Messiah! Pathian Khamhnak Lam
“Adam he an i pehtlaihnak thawng in mi vialte cu an thih bantukin, Khrih he an i pehtlaihnak thawngin mi vialte cu nunnak ah thawhter an si lai.”—1 KOR. 15:22.
1, 2. (a) Andru le Filip cu Jesuh an hmuh tikah zeitindah an um? (b) Jesuh Messiah a si langhter tu thil cu kum zabu pakhatnak in tuchan ah a tam deuh tiah zeicah kan chim khawh?
ANDRU nih Nazareth khuami Jesuh kha Pathian Chiti thuhmi in a zumh i “Messiah cu kan hmuh cang” tiah a u Piter kha a chimh. Filip zong nih a zumh i a hawi Nathanael kha “Phungbia cauk chungah a kong Moses nih a ṭialmi pa, profet hna zong nih a kong an ṭialmi pa kha kan hmuh cang. Amah cu Josef fapa Jesuh, Nazareth khuami kha a si” tiah a chimh.—Johan 1:40, 41, 45.
2 Jesuh cu biakammi Messiah, Jehovah “khamhnak ah a phakpitu” a si lungtak in na zum maw? (Heb. 2:10) Messiah a si langhter tu thil cu kum zabu pakhatnak in tuchan ah a tam deuh. Jesuh cu Messiah a si kha a chuah in a thawhṭhan tiang al khawh lomi langhter tu thil tampi Baibal ah a um. (Johan 20:30, 31 rel.) Jesuh nih vancung in Messiah rian kha tling tein a ṭuan rih lai kha Baibal nih a chim. (1 Kor. 15:22; Johan 6:40) Tu-chan ah Baibal na cawnnak thawng in ‘Messiah cu ka hmuh cang’ tiah na ti khawh. Asinain kum zabu pakhatnak zultu pawl nih Jesuh Messiah a si an hngalh khawhnak kha zoh hmasa u sih.
Messiah Kong “Biathli” Aa Chang tein Phuannak
3, 4. (a) Kum zabu pakhatnak zultu pawl nih Messiah zeitindah an hmuh khawh? (b) Jesuh lawng nih Messiah kong chimchungbia a tlinter dih tiah zeicah na chim khawh?
3 Kum zabu pakhatnak zultu pawl nih Jesuh cu Messiah taktak a si zeitindah an chim khawh? Jehovah nih profet hna hmang in a ra laimi Messiah kong hngalh khawhnak kha aa chang tein a chim. Baibal lei mifim pakhat nih lungrang milem pakhat aa cheumi tete pehmi he a tahchunh. Aa hngal bal lomi minung tampi nih innkhaan pakhat ah lungrang aa cheumi tete pakhat cio an rak put tiah na mitthlam ah cuanter. Mah aa cheumi tete cu pakhat le pakhat ṭha tein aa peh kho i milem pakhat a chuah khawh ahcun mah cu aa tongsualmi si loin pakhatkhat nih ṭha tein a ah i mah a ahmi kha put awkah a fial hna tiah na ti ko lai. Milem a cheu tete bantukin Messiah kong chimchungbia pakhat cio cu Messiah he aa tlaimi a kong a biapimi a cheu tete an si.
4 Messiah kong chimchungbia dihlak cu mi pakhat cungah i tongsual in a tling kho hnga maw? Messiah kong chimchungbia dihlak Jesuh ah ruah loin a tling timi cu a si kho hrimhrim lo tiah Baibal lei mifim nih a ti. Cun “tuanbia dihlak ah Jesuh lawng nih mah cu a tlinter khawh” tiah a chim chap.
5, 6. (a) Jesuh nih zei “biathli” dah a tlinter hmasa? (b) Biakammi “tefa” kong kha zeitindah Pathian nih aa chang in a phuan?
5 Messiah kong chimchungbia hna cu “biathli” an si, mah biathli kha Jehovah nih Eden dum ah a chim, cu ah van le vawlei dihlak he aa tlaimi thil kong tampi aa tel. (Kol. 1:26, 27; Gen. 3:15) Mah biathli ah minung sualnak le thihnak a phaktertu “rulpi tar” Satan Khuachia biaceihnak aa tel. (Biat. 12:9) Zeitindah biaceih a si lai? Satan lu rial ding “tefa” cu “minu” chung in a chuak lai tiah Jehovah nih a chimchung. Chimchungmi “tefa” nih rul lu a rial lai i dohnak, zawtnak le thihnak a chuahtertu kha a hrawh lai. Asinain Pathian nih nawl a pek bantukin Satan nih langhternak in minu “tefa” kedil kha a cuk hmasa lai.
6 Biakammi “tefa” aho a si lai kha Jehovah nih aa chang in a phuan. Pathian nih Abraham sinah hitin chiat a ser: “Vawlei cung miphun vialte nih, na tefa thluachuah ka pek hna bantuk hin thluachuah kan pe ve, tiah an ka nawl lai.” (Gen. 22:18) Mah tefa cu Moses nih keimah nakin a ngan deuhmi “profet” a si tiah a chimchung. (Deut. 18:18, 19) David cu na chung in Messiah a chuak lai i na pennak ro a co lai tiah bia-kamh a si, a hnuah profet pawl nih an fehter.—2 Sam. 7:12, 16; Jer. 23:5, 6.
Jesuh Messiah A Si Langhter tu Thil
7. Jesuh cu Pathian ‘nupi’ chung in zeitindah a chuah?
7 Pathian cu vancung ah a nupi bantuk a simi thlarau fale in dirhmi bu a ngei, mah a fale lakah hmasa bik a sermi a Fapa kha biakammi “tefa” in a thlah. A Fapa ngeihchunte nih van a nunnak kha “a hlawt dih” lai i a tlingmi minung in a chuak lai. (Fil. 2:5-7; Johan 1:14) Mari cungah Pathian “ṭhawnnak” aa fut caah a hrinmi fa cu “Pathian Fapa tiah” auh a si lai cu a fiang.—Luka 1:35.
8. Jesuh nih tipil a in lioah Messiah chimchungbia zeitindah a tlinter?
8 Messiah kong chimchungbia tampi nih Jesuh khuazei ah le zeitik ah dah a chuah lai kha an chim. Jesuh cu chimchungbia bang in Bethlehem ah a chuak. (Mik. 5:2) Kum zabu pakhatnak Judah mi nih Messiah cu an i ruahchan tuk. Messiah rat lai an i ruahchan caah Tipilpetu Johan kha “Messiah cu a si sual hnga maw” tiah an ti. Asinain Johan nih “keimah nakin a ngan deuh ngaingaimi a ra lio” tiah a ti hna. (Luka 3:15, 16) Jesuh cu kum 30 a si C.E. 29, sikpar caan ah Johan sinah tipil a ing. Cuticun chimchungbia bangin a caan bak ah Messiah a hung si. (Dan. 9:25) Cu hnu ah, phungchim rian a thawk tikah “a caan kha a phan cang. Pathian Pennak cu a phan dengmang cang” tiah a chim.—Mar. 1:14, 15
9. Jesuh kong a dihlak in a tling rih lo nain a zultu nih zei a fekmi zumhnak dah an ngeih?
9 Asinain mi cu an i ruahchanmi kha an thlen a hau. Mi nih Jesuh cu Siangpahrang a si tiah an au nain hmailei ah van in a uk lai kha tling tein an hngal lo. (Johan 12:12-16; 16:12, 13; Lam. 2:32-36) Jesuh nih “aho a si nan ka ti dah?” tiah a hal hna tikah Piter nih “a nungmi Pathian Fapa, Messiah kha na si” tiah a leh colh. (Matt. 16:13-16) Jesuh cu a cawnpiaknak ruangah mi nih an kaltak, cu lio zong ah Piter nih hmasa bantuk in a leh colh.—Johan 6:68, 69 rel.
Messiah Bia Ngai
10. Jehovah nih a Fapa bia ngaih a herh kha zeicah a langhter?
10 Pathian Fapa ngeihchunte cu vancung ah a ṭhawngmi thlarau a si. Vawlei ah Jesuh cu ‘a Pa aiawhtu a si.’ (Johan 16:27, 28, NW) Jesuh nih “kan cawnpiakmi hna hi keimah cawnpiakmi a si lo, a ka thlahtu ka Pa sinin a rami cawnpiaknak a si” tiah a ti. (Johan 7:16) Muihmai thlennak ah Jesuh Messiah a si fehter hnuah Jehovah nih “a bia kha ngai u” tiah a ti. (Luka 9:35) Hi Thimmipa bia kha ngaih awk a si. Cu ah Pathian mithmai ṭha le zungzal nunnak a hmuhtermi zumhnak le thil ṭha tuah aa tel.—Johan 3:16, 35, 36.
11, 12. (a) Kum zabu pakhatnak Judah mi nih zei ruangah Jesuh cu Messiah in an cohlan lo? (b) Jesuh cu ahote nih dah an zumh?
11 Jesuh Messiah a si langhter tu thil tampi a um nain kum zabu pakhatnak Judah mi nih an cohlang lo. Zeiruang ah? Messiah cu Rom hremnak tang in a kan luattertu uktu bawi a si lai ti an ruah lengah Messiah kong-ah an rak i ruahchan cangmi a um caah a si. (Johan 12:34 rel.) Cucaah zeirellomi, hlawtmi, tukmi le a donghnak ah thah a si lai timi chimchung bia a tlintertu kha an cohlang duh lo. (Isa. 53:3, 5) Rom hremnak tang in a luatter hna lo caah Jesuh zultu zumhawktlak hna hmanh an lung a rawk. Asinain zumhawktlak in an um caah a caan a phanh tikah fiang tein an hngalhthiam.—Luka 24:21.
12 Jesuh Messiah in an cohlanlonak a dang pakhat cu pom awk a har tiah mi tam nih an ruahmi a cawnpiaknak ruangah a si. Pathian Pennak luh a duhmi cu “mah zawn aa ruatlomi” Jesuh sa a “ei” i a thi a dingmi, “hrin ṭhan” a simi le ‘vawlei ta a si lomi’ an si lai. (Mar. 8:34; Johan 3:3; 6:53; 17:14, 16) Mi porhlaw, mirum le chungthu lengnal nih mah kha zulh a har tiah an hmuh. Asinain “amah cu vawlei Khamhtu a si hrimhrim ti kha kan hngalh” tiah a timi Samari mi cheukhat bantukin toidormi Judah mi nih Jesuh cu Messiah in an cohlan.—Johan 4:25, 26, 41, 42; 7:31.
13. Jesuh cu langhternak in zeitindah a kedil cuk a si?
13 Jesuh nih tlangbawi upa pawl nih sual an ka phawt lai, Jentail mi nih thing cungah an ka khenh lai, asinain ni thumnak ni ah nunter ka si ṭhan lai tiah a chimchung. (Matt. 20:17-19) Sanhedrin hmai ah “Pa-thian fapa Messiah” a si fiang tein a chim caah Pathian a thangchiat tiah an ti. (Matt. 26:63-66) Judah mi nih cozah dotu in sual an phawt nain Pilet nih “thah awk tlak thil a tuahmi” pakhat hmanh a hmu lo. Asinain Pilet nih “Jesuh cu anmah duh paoh in tuah awkah” a pek hna. (Luka 23:13-15, 25) Pa-thian nih a thlahmi a si langhter tu thil tampi a um nain “nunnak lam ah mi a hruaitu” cu an “duh lo” i thah an timh. (Lam. 3:13-15) Chimchungbia bang in Messiah cu C.E. 33 Lanhtak puai ah thing cungah an “thah.” (Dan. 9:26, 27; Lam. 2:22, 23) Cuti thih fak in a thih cu Genesis 3:15 chimchungbia bang in a “kedil” cuk a si.
Messiah Zeiruang ah A Thih
14, 15. (a) Jehovah nih Jesuh thihnak nawl a peknak a ruang pahnih cu zeidah a si? (b) Jesuh a thawhṭhan hnuah zeidah a tuah?
14 Jehovah nih Jesuh thihnak nawl a peknak a biapimi a ruang pahnih a um. Pakhat cu Jesuh zumhfek in a thihnak nih “biathli” a biapimi pakhat a phi a pek khawh. Mitling pakhat nih Satan chuahtermi a fak bik hneksaknak lakah ‘Pathian cungah a fekmi dawtnak ngeih’ khawh a si le Pathian nawlngeihnak ṭanh khawh a si a langhter. (1 Tim. 3:16, NW) Pahnihnak cu Jesuh nih “Mi Fapa hi . . . mi tampi . . . tlanhnak ca i ka nunnak pek awkah pei ka rat cu” tiah a chimmi hi a si. (Matt. 20:28) “Mi vialte tlanhnak” nih Adam tefa vialte comi sualnak le thihnak a hrawh lengah Jesuh kha Pathian khamhnak lam in a cohlangmi vialte cu zungzal nunnak an hmu lai.—1 Tim. 2:5, 6.
15 Thlan ah nithum a um hnuah Khrih cu a thoṭhan i a zultu pawl sinah ni 40 chung a lang i a nun ṭhan kha a langhter. Lamhruainak zong a pek chap hna. (Lam. 1:3-5) Cun van ah a kai i Jehovah kha a sungmi tlanh-nak man a pek i Messiah Siangpahrang a si lai kha a hngak. A hngah lioah ṭuan awk rian tampi a ngei.
Messiah A Rian Tling tein Ṭuannak
16, 17. Jesuh van a kai hnu ah Messiah in a ṭuanmi a rian kha chim.
16 Jesuh nih a thawhṭhan hnuah Khrihfabu kha Siangpahrang in kum zabu tampi chung a uk i Khrihfabu rianṭuannak kha zumhawktlak in a zohkhenh. (Kol. 1:13) Rikhiahmi caan a phanh tikah Siangpahrang ṭhawnnak kha a hman lai. Baibal chimchungbia le vawlei thil sining nih 1914 ah Siangpahrang a si le “atu chan donghnak” aa thawk kha a fehter. (Matt. 24:3; Biat. 11:15) Mah hnu khan Satan le a khuachia pawl van in thlak awkah a thiangmi vancungmi kha a hruai hna.—Biat. 12:7-10.
17 Jesuh nih C.E. 29 ah a thawkmi phungchimnak le cawnpiaknak rian a dongh lai caan a nai cang. A rauhhlan ah thilnung vialte bia a ceih cang lai. Cun amah kha Jehovah khamhnak lam in a co-hlangmi tuu bantuk mi hna kha “vawlei ser ri in nan caah timh a simi pennak cu ra co tuah u” tiah a ti hna lai. (Matt. 25:31-34, 41) Jesuh nih miṭhalo vialte doh awkah vancung ralkap bu a hruai hna tikah Siangpahrang a si a cohlang lomi kha a hrawh hna lai. Cun Satan le a khuachia pawl kha a tlaih hna lai i “dongh hngal lo khor” chungah a thlak hna lai.—Biat. 19:11-14; 20:1-3.
18, 19. Jesuh nih Messiah a rian tling tein a ṭuan tikah nawlngaimi hna caah zeidah a tuah lai?
18 Kum Thongkhat Uknak ah Jesuh nih “Fim Chimtu, A Ṭhawngmi Pathian, Zungzal Hmunmi Pa, Daihnak Bawi” timi upatnak min he aa tlak in tling tein rian a ṭuan lai. (Isa. 9:6, 7) A thoṭhanmi hna tel in mi vialte cu a Pennak thawngin mitling an si cang lai. (Johan 5:26-29) Messiah nih lungthin ṭha a ngeimi hna kha “nunnak tiput cerh kam ah” a hruai hna lai i nawlngaimi minung cu Jehovah he an i pehtlaihnak ah an i nuam lai. (Biathlam 7:16, 17 rel.) Hma-nung bik hneksaknak a dih hnuah Satan le a khuachia pawl tel in dotu vialte cu ‘mei le kat tili chungah paih’ an si lai i “rul” lu kha a rial cikcek lai.—Biat. 20:10.
19 Jesuh nih Messiah a rian kha chambaunak um lo le duhnung in a tlinter lai. Vawlei paradis cu a tlingmi damnak le lunglawmh-nak he zungzal a nung hngami tlanhmi minung in an khat lai. Jehovah min thangchiatnak vialte le van le vawlei dihlak ah a dingmi a nawlngeihnak cu a thiang cang lai. Pathian Chiti Thuhmi nawl a ngaimi dihlak hmai te ah a ummi ro sung a va si dah!
Messiah Na Hmu Cang Maw?
20, 21. Messiah kong midang chimh ding zei a ruang ṭha dah na ngeih?
20 1914 thawk in Khrih pa·rou·siʹa, asiloah phannak caan ah kan nung. Pathian Pennak Siangpahrang in a phanh cu mit in hmuh khawh a si lo nain chimchungbia tlinnak in a lang. (Biat. 6:2-8) Asinain kum zabu pakhatnak Judah mi hna bantukin tuchan mi tam deuh nih Messiah a phanh a langhter tu thil kha zei ah an rel lo. Ram uktu bawi pakhat asiloah a tlawm bik in minung uktu pawl he rian a ṭuan ṭimi hruaitu pakhat an duh. Asinain Jesuh nih Pathian Pennak ah Siangpahrang in atu a uk cang kha na hngalh. Mah na hngalh caah naa lawm ko lo maw? Kum zabu pakhatnak zultu hna bantukin “Messiah cu kan hmuh cang” ti chim awkah an forh ko lai.
21 Tuchan ah biatak kong na chim tikah Jesuh Messiah a rian kong kha biapi in na chim maw? Na chim a si ahcun na caah a rak tuahmi thil le a tuah liomi thil le an tuahpiak laimi thil hna kha na upat deuh lai. Andru le Filip bantukin na chungkhat le na hawile kha Messiah kong na chimh hna lai cu a fiang. Annih kha Jesuh Khrih cu Pathian khamhnak lam ah biakammi Messiah a si lung tho tein chim ṭhan hna.
Na Fianter Kho Maw?
• Kum zabu pakhatnak zultu pawl nih Messiah kha zeitindah an hmuh?
• Jesuh a thihnak a biapimi a ruang pahnih cu zeidah an si?
• Jesuh nih Messiah a rian tlinter awkah zeidah a tuah lai?
[Cahmai 21 hmanthlak]
Kum zabu pakhatnak a nungmi hna nih Jesuh cu biakammi Messiah a si kha zeitindah an hngalh?
[Cahmai 23 hmanthlak]
Mi he bia nan i ruah tikah Jesuh Messiah a rian kha biapi in na chim maw?