hna caah Pathian khamhnak hmual a si.” (Rom 1:15, 16) Biatak thanhnak hi uanthlarpi awk a si tiah Paul nih a ruah. Hitin a ṭial: “Pathian nih a ṭhawnnak rian a ṭuannak ah hin hmuh awk aa tlakmi ka si lo nain a ka pek . . . Khrih a rumnak a dong kho lomi thawng ṭha cu Jentail mi hna sinah chim awk” a si. (Efe. 3:7, 8) Jehovah le aa tinhmi kong midang cawnpiak tikah Paul a thanuamnak mitthlam ah cuanter cu a har lo.
13. Thawngṭha bia duh awkah zei a ruang dah a um?
13 Pathian Bia ah kan hmuhmi thawng ṭha bia nih Sertu kha ṭha tein a kan hngalhter i dawtnak in pehtlaihnak a kan ngeihter. Mah thawngṭha nih kan nunnak ah a biapimi biahalnak hna a phi kha lungsi lak in a kan pek i kan nunning thlenter khawhnak, ruahchannak ngeih khawhnak le harnak ton caan ah fek tein inkhawhnak a kan pek. Cun zeitikhmanh ah a dong lai lomi sullam ngeimi nunnak lam ah a kan hruai. Hi thawngṭha nakin a sung deuhmi asiloah a biapi deuhmi hngalhnak a um ti lo. Cucu a kan pekmi a man khiah khawh lomi laksawng pakhat a si i lunglawmhnak nganpi a hmuhter. Mah laksawng kha midang kan hrawm tik hna ah lunglawmhnak kan hmu chap.—Lam. 20:35.
14. Kan cawnpiakmi hna kong kan duh zeitindah kan fehter khawh?
14 Thawngṭha na duhnak a fehchin nakhnga zeidah na tuah khawh? Pathian Bia na rel tikah na relmi ruahṭhan awkah a caancaan ah dir ta. Tahchunhnak ah, Jesuh vawleicung a phungchim khualtlawnnak ah ka kal ve asiloah lamkaltu Paul a khualtlawnnak ah kaa tel ve tiah na mitthlam ah cuanter. Vawlei thar ah ka phan cang i aa dang tukmi nunnak a si lai kha cuanter. Thawngṭha bia na ngaih caah na hmuhmi thluachuah kha ruat ṭhan hmanh. Thawngṭha bia na duhnak a feh peng ahcun na cawnpiakmi hna nih mah kha an hmuh lai. Cucaah kan cawnmi kha ṭha tein ruat in kan cawnpiakmi kongah lungthin pek a herh cu a ruang ṭha a um.—1 Timote 4:15, 16 rel.
Mi Kan Dawt hna Lai
15. Saya nih zeicah a siangngakchia a dawt hna awk a si?
15 Cawnpiaktu saya ṭha cu a siangngakchia pawl kha nuam tein a umter hna, cu lawng ah an cawnmi ah an lungthin a um lai i an lung aa lawm lai. Dawtnak a ngeimi saya cu a siangngakchia cungah zawnruahnak a ngeih caah hngalhnak a pek hna. A siangngakchia herhmi le hngalhthiamnak an ngeihtluk in a cawnpiaknak kha a thlen. An thilti khawhnak le an sining kha a hngalh khawh colh. Saya nih cu bantuk dawtnak a ngeih tikah siangngakchia nih mah kha an hmuh i cawnnak ah an i nuam.
16. Jesuh nih mi a dawt hna kha zeiti lam in dah a langhter?
16 Jesuh nih zaangfahnak le dawtnak a langhter. A dawtnak ngan bik cu midang khamhnak hmuh awkah a tlingmi minung a nunnak a pekmi hi a si. (Johan 15:13) Jesuh cu mi bawmh awkah le a Pa kong cawnpiak awkah a zungzal timhcia in a um. Mi kha a sin rat ding aa ruahchan lo, amah tu meng za leng a ke in khual a tlawng i thawngṭha bia a chimh hna. (Matt. 4:23-25; Luka 8:1) A lung a sau i a theihthiam hna. A zultu pawl remh an herh tikah dawtnak in a remh hna. (Mar. 9:33-37) A zultu pawl kha thawngṭha bia hmualngei in a chimtu an si lai a zumh a langhtermi in thazang a pek hna. Minung ah Jesuh nakin dawtnak in a khat deuhmi saya ahohmanh an um lo. A zultu pawl cungah dawtnak a langhtermi nih annih zong amah kha dawt in a nawlbia zulh peng awk a forh hna.—Johan 14:15 rel.
17. Jesuh zultu pawl nih midang an dawt hna kha zeitindah an langhter?
17 Jesuh bantuk in a zultu pawl nih phung an chimhmi hna kha thukpi in an dawt hna an langhter. Hremnak le thihnak tiang ing in midang kha an rian an ṭuanpiak hna i thawngṭha bia chimnak ah an hlawh a tling. Thawngṭha bia a cohlangmi an dawt hnanak a si! Lamkaltu Paul ṭialmi hi bia cu hmual a ngei: “Nu nih a fale a zohkhenh hna bantuk tu in nan sinah khan nem tein kan um. Kannih nih kan in dawt hna caah Pathian sinin a rami thawng ṭha lawng hmanh kha si lo in kan nunnak tiang hmanh kha hrawm kan in duh hna. Kan dawt ngaingaimi nan si cang.”—1 Thes. 2:7, 8.
18, 19. (a) Phungchimnak rian ṭuannak ah zeicah lungtho in mah zawnruahnak kan hlawt? (b) Kan langhtermi dawtnak midang nih an hmuh a langmi tahchunhnak chim.
18 Cu bantuk in, tuchan Jehovah Hngaltu hna nih Pathian hngalh le biak a duhmi hna kawlnak ah vawleicung pumpi ah phung an chim. A si, a luancia kum 17 lio ah kum fate phungchimnak le zultu siternak rian caah suimilam nuai thong in an hman i mah rian cu ṭuan peng a si. Phungchimnak rian caah a caan, thazang le thilri hlawt a herh ko nain lungtho in kan ṭuan. Dawtnak vancung kan Pa nih mi vialte zungzal nunnak a hmuhtermi hngalhnak ngei hna seh ti a duh kha Jesuh bantuk in kan hngalhthiam. (Johan 17:3; 1 Tim. 2:3, 4) Lungthin ṭha a ngeimi hna kha kanmah bantuk in Jehovah an hngalh i an dawt nakhnga bawmh awkah dawtnak nih a kan forh.
19 Kan langhtermi dawtnak kha mi nih an hmuh. Tahchunhnak ah, United States ah a ummi hmaikal unau nu cu an dawtmi nih a thihtakmi hna sinah hnemhnak ca a ṭial. Pa pakhat nih hitin ca a leh: “Mi pakhat hngalh bal lomi harnak a ton caan ah inkhawh awk bawmh duh ah hi bantuk caṭial naa zuam caah a hmasa ah cun ka khuaruah a har. Minung nunnak lam a hmuhsaktu Pathian le mi a dawmi na si lai tiah ka ruah khawh.”
20. Dawtnak in cawnpiak cu zeitluk in dah a biapit?
20 Rian pakhat dawtnak, thiamnak he tuah tikah a ṭha bikmi thil a chuak lai tiah chim tawnmi a um. Kan cawnpiak tikah a cawngmi nih Jehovah kha a hngalh i dawtnak lungthin a ngeih nakhnga kan bawmh. A si, hmualngeimi cawnpiaktu si awkah Pathian dawt le biatak dawt le minung dawt timi dawtnak pathum a herh. Mah dawtnak phun kan ṭhanchoter i phungchimnak rian ah kan langhter tikah peknak in lunglawmhnak kan hmuh leng ah Jesuh aa zohchunhmi kan si le Jehovah lung kan ton kan hngalh caah lungsinak zong kan hmu.
Zeitindah Na Leh Lai?
• Thawngṭha bia midang kan cawnpiak tik hna ah . . .
Pathian dawt awk
kan cawnpiakmi kong duh awk
kan cawnpiakmi hna dawt awk zeicah a biapit?
[Cahmai 15nak i hmanthlak]
Phungbia cawnpiaktu, Farasi pawl le Jesuh cawnpiaknak zeitindah aa dan?
[Cahmai 18nak i hmanthlak]
Ṭha tein cawnpiak awkah hngalhnak, thiamnak le a hlei in dawtnak a herh